Sunday, October 26, 2008

رساله الي الله

الكلام ده كان من زمااان اوي , من حوالي 10 سنين
كنت في ابتدائي لما المدرسه بتاعتي طردتني انا واواحد صاحبي بره الفصل عشان روحنا التمرين وماعملناش الواجب
وقالتلنا الكلام ده :
" انتوا ازاي ماتعملوش الواجب انتوا ماتعرفوش ان الي ما بيعملش الواجب بيروح النار ... انتوا كده ربنا هيدخلكوا النار عشان ربنا ما بيحبش الاولاد اللي زيكوا , الولاد اللي ما بتعملش الواجب وبتلعب .. ربنا ما بيحبش الولاد اللي بتعد تهزر وتلعب وتسيب مذاكرتها اي حد مابيحبش المدرسة بيروح النار وانتوا كده ربنا هيوديكوا النار "
رديت انا وقلتلها :
" بس يا ميس انا عارف ربنا مش هيدخلني النار عشان هو عارف اني كنت عايز اروح التمرين "
ردت وقالت :
" استغفر الله العظيم يا حيوان يا سافل في حاجه اسمها ربنا يعرفني اوعي تتكلم علي ربنا كده تاني يحسن تدخل جهنم "
طبعا ماكانش ينفع اروح اقول لاهلي ان الميس زعقتلي عشان ماعملتش الواجب
فكرت انا واحمد صاحبي نعمل ايه نعمل ايه
قولنا نبعت رساله لربنا نقوله فيها عاللي حصل
وجيبنا ورقه كبيره
وكتبنا من فوق
بسم الله الرحمن الرحيم
المرسل : انا ممدوح يارب ومعايا احمد ( احمد ابو نضاره يارب مش احمد التخين ) ز
المرسل اليه : ربنا
المكان : فوق في السما
الرساله :
"بص يارب احنا عارفين ان احنا غلطانين ان احنا مش عملنا الواجب بس نيرمين دي رخمه اوي ارخم ميس عندنا في المدرسه وطردتنا من الفصل وضربتنا كمان يارب مشيها من المدرسه او موتها او اي حاجه المهم مش تدينا تاني وشكرا
باي
"
قعدنا اسبوعين الميس ما اتحركتش من المدرسه
ابتديت اقتنع انا واحمد ان ربنا ما بيحبش الولاد الصغيرين عشان ما بيمسعوش الكلام و بيلعبوا ومابيعملوش الواجب
لحد ما قولنا نبعت لربنا رساله تاني
المرسل : ممدوح واحمد صاحبه ابو نضاره مش التخين اللي قاعد في تخته 3
المرسل اليه : ربنا
المكان : فوق في السما
الرساله :
" يارب احنا كنا بعتنالك رساله من فتره عشان تطرد ميس نيرمين من المدرسه زي ما هي طردتنا من الفصل بس هي مش انطردت هو انت فعلا يارب مش بتحبنا ... طب ليه يارب ده احنا بنحبك والله وعايزين ندخل الجنه وانا امبارح خلصت حفظ جزء عم كله .. يارب . هو انت ليه مش بتطلعلنا .. هو انت بتكرهنا زي ما هي بتقول , هو انت ليه بعيد اوي كده وعمرنا ما بنشوفك .. ممكن يارب نطلب منك طلب
عايزين ميس نيرمين دي تمشي من المدرسه لو سمحت
ياللا سلام
"
المهم قعدنا اسبوعين تاني وبعدها دخلنا الفصل واحده زي القمر قالتلنا
" ازيكوا يا ولاد انا اسمي ميس مي وانا هديلكم انجليش بدل ميس نيرمين عشان ميس نيرمين خدت اجازه لمدة سنتين "
فرحت انا و احمد جدا وقولنا هيييييييييييييييييييييييه
استغربت جدا الانسه مي وضحكت ضحكه رقيقه كده وقالتلنا ياللا نبدا الحصه بقي
بعدها بكام سنه كده عرفت ان ميس نيرمين كانت حامل وخدت اجازة وضع

Friday, October 24, 2008

هو الكون كبير اوي كده ليه ؟

كل واحد في الدنيا عنده 100 حلم .. يقدر يحقق منهم 50 ... بيسعي انه يحقق منهم 25 .. بيفشل في 13 وبيجتهد في 9 وبيياس من 1
وبيفضل حيران بين الاتنين التانيين مش قادر يحقق منهم اي حاجه
اذا كان مايهمكش راي اللي قدامك يبقي اكيد رايك مش مهم
احلام الناس جزء من احلامنا ... دور علي واحد عنده حلم مش مرتبط بالناس.. يعني مثلا كام واحده امنية حياته انه يطلع القمر
الممثل الحقيقي هو اللي يتعايش مع الدور داخليا ...ويبان عليه ده من الظاهر لان مايهمنيش اذا كان مقتبس الشخصيه فعلا ولا لأ لكن يهمني انه يبانلي انه ناجح في انه ياديها حتي لو ماكانش غرقان في الشخصيه
كل واحد مننا بيرقص بطريقه او باخري .. بس اسوأ راقص فينا اللي بيرقص بلسانه لمجرد اثارة الناس
الفنان الحقيقي مش اللي بيعمل قصة جديده في شعره او يبتكر طريقة لبس .. الفنان الحقيقي هو الفنان اللي تحس انه صاحبك او قريب منك حتي لو ماكنتش عمرك شوفته
مؤمن بربنا ؟
اه
مؤمن بالكائنات الفضائيه ؟
لا
يرد عليك السؤال ويقول .. اومال الكون كبير اوي كده ليه ؟
اه صحيح ... هو الكون كبير اوي كده ليه ؟ ... مجرات ومجموعه شمسيه .. لمين ؟
لو شفت واحده لابسه مايوه في ميدان التحرير .. هتقول عليها ايه ؟
طب لو شفت واحده في البلكونه اللي قصادكوا لابسه مايوه ؟
طب لو شوفت واحده لابسه مايوه عالبلاج ؟
طب لو شفت واحده لابسه مايوه في بطولة الجمهورية للجمباز ... هتقول ايه ؟
هو انت مغرور ليه
هو انت انتيمك يبقي روبرت دي نيرو ؟
احمد زكي كان نفسه يمثل معاك ؟
شوماخر من زمان نفسه تشد معاه ؟
حقيقي
هو انت مغرور ليه
حقيقي كام ميداليه دهبيه خدتها في الاوليمبياد ؟
حافظ كام جزء من القران ؟
وانا صغير كنت فاكر ان مصر هي بس الكون
لما كبرت بدات اعرف حاجات اوسع وكل ما اكبر الكون بيوسع
شقتنا في بيتنا وبيتنا في امبابه . دي في الجيزه اللي هي في مصر ومصر في افريقيا وافريقيا في الكره الارضيه والكره الارضيه في المجموعه الشمسيه والمجموعه الشمسيه في المجره بتاعتنا والمجره ضمن مجموعة مجرات حواليها .... يا تري هيعدي يوم عليا واعرف اكتر من كده

Tuesday, October 21, 2008

عاااش يا نهي .. راجل والله

Photobucket
نهي رشدي
مخرجة افلام تسجيليه
كان لازم نرفعلها القبعه ونقولها مبروك عليكي وعلينا
كسبت اول قضية تحرش في مصر في بداية مهمه اوي لسن تشريع واقعي وحازم للتحرش الجنسي
والواد اللي اتحرش بيها لبس 3 سنين سجن
وعلي راي المثل
اضرب المربوط يخاف السايب
وبعد كده اللي هيتلسع من الشوربه هينفخ في الزبادي
واي حد قبل ما هيتحرش باي بنت هيفكر الف مره ان يبقي مصيره هيبقي زي مصير الاخ اللي انا مش عايز حتي اعرف اسمه
لاني عمري ما هتعاطف مع واحد زي ده
وياريت ماحدش يتعاطف معاه
لان اي حد يتخيل مكان البنت دي اخته او امه او بنته او مراته او صاحبته
يا تري لو كان شاف واحد بيعملها كده كان ممكن يعمل فيه ايه
احلي حاجه في الموضوع ان المجني عليها ( نهي رشدي ) الواد ده كان سايق عربيه نص نقل خرج ايده من الشباك وهي معديه من جمبه ولمس جسمها جريت وراه وهو سايق عربيته النص نقل وجابته من قفاه وعالقسم عدل وده بيثبت انها ب 100 راجل
ما يجيبها الا بناتها ( مشيها بناتها ) ويارب كل بنات مصر تعمل زيها لان ظاهرة التحرش دي اختفت من العالم كله ويارب نعديها بعقلنا ونفهم بقي اللي العالم كله فهمه
تحياتي لنهي رشدي
ولاي بنت هتعمل زي نهي رشدي

Saturday, October 18, 2008

عاشت دماغي حره مستقله

عاشت دماغي زي ما هي
لا هي سلفيه ولا هي علمانيه
لا هي حزبيه
ولا هي مفتريه
ولا هي مثليه
ولا هي ذكوريه
ولا انثويه
ولا اي حاجه من الحاجات اللي فاتت ديه
لا انا متفائل
ولا متشائم
لا مع الحكومه
لا انا ايوه امين
ولا خالف تعرف
دماغي معايا لوحدي
مش مع حزب
ومش مع حد
لا هي مع حركه
ولا هي مع جماعه
لا انا اخوان
ولا انا كفايه
ولا انا حزب وطني
ولا حزب غد
لا انا تبع تيار
ولا انا تبع حركه
ولا جمعيه
ولا شله
انا لوحدي انا ودماغي
يعني زي ما بيقولوا
رئيس جمهورية نفسي
عاشت جمهورية دماغي الحره
عاشت دماغي حره مستقله
عاشت دماغي حره مستقله
عاشت دماغي حره مستقله

Monday, October 13, 2008

سبعينات تمانينات تسعينات الفين

بيصحي الفجر يصلي الفجر . وبعدين ينزل علي شغله يفضل ينبح في صوته لحد الساعه 5 وبعدين يرجع ياكل ويستحمي ويتخانق مع مراته شويه عالمصاريف اللي مش مكفيه ويوم الخميس يعمل واحد عشان الجمعه اجازه وبعدين ينام
بيصحي الساعه 12 الضهر يتصل بالمكتب ..ايه الاخبار النهرده يا عم احمد يقوله كله تمام يا باشا .. السكرتيره الجديده جت وفي انتظار سعادتك... دايما يحتار هيركب انهي عربيه النهرده .. ينزل ما يلاقيش غير عربيه واحد عشان ولاده ومراته خدوا بقية العربيات , يفضل طول اليوم في الشغل وبالليل مع السكرتيره الجديده ويروح ينام
بيصحي الساعه 7 بالليل ينزل يروح يسهر مع صحابه في اي كافيه يعاكسوا بنات اصغر منهم بييجي 30 سنه واربعين سنه وبعدين يشقطوا موزز من جامعة الدول ويروحوا في الشقه اللي بقالها اكتر من 30 سنه نجسه
جيل الاموات
الجيل اللي بيتهمنا باننا اكثر فشلا من غيرنا و الجيل اللي رضي بغرور الراحل انور السادات و مشي جنب الحيط
الجيل اللي اخرنا 50 سنه عن العالم كله
الجيل اللي بسببه عاشت مصر جمود غريب تحت مسمي الانفتاح
الجيل اللي ماعرفش حتي يحقق 20 % من احلامه
دور عليهم في كل بيت
دور عليهم في المصالح الحكوميه
والشركات الخاصه
والقهاوي البلدي
كانت علي ايامهم اسمها قهوة الشباب لما كانوا فعلا شباب
لكن دلوقت شابوا وشابت معاهم القهموه وبقي اسمها قهوة المعاشات
يا تري لما نوصل سنهم
هنبقي زيهم ؟
ولا هتنجح جهودنا ومصر هتتغير
هل احنا فعلا الجيل اللي هيغير مصر اللي ماتغيرتش بقالها سنين

Thursday, October 9, 2008

النقاب والرقص والجنه والنار

الانسه المنقبه مغطيه جسمها كله في عز الحر باللون الاسود يعني لو انت طالع بيتكوا والنور قاطع ممكن يجيلك سكته قلبيه من اللي هشتوفه
لما كلمتها عن النقاب قالتلي ان الجنه مش ببلاش
وانت سيادتك بتشتغل ايه ؟
انا سيادتي بشتغل راقص
رقاصه يعني
كلك زوق يا انسه
بس انته ماتعرفش انك كده هتخش النار لان الرقص حرام وعيب
لا والله ماظنش ان الموضوع ده صحيح .. اظن انه طلع اشاعه في الاخر انا هدخل الجنه ان شاء الله
لكن انتي سيادتك ايه رايك في النقاب ... لابساه ليه يعني؟
عشان ادخل الجنه!
معني كده ان امي هتدخل النار
الست يا استاذ ممدوح بالذات لازم تغطي جسمها كله عشان ماتقعش في فخ الشهوه
ده علي اساس ان الشاب ماشي في الشارع فاتح سوستة البنطلون ولا ايه يعني
ارجو ان حضرتك تلتزم معايا باداب الكلام بين الراجل والست اللي حدده الدين
المهم اقنعيني اكتر بحكاية النقاب
الست مصدر للفتنه . بالذات لما تكون جميله
افهم من كده انك حلوه
وكمان لو عينيها حلوه يستحسن تغطيها
والله دي حاجه كويسه اوي . لما الست تبقي عينيها حلوه تغطيها وتمشي زي عربيات التصادم في الملاهي مش شايفه اي حاجه وبعدين صح النهرده شوفت بنت عينيها حلوه اوي لكن للاسف ماشوفتش اي حاجه تاني لانها كانت لابسه نقاب . تفتكري ربنا خلقها حلوه ليه .. وطالما هتلبس نقاب .. ليه خلق بنات حلوين وبنات وحشين لا مؤاخذه يعني
ولو اتفقنا عالنقاب والحجاب هل معني كده ان اي بنت مش محجبه هتدخل النار
يعني صحابي كلهم وانا معاهم بما اني رقاصه هندخل النار ونكمل السهره هناك ... تفتكري ان ربنا امر بكده
رغم اني بشوف بنات منقبات او محجبات كتير عالكورنيش في اوضاع اتكسف انا نفسي اعملها وبعدين اللي يعيش ياما يشوف
شوف يا ممدوح
استاذ ممدوح بعد اذنك لازم تلتزمي معايا باداب الحديث بين الراجل والست في الاسلام:P:P
شوف يا اخ ممدوح القاعده العامه ماتمشيش عالخاصه والقاعده الخاصه ماتمشيش عالعامه
ما بلاش الكلام المعجلص ده كلميني الكلام الشعبي السلس اللذيذ ده خليني افهمك
يعني مش معني انك شوفت بنات منقبات ومحجبات في اوضاع مش كويسه انا كمان شوفت بنات مش محجبات في اوضاع مش كويسه
عندك حق بس لما هما مقتنعين بالحجاب والنقاب اللي علي كلامكم ده مثال التدين والالتزام هل هي لازم تبقي ملتزمه من فوق ومن تحت متحرره
دي تصرفات شخصيه لا الحجاب ولا النقاب يسالوا عنها دي يسال عنها اصحابها
انا مش بتكلم عن الناس انا بتكلم عن الفكره
يعني طالما هي مش مقتنعه ان ده صح ليه بتعملوا من اصله لما هي بتخالف قواعده
انت سايب امثله كويسه وبتتكلم عن الامثله الوحشه يعني مثلا ليه ما تتكلمش عن ان الاوائل علي الجامعه كل سنه محجبات ومنقبات
الحقيقه لاني ما صادفتش محجبات او منقبات مثقفين في حاجه غير الدين ده اذا كان مثقفين في الدين اصلا انا معظم المحجبات اللي قابلتهم جهله
( مع الاعتذار للمدونين المحجبات)
طيب ياريت ننسي موضوع الحجاب والنقاب ونتكلم في موضوعك
اللي هو ؟؟؟
الرقص
ماله ؟
اولا عيب ثانيا حرام
عيب ليه
احنا مجتمعنا شرقي ممنوع فيه الرقص للرجاله اصلا
ده اكيد بالنسبه للرقص الشرقي لكن لمعلوماتك انا مش بدرب رقص شرقي يعني مش بتعامل مع كباريهات شارع الهرم واظن ان مجتمعنا متخلف بما فيه الكفايه اننا نقتنع باي حاجه يقولها
يعني خروج البنت بعد 11 بالليل عليه قيود
البيات بره البيت عليه قيود
تعليم البنت عليه قيود
يبقي صعب نقتنع بتعاليم مجتمعنا طول ما فيها غلط لان الناس هيا اللي بتخترع الطريقه اللي تمشي عليها اللي هي التقاليد لكن مش التقاليد هي اللي بتمشي البني ادمين
وبعدين التقاليد لو فضلنا ماشيين عليها اكتر من مدة محددة تبقي هي اللي ممشيانا وده يبقي عيب في حقنا
يتبع >>

Saturday, October 4, 2008

نشرة الاخبار

اولا
انا واعوذ بالله من كلمة انا
دلوقت
بعمل جلسات عمل مع المخرج المصري الاصل الامريكي الجنسيه مايكل جمال
والمصور الكندي ويليام بولز
بعد اختياري مصمم لرقصات اول فيديو كليب للباند الكندي الجديد زا كاناديان سول
the canadian soul
لتصوير اول اغنيه ليهم بعنوان
دو يو كير
do you care ?
وبعد ما تخلص جلسات العمل دي ان شاء الله
هنبدا تصوير
في اول ديسمبر الجاي
اينعم انا مش هشترك في الفيديو
لكن دوري هيقتصر علي التصميم والتدريب
دعواتكم

Thursday, October 2, 2008

بلاك تيما

انا اسف علي الانقطاع في الفتره اللي فاتت عن مدوناتكم ومدونتي بسبب ظروف الشغل ورمضان
وان شاء الله الفتره اللي جايه هكون موجود وهقرا كل تدويناتكم اللي فاتتني
نخش في الموضوع
......................................
كسر المجنون مرايته
لما مالقاش صورته فيها
قام خابطها بكعب حظه
اللي صدي سنين طويله
فسر الدنيا في لحظه
لما شاف بيت القصيده
كثف الدنيا في لقطه
قصر وسط بيوت فقيره
......................
اساليني يا حبيبتي عاللي داير في البلاد
اللي فيها صادروا حلمي وباعوا صوتي في المزاد
اساليني عن ولاد شوفتهم بعنيا دول
دربوا كل الحلول وبيفشلوا في الاجتهاد
احكي ليكي الف قصه من حكاوي التعبانين
اللي عايش نص ميت واللي ميت من سنين
اللي نص كلامه كحه
واللي شاف خماره راحها
واللي اكل العيش دبحها دايره دور عالسكرانين
............
وغيرها كتير من الكلام الجميل اللي اختاروه بعناية جدا مع الحان جميله مختلفه
مزيج جميل من الجاز والبلوز والكلام المصري اوي
طبعا بتكلم عن بلاك تيما


Photobucket

بحر وعبده وامير
اصوات مصريه جميله اوي وان شاء الله يكون ليهم مستقبل مشرق جدا
وبالمناسبة بلاك تيما عاملين حفله في الساقيه
يوم 4- 10
رابع يوم العيد
الساعه 9 بالليل
ياريت تروحوا الحفله هتعجبكم ان شاء الله