Saturday, October 27, 2012

موسيقى جنائزية

عايز أحط رسالة
مكتوبة بخط ايدي
في إزازة خمرة قديمة

مقفولة كويس
وأفضل طول عمري
مستني حد يلاقيها ويدوّر عليّا
بس خايف

 .. الوقت يفوت قبل ما يلاقيني
ساعتها ..
هايحس بنفس إحساسي دلوقت
وأنا خايف أحط رسالة
مكتوبة بخط إيدي
في إزازة خمرة قديمة

مقفولة كويس
وأفضل طول عمري
مستني حد يلاقيها
ويدوّر عليّا

بس خايف

Wednesday, October 10, 2012

هدى مش هاتقرا القصيدة دي .

لحد فترة قريبة جدا
كنت باحلم أكون ربنا
مش عشان أقدر أعمل أي حاجة
بس عشان أبعد عن الزحمة

ربنا ساكن بعيد
لأنه مابيحبش دوشة الميكروباصات
وزعل البنات الصغيرين
وخلصان السجاير في قعدة صحاب

ربنا
مش مضطر يقوم في نص الليل
ويطبطب على حد

الأكيد
ان ربنا عنده وقت يعمل كل ده
مثلا
عنده وقت يفتح السما
ويدلق شوية خير في حبة مطر تايهين
على أسفلت القاهرة السخن
ويلم بواقي الدخان
ويديهم لون أزرق
يقدر يتنططوا بيه ع الحزن
اللي في عيون الناس
يمكن ساعتها
يرفعوا راسهم مرة للسما
ويبتسموا
ويقولوا .. شكرا

في الغالب
الصيادين بيحبوا ربنا أكتر
لأنه اداهم المية والسمك
رغم انه حرمهم من الصدف السعيدة
وعواميد النور الباهته
لكن مفيش شك
ان ممثلين السيما
يعرفوا ربنا أكتر من الصيادين
لأنهم شافوه بعيون كتير

العاهرات والفقرا والمحرومين
مش مهتمين أوي بمعرفة ربنا
وربنا مش مهتم أوي بمعرفتهم
وبالتالي
العلاقة بينهم متأجلة ..
 لحد قبل معاد الحرق بشوية

لكن زي ما قالت ميس مها
" ربنا طيب "

ربنا بيحب البيانو
وبيحب الطواقي الحمرا
بالتالي
ربنا بيحب صوابع هدى الناعمة
وبيكره الخاتم الفالصو اللي في ايديها الشمال

هدى
أحسن واحده تحكيلك على حاجات
ماحصلتش
وتلهيك بابتسامتها المصطنعة
اللي وراها مظاهرة حزن كبيرة
وصف دموع متأهبين في أي لحظة
لاحتلال الشوارع الجانبية
ورفض أي فرصة للأرصفة عشان تحوش

ربنا
بيحب هدى
لدرجة انه خلاها في وسط الزحمة كتير
أكتر من قدرتها ع المشي
خصوصا
انها مش بتعرف ترقص  فالس

هدى بتحب ربنا
فقررت
ماتقراش شِعر لحد
زعلان من ربنا
هدى
مش هاتقرا القصيدة دي .

Tuesday, October 9, 2012

مجاز

كلها كام كاس ونتطوّح
بعدها كام حزن ونروّح
ايه هايتبقالنا غير نفسنا
مش هايفضل فينا غير نصنا
نص مسخ ونص مسحور
كت سنين مش باينه في البنّور
لم تعدّي علينا أسبابنا
لما نخسر فينا أصحابنا
كنت جاي أقول وحاسبتني
كنت جاي ألمسك وحسستني
إني هافضل دم مش بارد
إن أنا الفوانيس لميت مارد
بس ضلّوا طريقهم الفضة
لما أموت هاعرف لكن هارضى
كان ماصبرنيش غير الغضب
كنت حافظ ييجي مليون سبب
بس مادخلنيش ولا عفريت
جوه قلبي شموع ولا كبريت
ماتسطلتش غير ما فوّقتني
لما جيت أحضنك فكسفتني
كنت خايف روحي مش بارده
لما قلبي يموت من الخضة
كنت راح تشرب ولا تتسطل
لما تقتلني أنا هاتقتل
تمثلية قديمة مثّلتها
لعبة حبيتها وكسّرتها
اشرب اشرب وانسى كونك فظ
مش بأمر الغيب بأمر الحظ
كلها كام كاس ونتطوّح
بعدها كام حزن ونروّح

Friday, October 5, 2012

مصحّة

أتصفح كتاباتي القديمة كمريض نفسي
ينفث دخان سيجارته وهو ملقى على الأرض وظهره للجدران المشققة
لا لشيء سوى أنه يراجع وصفات الأدوية
كطبّاخ جائع .. حائر
يبحث في مطبخه عن شيء يكفي اتساع حدقة بطنه

أرى الأشياء مظلمة
بينما تسخر مؤخرتي من عين لا تساورها الشكوك

Sunday, September 2, 2012

دون جدوى

اليوم تسحق الشمس الرؤوس وتحني جبهات الرجال
شمس قاسية كأب جاهل
أو كقرعة ظالمة
 أو قل .. هي شمس قاسية كشمس

أعرف الآن معنى الرجوع بخُفَي حُنَين .. يتدلى الفأس من يدي كسيف محارب مهزوم
نظرت إلى السماء .. لم أرَ سوى سحبا تخشى اقتراب الشمس إلا قليلا منها 

يبقى سبتمبر كدليل على معصية الشمس لأمر الرحمة

كل ما أردت في نظرتي أن أرى وجه الله
كيف هو الآن 
يبتسم - يضحك - يرضى - يفكر - يتمتم - يتمم - يسخر - يبكي - يحزن - يغضب
 
أن أعود إلى المنزل بلا شيء
لا أحد يحفر دون جدوى .. أنا أحفر دون جدوى
دون أن أدرك كيف للماء أن ينبت من اللاشيء
دون أن أدرك أن الماء لا ينبت
ولا يهبه أحدا
هو الماء .. حظك المقتول

أنظر إلى السماء في محاولة أخيرة للاقتراب
يا الله .. لا سبيل إلى حتى في معصية
فلا أنا آثم ولا أنا عابد 

Sunday, August 26, 2012

فناء

Thursday, August 16, 2012

دعاء ليلة قدر

اللهم إني أسألك
ماتسألنيش عن حاجات مش بتاعتي
وماتلومنيش على كل تصرفاتي
باستغفرك
لكن ماقدرش أوعدك بالتوبة
لسه فيه في قلبي حبة معاصي
طول مانت باعد ما بيني وبين الصبر

اللهم عليك بالصاحب الفظ
وسوء الحظ
والتلاكيك
والذي منه

اللهم عليك بمن خدعني
والصاحب اللي باعني
وكل بنت شافتني استغربتني

اللهم عليك
بكلاب الداخلية
والحاجات اللي فيا
والحاجات اللي مش فيا
والظروف
والذكريات السيئة
والرسايل المزمنة

اللهم عليك .. بالماضي الأليم
والمسافات البعيدة
والبحر الأبيض المتوسط


اللهم اني أعوذ بك
من حب الكاس
ومن سيرتي على لسان الناس
ومن كتر الاحساس
بالاخرين

Thursday, August 2, 2012

اشكر اللحظة الأخيرة

  ال"شكرا" الوحيدة اللي بجد لسواق التاكسي المسيحي ..  الوحيد اللي عنده استعداد يروح من أي حته لحد وسط البلد قبل الفطار بربع ساعة عشان تلحق عزومتك وتنبسط مع صحابك
شكرا لدقيقة الموبايل الأخيرة اللي عمرها ما بتقضّي الغرض .. ولا بتشبّع من صوت اللي بتكلمه .. بس كفيلة انكوا أخيرا هاتتفقوا على حاجة .. ممكن أول ما تتقابلوا بعدها .. ترجعوا تاني لعقد الاختلاف اللي بينكوا

شكرا للدمعة اللي بتستر نفسها وسط الناس .. وبتتشعبط في عينك عشان ماتفضحش رعشة جسمك 
وتنساب لوحدها بمنتهى الشياكة وانت على سريرك في حضن المخدة
أكتر حد وثقت في حضنه

شكرا للعفاريت اللي بتستخبى في عب الحيطة عشان تطلع على خيال الضل وانت بتصلّي وتخوّفك .. فتعلّي صوتك - حتى لو الصلاة مش جهر - فتخاف أكتر
شكرا .. لأنها علمتك ازاي تحترم لحظة الخوف .. وتسيبلها نفسك
شكرا .. لأنها علمتك الهروب من صغرك .. من الأماكن الضلمة

شكرا للايد اللي طبطبت على ضهرك بحنّية وخانتك بعدها بشويش .. مش بس لأنها علّمتك ان الطبطبة مش علاج
لكن كمان لأنها عوّدت قلبك مايدقّش في لحظات مشابهة

شكرا .. لجواز السفر اللي بتحلم بيه
شكرا للحلم لأنه لسه موجود

شكرا للحزن اللي عمره ما أتأخّر عنّك

شكرا ليك .. لأنك عملت كل ده لوحدك .. من غير ما تدفن حد معاك
ولا تقنع حد ان الموت في حضنك سكة وصول


Sunday, July 29, 2012

السجين رقم 900 (2) الفصل التاني .. الاعتراف الأول

مولانا الشيخ والإمام : عثمان محمد عبد الهادي


أول ما النور فتح مسكت الورقة و القلم وقررت أحكيلك .. أنا محتاج حد أحكيله يا مولانا
كنت باكلمك على مستر آرثر .. نسيت أقولك ان مستر آرثر جه مصر لأول مرة سنة 1938 وفضل موجود رغم ان الجيش البريطاني كله رجع بريطانيا بعد أقل من 20 سنة , فتح دار أيتام مرتبطة بجمعيته الخيرية لمساعدة الفقرا ومتضرري الحرب
قلتلك عنه قبل كده انه راجل عظيم
كان بيجيب الأطفال اللي لسه مولودين ويديهم أسامي انجليزية وبيعلمهم الانجليزي كلغة أساسية , يمكن إيف وماجي أكتر اتنين كنت تحس كأنهم انجليز أبا عن جدا
إيف كانت عينيها زرقا .. زرقا كأنها السما .. أو كأنها البحر صافية تماما إلا من سفينة سودا كبيرة بس ما أثرتش على جمالها


تعرف يا مولانا .. أكتر حد زعلت عليه كانت إيف ..
رغم انها ماتت فداء للواجب وللأخلاق المقدسة .. بس يمكن كانت هي خلافي الوحيد مع آرثر , أنا غلطان جدا اني ماعترفتلوش اني بحبها
 بس أنا شوفتها في حضنه , وأنا مدين بفضل كبير جدا لآرثر في حياتي .. كان لازم أسكت وأشوفهم كل يوم بالصدفة نايمين مع بعض
أنا مش متدين اطلاقا بس ماجي  قالتلي ان مش ممكن حد يكون بينام مع حد ويخرج من حضنه بكم الأسى ده
فرق السن بينهم رهيب .. آرثر التخين العرقان العجوز مع إيف في سرير واحد ده في حد ذاته شيء مريض جدا
الحقيقة .. للحظات كنت باكره آرثر وكنت باغير منه جدا
بس بارجع تاني وأقول " لولا آرثر ماكانش هايبقا فيه ايمانويل " .. من حقه يكونله حبيبه جميلة زي إيف
وأبصلهم للحظة
كانت لحظة صمت
لحظات يا مولانا


تصوّر ان مارتينيا اتهمتني أنا في قتلها .. بس أنا ماقتلتهاش .. مش ممكن أقتل إيف , عينيها الزرقا كانت أقوى بكتير من الموت
هي اللي قررت تموت
إيف انتحرت يا مولانا ماقتلتهاش
 آرثر أصلا انسان غبي .. ردة فعله ساعتها كانت مريبة جدا
كلنا جرينا على صوت صراخ الخدامة وهي شايفة إيف مرمية على الأرض والسكينة في زورها والدم حواليها من كل حتة
كلنا كنا ساكتين من الأسى ..
آرثر قبل كده قالنا ان الدم ده علامة لغضب ... اللي بينزف وهو بيموت دليل على انه كان انسان سيء في الدنيا
وهايتعاقب في الآخرة عقاب كبير جدا 
 في اللحظة دي دخل  آرثر وصرخ فينا كلنا من الفزع
مين عمل كده يا أغبيا .. مين عمل كده"
أنا قلت مفيش دم .. قلت مفيش دم
 "شيلوا الأرف ده فورا


ماكنتش متخيّل رد ماجي
جت جنبي وأنا باعيط وصرخت فيا" إيف انتحرت " هه قالتها وهي بتغمز وبتبتسم ابتسامة شريرة جدا
"  ولا ايه رأي ايمانويل الرومانسي الحزين ؟ "
مارتينيا قالتلها :" ماتلوميش حد غير نفسك واهمالك يا ماجي وعدم اهتمامك باالنظام ..بتسخري من ايه .. من إيف .. إيف كانت مثال التضحية عشان الكل .. أما أنتي .؟! .. انتي عملتي ايه " ,  لفت مارتينيا ساعتها ناحيتي
وبصتلي بمنتهى الجرأة وقالت
" طبعا ايمانويل انت مالمستهاش ومالكش أي دخل باللي حصل ده
مش كده
قول يا ايمانويل ماتخافش .. الاعتراف هايريحك من عذاب الضمير
( وصرخت فجأة )
وهايريحك من العياط زي البنات الصغيرة المزعجة
"
بصتلهم وأنا بحاول أتمالك أعصابي وبابص لضهر مستر آرثر وهو طالع السلم الكبير من بعيد
وصرخت فيهم كلهم بطريقتهم المفضلة


إيف إنتحرت .. ( وبصوت أعلى ) ..  إيييف انتحرت...  لأننا كلنا ماكناش واقفين على نفس المسافة منها آرثر عمره ما فكر فيها تفكير مؤدب
أنا عمري ما حبيت إيف  , أنا بس صعبان عليا البلاط اللي اتغرّق بدمّه
هي طول عمرها كانت انسانة متخلفة ومقززة .. حتى لما ماتت السافلة ماتت بدوشة واازعاج
مش تموت بهدوء زي أي حد بيحترم قدسية الموت
اتفضلوا بقا عندناا تنضيف الأسبوع ده كمان
ملعونة العيشة دي , مفيش مسحوق بيشيل الدم تماما من أول مرة أبدا , ده شيء مزعج جدا ..
اتفضلوا يالا اتفضلوا


كلهم دوّروا وشهم ومشيوا  ما عدا مارتينيا .. استنتهم كلهم لما خرجوا وقربت مني وبصتلي بصة عمري ما هانساها
وقالتلي في ودني بمنتهى الهدوء
" كل الناس ممكن تصدق التمثيلية دي يا ايمانويل إلا أنا .. مارتينيا مش بيتضحك عليها بالخرا ده "
زقتها بعنف جدا لدرجة انها صعبت عليا
رجعت قربت مني تاني وقالتلي
" على فكرة السكينة اللي في رقبة إيف دي شبه السكينة اللي جابهالك آرثر في عيد ميلادك من كام يوم "
وابتسمت ومشيت




مهما حكيتلك وقلتلك عن النظام يا مولانا مش هاتصدقني كل شيء في الدار كان بنظام حتى الموت
مولانا .. مستني جوابك .. أنا مش هافضل أبعتلك في جوابات ع الفاضي .. أنا عايز أحكيلك على كل حاجة بس أحب بارضه اني اخد رأيك


هايقفلوا .ال
قفلوه فعلا .
أنا حاليا باكتبلك على ضوء بعيد جدا


صديقك
ايمانويل

السجين رقم 900 ( 1 )

مولانا الشيخ والإمام .. عثمان محمد عبد الهادي
 معرفش انت فااكرني ولا لأ ؟
بس أتمنى تكون فاكر خطّي .. احنا اتقابلنا السنة اللي فاتت وانت بتزور سجن ( طره ) في زيارتك المعتادة عشان الوعظ .
 اسمي بالكامل (إيمانويل) .. أيوه هو ده اسمي بالكامل عشان أنا متربّى في دار أيتام صاحبها واحد انجليزي .. اتولدت لقيت نفسي هناك فياريت ماتتعبش نفسك بالأسئلة الحزينة اللي متوقع تماما انك هاتسألها لنفسك
"زي .. "هي دي غلطة مين ؟!" .. وزي " هو ربنا بيعمل كده عشان يعذبنا ولا عشان يكافئنا بالنعيم ؟
وأرجو ان انت ماتحاولش تدوّر على أهلي الحقيقيين .. أنا بقالي 23 سنة بادور عليهم .. ومالقتهمش
حتى ربنا أول أب ليا .. مالقتهوش .. حتى لما دوّرت جوايا كويس
أنا بقالي سنين بادوّر على حاجات كتير ومش بلاقيهم .. مش بلاقي حاجة خالص

أنا فاضلّي كتير في السجن .. احساس فظيع انك تبقا عايز تكسّر كل الحيطان والسدود اللي في الدنيا وتطير لكن للأسف انت أضعف كتير من ده , حتى لو كسرت الحيطة دي .. هتلاقي حيطة كمان .. ولو كسرت كل الأسوار حتى السور العمومي بتاع السجن .. القناصة هايصطادوك زي ما بيصطادوا الضباع اللي بتعيش في الصحرا حوالين المنطقة .. الحرية شيء جميل جدا يا مولانا

 تعرف .. أنا عمري ما حكتلك أنا جيت هنا ليه ؟! ... تخيل القاضي المتخلّف ادّاني 25 سنة منهم خمس سنين في المستشفى بتاعة المجانين ؟! ..  هم عامة ماستحملوش أكتر من 3 سنين وجابوني لحد هنا
 القعدة مع المجانين كانت أرحم من الكلاب والمجرمين اللي هنا ..
أنا حقيقي مش فاهم فكرة المنطق اللي يقول انك تجمّع كل الكم ده من المغتصبين والقوّادين والقتلة في مكان واحد مع الأبريا اللي زيي
عموما أنا مش هاسكت .. هم فاكرين مفيش قانون ولا ايه
العدل لازم يسود يا مولانا .. وأنا مش هابطّل أستئنف ضد القرار ده طول مانا عايش

هاحكيلك

من قيمة كام سنة .. وتحديدا مع عيد ميلادي ال 18
جاتلي أول هدية في حياتي ..
اللي جابهالي مستر آرثر مدير الدار اللي اتربّيت فيها , مستر آرثر ده لازم أحكيلك عنه
راجل انجليزي جدا .. انجليزي أكتر من اللازم , بداية من اسمه .. لحد الموسيقى اللي بيسمعها
أنا عشت في الدار دي 20 سنة عمري ما شوفته بيفوّت معاد الشاي وقراية الجرايد وتصفّح وشوشنا كل يوم ومتابعة الحياة في الدار بكل انتظام وبكل اهتمام ..
الله يرحمه
كان راجل طيّب جدا .. وأكيد دلوقت في النعيم مع إيف ومارتينيا وماجي وجون

فكرتني بكل الحاجات دي مع بعضها يا شيخنا
مش فاضل كتير على معاد قفل النور هنا .. أعتقد دي هاتبقا أول رسالة أبعتها لحد من جوّه السجن
أولا لأن كل اللي أعرفهم من الدار مش هاقدر أبعتلهم حاجات زي كده
ثانيا لأنك الوحيد اللي وثقت فيه بعد مستر آرثر يا شيخ عثمان
أنا لازم أسلّم الورقة دي للحراس بكرة عشان يبعتهوالك فمش هاكمّل باقي التفاصيل
الوقت هايطول عموم .. لسه فاضل حوالي 20 سنة

ملحوظة : أنا عارف اني ماينفعش أقول كده .. بس
أنا عيد ميلادي الأسبوع الجاي
امممم
أنا نفسي في تورتة بالفراولة زي اللي كان بيجيبها مستر آرثر

مضطر أقولك .. سلام

صديقك
ايمانويل

Sunday, July 15, 2012

حريقة

لن يشتعل ولن يساعد على الاشتعال .. سيبكوا منه

Friday, July 13, 2012

فجأة


لم الذكريات في كيسه
حط كل شيء مكانه
بيشتري غاليه برخيصه
والسكات بيموت عشانه


مش غريب ع الدم جرحه
شجر الدمع اللي طارحه
البكا بيحب شرحه
والأماكن مسؤولين


عدّى لم الخوف وخبّى
كل شيء في العتمة دب
بس كل حاجه صحيت
فجأه ماتت لما حب


الزمن ده واخده حاله
والأماكن عايشه عاله
والأمل مبعوت حوالة
والسنين بتجيب سنين


فجأة ساب الصح فايح
فجأه بيفكّر بصوت
فجأة فاكر فجأة رايح
فجأة بيقرر يموت

Tuesday, July 3, 2012

الفَـلَـكي

دخان كثيف , دوي طلقات رصاص , أشلاء , بقايا معدّات تصوير 
فتاة ترتدي الأبيض تصرخ في وجه كل من هناك

ثم

- قفشتك يابن المتناكه جيت برجلك يا كس أمك انت وهو



مازلت أرى القليل من النور ..بعيدا .. أقترب خطوة بخطوة أرى الأمور أوضح , يصطف العساكر ثم يختلط الأمر عليهم ثم يأتي من يصرخ بهم فيعاودون تنظيم صفوفهم


- أنا مش هدخل أكتر من كده كفاية كده
- تعالى بس جمّد قلبك لو معاك عدسة زووم هاتجيب معاك من هنا بس جوّه هاتشوف كتر
- وانت ؟
- لأ أنا هاكمل معاك عادي ..نورلنا بموبايلك بس


- قفشتك يابن المتناكة , جيت برجلك يا كس أمك انت وهو


تحملني ذراع واحده نحو مدخل احدى العمارات القديمة , أرى رجلين من قوات الدعم الخاصة بالداخلية 


أرى عصا سوداء من أعلى تنير الظلام تهبط على رأسي فجأة , تسقط الكاميرا من يدي
فجأة وأغيب عن الوعي


- ماما .. حضريلي فطار
- لأ قوم حضر لنفسك
- خليكي جدعة أنا ماتعشتش امبارح


أرى قدمي , أرى أقدام أخرى .. واحدة منها تقترب من صدري
- عامل نفسك راجل يابن الشرموطة وداخل تصور لحد هنا عليا الحرام لنطلع دين أمك
ركلة , صفعة 
يتحدث الآخر 
- بلاش في وشه عشان مايموتش 
أرى العصا مرة أخرى على ساقي
لا أشعر بشيء , ركلة , ركلة 
أغيب عن الوعي مرة أخرى


-   أنا أسف يا مريم مش هاينفع نكمّل احنا بنضحك على بعض
- انت اللي بتضحك على نفسك .. اعمل اللي يريحك


 - قوم يابن الشرموطة انت هاتعمل نفس دين أهلك ميت انت لسه شوفت حاجه يا خول
أقف على قدمي ووأقرر المواجهة
 أعقد يدي وأتركها تذهب إلى وجهه بعنف , لا يتأثر
يغضب أكثر , ثم


-  لأ أحا ده قليل الأدب فشخ  .. هاتعملي فيها راجل طيب يا دكر أنا هوريك رجولتك دي أخرتها اايه


أحدهم يمسك ساقي أحاول الخروج من قبضته , لا أستطيع
أحدهم يخلع بنطالي أحاول أن أضرب بعنف , لا أستطيع
أحدهم يمسك ذراعي والاخر يركلني في صدري 
أحاول الفرار .. لا أستطيع
يحكم الجميع قبضتهم علي ويأتي أحدهم بالعصا ويضربني بها في أسفل ظهري 
أفقد القدرة على الحركة وأصرخ
أنظر إلى الكاميرا أمدّ يدي إليها فيركلها أحدهم بقدميه ثم يركلني في وجهي
يحاول أحدهم وضع العصا في مؤخرتي

أتعمد أن أغيب عن الوعي



- ماشي ماشي .. لما تيجي كلمني , لأ أنا قاعد لحد اتناشر واحده , هاروح أستحمّى وأرجع تاني


يفشل في ادخال العصا ويسقط هاتفي 
أحاول الوصول إليه أمسكه
كل ما يدور في عقلي الان
عادل .. هاكلّم عادل


يحدث شيئا بالخارج , يغلقون مدخل المبنى 
أرى سقف المدخل
أرى سلالم قديمة , أثار لمصعد قديم متهالك غالبا لا يعمل
أرى جسدي عاريا وأثار الضرب
لا أستطيع الحركة
ظهري .. ظهري يؤملني
( عادل أكلّم عادل )


أرتدي ملابسي وأصعد إلى الدور الأول 
أطرق الباب بعنف  رائحة الدخان تتزايد
أطرق الباب
لا أحد يرد
أصعد الدور التالي 
والتالي
والتالي
سطح المنزل مغلق تماما لا أحد يرد
لا أحد يرد أعود إلى المدخل وأنا أترنح


- انت روحت فين يابن الشرموطة هاندور عليك
- هات منه دين أم الكاميرا دي دغدهاله
- انتوا عاملين نفسكوا رجالة جايين لحد هنا برجليكوا يا شراميط .. انتوا مش شيلتوا شيلة وعملتوا فيها دكورة استحملوا بقا يا معرصين
خللي الثورة تنيكك يا شرموط منك ليه
بكره كل واحد يومه جي وهاتيجوا على حجر عمو


مزيد من الصفعات أرفض اعطائهم الكاميرا
يركلها أحدهم
تسقط
أرتمي عليها بجسدي , تنهال  العصيان على ظهري وساقي
يعاودون جذب ملابسي الداخلية يستخدمون أيديهم هذه المرّة
أفقد السيطرة على الكاميرا
يركلها ركلة أخرى


أضغط باخر أصبع باق عندي على زر اخراج العدسة أرتمي عليها وأفكّها فتخرج العدسة من الكاميرا


- مافيش راجل بيعيط 
- ازاي مفيش راجل بيعيط .. أي حد من حقه يعيط
- لأ على فكرة انتي فاهمة غلط .. أنا مش باسمح لحد انه يخليني أعيط مش بدّي الفرصة دي لحد


ركلة أخرى
يعتقد ان الكاميرا انتهت
- انبسط يا كس أمك ... يالا روح بيع بطاطا بقا
أبتسم في خضم كل هذا


أراهم يهرولون بعيدا 
لم يغلقوا الباب هذه المرة
أرتدي ملابسي
أحاول الوقوف
أغيب عن الوعي


الفطار جاهز
 خلاص نسيب بعض
 اقف انت جون
هاجيلك على عشرة عشرة ونص
عادل
مفيش راجل بيعيط


مفيش راجل بيعيّط

Sunday, July 1, 2012

عجزٌ عن الوصف الدقيق


الطريق
  في الطريق
  على الطريق
  إلى الطريق
بالطريق
..
.


حسنا 
لا يبدو على الشاعِر
أنه يريد إيصال معنى ما
غير أنه : يعجز الشِعر عن السير فوق ممتلكات غيره .
وأن الشِعر .. لا يقاس بالمسافة .

Tuesday, June 26, 2012

آثار أقدام


أنظّف الشاطئ من آثار قدميه
حتى يبدو وكأنه
لم يأت إلى هنا من قبل
هذا الذي لم يأت إلى هنا أبدا
يعرف الطريق جيدا إلى اللاشيء

هذا الزائر المتطفّل
ترك حذائه عند البداية
وأكمل حافيا
هكذا يظن أنه لن يُنسى
وأن الدخّان أكثر كثافة من البحر

ترك مصباحه الليلي
أخرج قنديل بحر من جيبه
وألقاه في الهواء ... حتى تشبث بالقمر
أضاء قلبه
ثم ترك الليل يمضي مظلما

أَخذتُ روحه
صَعدتُ بها إلى السماء
ثم عُدت لأتم عملي
أُنظّف الشاطيء من آثار قدميه
وأبكي قليلا

Monday, June 25, 2012

لمن الملك اليوم ؟!

لمن الملك اليوم

- للي معاه فلوس كتير وسلاح

استغفر ربنا .. الملك لله وحده يا أخي

- ماهو على فكرة ربنا معاه فلوس كتير وسلاح .. انت بتوزن عند مين ده هو عنده الميزان ذات نفسه سبحانه وتعالى
بس الفكرة ان ربنا مش بيستخدم نفوذه دايما ... بمنطق يمهل ولا يهمل

طب وربناا ليه مايستخدمش نفوذه ضد اللي بيستخدموا نفوذهم ع الناس اللي ماعندهمش نفوذ يستخدموه لمقاومة اللي عندهم نفوذ هه ؟

- ايــــه ؟

Thursday, June 14, 2012

عزيزي القارئ


عزيزي القارئ .. أنا بحبك جدا
أنا عارف اننا في الغالب مانعرفش بعض وان انت ممكن تكون فاكرني تنك عشان مش بارد ع التعليقات اللي بتكتبها من وقت لآخر
عايزك تعرف ملحوظتين مهمين جدا

أولا : أنا مابكتبش عن حد .. يعني ماحدش يضحك عليك يغشك ويقولك القصيدة دي كتبها عشاني أو كتبها لما انا قولتله أو المقال ده  ماعرفش ايه او التدوينة دي ماعرفش مالها

أي كلام من أي حد عن كتابتي ماتصدّقوش حتى لو قالك اني أحسن واحد بيكتب في الدنيا .. اعرف انه بيكدب

أنا باكتب عشان أنا باحب أعمل كده

وباعرض الكلام اللي باكتبه عشان بحبك والحب ده مش معناه انك لازم تحب اللي أنا باكتبه
ممكن تحبه أو تكرهه 
ممكن تستطعمه او تلاقيه ماسخ دي حاجه ترجع غالبا لمزاجك الحالي




ثانيا : مفيش ثانيا بس استخسرت أنزل تدوينة كده من غير ما أتفذلك .. ماهو مش معقوله هاجيبك لحد هنا عشان ملحوظة واحده يعني بارضه
انت مقامك عالي
مش باقولك بحبك

Tuesday, June 12, 2012

استفسار


من يشارك من الذكرى ؟!
الليل لا يساوم الفجر على أي شيء
والوقت تأخر جدا على العودة سالما
بل إن قليل من المعصية قد يقوّي إيماني

Monday, June 11, 2012

بالنسبة للشاعر


دايما
بابص للنص العتمة من القمر
وأسأل خروج الشمس عن شرعها
الأرض .. بتدور وتقلب الليل نهار
والبنت دي بالذات
 لسه باحب ايديا على شعرها

لما المصوّر
شاف البنت حلوة/ بتضحك
صوّرها
عدّى الطريق / عدّت
حاول يقرّب فاستعدت
بعدت عن العدسة
ماصورهاش .. تصوّرها

كان ليه ساعتها وهي بتعدّي الطريق
حسّ ان وسط البلد
مسكونة فيه
دايما يزورها الناس وماتزورهمش
مدّ الغريب ايده
تسلم ايدين البنت .. ماسلّمتش عليه

ماقدرش يلحقها
شكل الفلاش فضح الشمس
 والكاميرا
اتهزّت في إيد المصوّر
فوقّعها..
زي اللي حضن حبيبته في نص الشارع بقوّة
وودّعها..

يمكن .. بالنسبة للمصوّر
البنت دي
تشبه كتير القاهرة
مجرّد بورتريه رائع
يمكن يصوّر فيه .. تفاصيل جديدة
لو كشفهم..
لكن
أكيد بارضه
صوّر بنات غيرها
بمجرد ما شافهم ..

وبالمناسبة
الغريب .. أعمى
نظرة عينيه ماتقولش أكتر
من ان قصة حب سهلة
حكمة
اختبرها .. من كتر السياحة..
والبنت فهمت ده طبعا
وقررت تسكت تماما
من باب الفصاحة ..

إذن أنا برّة المنافسة
بالنسبة ليا
القصة مختلفة ..
شكل النهار في القاهرة
شبه المطر .. والبنت
كل يوم باشوفها .. بقصة شَعر جديدة ..
البنت دي شَعرها
ينفع قصيدة..

Monday, June 4, 2012

أنا بحب أنام ع الطرف ( في هجاء التفاصيل )

يا شيخة ملعون أبو التفاصيل اللي تخلّي الواحد يسيح في التوهان زي العيال الصغيرة ويفتكر كل كبيرة و 
وايه ؟
مفيش صغيرة .. مفيش تفصيلة صغيرة 

كل التفاصيل حتى لو بسيطة .. كبيرة ولو ماكانتش كبيرة ..أهي بتكبر مع الوقت

أيوه أنا لسه باحب أنام على طرف السرير والمشكلة دي مالهاش غير حل واحد .. اننا نحط السرير في نص الأوضة
عشان كل واحد فينا يبقا عنده الطرف بتاعه
وبالمرة نتقابل في المطبخ الفجر واحنا قلقانين في نص النوم

لسه بتفكّري في الأمومة اللي اتحرمتي منها طول حياتك ؟!  ربنا شال عنك كل تفاصيل الأمومة عشان لما يحرمك منها ماتتضايقيش أوي كده
الجرح على قد ما بيوجع بيعلّم .. ومابنحسِش بعلامة غير بعد فترة 



كلام هايف صح ؟


أه


- ازيك ؟
- الحمد لله أهلا ازيك 

- أنا كويس الحمد لله .. ألا قوليلي .. لسه بتشربي النيسكافية من غير ولا معلقة سكر
- يفرق معاك
- يفرق مع التفاصيل
- وايه فايدة التفاصيل ؟
- التفاصيل بتفرق في الذكريات
الذكريات اللي بتخليكي تبتسمي وتقولي ياااه
 " كبرنا .. كم كبرنا "
- درويش كان عارف
- درويش عارف على طول

القعدة جنب الشباك ؟
لأ لأ مش بتفرق .. خصوصا اني مابقتش أركب مواصلات كتير , بافضل المشي
وأه .. لسه بامشي على سطر وأسيب سطر
وفي شارع قصر النيل تحديدا البلاط الأحمر , عارف كل حاجة

شغل عيال معلش
الساعة اتنين بالليل تغوصي ايدك في الليل فتتعاص سواد
سيبيلي أنا اللون ده عشان بحبه
وشيلي ايدك بشويش من على خدّي , من غير ماحد ياخد باله
ماحدش هاياخد باله
ماتخافيش
كلهم ساكتين .. وبيتفرجوا
الشوارع مابتكلّمش حد .. مش كده ؟
الشوارع مابتكلّمش حد

Friday, May 18, 2012

ضياع




أنا الطريقة المُثلى  للضياع
ضع الراية يا أخي
هكذا يقع المسار
فلا انتصار اليوم
يا أخي
لا انتصار

Monday, April 30, 2012

طريقة عمل الطحينة


هو انت  ليه وانت صغير لما قالولك ان الشيطان عصى أمر ربنا قام ربنا عاقبه وهايدخله النار , مافهمتهاش ليه من أول مره , ليه قعدت تقاوح وتقول طب ليه مايتصالحوش ؟!
ده يبوس راس ده وده يبوس راس ده وخلاص وشكرا على كده
وبما ان ربنا الكبير يبقا الشيطان هو اللي يبوس بس 
وربنا يسامحه 
ونعيش مع بعض كلنا 
ليه فضلت تعذّب أبوك الغلبان اللي ماعندوش اجابات أكتر من الفلوس اللي بيطلعها رغم انها مش كتير عشان يديهالك تعمل بيها أي حاجه تلهيك عن السؤال
يمكن ماكانش بيرضا يجاوب عشان مايعرفش ويمكن كان خايف يقولك .. ويمكن ماكانش وقته ..
ماكانش وقته بمنتهى البساطة من غير أي فلسفة 


 مادرتش بالدنيا وبالسؤال غير لما كبرت ولقيت مقلة " نور الاسلام " معلقة صورة كبير لحازم صلاح أبو  اسماعيل ومكتوب عليها " سنبايعه " وافتكرت وانت صغير لما كنت مش فاهم الدرس اللي فيه قصة بيعة الرسول

وسألت الأبلة بمنتهى السذاجة 
" وهم يبيعوه ليه يا أبله "
- لأ يا حبيبي يبايعوه يعني ينصروه
- عشان ايه 
- عشان هو نبي يا حبيبي هو سيدنا محمد اللي ربنا بعته عشان يهدينا 

وساعتها يقوم صاحبك اللي دايما حظه أحسن منك يسأل سؤال يخليك ترجع تاني للضلمة ووتخلص صحوبيتك القصيرة مع سبوت النور
- أبله أبله هو ربنا فين ؟
السؤال اللي خد منك الأبله والتلاميذ وماخدش منك سنين
لكن خد من أبوك وقت كبير وتفكير أكتر لما عرف انك وقفت في نص الفصل وسبوت النور راجع عليك ومعاه عينيهم كلهم والأبلة بتسألك

- تفتكر ربنا فين ؟
فترد عليها بكل سذاجة 


- ربنا ليه ؟



يمكن دلوقت عرفت ربنا ليه .. لكن ماعرفتش ربنا فين ... وأكيد صاحبك ماعرفش والأبلة كمان ماعرفتش
لكن غالبا كلكوا اتفقتوا ان مش مهم ربنا فين منّي .. الأهم دلوقت .. أنا فين من ربنا

يمكن اتأكدت - رغم ان ده زعّلك جدا - انك مش هاتشوف ربنا دلوقت ومطلوب منك تعمل حاجات كتير أوي عشان تشوفه
وانت عارف انك نفسك تشوفه عشان تتكلم معاه كتير أوي وتسأله على كل حاجه وتحكيله على كل حاجه حصلتلك وتشتكيله منهم كمان
يمكن ساعتها مش هاتفرق دموعك معاك .. لكن هاتفرق معاه
وهاتحس بقيمة الطبطبة اللي حرمك منها طول حياتك

لأنك كنت طول الوقت لوحدك .. وكنت طول الوقت لوحدك لأنك كان حواليك ناس كتيرة أوي
يمكن ماكانوش بيعرفوا يطبطبوا عليك


أو يمكن مش هي دي الطبطبة اللي انت كنت محتاجها

تقطع ظنّك اللي بيسيبك ساعات ويسهيك عن كل حاجه انت ماقدرتش تعملها مش بس لأنك ماقدرتش تعملها

لكن كمان لأنك نسيت
فتفتكر على اخر لحظة نصيحة أمك اللي من كتر ما بتحضنها وانت حاسس بالعجز انك مش قادر تضحكها
مابقتش تعرف تحضن
وتفتكر صوتها وهي بتقنعك ان الطحينة لازم يتحط عليها شوية خل
وانت كل مره وكأنك قاصد
بتنسى الخل .. فتبوظ الطحينة










Monday, April 23, 2012

ماكنتش ناوي أموت دلوقت

جم البشر بالغصب
وادّاهم ارادة
تزيد دموعي أضيع
وأضيع .. تنزل دموعي زيادة
يا نخيل يا عالي نحيف
بافكّرك بيّا
أنا زي نُص الليل
لا رغيف ولا ميّه
برنيطة الساحر
مافهاش حاجات ليّا
أنا غصب عني ضعيف
وحيد بلا هيّ
لا ليك ايدين ناعمين
بيطيبوا ضهرك
ولا إيد إلاهية

ماكنتش ناوي أموت
ولا اشتكتش لحد
نخيل بلا بلح
شجر بلا توت
ورق بلا أشعار
وكاسين بلا مَزّه
وأهو الوجع بيفوت
والحزن له لذّة

وهكذا الأيام دايما بتتوالى
وهكذا الشاعر لا فعل لا قوالة
ولا الحنين بيزيد
ولا الحنين بيقلّ
وهكذا على طول
أهرب لأني باقول
يحق ليه للنور يذلّ حبة ضِل

وهكذا الأحزان بتمر ماتمرّش
الحظ زار ولا زارش
والصدفة ماتضرّش
حصل كتير ماحصلش
والأمر مايسرّش

واهي عين بعين
والسن ..
البادي ليه بالحب
فرضا عليه بيحن ؟!..
اكمن أنا اللي بدأت
طب أروح لمين دلوقت ؟!
وأرجع وأقول ولكنّ
يا نخيل يا عالي يا بيت
مطرح ما تطرح جيت
أنا غصب عني بكيت
وغصب عني بئن

Tuesday, April 17, 2012

بيت زغير بكندا وكارت شحن بعشرة


  تقرر تسأل نفسك ايه الحل , يمكن انت مش عارف الحل , أو يمكن عارفه وبتستعبط ومش عايز تعترف لنفسك انك عارف 
حتى ظروف حياتك اللي خلتك تحب تركب ميكروباصات وتكره 
الزحمة وتشحن كارت بعشرة وانت معاك تشحن بأكتر


نفس الأسباب اللي خلتك تحب القاهرة بالزحمة والوساخة والأحلام البسيطة اللي كلها مش على مزاجك لأنها بتحتل جزء كبير من الفراغ اللي بيملا عليك الدنيا وتخليك تتنازل عن حلمك الكبير , بيت زغير بكندا 
وكأن فيروز صوتها ماكانش بيقول كل حاجة
أو قال حاجات انت بتحاول تشوفها مملة وتجبر نفسك تتخيل انك لوحدك في بيت زغير في كندا والتلج والعصافير البردانة اللي بتحوم حوالين بيتك عشان تتدفى فيك
وكأن الكمانجات نفسها ماعادتش بتدوس على مشاعرك أوي
مش بس لأنك حبيت الكونجا والبونجز والدف والطبلة أم طبقة زرقا مرسوم عليها نجمة كبيرة
وانت عارف ان لونك أجبرك على حاجات كتير أوي
جسمك القليل أوي مافرقش مع الناس الكتير اللي باستك .. حاجه كده زي رغيف العيش اللي وقع على عشرين واحد في صحرا
مهما كان 
هايعجبهم وهايحبوه .. لكن ماتستناش منهم انهم مايتنازلوش عنه قدّام أول بيتي بان يعدّي قدامهم
وعشان كده انت بطلت من زمان تروح للزباين لدرجة انك ساعات بترفض شغل كتير لمجرد انك تشوف نفسك في المرايا
وماتستغربش العضم اللي بارز في جسمك
على سبيل العما المؤقت وعلى سبيل إن الفرجة على جسمك في المرايا حرام زي ما بيقولوا وتستمتع بحبة الحرام اللي ماحدش شافك بتعملهم
وكأن جسمك ده مش من حقك .. مش بتاعك .. مش من حقك تكتشفه حتة حته وتشوف كل حتة موجوده ليه وعشان ايه
كأنك غريب جه الجسم ده بالصدفة في سكة سفر طويلة 
جه يريح وهايمشي قريب جدا لما يحين معاده
عارف
 انت مش مستعجل ع النهاية , ولو انك مش هازعل لو جت بدري.. لأنك بصراحة بتحب الحقيقة حتى لو هاتجرحك
ورغم انك احترفت الصراحة في  حياتك بس للأسف الصراحة مش دايما صح , مش معنى كده ان الكدب هاينجّيك
لكن مافيش مانع تعترف ان الصراحة الكتير جرأة وضد المثل اللي بيقول .. الجري نص الجدعنة
الهروب نفسه ممكن يكون حل 
الرسول نفسه انسحب من غزوة قبل كده عشان مايخسرش كل حاجه
في الاخر
بتلاقي نفسك بتجاوب على كل حاجه لوحدك وماتعجبكش الاجابات بس تبتسم لأنك عارف انك ماشي في طريق الحل
مش مهم توصلّه
المهم تفتكر أغاني عمرو دياب اللي دايما تمسك نفسك متلبّس وانت ناسي نص الأغنية وبتهته الباقي مع اللحن
على أعتبار ان ماحدش واخد باله من حركة شفايفك
لأن شفايفك مافهاش حاجه تخلي الناس تركّز معاها 
تقوم تقلب قعدة الغنا على أغنية انت حافظها كويس حافظها حرف حرف رغم انك أقنعت نفسك انك مش شرط تفهم كل كلامها
كثّف الكوكب في لقطة قصر وسط بيوت فقيرة 
قصر وسط بيوت فقيرة 
قصر وسط بيوت فقيرة
قصر وسط بيوت فقيرة   

Tuesday, April 10, 2012

متضامن مع تونس



متضامن جدا مع اللي بيحصل في تونس دلوقت .. متضامن مع الشعب التونسي
ضد أي وغد يركب ثورته

Thursday, March 29, 2012

شريد

الحياة مش بنت وسخة يا متخلّف ماتحسسنيس ان حياتك كانت صعبة أوي انت بدين أمك ماكلتش من الزبالة وأمك مش شرموطة ولا بتنزل تشحت عشان تأكلك انت وأبوك اللي بياخد الفلوس بالعافية ويروح يسكر بيها ويرجع بالليل يغتصب أختك

وصدقني الدنيا مش عاملة زي القطر .. الدنيا مش صغيرة الدنيا دي أكتر حاجه ممكن واحد يعملها ..
ايه أطول من انك تعيش حياتك ؟!.. عشان تعرف انك طري
والحياة أنشف منك

Monday, March 5, 2012

الفيلم ... تأليف واخراج ممدوح زيكا



تحديث : اعلان الفيلم
http://www.youtube.com/watch?v=vn2Wk9s5Jmk&feature=youtu.be


فيلم من تأليفي واخراجي.. شارك معايا في التصوير أحمد الساعاتي

والمونتاج عمله نديم

الموضوع غريب شوية .. قصة الفيلم بتحكي عن مخرج .. قرر يعمل فيلم

الفيلم اتعمل بدون تكلفة تماما.

صوّرت بالكاميرا بتاعتي وفي شقة ناس صحابي والممثلين صحابي
والمونتاج كان عند نديم في البيت بلا أي تكلفة
بدون إضاءة

التجربة كان فيها شيء من الارتجالية أنا مش متعود عليه


الفيلم ده مش أول فيلم أعمله
بس أول فيلم أخلصه


اشتغلت في فيلم روائي قصير في بداية 2010 عن الانتحار اسمه حقنة هوا
تأليفي واخراجي
وكان تمثيل أحمد الساعاتي ومحمد فوزي ومحمد عادل وأنا بارضه
لكن للأسف بعد ما خلص التصوير .. المادة المتصورة باظت على الشريط اللي كانت متصوره عليه

بعد كده دخلت تجربة مهمة جد بالنسبالي وكنت مستني منها كتير
فيلم اسمه " ملاك العجز " تأليفي واخراجي بارضه
حضرت مبلغ عشان انتاجه بعد ما اترفض من كذا شركة انتاج
لأسباب كتيره منها اني ماعملتش أفلام قبل كده
رغم اني شاركت في بتاع 25 مشروع ما بين أفلام وثائقية وأفلام روائية قصيرة واعلانات وكليبات
لكن الرفض كان لأني ماعنديش مشروع خالص باسمي

أو رفض للفكرة عشان كان فيها بالنسبة لبعض تجاوز ديني أو فلسفي ما

المهم صوّرت يومين من أصل 5 أيام تصوير
وحصلت مشاكل تصوير كتير نظرا لأن أنا اللي ممول الموضوع فالناس كانت متطوعة بارضه
المهم اني ماكملتش تصوير ملاك العجز لظروف مادية تماما
لكن ناوي أكمّله ان شاء الله


وهنا جت مرحلة فيلم " الفيلم " اني لازم يكون عندي فيلم ليا من اخراجي مش مساعد مخرج أو كاميرا مان أو ممثل أو كاتب
لأ مخرج
وقررت أعمل الفيلم ده
وأتنازل عن مستوى جودة معين باشتغل بيه أو متعوّد أشتغل بيه ونظام تصوير معين
ومن هنا جت فكرة الفيلم كمان
انه يكون بدون تكلفة تصوير تماما
واخترت مجموعة من صحابي ونفذنا الفيلم

أتمنى يعجبكوا
وأتمنى تستنوا الحاجات اللي جايه
وأتمنى تستنوا أكتر من كده على مستوى كل حاجه

وأتمنى بجد اني أقدر أوصل لبداية اللي بحاول أعمله في السينما .

عرض فيلم الفيلم
هايكون قريب جدا ان شاء الله
وهاقول على أقرب مواعيد وغالبا هايبقا فيه عرض أو أكتر الشهر ده ان شاء الله .

ممدوح زيكا

Wednesday, February 29, 2012

الأحلام دائما سعيدة

لا تحلموا
فالأحلام مؤلمة مثل فراق
أو مثل بندقية مصوّبة نحو رأس طفل
الأحلام خطيرة جدا
مثل ليال بلا طرقات
بلا داع للانتظار
انتظرت شجرة الشاي أكثر من سبع سنين
ثم لم تثمر
فذهبت إلى المقهى
شربت الشاي .. وحدي .

Saturday, February 25, 2012

اسم الله

اسم الله يُقتل به
اسم الله يُسرق به
لو كان اسم الله رجلا لكان أشدكم عذابا يوم القيامة
لو كان اسم الله رجلا لقتلته
---
واحد أعرفه قال الكلام ده قبل كده

Monday, February 20, 2012

رصيف


قولها ماتدوسش عليك جامد
قولّهم ازاي تسعة وعشرين
يتقاسموا رغيف ؟!
مش احنا صحاب يا رصيف ؟!
ده أنا نمت في حضنك وانا خايف
وأنا وازن قلبي خفيف بخفيف
نتغطّى ببعض ازاي يا رصيف
وأنا قلبي ضعيف
زعلان مني
طب ده أنا مطمّن على حضني
علشان أنا وانت صحاب يا رصيف

Sunday, February 19, 2012

.

لم أطلب سوى ملاذ ولحظة للصلاة

Saturday, February 18, 2012

فضيحة

كنا , بلا عشب
أو خشب
أشعلنا النار في قلوبنا
للتدفئة
فاحترقت ذكرياتنا
وتطايرت
وأمطرت علينا في يوم تالٍ
أصدقائنا
ودموعنا
وطفولتنا المشرّدة
وأعباء أحزاننا المعتادة
وبقايا أشعار لم نطلب رأي أحد فيها .

Friday, February 17, 2012

في جسد الضحية

قاوم
مازال في جسد الضحية ..
بقية ..
ولمصوّر الفوتوغرافيا أقول :
مازالت اللقطة .. ممكنة
فقط
عليك أن تضبط سرعة التقاط الصورة
على الأبدية
مازال في جسد الضحية
بقية ..

وسيلة


ارقصوا .. على الأرض .. وعلى السلّم
وماتزهقوش لو الأغاني نشاز
غنّوا
ولا أقولكوا
استنوا
مين اللي قال الغنا قادر على الاعجاز .

Friday, February 10, 2012

بمحض صدفة

لا أؤمن بالتنمية البشرية
ولا أؤمن بالمؤامرات
ولا أؤمن بالصدفة

ولكن .. رجل التنمية البشرية
الذي يخبر الجميع بأن العالم يمكنه أن يصبح أفضل
مات محترقا

يا الله
نحن ندرك قوتك
فلا داعي لاختبار ضعفنا

Tuesday, January 31, 2012

معقول ومنطقي

س - ليه روسيا رغم كل اللي حصلها في اخر 100 سنة دولة قوية ؟!

ج - عشان الروس طول عمرهم بيحترموا تاريخهم الأدبي وبيقدروه وبيطوّروه .

Monday, January 30, 2012

معقول بارضه



س- انت شوفت ايه من ربنا عشان تكره شريعته ؟



ج- يا عم أنا ماشوفتش ربنا أصلا .

Sunday, January 22, 2012

كاذبون

منقول من مدونة
http://blogs.eastgods.com/almnte2aal7ora/




أيام قليلة تفصلنا عن الذكرى الأولى لثورة 25 يناير وخلع الطاغية مبارك وتبديد احلام ابنه المتصابى بحكم مصر.
عام مر ومازلنا نردد نفس الهتاف عيش حرية وعدالة اجتماعية ، هتاف قد تجمعت وراءه هتافات اخرى وربما قد تسبقه هتافات كالشعب يريد اعدام المخلوع ، محاكمة الفاسدين ، الدستور اولا ، الانتخابات اولا ، الشريعة اولا الى ان وصل بنا الأمر الى هتاف الشعب يريد اسقاط المشير ، ويسقط حكم العسكر .

الشئ بالشئ يذكر اسمع الان صدى انغام اغنية العندليب الاسمر نبتدى منين الحكاية فدعنى اسئلك لو حكينا يا حبيبى نبتدى منين الحكاية ؟
لنبدئها من يوم 28 يناير عندما اشتد بطش زبانية العادلى وارتفع صوت المصريين ” عايزين الجيش يحمينا الشرطة بتضرب فينا ” وانتشرت المدرعات منتصف ليل ال 28 من يناير مصحوبة بهتافات “الجيش والشعب أيد واحدة” وتعاقبت بعدها بيانات المجلس العسكرى واحدا تلو الأخر تشيد بالشباب وبالشعب المصرى العظيم حتى يوم 2 فبراير حين اقتحم همج مبارك ميدان التحرير فيما عرف بموقعة الجمل التى استمرت ساعات طويلة سقط فيها أطهر الشباب نفوسا وسط تجاهل تام من المؤسسة العسكرية متسترة وراء ستار يدعى ” الحياد” هنا سقط قناع العسكر وظهر طرف شعاع لحقيقة أن العسكر كاذبون.

العسكر كاذبون حينما اعترف طنطاوى برفض المؤسسة العسكرية لأوامر أطلاق النار على المتظاهرين
ثم أنكر فى شهادته فى محاكمة المخلوع ان يكون قد تلقى اوامر بأطلاق النار على المتظاهرين.
العسكر كاذبون حينما نفوا دهس متظاهرى ماسبيرو بالمدرعات او استخدام الرصاص الحى فى الوقت نفسه الذى تم قتل مينا دانيال برصاص حى وغيره من المتظاهريين وتم سحل العشرات بالمدرعة التى ادعى العسكر سرقتها.
العسكر كاذبون لما نفوا سحل شهداء محمد محمود والقاءهم الى جانب القمامة.
العسكر كاذبون حينما نفوا سحل فتاة القصر العينى ثم اعترف عمارة فى المؤتمر الصحفى بسحلها ثم علق اسبابه على شماعة الظروف.
العسكر كاذبون يلقوا بجرائهم على ظهر الفلول والطرف الثالث والأيدى الخفية وتعجز اجهزتهم الاستخباراتية عن كشف هذه الايدى الخفية او اظهار الطرف الثالث .

العسكر مراوغون حينا اشعلوا الخلاف في نفوس المصريين وخيروهم فى استفتاء بين الدستور والانتخابات وحيرة بين نعم و لا واسقطوا المصريين فى فخ الجهل وفى احضان الأسلاميين ثم خرجوا علينا بأعلان دستورى يحل محل الدستور.

العسكر متخاذلون حين صمتوا على نظام فاسد لمدة تزيد عن ال 20 عام ثم خرجوا ليقفزوا على ثورة شباب ادعوا حمايتها.

العسكر متواطئون حينما سمحوا بفرم الملفات فى قصر العروبة وفى مقرات امن الدولة المختلفة وبالمجالس المحلية ومجلس الشعب ولم يمنعوهم.
متواطئون حين تركونا نعانى من الانفلات الامنى والبلطجة ساعات وايام وشهور ثم فى لحظة واحدة اختفت البلطجة وانتشر الامن وساد الامان حينما قرروا تأمين العملية الانتخابية.

العسكر مضللون ساءوا الى الثورة والثوار وسموهم بالعمالة والخيانة وسموهم بالبلطجة اشاعوا الفوضى والطائفية نشروا الكذب على لسان اعلاميين ماسبيرو والصحف القومية وحينما اثبتت التحقيقات نزاهة هؤلاء وان ليس منهم من هو عميل او ممول تكبروا ولم يعتذروا او يحاكموا بتهمة السب والقذف حرضوا على متظاهرين سلميين فى ماسبيرو فأقتتل المصريين وانتشر الدم تحت رعاية اعلام العسكر.

العسكر أشقياء مارسوا مراهقتهم على فتيات مصر الشرفاء وهتكوا اعراضهن فى الطرقات ثم تولوا الكشف عن عذريتهن ولم يقدم ايا منهم للمحاكمة حتى وقتا قريب.

العسكر جبناء سكتوا على مقتل جنود مصريين برصاص اسرائيلى على الحدود المصرية ولم تقم بأى فعل يذكر حتى ابسط ردود الفعل المتمثلة فى طرد السفير الاسرائيلى او استدعاء السفير المصرى تغافلوا عنه ورفضوه ثم استعرضوا قوتهم وسحلوا وقمعوا المتظاهرين والمعتصمين امام السفارة الأسرائيلية.

العسكر عملاء اصروا على تصدير الغاز لأسرائيل فى الوقت الذى يعانى فيه المصريين من ازمة انابيب وارتفاع فى اسعارها بشكل مبالغ فيه.

العسكر أغبياء اقاموا موازنة فى غير محلها عندما وضعوا مبارك فى كفة والشعب المصرى فى كفة ، الا بينكم رجلا راشد .لا مجال للموازنة بين مبارك والشعب ، كفة الشعب راجحة مهما مر من وقت

عام بأكمله لم يتنازل فيه العسكر عن صفاتهم السالف ذكرها ولكن فى نفس الوقت تحلى المصريين بالمزيد من الاصرار والعند والشجاعة وسيظهر ذلك جليا فى يناير القادم وسيخرج فى صوت واحد يسقط حكم العسكر ..موعدنا خلال ايام.

ندعوكم للتدوين ضد حكم العسكر حتى يوم 25 يناير لينك الايفنت |
http://www.facebook.com/events/283272988394746/

تدوينة (ث)…ثورة
http://3ayelkbeerawy.blogspot.com/2012/01/blog-post.html
تدوينة ابادة العنصر الثائر
http://sosa11sosa.blogspot.com/2011/12/blog-post_17.html
الشعب يريد تبديل الثورة
http://bit.ly/Ai2HIU
الساكن فى الاعالى
http://on.fb.me/xMa2k2
رومانيا على الطريقة الطنطاوية
http://bit.ly/zZ05wS

رسوم ضد العسكر
http://sosa11sosa.blogspot.com/2012/01/scaf.html
http://sosa11sosa.blogspot.com/2012/01/we-are-gonna-renew-our-revolution.html

Saturday, January 21, 2012

علاقة


الشتاء صريح
أقرب إلى أن يكون فضيحة

Friday, January 20, 2012

شي الله يا ماركس

شي الله يا معلّم ماركس
شي الله يا سيد لينيين
القرش على الله بطبعه
والصحة نجيبها منين ؟
والعالم كله بيرقص
شي الله يا سيد يا ماركس

العملة الصعبة رصاصة
قاتل دايما بيصيب
الكوكب غير مهتم
أمريكا غرضها مريب
والرأسمالية الفجة
هي السبب يا حاجة
في أزمة الأنابيب
واهو لما الموتى يزيدوا
العالم بارضه هاينقص
شي الله يا سيد لينين
شي الله يا سيد يا ماركس

صنف البني آدم شاحح
والناس بتبيع في السوق
والسوق نفسه بيتباع
وحقوق بتضيع وحقوق
والسر الغالي مشاع
ممكن يتذاع بجنيه
ببساطة المنطق عيرة
واهو كله وله تسعيرة
بيقولوا مجاعات وبلاوي
وشاكيرا
سايبه بيكيه
هاتركّز ليه وعلى ايه ؟
والعالم كله بيغلَى
بس انت قيمتك بترخص
شي الله يا سيد لينين
شي الله يا سيد يا ماركس

Thursday, January 19, 2012

مقتنيات

نعم .. الكلب صديق وفي
عليك فقط أن تشتريه أولا

Tuesday, January 17, 2012

هبوط اضطراري


قال صديقي
والنبيذ يتقطّر من شفتيه .. كاللعاب

ماذا سأفعل
إن رأيتك في النعيم
ولم أميّزك ؟

المضيفات الجميلات
يبتسمن كجرح مقاتل في الريح
ويقول آخر
لا مسافر .. يعود

أخبرنا قائد الطائرة
قد نفذ منّا التأمّل
وهانحن نلجأ إلى هبوط اضطراري
في محطة الذكريات

الليل أجندة سوداء
عام مضى
حتى ولو تخيّلت أن العام لم يمضي
وأن رصاص الجنود في الشوارع الرئيسية
أمر شائع

تطعم الشمس زبائنها
وتنبح الكلاب في وجه الشوارع
بينما
أعمدة النور
عاطلة عن العمل
سوى من حراسة النهار
وصحبة الكلاب الضالة
والعاهرات

عد سالما أيها الريح
أتحسب أني جننت
لا خير في الطلقات ما لم تصبك
لا خير في ظنونك ما لم تصبني
يا صديقي
هل ندخل الجنة جزاء أحلامنا ؟

الذكريات تموت في عبث الطريق
القتلى يبتدعون اسم الله ليصبحوا شهداء
والنوافذ تطل على الكوكب الخارجي
في هدوء جندي المرور

نعود كما ولدنا
فلا يبقى للكوكب ظلا سوى خيالاتنا
الصمت ينبح في المرآة
فلا تراني
هل أراك ؟
هل أميّز صمتك الان ؟

إذا كنت لن أستطيع أن أميّزك
بعد زجاجة أخرى
فكيف يميّز بعضنا بعض
بعد قيامة عبثية تماما ؟ ! .

Wednesday, January 11, 2012

اغتصاب

قهوتي .. حمقاء .. لأني لا أدللها
اشربها كعجوز ينهال على قاصر بالقبلات
هي مُـرّة ك صوت أبي
ومزاجي .. لا يهتم ..
الموضوع ببساطة ..
أن لا أحد يهتم بالقاصر .. طالما أن العجوز يملك ثمنها .

Tuesday, January 10, 2012

فرق توقيت


لو مت قبل ما أوصّلك
هايقولوا مات بطل
وهايكدبوا
عن قصة الأسد الملك
والضبع
بس أنا طول مانا عايش
هافضل في عينيهم كدّاب
و ف عينك خايف ..بالطبع