Tuesday, December 30, 2008

عودة المصادر


اخر تحديث

طبعا لو قعدت اعمل تحديث للعدد اللي بيتقتل كل يوم في غزه والاصابات هنحتاج ميت بوست

لكن اخر حاجه قالتهالي حسنا

انهم المساعدات المصريه شغاله كويس

وفيه مساعدات طبيه تانيه

بس هم كمان مش بس محتاجين كده

لا.. محتاجين دكاتره مصريين يتطوعوا لان فيه حالات بتحتاج اكتر من دكتور

وعدد المصابين كبير بدرجه كبيره

ياريت اي حد يعرف حد في نقابات الاطباء او الهلال الاحمر المصري يتصرفلنا في الحوار ده






بعد انقطاع عن الاتصال بصديقتي الموجوده في غزه


حسناء الجندي


لدرجة اني افتكرت ان حصلها حاجه لا قدر الله


ورجعت تاني واتصلت بيا


" حمد الله علي سلامتك يا حسناء "


والعدد وصل ل 390


الساعه 4.30


و 1800 مصاب


حسناء بتقول ان الوضع في غزه اكثر رعبا من اي فيلم رعب امريكي


الجميع متوقع انه يموت في اي لحظه


نسبة الوفيات بين الاطفال والنساء زادت عن ال 20 %


القنوات الفضائيه بتتعامل بغباء مع الموضوع


لدرجة ان ساعات المراسلين عايزين يصوروا اكتر من انهم عايزين يساعدوا وساعات بيعطلوهم


في الاخر لازم اقول مين هي حسناء الجندي


حسناء الجندي


من مواليد


1985


بنت بميت راجل


قابلتها في مصر من سنتين


وهي بتشتغل في فرق الانقاذ تبع الامم المتحده


واشتغلت فتره في السودان


بس رجعت لفلسطين مؤخرا


عشان تبقي مع اهلها


لكن لحظها السئ ساءت الظروف اوي


وهي دلوقت بتشتغل في واحده من مستفيات غزه " اللي بتعاني فقر رهيب في المعدات الطبيه " ربنا معاهم ان شاء الله


حسناء


ربنا يحفظك


ويحفظ اهل فلسطين


ويرجعك بالسلامه


ويهزم العدوان


هو الذي هزم الاحزاب وحده


Monday, December 29, 2008

تاج . تااااج . تاااااااااج

التدبيسه دي جايالي من عند ايمي جزره
ماذا يمثل لك الكتاب ؟
الكتاب بالنسبالي زي الحشيش بالنسبه للمدمنين ... باجيبه من وقت للتاني وبيكيفني جدا ويا سلام لو صنف ( الكتاب ) حلو


هل القراءة تغير من حالتك النفسية ؟ وما أثر القراءة عليك بوجه عام؟
نوعا ما ... مش اوي يعني علي حسب حالتي النفسيه و حسب حالة الكتاب .. افرض كتاب كئيب وانا مبسوط .. اكتئب يعني ولا ايه ؟
والقرايه عامة بالنسبالي هي اللي ربتني
انا تربية كتب
انا عندي ادمان القرايه ده من
ايام ميكي وسمير وعلاء وبلبل
وبعدين فلاش وسماش ( كنت مدمنهم اوي ) هههه
وبعدين بدات اقرا الكتب المهمه
ثم الادمان الاكبر في حياتي في تاريخ الكتب ( ما وراء الطبيعه ) لدكتور احمد خالد توفيق
وانا بصراحه بقيت اي حاجه اشوف عليها احمد خالد توفيق لازم اقراها
ودلوقت بقرا اي كتاب في اي وقت

ماهو أول كتاب أو قصة قرأتها وما هو آخر كتاب ؟
انا لسه قايل فوق
ميكي وسمير وعلاء وبلبل وسماش وفلاش
دول اول كتب قريتهم
اخر كتاب قريته
اسمه اليهود في البلدان الاسلاميه
تاليف واحد اسمه صموئيل اتينجر
وترجمة د/ جمال الرفاعي

اذكر ثلاث كتب أو قصص أثروا في حياتك وتحتفظ بهم ؟
اممممم
طبعا رواية شيكاغو .. لعلاء الاسواني ( دي اثرت فيا تاثير فني ) جدا
فكرة المسرح ... جلال العشري
فصول من الكلام في هجاء الاحلام...م/ محمود عبد الحميد ( ابويا ) ومابحبش اقرا اي حاجه بيكتبها بس الكتاب ده عجبني لكن عموما انا بكره شعر ابويا و وقصصه ومقالاته واي حاجه كتبها في حياته

في أي المجالات تحب أن تقرأ ولماذا ؟
الحضارات , السينما , الشعر , الروايه , الروايه الغنائيه , السياسه , الرياضه , الادب المصري والفرنسي واليوناني والانجليزي .. وكمان بحب اقرا في التاريخ وساعات في الدين
بقرا في اي حاجه
المهم ان الكتاب يبقي حلو
هل عندك مكتبة وكم عدد الكتب بها في تقديرك ؟

عندنا في البيت مكتبه بس فيها كتب خاصه بيا وكتب خاصه بالفاموليا الكريمه
واكيد ماعدتهمش العدد في اللمون

اذكر اسم كاتب تتمنى أن تحتوي مكتبتك كتاب له ؟

مفيش حد نفسي في كتاب ليه ماعنديش كتاب ليه .. اومال عندي مكتبه ليه؟

ماهو الكتاب الذي يرافقك في السفر ( غير المصحف )؟

اي كتاب لاحمد خالد توفيق

ماهي الجريدة أو المجلة التي تتابعها وما هي أهم الأعمدة فيها؟

الدستور والمصري اليوم
بس
بقرا فيهم بالذات
لخيري رمضان
ابراهيم عيسي
بلال فضل
حلمي النمنم
حمدي رزق
عمنا احمد فؤاد نجم
طارق الشناوي
ساعات : د/ نبيل فاروق
وطبعا د/ ايمن نور
واخيرا ابراهيم منصور

ماهو أفضل كتاب أهدي لك ؟ وأي الكتب تهديه ولمن ؟
ماحدش جابلي كتاب هديه قبل كده .. ( ماحدش جابلي هديه قبل كده اصلا ) واهدي الكتاب لمين
اي كتاب لدكتور مصطفي محمود
لاي حد يقدر قيمته

إذا كنت بمعرض للكتب كيف تتعرف على الكتاب الجيد ؟

بشمشم ... اصل انا حاسة الشم عندي كويسه في الكتب
:D
اكيد من الكاتب ...ودار النشر

ما هو المكان المفضل لك للقراءة ؟ وهل لك طقوس خاصة وقت القراءة؟

السرير
ايه حكاية الطقوس دي ؟
اه بحط ايدي في بؤي وبقطع رجلي ... وباجيب شعر ارنب ابيض
ورجل فرخه مسلوخه وادلق عليهم شوية لبن واشربهم قبل ما اقرا


الرواية – القصة القصيرة – الدين – السياسة من الأحب لك في كتاب تلك الفروع ؟

الرواية و القصه القصيره :علاء الاسواني . تشارليز ديكينز - احمد خالد توفيق - احسان عبد القدوس - نجيب محفوظ

الدين: ( الله اعلم ) ماقرتش في الدين كتير لدرجة اني اعرف اسامي كتاب

السياسة : ابراهيم عيسي



انصحنا بخمس كتب ترى فيها إفادة عظيمة لنا

الاسلام والمسيحيه في العالم المعاصر .. مونتجمري وات ترجمة دكتور عبد الرحمن عبد الله
الاسلام والعروبه ... د/ محمد عماره
كتب غيرت الفكر الانساني ... احمد محمد الشنواني
الاحزاب السياسيه في العالم التالت ... د/ اسامه الغزالي حرب
التفكير المستقيم والتفكير الاعوج ... روبرت ثاوليس ..ترجمة حسن سعيد الكرمي
والتاج ده احب ارميه علي
اي حد شايف نفسه في الليسته اللي ناحية اليمين دي

Saturday, December 27, 2008

غزه لا تحتمل اكتر

فكوا الحصار عن غزه

تحديث ( 2 )؟

مصادر شخصيه في غزه تؤكد

ان الاعداد للي بتتقال حتي في الجزيره مش حقيقيه

وان العدد الحقيقي لحد دلوقت ودلوقت الساعه 2.30 بتوقيت القاهره

قتيل 246

و873 مصاب
منهم 35 في حاله خطيره جدا

احمد مطر قال

الناس ثلاثة امـوات في أوطاني

والميت معناه قتيل

قسم يقتله أصحاب الفيل

والثاني تقتله إسرائيل

والثالث تقتله عربائيل

وهي بلاد تمتد من الكعبة حتى النيل

والله إشتقنا للموت بلا تنكيل

والله اشتقنا و اشتقنا ثم اشتقنا

أنقذنا ... يا عزرائيل

للشاعر الكبير أحمد مطر

***********

جثة

في مقلب القمامة

رأيت جثة لها ملامح الأعراب

تجمعت من حولها النسور والذباب

وفوقها علامة

تقول هذي جثة كانت تسمى سابقا كرامة

تحديث
210 شهيد
700 مصاب
حتي الان الساعه 10

قلب الوطن مجروح
لا يحتمل أكتر
نهرب و فين هانروح
لما الهموم تكتر؟


فكوا الحصار عن غزه

Friday, December 26, 2008

you 're beautiful

james blunt - you are beautiful -
album : back to beldam 2004
written by :
James Blunt
S. Skarbek

You're Beautiful lyrics

My life is brilliant.
My love is pure.
I saw an angel.
Of that I'm sure.
She smiled at me on the subway.
She was with another man.
But I won't lose no sleep on that,
'Cause I've got a plan.

You're beautiful. You're beautiful.
You're beautiful, it's true.
I saw your face in a crowded place,
And I don't know what to do,
'Cause I'll never be with you.

Yeah, she caught my eye,
As we walked on by.
She could see from my face that I was,
Fucking high,(Real version)
Flying high,(clean version)
And I don't think that I'll see her again,
But we shared a moment that will last till the end.

You're beautiful. You're beautiful.
You're beautiful, it's true.
I saw your face in a crowded place,
And I don't know what to do,
'Cause I'll never be with you.
You're beautiful. You're beautiful.
You're beautiful, it's true.
There must be an angel with a smile on her face,
When she thought up that I should be with you.
But it's time to face the truth,
I will never be with you.


Sunday, December 21, 2008

حاله كده

ماعرفش ليه تنحت للدنيا كده
فجأة لقيتني مسكون بالملل
لا عندي رغبة في البكا و لا في الكلام
ولا عايز انام
ولا حتى باسأل ايه ده ايه و اخرتها ايه و ايه العمل

و اخاف اقول لأي حد لحسن يقوم يقلبها جد
حد صاحبي ينزعج يمد ايده جوه قلبه من باب الكرم
عشان يشاركني الالم
او يستلفلي من لئيم حبة أمل
حالة كده ما اعرفش ايه
حالة كده ما اعرفش ايه
كام مره بتدعي ربنا ... وبتدور عليه .. لكن ماتلاقيهوش ؟
وكام مره بتدعيه.. وتلاقيه ؟
الحقيقه انك دايما مش بتلاقيه .. لانك في الحقيقه ما بتفكرش فيه غير لما تكون عايز حاجه ... لكن كل النعم اللي ربنا ادهالك دي انت مش حاسس بيها ومش حاسس ان كده ربنا واقف جمبك وبينقذك
بينقذك من السقوط
السقوط الرهيب
السقوط اللي مش هتقدر تفوق منه حتي ولو كل الناس ساعدتك
عشان كده ربنا دايما موجود .. بس انت عشان ايمانك ناقص . ساعات بتسرح وتحس انه مش موجود
مع انه موجود .. موجود حواليك
موجود دايما . بيحميك
بينقذك .... تصدق ان هو بيدور عليك
ونفسه انك تروحله .. والغريب ان انت مش بتروحله . مش عايز تروحله.... او يمكن خايف تروحله لانك ما تستاهلوش
حاله كده ماعرفش ايه
لا معاها ينفع كلمتين ولا غنوتين ولا لقطة من البوم صور
ولا ادي قلبي في الهوا ويا الكور
حاله كده ماعرفش ايه
لاول مره اعد كل الاشعار اللي انا كتبتها في حياتي واقعد اقراها ولاول مره الاقي حاجات تعجبني .. لاول مره بحس اني كتبت حاجه كويسه , بفتكر فرحتي لما حد يقولي يااااه تصدق ان القصيده دي جميله جدا واثرت فيا اوي ..وانا برد عليه طبعا .. والفرحه مش سايعاني .... بجد وربنا .. قول والله العظيم بجد
بجد عجبتك ؟
عارفين
انا بكتب من وانا عندي 14 سنه
ويمكن من قبل كده بس انا بدات اعد واحلم من وقتها
ولحد دلوقت
كتبت 425 قصيده
و14 قصه
و3 سيناريوهات افلام
ومسرحيه غنائيه
لاول مره وانا بقراهم حسيت قد ايه ان كل حرف كتبته كان بيعبر عن جزء فيا ... ممكن يكون جزء واضح اوي او جزء بيضحك او جزء مقسوم نصين نص بيضحك والنص التاني كئيب اوي . نص مش عارف هو مين . ونص خايف يعترف لنفسه . ويقول انا فعلا مين ؟
وفيه نص .. هربان مدفون خايف يطلع
حاله كده ماعرفش ايه
اخاف اقول لأي حد لحسن يقوم يقلبها جد .. حالة كده ..ما اعرفش ايه
انا عندي صحاب كتير اوي
كتير لدرجة اني مابقتش بعدهم .. ومابقتش عارف اقعد مع مين ولا ازور مين ولا اسافر مع مين ولا اخرج مع مين وده بيزعلهم كلهم مني وبيقولوا ان انا مش باقي علي حد فيهم
مع اني باقي عليهم اكتر من نفسي
لدرجة اني لما بانجح في حاجه .. بابقي فرحان . لانهم هيبقوا فخورين بيا ومبسوطين بيا وفرحانين عشاني . عشان كده دايما كل ما بافشل .. باقول لنفسي لأ
اوعي تخذلهم

حالة كده مالهاش معاد
ساعات تزورني في الربيع في الحر و في عز الشتا
و تجيب حاجات لا فيها الروح ولا ميتة
لكني بارجع منها بعد السكات
فاهم شوية في اللي فات
حاسس اوي بحضن الصحاب
محظوظ انا
ساعات باشاور ينفتح لي الف باب
لكني باغلط في الحساب
ما اعرفش ليه
ما اعرفش ليه
حاله كده . من اشعار علي سلامه

Saturday, December 13, 2008

اعتراف

اليوم أعترف بالحقيقة التي أخفيتها عن الناس منذ الطفولة
..أنا أحسد بقوة
..أحسد طفلاً سوف يحقق كل الأشياء التي فشلت أنا في تحقيقها
(الشاعر الروسي إيفتوشنكو)

Monday, November 24, 2008

ودلوقت ... نهي رشدي بقت اسرائيليه

ياجدعان كفايه بقي يا جدعان ... نهي رشدي واحده اتعرضت للتحرش الجنسي في مصر يعني لو حتي من جمهورية شومبونجو لازم تاخد حقها
ثم ان علي حسب كلام نهي رشدي
هي من عرب 48 واتولدت في ليبيا ومخرجتش بره مصر في حياتها غير مره واحده سافرت لفرنسا لمدة شهر ونص في منحه من مصر
يعني عربيه .. مصريه
زهقت من تغيير الموضوع
زهقت من دفن راسنا في التراب وعدم الاعتراف بالمشكله
دلوقت عشان نغير الموضوع نقول ان نهي رشدي اسرائيليه
وده ليه بقي ؟
عشان نتعاطف مع اللي اتحرش بيها
ونقول لا
تؤ تؤ تؤ
يا عيني
يا حرام
شوفتوا المسكين ده كان في مهمه وطنيه ( بما انها اسرائيليه بقي ) !!؟؟
وبعدين مين اللي قال انها لو زفت اسرائيليه يبقي ديننا واخلاقنا ومجتمعنا يسمحلنا اننا نتحرش بيهعا وناذيها في الشارع
وعايز اقول لكل شاب مصري متعاطف مع المتهم
لو نهي رشدي دي كانت اختك
كان هيكفيك في الواد ده عشر سنين تعذيب
والله يا جدعان انا لو كان عندي اخت بنت وحد اتحرش بيها
اقسم بالله ما كنت هخليه ينفع تاني خالص
وبعدين الناس اللي بتقول ان المحاميه بتاعتها هي اللي طلعت عليها الكلام ده
وده طبعا مش محتاج فقاقه لانك تعرف انه تغيير في مسار الموضوع
( دي مش قضية تحرش .. احنا ماعندناش تحرش دي بت اسرائيليه معفنه عايزه تعمل فتنه ... اخص عليها اخص)
نهي رشدي في حوارها مع اليوم السابع قالت انها - المحاميه- هي اللي اتطوعت ومش هي محاميتها الاساسيه دي متطوعه من احدي لجان حقوق المراه في مصر
ومافيش ادله علي اللي هي بتقوله
اتقوا الله
الرسول عليه الصلاة والسلام بيقول
" لو ان فاطمة بنت محمد سرقت .. لقطع محمد يدها "
يعني الرسول نفسه مش هيتعاطف مع بنته لو عملت حاجه غلط
تبرير الغلط هو سبب المشكله
نهي رشدي هي اختي واختك
وامي وامك
وصاحبتي وصاحبتك
وزميلتي وزميلتك
وخالتي وخالتك وعمتي وعمتك وقريبتي وقريبتك
وجارتي وجارتك
وانت ماترضاش لحد من دول ان حد ياذيهم

Tuesday, November 18, 2008

السر الخطير في تاجير الهرم الكبير

Photobucket
حقيقي اللي بيحصل ده ؟
طب والله قشطه قوي .فيلم عايز حقي بيتحقق يا جدعان. شوفتوا بقي تاثير السينما علي الحياه .. الحكومه بتبيع مصر .. ( للمصريين بس ) وده بيزيد الطين بله
ازاي انا اروح اشتري حاجه هي اصلا بتاعتي
يعني الشركات الحكوميه دي
اصلا
بتاعتي
اروح اشتريها ازاي
هم معقوله وصلوا للعالميه في النصب للدرجه دي ؟
انا متهيالي ان الشيطان معلق بوستراتهم في اوضته وبيعتبرهم مثلهم الاعلي
..
واكيد اكيد اكيد الناس اللي هم
اللي هم هم يعني
هم اكتر ناس هيشتروا وبعد كده مثلا اجي اطلع ال CTA
الاقي واد صغير بيقولي الاجره ب50 جنيه
ماهو اصل بابا اشتري السي تي ايه
..
واشمعنا يكون البيع للي فوق 21 سنه
هو فيلم رعب للكبار فقط ؟
يعني انا ماينفعش اشتري
لازم اجيب حد يشتريلي
عايز اشتم يا جماعه
عايز اسب الدين
عايز اشخر
ماتسمعونا شخره حلوه كده يا جدعان
الحكومه بتبيعلنا بلدنا
يعني مش بعيد بعد كده الاقي واحد بيقولي ايه رايك تشتري شقتكم
او واحد يوقفني في الشارع يقولي تشتري الموبايل بتاعك علي كام ؟
....
وطالما العمليه كده بقي
انا عندي مشروع عايز اعرضه عالحكومه هيجيب فلوس بالعبيط
احنا نأجر الهرم مفروش
بالليله
او بالساعه علي حسب مزاج الزبون
وطبعا الموضوع ده هيجيب فلوس كتيره فشخ
ازاي بقي اقولكم انا ؟
شوفوا كام واحد عربي بييجي مصر عشان يتمسخر
بدل ما يروح اي كباريه في شارع الهرم
اهو يروح الهرم ويعمل واحد في جو تاريخي
شوف بقي عظمة الالهه وكبرياء الفراعنه
شوفوا الاجانب اللي هتيجي تاجر الهرم تعمل حفلات
شوفوا بقي
شوفوا بقي الفلوس اللي هتنزل عالبلد اكتر من قناة السويس ذات نفسها
واهي كلها مشاريع
ماستمعونا بقي شخره حلوه كده

Saturday, November 8, 2008

عن احلام مارتن لوثر كينج

"Change does not roll in on the wheels of inevitability, but comes through continuous struggle. And so we must straighten our backs and work for our freedom. A man can't ride you unless your back is bent. "



"التغيير لا ياتي بطريقه سهله ... ولكنه يواجه صعوبات عديده لذلك يجب علينا ان نقف علي ارجلنا ونعمل من اجل حريتنا لا يمكن ان يركبك احدا الا اذا كان ضهرك محنيا"



"I have a dream that one day every valley shall be exalted, every hill and mountain shall be made low, the rough places will be made straight and the glory of the Lord shall be revealed and all flesh shall see it together."



"انا احلم باليوم الذي تكون فيه كل الوديان عاليه .. ان تنخفض كل الجبال والتلال .. ان تستوي كل الطرق الوعره ... ان ينكشف للجميع "مجد الرب ...وان يري الاحياء ذلك يتحقق .. معا



Photobucket



"I have a dream that my four little children will one day live in a nation where they will not be judged by the color of their skin, but by the content of their character"



" انا احلم .... انا احلم باليوم الذي اجد فيه اطفالي الاربع يعيشون في امة لا يحكم فيها علي الناس بالوانهم ولكن بما تنضج به شخصياتهم "



كل هذه عبارات خرجت من فم الرجل الامريكي الاسود الذي اغتيل منذ 45 عاما


لا اري تفاؤلا كبيرا كما يري الكثيرين في باراك اوباما ولا اتشاؤم كثيرا كما يقعل البعض الاخر ولكني ولاول مره في حياتي اتابع بهذا الشغف انتخابات لا تخصني بالمره بل واسهر الليلة حتي الصباح لكي اعرف نتيجة الانتخابات


لست ممن ينظرون الي الامور بنظرة سطحيه فانا من مدرسة " اللي يعيش ياما يشوف " انا من المدرسة التي تنادي دائما " حليك ورا الكداب " لا اري علي الجانب السياسي العالمي نصرا عظيما بفوز هذا الرجل في الانتخابات الامريكيه ولكن ستمر الايام وسنري ما اذا كان هناك جديدا !



Photobucket



اثناء متابعتي للانتخابات الامريكيه علي العديد من القنوات التلفزيونيه منها ( الجزيرة والعربيه والمنار والسي ان ان وال بيبي سي ارابيا وال بي بي سي وورلد وقناة سكاي نيوز وقناة الاخباريه )


وبالتحديد في بي بي سي العربيه


واثناء استطلاع للاراء في شوارع امريكا


سال المذيع رجلا في الخمسينات


ما رايك في باراك اوباما


فقال : انا لا احبه


فسال المذيع :لماذا ؟


فرد الرجل : يقولون انه مسلم وانا اصدقهم


لكل من ينادي ويهلل ويرفع صوته قائلا انتهت عهود العنصريه في امريكا .. احب ان اقول لهم جميعا


( احا )


ان العنصريه في امريكا لا زالت تلقي بذور وتجني اخري


العنصريه الامريكيه لن تنتهي فالعنصريه الامريكيه ليست مجرد صفحات في كتاب بل انها كتاب به العديد والعديد من الفصول


اذا قدر الله و(فلت ) اوباما من العنصريه في الشكوك حول اصوله الاسلاميه


لن يفلت من العنصرية تجاه لونه


هناك المحافظين والمسيحيين الاصوليين وحركات النازيه المتبقيه او من ال " كو كلاكس كلان " او حتي من الجماعات الاسلاميه التي تعتبر رئيس امريكا مهما كان شخصه هو العدو الاول لها



علي الجانب الاخر



اثناء متابعتي للانتخابات الامريكيه شعرت ببعض الخجل وبعض الاعجاب وكثيرا من الحزن ... لم اكن اتصور ان هذا يحدث في عالم الواقع


انتخابات حقيقيه


ان لهذه الكلمة رنينا غريبا علي اذني لم اعتد عليه من قبل


اذن .. انها انتخابات


ا ن ت خ ا ب ا ت


دون عراك


دون قوات امن


دون عصا سوداء اللون


دون تكسير وضرب وشتم وحقن و محاضر و تزيور واتهامات وتلفيقات


ان هذا لا يحدث علي كوكبنا


رجل اسود يقف امام رجل ابيض الاثنان مرشحان لرئاسة اكبر كيان في العالم


يتصافحان ثم يتناقشان ثم يختلفان ثم يتصافحان


" جون ستيوارت "


لم يكف عن السخريه من الاثتنان .. ناهيك عن سخريته من الرئيس الامريكي بوش


حقا كيف يتعدي هؤلاء الاوغاد علي الهتهم


كيف يستطيع شخصا ما ان يسخر من رئيس دولته


" استغفر الله العظيم "


اللهم لا تحاسبنا بما فعل السفهاء منا


ينتصر الاسواد فيتمني له الابيض التوفيق يرد عليه الاسود يعزيه في امره
هذا لا يحدث عامة علي كوكبنا العربي
مما يجعلنا مهما اختلفنا مع الشعب الامريكي بعنصريته بعجرفته بكل احواله
ان ننحني الي تلك الديمقراطيه العظيمه .. نعم . لقد فاز اوباما في انتخابات شرعيه
" شرعيه "
تبدو هذه غريبة ايضا
اما بالنسبة لاوباما شخصيا
فمن خلال حملته الانتخابيه يبدو انه راجل " بيلعب علي كل لون " بمعني " مش بيزعل حد "
هو لا يريد القضاء علي ايران ولكنه اخبر الصهاينه انه سينسف ايران اذا هجمت علي اسرائيل , له اصول مسلمه ولكنه يقسم بانه ليست لديه اصول مسلمه
يذكرني بما قرات عن كلينتون الرئيس الامريكي السابق لم اعاصر عهد الرجل ولكن سمعت انه لم يقم حروبا ولكنه اشعل فتيل كل الحروب التي نعيشها الان
لا اتوقع نصرا سحيقا للديمقراطيه او السلام في عهد اوباما ولكن لا استطيع ان اجزم بوجود مزيد من الحروب او الظلم في العالم في الخمس سنين القادمه
باراك اوباما
هو الحلم الذي حلمه الكثير من السود في امريكا وعلي راسهم المناضل الاسود مارتن لوثر كينج الذي كان ممنوعا في عهده علي اصحاب البشرة السمراء دخول بعض المطاعم او الاماكن العامه او بعض المواصلات العامه
لننتظر معا الام سيودي بنا
حلم مارتن لوثر كينج

Sunday, October 26, 2008

رساله الي الله

الكلام ده كان من زمااان اوي , من حوالي 10 سنين
كنت في ابتدائي لما المدرسه بتاعتي طردتني انا واواحد صاحبي بره الفصل عشان روحنا التمرين وماعملناش الواجب
وقالتلنا الكلام ده :
" انتوا ازاي ماتعملوش الواجب انتوا ماتعرفوش ان الي ما بيعملش الواجب بيروح النار ... انتوا كده ربنا هيدخلكوا النار عشان ربنا ما بيحبش الاولاد اللي زيكوا , الولاد اللي ما بتعملش الواجب وبتلعب .. ربنا ما بيحبش الولاد اللي بتعد تهزر وتلعب وتسيب مذاكرتها اي حد مابيحبش المدرسة بيروح النار وانتوا كده ربنا هيوديكوا النار "
رديت انا وقلتلها :
" بس يا ميس انا عارف ربنا مش هيدخلني النار عشان هو عارف اني كنت عايز اروح التمرين "
ردت وقالت :
" استغفر الله العظيم يا حيوان يا سافل في حاجه اسمها ربنا يعرفني اوعي تتكلم علي ربنا كده تاني يحسن تدخل جهنم "
طبعا ماكانش ينفع اروح اقول لاهلي ان الميس زعقتلي عشان ماعملتش الواجب
فكرت انا واحمد صاحبي نعمل ايه نعمل ايه
قولنا نبعت رساله لربنا نقوله فيها عاللي حصل
وجيبنا ورقه كبيره
وكتبنا من فوق
بسم الله الرحمن الرحيم
المرسل : انا ممدوح يارب ومعايا احمد ( احمد ابو نضاره يارب مش احمد التخين ) ز
المرسل اليه : ربنا
المكان : فوق في السما
الرساله :
"بص يارب احنا عارفين ان احنا غلطانين ان احنا مش عملنا الواجب بس نيرمين دي رخمه اوي ارخم ميس عندنا في المدرسه وطردتنا من الفصل وضربتنا كمان يارب مشيها من المدرسه او موتها او اي حاجه المهم مش تدينا تاني وشكرا
باي
"
قعدنا اسبوعين الميس ما اتحركتش من المدرسه
ابتديت اقتنع انا واحمد ان ربنا ما بيحبش الولاد الصغيرين عشان ما بيمسعوش الكلام و بيلعبوا ومابيعملوش الواجب
لحد ما قولنا نبعت لربنا رساله تاني
المرسل : ممدوح واحمد صاحبه ابو نضاره مش التخين اللي قاعد في تخته 3
المرسل اليه : ربنا
المكان : فوق في السما
الرساله :
" يارب احنا كنا بعتنالك رساله من فتره عشان تطرد ميس نيرمين من المدرسه زي ما هي طردتنا من الفصل بس هي مش انطردت هو انت فعلا يارب مش بتحبنا ... طب ليه يارب ده احنا بنحبك والله وعايزين ندخل الجنه وانا امبارح خلصت حفظ جزء عم كله .. يارب . هو انت ليه مش بتطلعلنا .. هو انت بتكرهنا زي ما هي بتقول , هو انت ليه بعيد اوي كده وعمرنا ما بنشوفك .. ممكن يارب نطلب منك طلب
عايزين ميس نيرمين دي تمشي من المدرسه لو سمحت
ياللا سلام
"
المهم قعدنا اسبوعين تاني وبعدها دخلنا الفصل واحده زي القمر قالتلنا
" ازيكوا يا ولاد انا اسمي ميس مي وانا هديلكم انجليش بدل ميس نيرمين عشان ميس نيرمين خدت اجازه لمدة سنتين "
فرحت انا و احمد جدا وقولنا هيييييييييييييييييييييييه
استغربت جدا الانسه مي وضحكت ضحكه رقيقه كده وقالتلنا ياللا نبدا الحصه بقي
بعدها بكام سنه كده عرفت ان ميس نيرمين كانت حامل وخدت اجازة وضع

Friday, October 24, 2008

هو الكون كبير اوي كده ليه ؟

كل واحد في الدنيا عنده 100 حلم .. يقدر يحقق منهم 50 ... بيسعي انه يحقق منهم 25 .. بيفشل في 13 وبيجتهد في 9 وبيياس من 1
وبيفضل حيران بين الاتنين التانيين مش قادر يحقق منهم اي حاجه
اذا كان مايهمكش راي اللي قدامك يبقي اكيد رايك مش مهم
احلام الناس جزء من احلامنا ... دور علي واحد عنده حلم مش مرتبط بالناس.. يعني مثلا كام واحده امنية حياته انه يطلع القمر
الممثل الحقيقي هو اللي يتعايش مع الدور داخليا ...ويبان عليه ده من الظاهر لان مايهمنيش اذا كان مقتبس الشخصيه فعلا ولا لأ لكن يهمني انه يبانلي انه ناجح في انه ياديها حتي لو ماكانش غرقان في الشخصيه
كل واحد مننا بيرقص بطريقه او باخري .. بس اسوأ راقص فينا اللي بيرقص بلسانه لمجرد اثارة الناس
الفنان الحقيقي مش اللي بيعمل قصة جديده في شعره او يبتكر طريقة لبس .. الفنان الحقيقي هو الفنان اللي تحس انه صاحبك او قريب منك حتي لو ماكنتش عمرك شوفته
مؤمن بربنا ؟
اه
مؤمن بالكائنات الفضائيه ؟
لا
يرد عليك السؤال ويقول .. اومال الكون كبير اوي كده ليه ؟
اه صحيح ... هو الكون كبير اوي كده ليه ؟ ... مجرات ومجموعه شمسيه .. لمين ؟
لو شفت واحده لابسه مايوه في ميدان التحرير .. هتقول عليها ايه ؟
طب لو شفت واحده في البلكونه اللي قصادكوا لابسه مايوه ؟
طب لو شوفت واحده لابسه مايوه عالبلاج ؟
طب لو شفت واحده لابسه مايوه في بطولة الجمهورية للجمباز ... هتقول ايه ؟
هو انت مغرور ليه
هو انت انتيمك يبقي روبرت دي نيرو ؟
احمد زكي كان نفسه يمثل معاك ؟
شوماخر من زمان نفسه تشد معاه ؟
حقيقي
هو انت مغرور ليه
حقيقي كام ميداليه دهبيه خدتها في الاوليمبياد ؟
حافظ كام جزء من القران ؟
وانا صغير كنت فاكر ان مصر هي بس الكون
لما كبرت بدات اعرف حاجات اوسع وكل ما اكبر الكون بيوسع
شقتنا في بيتنا وبيتنا في امبابه . دي في الجيزه اللي هي في مصر ومصر في افريقيا وافريقيا في الكره الارضيه والكره الارضيه في المجموعه الشمسيه والمجموعه الشمسيه في المجره بتاعتنا والمجره ضمن مجموعة مجرات حواليها .... يا تري هيعدي يوم عليا واعرف اكتر من كده

Tuesday, October 21, 2008

عاااش يا نهي .. راجل والله

Photobucket
نهي رشدي
مخرجة افلام تسجيليه
كان لازم نرفعلها القبعه ونقولها مبروك عليكي وعلينا
كسبت اول قضية تحرش في مصر في بداية مهمه اوي لسن تشريع واقعي وحازم للتحرش الجنسي
والواد اللي اتحرش بيها لبس 3 سنين سجن
وعلي راي المثل
اضرب المربوط يخاف السايب
وبعد كده اللي هيتلسع من الشوربه هينفخ في الزبادي
واي حد قبل ما هيتحرش باي بنت هيفكر الف مره ان يبقي مصيره هيبقي زي مصير الاخ اللي انا مش عايز حتي اعرف اسمه
لاني عمري ما هتعاطف مع واحد زي ده
وياريت ماحدش يتعاطف معاه
لان اي حد يتخيل مكان البنت دي اخته او امه او بنته او مراته او صاحبته
يا تري لو كان شاف واحد بيعملها كده كان ممكن يعمل فيه ايه
احلي حاجه في الموضوع ان المجني عليها ( نهي رشدي ) الواد ده كان سايق عربيه نص نقل خرج ايده من الشباك وهي معديه من جمبه ولمس جسمها جريت وراه وهو سايق عربيته النص نقل وجابته من قفاه وعالقسم عدل وده بيثبت انها ب 100 راجل
ما يجيبها الا بناتها ( مشيها بناتها ) ويارب كل بنات مصر تعمل زيها لان ظاهرة التحرش دي اختفت من العالم كله ويارب نعديها بعقلنا ونفهم بقي اللي العالم كله فهمه
تحياتي لنهي رشدي
ولاي بنت هتعمل زي نهي رشدي

Saturday, October 18, 2008

عاشت دماغي حره مستقله

عاشت دماغي زي ما هي
لا هي سلفيه ولا هي علمانيه
لا هي حزبيه
ولا هي مفتريه
ولا هي مثليه
ولا هي ذكوريه
ولا انثويه
ولا اي حاجه من الحاجات اللي فاتت ديه
لا انا متفائل
ولا متشائم
لا مع الحكومه
لا انا ايوه امين
ولا خالف تعرف
دماغي معايا لوحدي
مش مع حزب
ومش مع حد
لا هي مع حركه
ولا هي مع جماعه
لا انا اخوان
ولا انا كفايه
ولا انا حزب وطني
ولا حزب غد
لا انا تبع تيار
ولا انا تبع حركه
ولا جمعيه
ولا شله
انا لوحدي انا ودماغي
يعني زي ما بيقولوا
رئيس جمهورية نفسي
عاشت جمهورية دماغي الحره
عاشت دماغي حره مستقله
عاشت دماغي حره مستقله
عاشت دماغي حره مستقله

Monday, October 13, 2008

سبعينات تمانينات تسعينات الفين

بيصحي الفجر يصلي الفجر . وبعدين ينزل علي شغله يفضل ينبح في صوته لحد الساعه 5 وبعدين يرجع ياكل ويستحمي ويتخانق مع مراته شويه عالمصاريف اللي مش مكفيه ويوم الخميس يعمل واحد عشان الجمعه اجازه وبعدين ينام
بيصحي الساعه 12 الضهر يتصل بالمكتب ..ايه الاخبار النهرده يا عم احمد يقوله كله تمام يا باشا .. السكرتيره الجديده جت وفي انتظار سعادتك... دايما يحتار هيركب انهي عربيه النهرده .. ينزل ما يلاقيش غير عربيه واحد عشان ولاده ومراته خدوا بقية العربيات , يفضل طول اليوم في الشغل وبالليل مع السكرتيره الجديده ويروح ينام
بيصحي الساعه 7 بالليل ينزل يروح يسهر مع صحابه في اي كافيه يعاكسوا بنات اصغر منهم بييجي 30 سنه واربعين سنه وبعدين يشقطوا موزز من جامعة الدول ويروحوا في الشقه اللي بقالها اكتر من 30 سنه نجسه
جيل الاموات
الجيل اللي بيتهمنا باننا اكثر فشلا من غيرنا و الجيل اللي رضي بغرور الراحل انور السادات و مشي جنب الحيط
الجيل اللي اخرنا 50 سنه عن العالم كله
الجيل اللي بسببه عاشت مصر جمود غريب تحت مسمي الانفتاح
الجيل اللي ماعرفش حتي يحقق 20 % من احلامه
دور عليهم في كل بيت
دور عليهم في المصالح الحكوميه
والشركات الخاصه
والقهاوي البلدي
كانت علي ايامهم اسمها قهوة الشباب لما كانوا فعلا شباب
لكن دلوقت شابوا وشابت معاهم القهموه وبقي اسمها قهوة المعاشات
يا تري لما نوصل سنهم
هنبقي زيهم ؟
ولا هتنجح جهودنا ومصر هتتغير
هل احنا فعلا الجيل اللي هيغير مصر اللي ماتغيرتش بقالها سنين

Thursday, October 9, 2008

النقاب والرقص والجنه والنار

الانسه المنقبه مغطيه جسمها كله في عز الحر باللون الاسود يعني لو انت طالع بيتكوا والنور قاطع ممكن يجيلك سكته قلبيه من اللي هشتوفه
لما كلمتها عن النقاب قالتلي ان الجنه مش ببلاش
وانت سيادتك بتشتغل ايه ؟
انا سيادتي بشتغل راقص
رقاصه يعني
كلك زوق يا انسه
بس انته ماتعرفش انك كده هتخش النار لان الرقص حرام وعيب
لا والله ماظنش ان الموضوع ده صحيح .. اظن انه طلع اشاعه في الاخر انا هدخل الجنه ان شاء الله
لكن انتي سيادتك ايه رايك في النقاب ... لابساه ليه يعني؟
عشان ادخل الجنه!
معني كده ان امي هتدخل النار
الست يا استاذ ممدوح بالذات لازم تغطي جسمها كله عشان ماتقعش في فخ الشهوه
ده علي اساس ان الشاب ماشي في الشارع فاتح سوستة البنطلون ولا ايه يعني
ارجو ان حضرتك تلتزم معايا باداب الكلام بين الراجل والست اللي حدده الدين
المهم اقنعيني اكتر بحكاية النقاب
الست مصدر للفتنه . بالذات لما تكون جميله
افهم من كده انك حلوه
وكمان لو عينيها حلوه يستحسن تغطيها
والله دي حاجه كويسه اوي . لما الست تبقي عينيها حلوه تغطيها وتمشي زي عربيات التصادم في الملاهي مش شايفه اي حاجه وبعدين صح النهرده شوفت بنت عينيها حلوه اوي لكن للاسف ماشوفتش اي حاجه تاني لانها كانت لابسه نقاب . تفتكري ربنا خلقها حلوه ليه .. وطالما هتلبس نقاب .. ليه خلق بنات حلوين وبنات وحشين لا مؤاخذه يعني
ولو اتفقنا عالنقاب والحجاب هل معني كده ان اي بنت مش محجبه هتدخل النار
يعني صحابي كلهم وانا معاهم بما اني رقاصه هندخل النار ونكمل السهره هناك ... تفتكري ان ربنا امر بكده
رغم اني بشوف بنات منقبات او محجبات كتير عالكورنيش في اوضاع اتكسف انا نفسي اعملها وبعدين اللي يعيش ياما يشوف
شوف يا ممدوح
استاذ ممدوح بعد اذنك لازم تلتزمي معايا باداب الحديث بين الراجل والست في الاسلام:P:P
شوف يا اخ ممدوح القاعده العامه ماتمشيش عالخاصه والقاعده الخاصه ماتمشيش عالعامه
ما بلاش الكلام المعجلص ده كلميني الكلام الشعبي السلس اللذيذ ده خليني افهمك
يعني مش معني انك شوفت بنات منقبات ومحجبات في اوضاع مش كويسه انا كمان شوفت بنات مش محجبات في اوضاع مش كويسه
عندك حق بس لما هما مقتنعين بالحجاب والنقاب اللي علي كلامكم ده مثال التدين والالتزام هل هي لازم تبقي ملتزمه من فوق ومن تحت متحرره
دي تصرفات شخصيه لا الحجاب ولا النقاب يسالوا عنها دي يسال عنها اصحابها
انا مش بتكلم عن الناس انا بتكلم عن الفكره
يعني طالما هي مش مقتنعه ان ده صح ليه بتعملوا من اصله لما هي بتخالف قواعده
انت سايب امثله كويسه وبتتكلم عن الامثله الوحشه يعني مثلا ليه ما تتكلمش عن ان الاوائل علي الجامعه كل سنه محجبات ومنقبات
الحقيقه لاني ما صادفتش محجبات او منقبات مثقفين في حاجه غير الدين ده اذا كان مثقفين في الدين اصلا انا معظم المحجبات اللي قابلتهم جهله
( مع الاعتذار للمدونين المحجبات)
طيب ياريت ننسي موضوع الحجاب والنقاب ونتكلم في موضوعك
اللي هو ؟؟؟
الرقص
ماله ؟
اولا عيب ثانيا حرام
عيب ليه
احنا مجتمعنا شرقي ممنوع فيه الرقص للرجاله اصلا
ده اكيد بالنسبه للرقص الشرقي لكن لمعلوماتك انا مش بدرب رقص شرقي يعني مش بتعامل مع كباريهات شارع الهرم واظن ان مجتمعنا متخلف بما فيه الكفايه اننا نقتنع باي حاجه يقولها
يعني خروج البنت بعد 11 بالليل عليه قيود
البيات بره البيت عليه قيود
تعليم البنت عليه قيود
يبقي صعب نقتنع بتعاليم مجتمعنا طول ما فيها غلط لان الناس هيا اللي بتخترع الطريقه اللي تمشي عليها اللي هي التقاليد لكن مش التقاليد هي اللي بتمشي البني ادمين
وبعدين التقاليد لو فضلنا ماشيين عليها اكتر من مدة محددة تبقي هي اللي ممشيانا وده يبقي عيب في حقنا
يتبع >>

Saturday, October 4, 2008

نشرة الاخبار

اولا
انا واعوذ بالله من كلمة انا
دلوقت
بعمل جلسات عمل مع المخرج المصري الاصل الامريكي الجنسيه مايكل جمال
والمصور الكندي ويليام بولز
بعد اختياري مصمم لرقصات اول فيديو كليب للباند الكندي الجديد زا كاناديان سول
the canadian soul
لتصوير اول اغنيه ليهم بعنوان
دو يو كير
do you care ?
وبعد ما تخلص جلسات العمل دي ان شاء الله
هنبدا تصوير
في اول ديسمبر الجاي
اينعم انا مش هشترك في الفيديو
لكن دوري هيقتصر علي التصميم والتدريب
دعواتكم

Thursday, October 2, 2008

بلاك تيما

انا اسف علي الانقطاع في الفتره اللي فاتت عن مدوناتكم ومدونتي بسبب ظروف الشغل ورمضان
وان شاء الله الفتره اللي جايه هكون موجود وهقرا كل تدويناتكم اللي فاتتني
نخش في الموضوع
......................................
كسر المجنون مرايته
لما مالقاش صورته فيها
قام خابطها بكعب حظه
اللي صدي سنين طويله
فسر الدنيا في لحظه
لما شاف بيت القصيده
كثف الدنيا في لقطه
قصر وسط بيوت فقيره
......................
اساليني يا حبيبتي عاللي داير في البلاد
اللي فيها صادروا حلمي وباعوا صوتي في المزاد
اساليني عن ولاد شوفتهم بعنيا دول
دربوا كل الحلول وبيفشلوا في الاجتهاد
احكي ليكي الف قصه من حكاوي التعبانين
اللي عايش نص ميت واللي ميت من سنين
اللي نص كلامه كحه
واللي شاف خماره راحها
واللي اكل العيش دبحها دايره دور عالسكرانين
............
وغيرها كتير من الكلام الجميل اللي اختاروه بعناية جدا مع الحان جميله مختلفه
مزيج جميل من الجاز والبلوز والكلام المصري اوي
طبعا بتكلم عن بلاك تيما


Photobucket

بحر وعبده وامير
اصوات مصريه جميله اوي وان شاء الله يكون ليهم مستقبل مشرق جدا
وبالمناسبة بلاك تيما عاملين حفله في الساقيه
يوم 4- 10
رابع يوم العيد
الساعه 9 بالليل
ياريت تروحوا الحفله هتعجبكم ان شاء الله

Tuesday, September 2, 2008

رمضان كريم

Photobucket
امبارح كان اول رمضان
كل سنه وانتوا طيبين
وامبارح بارضه كان اول سبتمبر
وكل سنه وانا طيب لوحدي عشان عيد ميلادي
طبعا توافق غريب اول رمضان مع اول سبتمبر .. احم احم بارضه الواحد واصل
وحيىىىىىىىىىىىىىى
المهم بقي
رمضان السنه دي جاي بدري
صيف بقي وحر وعطش
بس نقول ايه
نقول الحمد لله ونعوذ بالله من حر نار جهنم
اه والله
وكل سنه وانتوا طيبين وان شاء الله نخرج كلنا من رمضان بفرق
ويارب ميكونش رمضان شهر نفاق ولا خنقه من الناس ولا قرف ولا بطاله وكسل
ويبقي شهر كله خير وشغل اكتر من اي شهر
وربنا يغفرلنا كلنا
رمضان كريم

Monday, August 25, 2008

تعرف ايه عن المنطق يا مرسي ؟؟

ناس ملتحيين وعيلة كلها منقبات صحاب البيت اللي ساكنين فيه والشقه اللي قدامنا فاضيه
بس بقالهم كام سنه بييجوا من السعوديه قرايبهم عشان يقضوا الصيف في مصر
امي تفتح الباب تطلع بنت ما تجيبش 17 سنه امي تقولها صباح الخير تقولها عليكم السلام ورحمة الله وبركاته وتجري بسرعه وتقفل الباب
اجي طالع الاقي بنات واقفه علي باب شقتهم واول ما اطلع احس بجري كان في حرامي طلع واسمع صوت ( اقفلي الباب بسرعه ) والاقي ناس بتهرب وتدخل جوه شققها كاني اول ما اطلع واشوفهم بشعرهم هيتحرقوا في جهنم او اول ما اشوفهم هيغمي عليا من جمال اللي خلفوهم وهاغتصبهم لاني وحش كاسر من وحوش البشريه اللي اسمهم رجاله وخصوصا اني مش مربي دقني
يعني يا نهار اوسد
شاب اجنبي طالع عليهم
ابقي واقف علي باب العماره مع واحد صاحبي الاقي واحد طالع بيزعق عيب كده يا اخ ممدوح في بنات في العماره
بنات اه
اللي انا لما النور بيبقي مطفي مش ببقي عارف هل ده بني ادم اللي لابس اسود ولا دي الضلمه عادي وده مجرد فراغ كوني
الراجل الكبير بتاعهم امام الجامع اللي قدامنا
ربنا يديله طولة العمر ويشفيه ( ده عشان انا قلبي ابيض بس) لو شافني واقف مع واحد صاحبي او صديقه جايه تزورني تحت البيت يعني في الشارع ( ملك الحكومه ) الاقيه واقف ناقص يقف في حضني ودايما يقولي بلاش دوشه عند البيت
طب اقوله ايه راجل عنده بتاع 75 سنه
ارد انا اقوله ايه
عيب بارضه ارد علي راجل قد جدي
راجل دقنه نازله علي ركبته وماشوفتوش بيصلي في الجامع ويوم صلاة الجمعه بلاقيه بيستني اول ما الخطبه تخلص وييجي
بييجي يقضي الواجب
ودايما لما بيلاقيني جاي علي باب العماره الاقيه يدخل العماره ويقفل الباب وراه ومايستانانيش لما اجي
طب افرق ماعييش المفتاح
تعرف انت ايه بقي عن المنطق يا مرسي ؟

Tuesday, August 19, 2008

انا كنت في بورسعيد

مش عارف ابدا منين



عشان كده انا هحكي الحكايه كلها زي ما حصلت بالظبط



الساعه عشره الصبح يوم الاربع اللي فات



كان يوم ماتش الاهلي والمصري



كنت انا عند بوابة النادي الاهلي مع اعضاء منتدي كوووره مصرية متجمعين عشان نطلع نشوف الماتش في بورسعيد في رحلات خارجيه بينظمها النادي الاهلي لجماهيره لمشاهدة المباريات الخارجيه



المهم ركبنا الاتوبيسات علي حوالي الساعه 1 او 2 الضهر



وتوكلنا علي الله . لاننا عارفين ان الامن بيبقي واخد باله مننا وبيحافظ علينا من اول ما ندخل المدينه لحد ما نخرج منها



زي ما بيحصل في اسماعيليه او في اسكندريه



المره دي كانت اول مره اروح بورسعيد



اول ما دخلنا بورسعيد جوه البلد مالقيناش الامن طوب وكوبايات بتتدحف علي الاتوبيسات الناس ( اهل بورسعيد ) بيعدوا من جمب الاتوبيسات من غير اي اعتراض من الامن لانه ببساطه مش موجود



ولما وصلنا الاستاد بارضه كان جمهور المصري مستنينا في مشهد مالوش اي علاقه بالرياضه ومشهد غريب اننا نبقي بندخل الاستاد جري خوفا من الطوب والكانزات والكوبايات والعصيان اللي يبتتحدف .. ده مايمعنش ان كان في رد فعل من بعض جمهور الاهلي اللي كان موجود بنفس الوسايل



المهم دخلنا الاستاد وبعد الجون الاولاني للنادي المصري



اتفاجات بسماح امن الاستاد بدخول مجموعه كبيره من جمهور المصري في مدرجات جمهور الاهلي بدون فاصل قوي.. كام عيل من بتوع الامن المركزي بس



وده في العلم الحديث بيسمي



( النار جمب البنزين )



المهم بعد الجون التاني بدات المشكله والنار لمست البنزين



جمهور المصري رمي ازايز وكانزات مع شتايم واشارات بالايد .. بعض جمهور الاهلي اتحمس ( انا مش معاهم ) راح يتخانق معاهم .. حصل ضرب .. وفجاه ظهر كمية نمل ابيض ( امن مركزي ) غريبه هجمت علي جمهور الاهلي كله بالعصيان( انا كنت من الناس اللي اتعرضت للضرب وانا بجري وماليش دعوه باي حاجه) المهم خدت اصدقائي من اللي كانوا معايا اليوم ده وطلعنا بره المدرجات عشان نحتمي في الاتوبيسات لقينا ضرب بارضه وجمهور من الاهلي بيكسر في الاستاد وجمهور من المصري موجود و ومعاه عصيان واسلحه بيضا كل ده واحنا مش متخيلين ايه اللي بيحصل وبنتفرج من بعيد


المهم
انا قلت ما بدهاش انا اطلع اركب الاتوبيس بتاعي احسن ما تحصلي حاجه وانا مش ناقص ( ضهري ورجلي ) فيهم اللي مكفيهم
وبدات الاحظ ان مبقاش فيه جمهور وانتشرت قوات الخاصه ( اللي بيلبسوا اسود ) بشكل غريب وبدات الاحظ ان اي حد واقف بياخدوه .. روحت عالاتوبيس لقيت الباب بيتقفل .. خبط للمشرف عالازاز مارضيش يبصلي خبط تاني وقعدت انادي عليه بصوت عالي يا استااااذ .. انت يا استااااذ افتح الباب يا عم
هو يبصلي بقرف ويقولي لأ
الله يخرب بيتك يا عم ده كده انا هياخدوني
افتح الباب يا استاذ انا معاك في الاتوبيس بتاعك وادي الورقه بتاعتي اهي
( دي الورقه اللي مكتوب فيها رقم المقعد واسم المشرف واسم السواق ورقم الاتوبيس )
بارضه شاورلي لأ
يا عم يهديك يرضيك
مفيش
لقيت ظابط كده طولي مرتين وقدي مرتين تلاته وشكله امور ( اه والله ) ولابس اسود لقيته بيحط ايدي علي كتفي وبيقولي فيه ايه ؟
قلتله البيه المشرف مش راضي يركبني الاتوبيس بتاعي وانا موجود معاه
قام قاللي طب ولا يهمك تعالي اركبك اتوبيس تاني
روحت عشان اركب اتوبيس تاني لقيت المشرف خارج من شباك السواق وبيشتم .. قلتله وربنا لاجيبك من جوه النادي وانا بحط رجلي علي باب الاتوبيس التاني لقيت الظابط اللي لسه كان في صفي من دقيقه واحده وبيشدني من التيشيرت وبيقولي طب تعالي يا روح امك
الظابط اداني لاتنين من عساكر الامن المركزي كان جسمهم في ضعف جسمي تقريبا وده ماشفعليش انهم يمدوا ايديهم عليا
ضرب بالعصيان
ضرب علي ضهري وفي وشي
الاتنين سحبوني وادوني لاتنين سكلهم مخبرين كده لابسين عادي زي البني ادمين وعندهم شنب ( اه والله عندهم شنب ) واحد من الاتنين دول
بصلي حتة دين بصة ورقعني الم واتوصي
واداني للتاني اللي قام بدوره في حفظ الامن بقطع التبشيرت بتاعي
( خساره كان تي شيرت جاك جونز يا ولاد الوسخه)
قعدت مع الحجز انا والناس بتوع الاتوبيسات ولما قعدت مع المحجوزين اكتشفت ان كل الناس دي كانت مشاكلهم بسبب اتوبيسات بارضه
انا مش لوحدي اللي مظلوم
معايا 47 مظلوم
احنا بتوع الاتوبيس يا اخوانا
قعدونا في اوضه جوه الاستاد لمده حوالي ساعه او ساعه ونص
وبعدين ركبونا عربيه مقفوله من اللي بتقف قدام باب المحاكم اللي هي عربية الترحيلات
حوالي 28 واحد في عربيه واحده لان بقية ال 47 حكايتهم اغرب
( عملوا عليهم كوردون جوه المدرج وقالولهم احنا هنحميكم من الضرب وبعد ما خلص الضرب ركبوهم اتوبيس الترحيلات وجابوهم عندنا )
المهم روحنا علي قسم الترحيلات يف بورسعيد وقالولنا هتخرجوا 4 الفجر
وبعدين هتخرجوا 8 الصيح وبدا الحجز يبقي فيه مسجلين اينعم ماكانوش فاعدين في نفس الحجز اللي احنا فيه بيس الحجوزات عامله زي الاقفاص مكشوفه يعني احنا قاعدين
وقاعد قدامنا الناحيه التانيه قتله ومجرمين وشواذ وحاجه اخر قرف
وبعدين هتتعرضوا علي النيابه 4 العصر وبصراحه اقرارا للحق
الظباط اللي كانوا في القسم كانوا بيعاملونا باحترام وعلي غير المتوقع
كانوا بيقبلوا اننا نديهم فلوس يجيبولنا اكل وعصاير وسجاير وكانوا متعاطفين معانا جدا وكانوا عارفين اننا ماعملناش حاجه لدرجة ان ظابط كبير جه قالنا يا جماعه انا عارف انكم ما عملتوش حاجه بس لازم يبقي فيه كبش فدا
المهم النيابه كانت كوييسه جدا وماعرفش ليه حاسس ان النيابه كانت في صفنا وكانوا بيهزروا معانا وكانوا كويسين
وشخصيات محترمه جدا
لحد ما اتضح ان قرار النيابه طلع لنا يوم الجمعه بعد ما اتعرضنا علي النيابه لتاني مره يوم الجمعه
بس القرار كان بكفالة 100 جنيه واخلاء سبيل من سراي القسم
فكان لازم يبقي فيها بيات تاني
واترحلنا علي قسم بور فؤاد 2
وخرجنا من هناك يوم السبت بعد اذان الضهر ب5 دقايق
بس وانا باتكلم في النيابه وكيل النيابه لما سالني عن البطاقه وقلتله معايا استغرب
وكلم واحد جمبه بيقوله يا باشا ما تغيرلهم المحاضر بقي
قاله ما ينفعش المحاضر اتسجلت من غير بطايق مش مهم بقي يدفعوا الكفاله دي مش مهم 100 جنيه
وده قبل ما اعرف ان الموضوع اصلا اننا هنخردج بكفالة 100 جنيه
يعني انا دلوقت مش عراف هل ال 100 جنيه بتاعة اننا ماكانش معانا بطايق ( لانهم كانوا واخدينها مننا ) يوم ما اتسجلت المحاضر ولا دي كفالة خروج علي ذمة القضيه
عموما
دلوقت مستنيين ان يجيلنا اعلان ان فيه قضيه عشان اقوم محامي
وربنا يستر
حسبي الله ونعم الوكيل

Tuesday, August 12, 2008

راقص .. مش رقاصه يا بشر

الدنيا كلها قدرت توصل للمعني الحقيقي للرقص الا احنا
لسه لحد دلوقت بنعتبره
عيب .. وقلة ادب .. ويالهوي ... ويا نهار مش فايت
لو انت راقص وروحت اي بلد اوروبي او امريكا
هتلاقي ان الناس بتعاملك كويس جدا زي ما الناس هنا بتعامل العيال اللي في ثانويه عامه قسم علمي حتي لو بعد كده جاب خمسين في الميه
فكرة الرقص اللي منتشره في مصر بتتمثل في اختبار بسيط ممكن اي حد يعمله
اسال اي حد قوله
بتحب الرقص ؟
اه طبعا بحب اشوف البنات اللي بترقص جدا .. ده بيبقي مووز اوي
الرفس الشرقي .. اللي مالوش اي علاقة بكلمة رقص
الرفس الشرقي مافهوش اي حاجه ممكن تحسها او تتعلمها غير الاثارة وهز الوسط لانك مش بتحرك غير وسطك مع حاجات بسيطه برجلك ومايمنعش شوية تعابير شاذه بوشك او تعابير وسخه بايدك لزوم انه يتقال عليك بتعرف ترقص فعلا
وده بيوضح المعني الحقيقي للرقص الشرقي اللي اتحسب علينا رقص ليييييييه
ماعرفش ؟
الرقص الحقيقي
اللي لما تسمع المزيكا كل حتة في جسمك تتحرك جركة معينه تقدر بيها تفرغ طاقة موجوده جواك
الرقص الحقيقي
اللي عمرك ما تزهق ولا تتعب منه لانك بتحب المزيكا بجد وحاسس بكل جمله موسيقيه بتتقال
الرقص الحقيقي
لا يهدف للاثاره ولا يهدف لقلة الحيا ولكن بيهدف لتفريغ طاقة فنيه موجوده جوه كل واحد فينا
الرقص الحقيقي
مش عيب
مهما اختلف
كل دوله في دول العالم رقصت
لكن احنا اكتر دولة ابتذلت في نوع الرقص اللي قدمته ده اذا حسبنا الرقص الشرقي رقص
الارجنتين وكوبا وشيلي والبرازيل وامريكا وفرنسا والصين واثيوبيا واوغندا وكوبا واسبانيا
وغيرهم وغيرهم
كل دول دول رقصت
اخترعت رقص .. او اضافة لرقصه معينه حاجه معينه
لو قعدنا نعد في انواع الرقص مش هنخلص
هيب هوب
صلصا
تانجو
بريك دانس ( وده ممكن يدخل تحت تصنيفات الهيب هوب المعدوده ) لو ماحدش فهم يقول ؟
ريججي
ريدون
ديرتي ( حتي الرقص الديرتي لكل انواع الرقص كان بارضه بيتعلق بفكره في المزيكا تقدر تحركك ) يعني حتي اثارة الغريزه من خلال الرقص كانت موجوده انا مش بنكر بس اتعملت صح ةاتعملت في سياق محدد ماحدش خرج عنه وبعدت كل البعد عن الابتذال والاستعبال ورمي النقطه علي صدر الرقاصه
عمرك شوفت اتنين بيرقصوا صلصا وجه واحد لابس جلبيه بيضا وعمه وقام مطلع فلوس وهوبااا ياللا و وقام حادف عليهم كام دينار ولا كام دولار ولا حتي كام جنيه
الناس كلها بتحترم الرقص كفن
زيه زي الموسيقي زي السينما او كنشاط زيه زي الرياضه او الادب او السياسه
تقدر هناك تشتغل راقص او مدرب رقص زي حالاتي كده من غير ما تتعرض لضغوط تخليك تمشي تلف حواليك
تقدر هناكم تبقي راقص كويس جدا
من غير ما يتقال عليك انك شاذ
من غير ما يتقال عليك انك مش راجل
او تافه
او دماغك صغيره وتافهه لمجرد انك بتمارس نوع من انواع الفن
مع ان المفروض ان الفنون جنون
وان الابداع مطلوب في الفن من غير ما تلجا لانك تخفي حاجه انت بتحبها
ناس كتير جدا بتضطر اني اخبي عليهم موضوع اني برقص او اني بدرب رقص
لانهم في حالات كتيره هيفتكروا اني
يا اما شاذ يا اما تافه يا اما فرفور
وللي مايعرفش يعني ايه فرفور يسال يعن يايه
ايوه انا برقص من غير ما اكون فيا اي حاجه مش طبيعيه
من غير ما اكون بلبس لبس بنات
او طريقة تعاملي فيها نوع من الانوثه
او الشذوذ او قلة الحيا
بدرب انواع كتيره من الرقص وانا فخور جدا بكده لان قليل لما تقدر تستوعب كذا ثقافه لكذا رقصه مع بعض
انا قدرت استوعب ثقافة الهيب هوب الامريكيه
قدرت استوعب ثقافة الصلصا ( بكل اضافتها سواء لاتينيه او اسبانيه او امريكيه
قدرت استوعب ثقافة التانجو اللاتينيه
وقدرت اضيف عليهم
الضغط اللي حصل عليا واصراري اني استمر يف الرقص بدون خجل وبكل فخر
كله ادي لطريق واحد
هو عدم تركيزي
وتشتيت تفكيري والهائي عن الكتابه والابداع في الرقص
مما ادي الي
حادثتين في يومين ورا بعض
مره يخبطني ميكروباص
واليوم اللي بعديه علي طول
تاكسي
( واخدين بالكوا من التطور )
مما يؤدي الي
تمزق في اربطة العضله الاماميه
تمزق في اربطة العضلة الخلفيه
قطع في اربطة الركبه الداخليه
التهاب في وتر اكيليس ادي بعد المضاعفات الي قطع
كل ده في رجلي اليمين بس
كل ده ادي لحاجه واحده بس
ابتعاد عن الرقص لمدة 5 شهور مع الاستمرار في عمليات جراحيه وعلاج طبيعي
ودمتم