Monday, August 25, 2008

تعرف ايه عن المنطق يا مرسي ؟؟

ناس ملتحيين وعيلة كلها منقبات صحاب البيت اللي ساكنين فيه والشقه اللي قدامنا فاضيه
بس بقالهم كام سنه بييجوا من السعوديه قرايبهم عشان يقضوا الصيف في مصر
امي تفتح الباب تطلع بنت ما تجيبش 17 سنه امي تقولها صباح الخير تقولها عليكم السلام ورحمة الله وبركاته وتجري بسرعه وتقفل الباب
اجي طالع الاقي بنات واقفه علي باب شقتهم واول ما اطلع احس بجري كان في حرامي طلع واسمع صوت ( اقفلي الباب بسرعه ) والاقي ناس بتهرب وتدخل جوه شققها كاني اول ما اطلع واشوفهم بشعرهم هيتحرقوا في جهنم او اول ما اشوفهم هيغمي عليا من جمال اللي خلفوهم وهاغتصبهم لاني وحش كاسر من وحوش البشريه اللي اسمهم رجاله وخصوصا اني مش مربي دقني
يعني يا نهار اوسد
شاب اجنبي طالع عليهم
ابقي واقف علي باب العماره مع واحد صاحبي الاقي واحد طالع بيزعق عيب كده يا اخ ممدوح في بنات في العماره
بنات اه
اللي انا لما النور بيبقي مطفي مش ببقي عارف هل ده بني ادم اللي لابس اسود ولا دي الضلمه عادي وده مجرد فراغ كوني
الراجل الكبير بتاعهم امام الجامع اللي قدامنا
ربنا يديله طولة العمر ويشفيه ( ده عشان انا قلبي ابيض بس) لو شافني واقف مع واحد صاحبي او صديقه جايه تزورني تحت البيت يعني في الشارع ( ملك الحكومه ) الاقيه واقف ناقص يقف في حضني ودايما يقولي بلاش دوشه عند البيت
طب اقوله ايه راجل عنده بتاع 75 سنه
ارد انا اقوله ايه
عيب بارضه ارد علي راجل قد جدي
راجل دقنه نازله علي ركبته وماشوفتوش بيصلي في الجامع ويوم صلاة الجمعه بلاقيه بيستني اول ما الخطبه تخلص وييجي
بييجي يقضي الواجب
ودايما لما بيلاقيني جاي علي باب العماره الاقيه يدخل العماره ويقفل الباب وراه ومايستانانيش لما اجي
طب افرق ماعييش المفتاح
تعرف انت ايه بقي عن المنطق يا مرسي ؟

11 comments:

appy said...

هو الاحترام ومراعاه حره البيوت مش وحش يا زيكا يعنى معلش لو اختك وفى البيت برضه هتقولها كده انا ولا محجبه ولا متنيله بس لو حد طالع بدخل اجرى طبعا فيه حاجه اسمها مسلم وميصحش عادى يعنى مش تشدد انتى ترضى حد يبص على اخواتك سواء لابسين او قالعين

break said...

ههههههههههههههه
احنا قدامنا بردوا الشيخ احمد
اية فى مصحف
ساعة الصلاة ينزل الجامع
قال ايه ناس ولاد حلال شافوه فى مارينا
حالق الدقن و مطول البنطلون
وبيجى هنا بقى يورينا الوش التانى
حكم

بس بالنسبة لحكاية الجرى دى
انا بعملها كتير على فكرة مش عارفة اذا كانت صح او غلط
واول مرة افكر فى تفكير الطرف التانى
اكون فى البلكونة مثلا
الاقى اللى قدامنا طلعوا
ادخل بسرعة
اكون على السلم -ابن عمى- طالع او نازل ادخل جرى


طبعا دمك خفيف كالعادة
و ابقى سلملى على جيرانك كلهم

:)

Zika said...

appy
بصي يا آبي
انا اعرف حاجه اهم من اللي انتي قولتيه
اللي هي الذوق
لما اكون انا طالع وهم فاتحين الباب عادي مش شرط يعني يكونوا واقفين بيعملوا ايه
بس رزعة الباب في وشي
اعتقد اننا بعاداتنا وتقاليدنا وبالتزامهم اللي بيتكلموا عليه
لازم عليهم احترام الاداب العامه اللي هي اتربينا عليها لما يكون حد طالع احتراما ليه ما تقفلش الباب في وشه
فهمتي انا بتكلم في انهي نقطه
اصلي حسيت انك بعدتي شويه عن اللي انا اقصده
انا مش بختلف علي الاحترام او حرمة بيوت الناس بس
الاسلام بيقول الدين معامله والاحترام بارضه بيفرض عليهم انهم يحترموني زي مانا بحترم بيوتهم وحرمتها وهكذا
وانا لو عندي اخوات بنات والله كنت هقولهم ما تقفلوش الباب في وش حد لان الدين والذوق والاحترام بيقولوا كده
نورتي يا آبي

Zika said...

break
لولا اني مش عايز اجيب سيرة الناس بكلام مش من اختصاصي كنت كتبت كلام تاني
بس ياللا بقي ربنا يهدي
بس والله يا سمر انا ما شوفتش في العيله دي واحد محترم
.. وبالنسبه لحكاية الجري دي
مفيش مشكله بس ياريت ما تكونيش بترزعي الباب في وش ابن عمتك عشان اكيد بيضايق
:D
ربنا يكرمك ده بس من زوقك

مهيج الجماهير said...

زيكا بيه
بقى انا أسمع انك عامل مغامرات و صولات و جولات فى الشارع عندكوا ؟؟
بقى يا راجل كل ده و مافيش حاجة على أخوك مهيج الجماهير ؟؟
ماشى يا سيدى
بس هو متهيألى موضوع انهم يدخلوا بسرعة ده مافيهوش مشكلة
المشكلة فعلاً فى حاجة زى قفلة الباب فى وشك
و فى الصوت العالى فى كلمى (( ادخلى بسرعة )) ... يعنى المفروض يكون الصوت واطى شوية
ولا ايه ؟؟؟

appy said...

ااه لا رزعت باب دى قله ادب فعلا
بس عارف ساعات ممكن تتخض ههههه ويكون رد فعل تلقائى حاول لو لك اخت تفهمه براحه فهمت قصدى وده مراعاه للجيرة بس مش اكتر
انا برضه كده بتخض اقوم رزعه الباب بس والله بعدين بعتذر ومبقتش اقف مع حد غير لما البس كويس وعموما هو الافضل يعنى فى راى طالما بيخافوا اوى ومحترمين وده حلو يبقى ميقفوش على الباب بحاجه ملفته
كده انا فهت يا زيكس

aly fahmy said...
This comment has been removed by the author.
Zika said...

مهيج الجماهير
ايه بس يا باشا اللي انت سمعته انا ماعنديش اخبار عن اللي انا بعمله والله
:D
وبعدين اي حاجه عايز تاخدها رغم اني مش عارفها اتفضل البيت بيتك
:D
بص يا جميل انا بلاقي هرج ومرج لدرجة اني ساعات بتخض واقول في حرامي فيه مصيبه
فيه زلزال فيه حاجه بتتحرق
ربنا ما يوريك ايه اللي بيحصل واخوك طالع لبيته لا مؤاخذه

aly fahmy said...

بص يا أستاذ زيكا يا محترم, طبعا أنا عارف إن فيه حاجات كتير بتضايق جميع الأطراف, لكن ياريت نبقى عادلين شوية برده فى حكمنا على الناس, وبرده كل واحد حر واللى يعترض يبقى متطرف وده على فكرة مبدأ الأجانب والعلمانيين المحترمين.

حشرح أكتر, يعني حضرتك بتقول إن والدتك لما بتطلع تقول صباح الخير بتقوللها وعليكم السلام بالرغم إني كل زملائي المسيحيين فى الشغل اللي عددهم كبير جدا ماحدش بيرد عليا السلام نهائي (يعني كأنى ماقلتش حاجة) إلا واحد و2 بيقولوا "سلام" عشان مايكسفونيش وأحب أقوللك إني دلوقتي مابقتش أقول إلا صباح الخير عشان مش عايز يتحلق ليه أكتر من كده, بالرغم من إنهم لما حد بيقوللي صباح الخير طبعا باقول له صباح الخير أو النور :) عظيم ؟ فيا ريت يا سيدي الفاضل تبقى صريح مع نفسك أكتر شوية وأتمنى تكون إنت شخصيا بترد على اللي بيقولولك سلام عليكم ده لو إنت عايز الناس تعاملك بنفس الطريقة....

تاني حاجة على حتة التريقة على النقاب....دي حرية شخصية وكل واحد يلبس على مزاجه وده الفكر العلمانى المتحضر لو بتدافع عن التبرج يجب أن تدافع أيضا عن الحجاب أو أي زي آخر من حق كل واحدة تلبس اللي هي عايزاه طالما مش بتخدش الحياء لأن ده حق كل واحدة وحريتها فى إختيار زيها ومنظرها, ونفس الكلام على اللحية دي حرية شخصية, والقساوسة النصارى ملتحيون أيضا

وآسف إن كانوا ضايقوك
وآسف على الإطالة
على فكره أنا مش علماني بس العلمانيين فى مصر فاهمين العلمانية غلط, وبقوا متطرفين بيهاجموا أي حد عكسهم وده قمة التطرف

Zika said...

appy
اه والله يا ابي الموضوع ده بيحز في نفسيتي اوي :D

Zika said...

aly fahmy
اولا يا عم علي نورت المدونه
ثانيا رمضان كريم
ثالثا انا مسلم والحمد لله وعلي فكره
انا اعرف مسيحيين بيردوا السلام ومسلمين بردوا السلام باحسن منه
اذن هي مسالة شخصيات مش اكتر
ثانيا انا مش علماني
ومش اخوان
ومش كفايه
ومش اي حاجه
زي ما بيقولوا كده
انا رئيس جمهورية دماغي
ووالله العظيم يا عم
انا لما حد بيقولي سلامو عليكو
بقول
وعليكم السلام ورحمة الله وبركاته اتفضاااااال
بس ياريت سؤال يا صديقي
ايه اللي وصلك اني مسيحي ؟
في نقطة كمان
من حقي انقد النقاب
زي ما دافعت عن الحجاب
وزي ما دافعت عن حرية المحجبات وحرية اللي مش محجبات
بس انا شايف ان النقاب في تعدي علي حريتي انا شخصيا عشان كده بانقده
اخر حاجه
انا ضد التطرف بكل اشكاله
سواء تطرف علمانيين او تطريف مسيحين او مسلمين او يهود او اي عنصريه باي شكل من الاشكال
لو كان يهمك تعرف يعني
تحياتي
واسعدتني زيارتك