Friday, December 28, 2007

علاقة الحجاب بالتخلف...علاقة التخلف بالحجاب

وانا بتصفح المدونات علي الشبكه العنكبوتيه ساعات بلاقي مدونات عبقريه ومدونات متناقضه ومدونات ملهاش معني
انا بحب جدا مبدأ
"كل واحد حر"
لكن ازاي يبقي الانسان مقتنع بالحريه وبالتعدديه في السياسه والتفكير وعقله مليان بحرية التعبير وبحرية الانسان وبيدور علي تحرير مصر من الفكر المتخلف اللي احنا عايشين فيه
وفي نفس الوقت
بينتقد بشده نوع من التفكير
فاهمين حاجه؟
افهمكم انا
.................................................................................
دي مدونة عنوانها
الحجاب والنقاب وزبالات اخري
واللي مستغربله
ازاي واحد بينادي بالحريه كاتب بنفسه في مدونته
"من حقي ان يكون لي راي ومن حقك ان تختلف معي"
ايه مفهوم الاختلاف عنده
يعني انا علشان مختلف مع واحد اعد اتريق علي تفكيره واتهمه بالغباء والجهل والتخلف
الكاتب بيقول ان الحجاب ده تخلف , وان المحجبه مبتعرفش تفكر لانها كاتمه دماغها بكاتم الذكاء او زي ما قال
يعني مثلا مثلا انا لما البس طاقيه ابقي غبي
ايه التناقض ده
وبيتهم وعمرو خالد والشيخ القرضاوي باتهامات ..ما يعلم بيها الا ربنا
عرفتم ليه احنا دولة متخلفه
اه احنا دولة متخلفه
لان اي حد بيختلف مع حد بيقول للتاني انه حمار
ازاي هو بينادي بحرية التعبير (للدنماركيين ) اللي اهانوا رمز الاسلام الرسول عليه الصلاة والسلام وبيعترف بان دي حرية
وبينادي بحرية عبدالكريم نبيل
وهو مش قادر ينادي بحرية البنت المحجبه
وبيعتبرها متخلفه لمجرد ان لبسها مش عاجبه
يا اخي زي مانت معترف بحرية دول...فيها ايه لما تعترف ان البنت المحجبه حره تلبس زي ما هي عايزه وان الموضوع ليه علاقة بمبادئها اللي حتي لو هتختلف معاها لازم تحترمها
عشان يبقي اختلاف وجهات نظر محترم
لكن كون قبول فكر ان الحجاب تخلف
هو بيقول ان المحجبه متخلفه
طب فين الدليل لا مؤاخذه العلمي
دايما عندنا في الكلية البنات الاوائل محجبات
مش فاهم اصلا ايه علاقة اللبس بالذكاء او بالغباء
جايز انك تلاقي واحده محجبه ذكيه وجايز تلاقيها غبيه
وذكائها او غبائها ده اكيد مالوش علاقة بحجابها , ده ليه مقومات علميه تانيه
وليه دراسها...ولا يعن يالاخ درس كل المحجبات وصنفهم علي انهم محدودي التفكير
تناقض غريب في وجهة نظر شخص واحد وعلي نفس المدونة

Friday, December 21, 2007

compose messages


ذكر أحد الأطفال بأنه رأى في منامه

طيف أبيض جاء يبلغه الرسالة التالية : ردد 10 مرات : إفتح يا سمسم أبوابك نحن الأطفال

... ملاحظة : أرسل هذه الرسالة إلى 10 أشخاص وسترى "علي بابا" في منامك

.. وإذا قرأتها أكثر سترى ميكي ماوس وسيأتيك كونان يحمل أخبارأ سعيدة

.. تنبيه هام جداً : حدث فعلأ أن أرسلت الرسالة إلى شخص وأهملها فانقطعت عنه قناة سبايس تون"..يا خبر ابيض "

وشخص آخر عمل بها فرزق بشريط "غرندايزر" ..( بموت في غرندايزر) مش كده بارضه؟

وأرسلت إلى شخص واستهزأ بها فانقلب إلى " زعبور" عارفين زعبور؟

ولا تنس إن أرسلتها سترى "بطوط" الليلة
.........................
تحفه مش كده

.........................

عارفين طبعا الرسائل دي ..بتيجيلينا كلنا عالايميل من forward msg

يعني اي حد بيلاقيها حتي ساعات من قبل ما يقراها بيعملها compose

طب والله عيب

والله عيب

لان معظمها اصلا حاجات مغالطه للاسلام وكلها هبل

انا من كام يوم جاتلي رساله

بتقول ان القران بيتمنع في هولندا وبيعملوا تصويت عشان يشوفوا اذا كانوا هيمنعوه او لأ واتبعتلي لينك علشان اصوت

وقالوا انه مكتوب بالهولندي

وفيه كمله بالهولندي ( مش فاكرها ) معناها نعم وكلمه تانيه معناها لا ومعرفينني النعم من ال لأ

ودخلت فعلا علي السايت

بس قبل ما اعمل اي حاجه

قلت طب هو انا هدوس كده زي الحمار

طب ما اترجمها

ولما ترجمتها من علي موقع

لقيت السؤال كالتالي

* هل توافق علي ان يتم التفاوض مع طالبان ام لا*

وطبعا الرساله مش مبعوتال لوحدي

دي مبعوته لواحد .قام هو بعتها لكل اللي مسجلهم عالايميل ...وكل واحد من اللي مسجلهم يبعتهم لكل اللي عنده عالايميل وهكذا

اه يا بهايم

يعني كل اللي صوتوا بنعم موافقين او حتي مش موافقين عالسؤال .. جاوبوا بنعم

علشان التخلف طبعا اومال علشان ايه

ومش بس الرساله دي

عشروميت رساله زي دي بتجيلي بمعدل كل يوم رسالتين

و90 % منها غلط

لا بقي واللي بيفقع مرارتي

الاقي واحد كاتب رساله فيها تسبيحات وادعيه وكاتبلي في اخر الرساله

ابعتها تكسب حسنات ..ولا كاني في مسابقه للشمعدان

لا واللي يفقع اكتر واكتر انه يقوللي

" لو لم ترسلها فانت لا تستحق ثوابها"

" لا تبخل علي الله فانت تحتاجه"

والحاجات المتخلفه التانيه بقي زي

واحد مبعتهاش لصحابه اللي عالايميل الايميل بتاعه اتحرق ...لو مبعتهاش هتموت متعور

او هتموت في حادثة تليفزيون ..او اي حاجه من الشلل اللي زي ده

جاتلكوا الرساله بتاعة

"الراجل اللي رسم الكارياتير مات محروق والدنمارك مكتمه عالخبر في اخت في فلسطين شافت في المنام ان اللي هيرسل الخبر ل 10 اشخاص ..ربنا هيفرحوا بعد اربع ساعات"

يا حلاوه

اشمعنا يعني اخت من فلسطين..ليه مش اخت من كوالالمبور

وليه الراجل مات محروق..ما ماتش مخنوق ليه

وليه بعد اربع ساعات

وليه 10 اشخاص بالتحديد

حرام عليكوا اموت مشلول وانا عندي 18 سنه ...طب استنوا كمان سنتين او استنوا لما اطلع رخصة العربيه

او استنوا لما اتجوز ولا اشتغل ولا اسافر ولا ادرس اخراج ولا اعمل اي حاجه

يعني هتشل كده وانا لسه بعيد سنه اولي تجاره

طب حتي استنوا لما اعدي السنه من غير مواد

ولو شيلت مادتين محدش يزعل

لكن لو عدت السنه تاني

ابقوا ابعتولي الرسايل دي كل تلت دقايق

قصة طفل...ممدوح عبد الحميد

في بلاد الحزن
كان هناك طفلا
قتيلا .. يرقد
بعد ضياع القطن
في بلاد مليئه بالذكريات
واشجار الزيتون ماتت
ورفرفت اعلام الاهات
والهويه .. ضاعت
كمثلها من المدن
كما ضاع علم المجد
كما ضاع الوطن
كان الطفل يلعب
ياتي ويعود ثم يعود ثم يذهب
واذا سالته .من انت
دائما يكذب
طفلا يلهو
كمثل كل الاطفال
والحرب دائرة
تقتل حتي صخور الجبال
والمدن ليست ثائرة
كعادة الاجيال
بل انها نائمة مثلها مثل الاطفال
كرضيعة
وديعة
في جيب امها
وفي حضن ابيها
تعبث بايديها
وتعض انامل وجنتيها
الجميلتين
الرقيقتين
ومع الفرق
فالطفله كلما زادت
وداعتها
كلما زاد جمالها
وصفوتها
اما البلاد فتسكت
وكانما نزعت زرعتها
والنساء لا تفعل شيئا سوي العويل
والرجال كانما فقدت خصيتها
يلهون في ليل طويل
يتحدثون
ويتسامرون
في قلب الليل
وسيل
من الطلقات
والصرخات ياتي من كل جانب
فتزيد الابتسامات
وتعلوا الضحكات
انه الممات
لا شئ الا الممات
فما ينفع البكاء
انه لم يعد جسدا
انه اشلاء
فما عادت تمطر
وزاد جحيم السماء
ولم يعد هناك هواء
ولم تعد تمطر مرحا
ولم يعد هناك شتاء
فما ينفع البكاء
الطفل الذي مات
فوق الغصن
في الربيع
وفي الصيف في موسم القطن
قتل الطفل
وزاد الحمل
فقتل الحلم
والطفل ما زال حتي بعد موته
يتالم
لعل احدا من اهله يتعلم
او يتكلم
او ربما يذهب ويقاتل من قتل الابن
وكيف ينام له جفن
هل قدم العدو الكفن
لا
بل زاد من القسوة
انه كالعفن
لا يمكن ان يكون في السماء
قد قطن
ارض القدس
اه بكل .حرقة وياس
كم جائك من منتصر يعرف ما معني البأس
اما هم
فهم ليسوا رجال
لقد نسوا كيف هزموا الفرس
قد قتل الليث طفلا جميلا
يبكي علي مجدا ضاع منذ زمنا طويلا
قد قتله حصان عربي
نسي انه اصيلا
نسي كيف كان سيفه يهزم الاعداء
قبل نزوله علي جسده كالوباء
يقطع كل الاشلاء
لقد نسي
سنوات الشموخ
وكما قال الرجل
قد ملاتهم الشروخ
انهم ليسوا عرب
انهم مسوخ
نعم انا عربي
ايها الطفل الغبي
ليس انا من قتلك
ولكني ايضا صبي
قد مات فيه الحلم
ومات حلم
عن عصر ذهبي
ومن اين ياتي الذهب
والكل يطل اللعب
الكل يكذب
ولتنزل لعنة الرب
علي كل من يكذب
اعرفك يا صغيري بنفسي
انا رجل عربي فقدت ضميري
وفقدت بأسي
فما عدت اصلح رجلا
وقد مات حاضري كما مات امسي
وسيضيع مستقبلي قريبا
وستبحث امك عني
تقتلني
من فوق جبل شاهق
تدفعني
وان كذبت عليها
تكذبني
فقد عرف الكل الحقيقه
لقد مت ايها الطفل
وانطفا بريق عينيك
ومن عنك
يعوضني
ومنذ دقيقه فقط
قد تعب الكلام
وقد بدا لي انه صمت
ولكنه لم يصمت
انه يتعنت
ويتشتت
كما تشتت الابناء
والامهات
كما تشتت الاولاد
والبنات
كما نزحت الذكريات
الي مصر والخليج
وبلادنا الشاميات
ولجات الي الاغراب
كل الصحوات
والام
واهات
تخرج من قلب السكوت
تمزق صدري واشلائي
وتبكي ...ولا يصعب عليها بكائي
وتعود بنا الذكريات
الي ارض الشتات
سيناء ومصر بل
يريدونها من النيل الي الفرات
هل تعرف او تفقه يا طفلي العزيز
لقد فعلوها الانجليز
وقد قرات عليهم كتب القران
والانجيل والتوراة
فكذبوا كل اديان السماوات
واخترعوا اديانا
تكذب كل ما فات
تكذب التاريخ
والكتابات
وتمزق الخرائط والرسومات
ولكن ليس العيب عليهم
انه علينا
فنحن من سقطنا من فوق الصراط
وهوينا الي جحيم الشهوات
فزادت في بلادنا المصليات
ولم نركع ولم نسجد ولم نؤدي الصلوات
وزادت في بلادنا الموبقات
والمومسات
فقدنا حتي التراب
واصبح يمشي هو فوقنا
وحزن القران وتخللي عنا
من الذل الذي اصابنا
وقد فقدنا العبارات
وتاهت الكلمات
ورفضت ان تستجيب لنا
قصائد المحبه
وقصائد البذاءات
زادت
وما العن تلك الزيادات
وقد كرهتنا
الاشعار والبيوت
والاغاني
واصوات السكوت
وكرهتنا كل انوار الشوارع
حيث زادت المدامع
وزاد الخشوع
وزاد الخضوع
فوق اطراف المسامع
فامرونا
حكامنا بالسكوت
وبدا العدو في ملأ الشروط
فتبا لكل هذا
ايها الطفل
قل الان؟
لماذا ؟
لم تدافع انت؟
لا تقل لي انك طفل
فكلنا اطفال
فما عاد هناك
في بلدنا رجال
ديسمبر 2008

Thursday, December 20, 2007

تم بحمد الله مسح المدونات

Photobucket
تم بحمد الله مسح
مدونة العربي
و مدونة اشعارنا
وان شاء الله كل المواضيع والاشعار هتتكتب هنا بعد كده ...وانسوا حكاية التخصص دي
طبعا انا عملت كده توفيرا للمجهود بتاعكم وبتاعي بارضه
وكمان لان الاشعار مظلومه لوحدها
فوجودها هنا هيسهل للناس انها تشوفها
وبالنسبه للمقالات السياسيه هتتكتب هنا بارضه ان شاء الله
وكل سنه وانتم طيبين
بمناسبة
العيد
والكريسماس
والسنه الجديده
والامتحانات :D:D
وكل حاجه حلوه

Monday, December 17, 2007

بحبك يا سافله...حدث في مصر الملبوسه

في ليله من الف ليله وليله اللي الواحد بيعيشها في مصر
وقبل ما يدن الديك ببتاع خمستاشر ستاشر ساعه كده
وكان البدر ساطعا في ليلته ال 14
وكانت خيوط الشمس تغيب وكانها تتمسك بالسماء , لا تريد ان تتركها
ماكنش في تاكسي كالعاده راضي يقف
فكرت تفكير عبقري
وقومت راكب اتوبيس
ودفعت التذكره
وقعدت
وفي المحطه بتاعتي نزلت
(عادي يعني ايه اللي ممكن يكون حصل في الاتوبيس)
(1)
المهم اول ما نزلت
لاقيت طفلين تبدو عليهم علامات البراءه والسذاجه والطيبه
ميزيدش عمر كل واحد فيهم عن 12 سنه
واحد واخد غرزتين في وشه... وواحد حالق شعره زي احمد زكي في فيلم كابوريا
واحد كان في ايده مطوه بيلعب بيها ...والتاني ماسك سيجارة من بتوع ( بوب مارلي) وكنت معدي من جمبهم
روحت رامي عليهم ودني
( وما ادراك ما ودني)
وسمعت كده بالصدفه ( واخد بالك انت من بالصدفه دي) لطفل ابو مطوه بيكلم الطفل ابو سيجاره
بيقوله ايه يا عم" جيفا" اختصار ل"جيفارا" طبعا.. ما تروق كده وتفكك من الواد ابن ال(تيييييت) هو انت لازم كل واحد يشتمك تعمله عاهه مستديمه ..علي ايه يا عم ده عيل (بييييييب) ميستاهلش انك تبوظ الدماغ اللي انت عاملها
.............................
(2)
وانا ماشي
قابلت اتنين صحابي
من ايام المدرسه
كانت علاقتي بيهم متزيدش عن ايه يا مان عامل ايه ايه يا ريس عامل ايه ...
طب عايز حاجه ؟
لا سلام
،
يا نهار ابيض
ممدوح زيكا
رؤوف
ايه يا زيكا يابن ال(تييييت) انت فينك ياض ...
قلتله: انا كويس يابني الحمد لله ..انت عامل ايه
انا كويس....واحشني يابن ال(تيييييت) محدش بيسمع اخبار عنك ليه ياض يا ( تييت ) هه ؟ ..رد.
عاي بقي يا مان ..مشاغل
" وعلي راي الدكتور احمد خالد توفيق لما قال "
رد عليا رؤوف: بكلمه من تلت حروف ذات اصل اسكندراني تدل علي الاعتراض....ليه يعني انت اتعينت في الوزاره ..وحركة بالانف تدل علي الاعتراض
قلتله عادي بقي يا رؤوف عايزين نبقي نشوفك كده ...
خلاص اوك
عايز حاجه
سلام
.........................
وانا معدي في نفس اليوم الجميل المشرق ده
كنت معدي من جمب مدرسه ابتدائي
ووانا ماشي
"بالصدفه"
سمعت طفلين بيهزروا مع بعض
ولا يا احمد يا بتاع اسماء
ايه ياض يا مازن يا ( تييييت ) يا بتاع ميس الهام
يالا يا احمد يا ( تييييت ) ياللي امك ( تيييييت ) وابوك ( تييييييت ) يا ابن ال تيييييييييييييييييييييييييييت وكلمه اسكندرانيه من تلت حروف تدل علي الاعتراض
انا بارضه اللي امي ب( تيييييييييييييييت ) يابن الراجل ال( تييييييييت) ياللي اختك ( تييييييت) وعيلتك كلهم ( تيييييت)
ياللا ياض روح لامك قولها تبقي ( تيييييت ) عشان انا مش ه( تيييييييييييت)
* طبعا كفاية كده انتوا اكيد فهمتوا كانوا بيقولوا لبعض ايه*
.....................
(3)
فنفس اليوم
لاقيت اتنين خارجين من الجامع وفنفس ذات الوقت واحده من اللي هم معديه
وكانت طريقة المعاكسه كالاتي:
يا شيخه حرام عليكي بقي داحنا لسه خارجين من الجامع
القمر بيصلي ؟
طب عايزين نصلي العشا مع بعض
خدي بس هقولك
ياللا مالكيش نصيب تاخدي حسنات النهارده
...........................
(4)
واحد صاحبي بيحكيلي:
ماشي انا وواحده زميلتي في الجامعه
لاقيت واحد معدي من جمبنا ومبحلق فيها وبيقولها
ايه يا موززه ..يخرب بيت حلاوتك
تنحت للدنيا كده
وقتله خد يا ض يا ابن ال( تييييت)
قاللي انت بتقول مين ياض يا (تييييت)
يعني هكون بكلم مين ياض يابن التييييييت هي مش ماشيع مع راجل ولا انا ابن ( تيييييت)
وطبعا انتوا عارفين الباقي
.............
(5)
كنت في يوم رايح لوالد زميلي ..فالمدرسه اللي بيشتغل فيها
وهي مدرسه .....الاعداديه الخاصه للبنات
ووانا داخل الباب
لاقيت واحد محترم كده بيقوللي
انت رايح فين يا كابتن
قلتله انا رايح لمستر محمود بتاع الانجليزي
قاللي طب استني انا هناديهولك
قتلته لا حضرتك متتعبش نفسك انا هعرف اوصله هو قاللي هو في فصل 3/5
قاللي طب اتفضل
وخللي بالك من نفسك
قلتله نعم
قاللي خش خش
دخلت
لقيت واحده بتوقفني بتقوللي :
انت رايح فين يا موزه
نعم
رايح فين
انا رايح لمستر محمود بتاع الانجليزي
الحقي يا بت يا مي في واحد عايز الاستاذ محمود
وضحكت كده ضحكه من بتوع هند رستم
وصحابها جايين يجروا كده يشوفوا في ايه
روحت واخد رجلي ومديت كده خطوتين
مشيت لحد ما قابت مدرسه بنت حلال كده
قالتلي انت بتعمل ايه هنا يابني
انا ..حضرتك رايح لمستر محمود بتاع الانج..
يوووه...هو يوم اين ستين (تيييت) من اوله
اتفضل اطلعله في مبني ب الدور التالت اخر فصل عالشمال
" هو استاذ محمود ده تاجر مخدرات ولا ايه"
وانا طالع لاستاذ محمود الفصل قابلت اتنين بنات بيتخانقوا
ياللا يا بت يا ( تييييييييت ) يا بنت التييييت ده انتي صحييح تيييت زي مامتك
" يا خراشي"
انا بارضه يا سافله يت بتاعة استاذ محمود
" يالهوي"
يالهوووووي
الله يخرب بيتك يا سامح انت ومستر محمود ابوك ده اللي هيودينا في داهيه
.......................
(6)
فيلم هي فوضي
فيه كمية شتايم
وفيه مشهد اتنين ستات في السجن
صفوه وواحده تانيه
بيتخانقوا
وفوسط ما هما بيضربوا بعض لاسباب مش هقولها لانها لوحدها منيله بنيله
بتقولها
ده انا هطلع ( تيييييييت ) امك
وطبعا مش محتاجه مفهوميه
بالاضافه الي ان كل مشهد ممن مشاهد الفيلم اللي فعلا عجبني جدا
كان فيه شتيمه حتي المشاهد العاديه اللي مفهاش احداث تخص مشكلة الفيلم الرئيسيه
........***************................
الخلاصه
.......***************.................
ان قلة الادب في مصر دي حاجه طبيعيه
وبالعكس دي بقت في بعض الاحيان ...دليل علي الحب
* راجع الفصل رقم(2) بتاع رؤوف
..
انا مش ضد ان كل واحد يكون عنده حرية في الكلام
بالعكس
دي حاجه كويسه وتطور مفيد جدا لحرية التعبير
بس في الفاظ معينه بتجرح الحياء العام
هي دي اللي انا معترض عليها
ومعترض عليها جدا
لانها طبعا مضره بالذوق العام
ولان احنا لسه موصلناش لسه لدرجة الحرية اللي تخللي كل واحد يقول اي حاجه من غير ما يتفهم غلط
او " يتعلم عليه" بمعن اصح
وهتستغربوا جدا لما تعرفوا اني شايف ان دي مش غلط
اقصد هنا الجراه في الكلام...مش الافلاظ المعينه اللي انا شاورت عليها بكلمة ( تييييت) والمقصود بيها
ان في الافلام او الاغاني اللي فيها الفاظ من دي
بيقطعوا فيها الصوت
وبيعملوا صوت جرس خفيف كده
وعشان ابقي قولت اللي ليا واللي عليا
افتكر ان فيه حديث عن الرسول صلي الله عليه وسلم " فيما معنا" انه يوم القيامه
سياتي رجل بصلاة وبصوم وياتي وقد سب هذا وسرق هذا وصفك دم هذا ..فياخذ هذا من حسناته وهذا من حسناته
وطبعا مش هتنفع ساعتها الصلاه ولا الصوم ولا الحاجات التانيه
لان المعاملات في الاسلام مهمه جدا
...
انا عايز اقول اني مش هكدب عليكوا واستثني نفسي واقول اني مبعملش كده
لان ده في حد ذاته يعتبر نفاق
لكن علي الاقل الواحد بيعمل الغلط وهو عارف انه غلط
او علي الاقل الواحد مبيوصلش لدرجة الطفلين اللي بيتخانقوا او البنات اللي بتسب الدين لبعض في الشارع
لكن اكيد.... طريقة الكلام دي
عاده مصريه اصيله متاصله من زمن الفراعنه لحد دلوقت
وده اكيد ملموس وموجود وكلنا عارفينه وحاسينه
في كل الكبقات مش هنخص طبقه معينه
لا
دي حاجه كده زي سلامو عليكو
سلاو عليكو

Friday, December 14, 2007

عبد الحليم والمعجزات

Photo Sharing and Video Hosting at Photobucket
اليومين دول هافف عليا الحاج عبد الحليم حافظ الله يرحمه ..عشان بمر بحالة قولون وبحب علي روحي كل يوم
عبد الحليم حافظ واحد من الناس اللي زمان ركبوا الموجه
بس ركبها صح
ولا انسي طبعا من ركبوا الموجه واتفضحوا زي عبد الوهاب الله يرحمه
المهم
عبدالحليم حافظ ...الله يرحمه ويبشبش الطوبه اللي تحت راسه ( نفسي اعرف يعني ايه) قدر يكسب الجمهور بطريقه غريبه
مش لان صوته هو احلي صوت سمعته في حياتي
او لان الحانه هي تعتبر اعظم الحان في تاريخ الموسيقي ( من وجهة نظري الغير متواضعه خالص) ولا لان الموسيقي كانت بتخدر الناس وهي قاعده بتتسلطن مع كل ما سبق بالاضافه الي الحشيش والخمره والاصطباحات والقعده الحلوه .
لكن لان عبدالحليم عرف يركب الموجه صح
بمعني انه غني للحب في وقت ما الناس بدات تمل وتزهق من ام كلثوم وعبدالوهاب ( ومحدش يحدف طوب) بمعني ان عبد الحليم حافظ كان هو التغيير بتاع الموسيقي والنقله اللي نقلت الناس من زمن عبد الوهاب وام كلثوم الي نجم الاغنيه الشبابيه عبد الحليم حافظ
اي والله
يعني في شبابه لما كان بيغني اغانيه الاولي
كان بيغنيها بالحان شبابيه ( بالنسبه للوقت ده ) وفجاة وهم مش واخدين بالهم ...
قامت الثوره
( انا لا اعرف لماذا قمنا بثوره ... انا كنت في الحمام ساعتها )
وكان لازم عبده يركب الموجه ويراكب المراكب السايره..ويغني للثوره
وغني عبدالحليم ...انجح وافضل ما غني للثوره في هذا الوقت.
وفوسط ما هم مش واخدين بالهم لسه
قام العدوان الثلاثي
غني للعدوان الثلاثي
وحط في النص ...التاميم .. والسد العالي
( في ملحمه غنائيه قوقعيه رائعه اسمها)
" حكاية شعب"
بتاعة ..: راح علي البنك اللي بيساعد ويدي ...قاله حااااااسب . هنا مش باركينج
وهي حكاية حرب وتار ..بيننا وبين الاستعمار
ويا سلام عليك يا عبدالحليم لما النكسه جت
وغنتلنا عدي النهار
عدي النهار ..والمغربيه جايه تتخفي ورا ضهر الشجر
اللي هي بتاعة الابنودي طبعا عمنا وعم الناس
لما بيقول
تحلم ببكرة .. و اللي حيجيبه معاه
تنده عليه في الضلمة و بتسمع نداه
تحلم ببكرة .. و اللي حيجيبه معاه
تنده عليه في الضلمة و بتسمع نداه
ومش فاهم لسه ايه علاقة الضلمه بالصوت ..مع احترامنا لعمي وحبيب قلبي من جوه ومن بره الابنودي
وكذا دواليك دواليك...الخ الي اخر ما غني قبل ما ينتقل الي رحمة الله
ولا يمكن ننسي اغاني عبد الحليم الوطنيه ايام حرب 73 و اغاني الانتفاضه
اللي الناس لو سمعتها دلوقت ... هتنط بعد بكره في فلسطين علشان تحارب
فعلا كل الشواهد بتقول انه ركب الموجه زي ما هو عايز وبدون ابتذال وهفلطه
ده غير ان غني ديني كمان
متفهمش ربنا تاب عليه كام يوم
عمل كام اغنيه تخللي الواحد يتوب عن البيبسي كولا ذات نفسها
وبعدين الراجل غني لكل حاجه في الحب
غني للي بيحب وللي لسه هيحب وللي مبيحبش وللي مش عارف يحب
وغني قصائد جامده اخر مقاس
زي طبعا قارئة الفنجان ...دي حاجه كده من ابو اخر او ( اخر حاجه) زي ما بتقول البنات
ومين بقي ينسي معجزات عبد الحليم في الغنا
لان عبد الحليم حافظ هو المطرب الوحيد
اللي تنفس تحت الماء .( لا مركب خياشيم يا واد)..بس بعد كده ملحقش يمسك نفسه وانه يغرق يغرق يغرق
وهو بارضه اللي مسك الهوا بايديه ( بطل كدب بقي) ال ماسك الهوا ال
وطبعا غيرهم وغيرهم
in other words
النجاح والشهره والشعبيه مش بييجوا للفنان عن طريق موهبته او موهبة اللي بيشتغلوا معاه لكن بييجي لما تعرف الناس قد ايه هو حاسس بيهم وبيحسوا بيه لما يبقي كانه واحد منهم سواء في افلامه او في اغانيه
يعني بالنسبه لعبدالحليم ...انا في رايي الشخصي (الغير متواضع خالص بارضه ) ( وبلا اي فخر ابدا ) نجاحه كان لانه
بيغني للناس ... مش بيغني عليهم .. وسلملي علي عمرو دياب

Monday, December 3, 2007

في الاغاني

الاغاني .. حرام ..او مش حرام مش هتفرق
المهم اني بحب اسمع الاغاني
وعلي حسب الموود
بمعني
اني ساعات بتبقي طالبه معايا اسمع ام كلثوم وعبد الحليم ونجاة
وساعات تانيه ببقي هموت واسمع
eminem
50 cent
bep
fergie
sean paul
will smith
تناقض غريب بيحصلي في حكاية الاغاني دي
بمعني اني بحب محمد منير وعلي عكس معظم المنايريه ..بحب عمرو دياب وعاصي الحلاني وخالد سليم
ساعات ببقي عايز اسمع تامر او جنات
او جايز
انغام وشيرين وعايده الايوبي وحنان ماضي
بس كل الناس بتختلف معايا في اني بحب جاد شويري
اه بحب جاد شويري
بيعجبني الشو اللي بيعمله ..وستيله في الاغانيه
وساعات كتير جدا بحب اسمع
روك
evancense
& linkin park & green day & korn & creed & pink
وساعات الموود بيتقلب مره واحده واسمع اغاني كلاسيك اجنبي يعني
dean martin , george michel , elton john
وبحب اسمع بارضه
bryan adams , scorpion ,eagles , outlanidsh , blue
يعني وداني جايبه كل الدنيا
بكل انواع المزيكا اللي فيها
وكله حسب الموود
بس في اغاني كده الواحد بيحب يسمعها في موود معين
معرفش اسمه ايه
بس مثلا اغنية
ان مقدرتش تضحك...اللي غناها احمد زكي الله يرحمه في فيلم هيستريا
وغناها بارضه وجيه عزيز
عارفينها ؟
ان مقدرتش تضحك ..متدمعش ولا تبكيش .. وان مفضلش معاك غير قلبك اوعي تخاف .. مش هتموت هتعيش
وان سالوك الناس عن ضي جوه عيونك بيلمعش
متخبيش
قوللهم العيب مش فيا .. ده العيب في الضي
وانا مش عاشق ضلمه .. ولا زعلت الضي
مسير الضي لوحده هيلمع
ومسير الضحك لوحده هيطلع
مبيجرحش
ولا ياذيش
..........
كلام الاغنيه دي بيخليني مش عارف فعلا ايه هي حالتي...مش عارف ببقي زعلان ولا فرحان وانا بسمع الاغنيه دي
الاغنيه دي بالذات مش عارف ايه هو الموود بتاعها
لكن بحب اسمعها دايما
..
بارضه في اغنيه لوجيه عزيز
بتقول
ادن يا ديك... كمان شويه
الضلمه ليك ... والفجر ليا
والدمعه راحت .. الضحكه جايه
والحزن نشن ... ماجتش فيا
وهكذا ...بيعد يفرحني لحد اخر الاغنيه ..ويديني الامل
في كمان اغنيه ...لفيلم الجزيرة ..( فيلم احمد السقا الجديد ) معرفش ايه اسم الاغنيه بس عجبتني كلماتها
احم احم ..اسمع يا سيدي
احلامنا لسه بكر
ودموعنا بتجري نهر
والليل طويل اهات وويل ... مش باينله فجر
تحسي الاهات ..حبيبتي
وانتي عني بعيده
سهران جيتاري .يغني
اغاني جديده
حنيني وشوقي خوفني .
عيون الناس تكتفني
والبعد طعم مر
وبعدين بيعيد الكوبليه الاولاني
....
في اغاني كتير مميزه
بس دول انا بحب اسمعهم من وقت للتاني
وزيهم كتير
في النهايه ...انا ميهمنيش مين بيغني ..او نوع الغنا اللي بيغنيه ..
طالما الاغنيه حلوه ...هسمعها ..مش هيهمني هو مين او هو ايه