Tuesday, May 26, 2009

عفوا

مسحت بلوج الاشعاريزم حفاظا علي حقوقي الفكريه.
فبعد سرقة اشعاري قررت التوقف عن كتابتها علي الانترنت باستثناءات صغيره
لاني وبصراحه باتغاظ لما كل يومين ادعبس في جووجل الاقي واحد ولا واحده ناشل قصيده
واتمني ان الناس اللي كانت بتدخل عليها وبتعجبها اللي مكتوب فيها ما تزعلش ارجوكم
لان ده هيحافظ علي الحاجات دي والقرار ده في مصلحتي واتمني انكم ماتزعلوش

Sunday, May 17, 2009

البوس البوس .. الحضن الحضن.

انا سايب ملزمة رياضة 59 ورقه
وسايب التطبيقات ماحلتش فيها كلمه
وعندي امتحان يوم 24
ومش عارف اي حاجه في الماده
وداخل اقول الكلمتين اللي واقفين في زوري
سمعت كده ان ال ايه
هيعملوا غرامه علي البوس والاحضان ومش عارف بيناقشوها في مجلس الشعب
يا ولاد الفاضيه
سايبين كل حاجه في البلد حلوه ووحشه
وجايين تتكلموا في البوس
ال يعني الشعب المصري بيبوس اوي
عايزين يطلعوا اي مصلحه من الناس وخلاص
شويه شويه هيقولك اللي لابس شورت عليه غرامه
ضيقتوها علي الناس من كل حته الله يخرب بيوتكوا
اقول ايه
اقول ايه
اشتم ؟
مش عايز ..
لا لا لا مش عشان مؤدب .. لا خالص
عشان عندي امتحانات
يعني الناس ولا تاكل ولا تتجوز ولا حتي تبوس
طب افرض واحد اخته جايه من السفر وواحشاه . مايبوسهاش في الشارع يعني ولا لازم ابوه يكون واقف
افرض يعني واحده جوزها كان مسافر
تستقبله كده في المطار اورديحي
وربنا انتوا عالم فاضيه
وانا بقي ضد منع البوس في الشارع المصري وعندا فيكوا بقي انا هابوس اي حد يقابلني
اي واحده اعرفها هابوسها في الشارع عندا في اللي معترض
وبعدين يعني ما البحبحاني قالك حلال ولا انتوا غاويين نكد
استغفر الله العظيم
ولا يعني شيكمنكوا مقضيينها بوس هنا وهنا وواخدين حقكوا في البوس تالت ومتلت مش هاممكوا الناس تبوس ولا لأ
وانا بعد كده لو بؤي واجعني هاجيب مبوسه بالكهربا
وعليا الطلاج بالتلاته لاني بايس
واللي هاشوفه مش بيبوس او مش بتتباس هاقاطعوا بس بقي
وفي النهايه احب اهديلكم
اغنيه بلاش تبوسني في عينيا دي البوسه في العين بتحبس
وليكوا كل واحد بوسه ليه لوحده
وببلاش مش من ام خمسميت جنيه ( الغرامه ) بتاعة الحكومه
اممممممممموووووواه

Sunday, May 3, 2009

اعزائي المشاهدين.. اسماء عوني





سيداتي آنساتي سادتي


اسماء عوني تحييكم من استاد مدونة زيكا وتقدم لكم بوست جديد بعيدا عن مدونتي وكنوع من التبادل الحمبولي بين مدونة مكعب سكر ومدونة المخرج العربيه الشقيقه




المهم




من كام يوم قريت عند مياسي موضوع عن جاد شويري , وكليبه الاخير


funcky arabs


سيبكم من الكليب فيه هبل عميق .. هبل علي ابوه يعني انا اصلا افتكرته كليب اجنبي , هبل اللي هو بتاع زمان ده يا اخواننا ايام الزبده الفلاحي والسمنه البلدي


الكليب عباره عن ايه


موزز


بس


هو ده كل الموضوع


جاد شويري حابب يقول للناس اللي في الخارج يا جماعه احنا عندنا موزز


رجاله وستات


وجايب في اول الكليب بيقول ان كل فرد اشتغل في الكليب ده عربي


يا حلاوه . ومالك ياخويا كده بتتفشخر اوي هم يعني طلعوا الفضاء ما اي حد يقدر يرقص ويقلع في الدنيا مش فتاكه يعني ولا هم يعني هيفرحوا ويقولوا علينا كويسين ومتقدمين اول ما نهز


عموما جاد شويري اصلا زي ما بيقولوا


مش عايش عيشة اهله


يا عم احنا عرب


بنحب وبنكره وبنتسهوك وبنشتم وبنقل ادبنا وكل حاجه بس مش علي الملأ


ومش بنعمل كليبات نقول احنا قلالات الادب اللهم الا الناس اللي عارفين نفسيهم اللي بيطلعهم جاد بارضه


سواء جاد شويري


او جاد صوايا


او حتي جاد بتاع السندوتشات


كل اللي اقدر اقوله انه كليب بيتعمد الاثاره بشكل واضح وبدون مبرر


عشان ما تطلعلناش واحده من بتوع انا مابتباسش بوس الا لو كان في سياق الدراما


مافيش اي ام سياق في الكليب اصلا




تاني حاجه بقي ودي الاهم بالنسبه لتامر حسني


تامر حسني خامة صوته مش بطاله ينفع يغني يعني مش ضايع


لكن للاسف عقله ضايع


كلام اغانيه ضايع


وهو يعني المفروض اني ابقي تافهه زي البنات اللي بيسمعوا اغانيه الهبله ويقولوا عليها حلوه لا مش مطلوب مني


يعني مثلا واحده اعرفها من بتوع ( الا تيمو حبيبي ) وهي فتاة عشوائيات من الدرجه الاولي كما انها في سن المراهقه يعني ماتحطوش في دماغكم .. بقولها طب الاغنيه بتاعة خليها تاكلك دي وحشه


قالتلي اه . ما دي اغنية الفيلم مش شرط يعني تبقي ليها معني


يعني ايه اغنية فيلم لازم تبقي تافهه


الله


ما الملك عامل اغنية اسمها علي صوتك .. وكمان عشاق الحياه


واغاني فيلم بارضه وفيلم حلو كمان


ولا حدوته مصريه ما هي اغنية فيلم


ولا هو المحن جايب اخره معاكوا


وبعدين يا جماعه انا مش ضد ان الانسان يكون عنده شعر في صدره


لا والله كل واحد حر يعني يربي شعر صدره يحلقه يحط جيل يصبغه يعمله كيرلي كل واحد حر


بس السؤال بقي هل هي ازمة تي شيرتات عند تامر


ولا الفكره انه دايما بيصوروه في الصيف والدنيا حر وكده


لو ازمة تي شيرتات انا الواد اخويا مقاسه زي مقاس تامر ده وعنده تي شيرتات حلوه وعادي يعني يا تموره ماتتكسفش مناضل ده زي اخوك


ومش هايعايرك


بس يا جدعان في النوهايه


احب اقول للناس اللي غاويه تظهر وخلاص وتخلي الناس تتكلم عنها


تقوم تعمل حاجه غريبه عشان الناس تاخد بالها


بحكم المثل اللي بيقول


خالف تعرف


يعني الناس قالعين


البس


الناس لابسين اقلع


الناس بتغني هادي . طرقعهم


بيتطرقعوا .. اتسهوك


اقعدوا في بيوتكوا بقا جتكم الارف مليتوا البلد






وفي نهاية البرنامج احب اشكر الاخ زيكا علي التعاون البوهيمي بيني وبينه واستنوا البوست الجاي بتاع زيكا هتلاقوه عندي في المدونه قريبا


وآدي لينك المدونه عشان ماحدش يعوأ




كان معكم من ستوكهولم


اسماء عوني