Sunday, March 30, 2008

ارض الخوف

Photobucket
واحد صاحبي فمره قاللي ان مشكلة مصر مش في الحكومه
قلتله ازاي ؟
قاللي ان مشكة مصر بتكمن في الشعب المصري ذات نفسه
قلتله :( حلوه بتكمن دي ) ...فهمني
قاللي في البدايه ان اللي يلاقي دلع وميتدلعش يبقي .....( تيييت )؟ والحكومه المصرية بتطبق المثل ده بالحرف الواحد
الشعب المصري علي راي خالد صالح في فيلم عمارة يعقوبيان " ماسك في ديل الحكومه كانها امه اللي خلفته حتي لو كانت الحكومه دي ماشيه علي حل شعرها" ,, الخوف اللي بيعيشه المصريين الصغير منهم والكبير والمسلم والمسيحي علي حد سواء هو ده السبب الرئيسي في تمادي الحكومه في افعالها وكذبها , رغم انهم عارفين ومؤمنين ان كل حاجه في الدنيا بتحصل بتبقي مكتوبه علينا " قل لن يصيبنا الا ما كتب الله لنا " ومتهيالي كلنا شوفنا فيلم " احنا بتوع الاتوبيس " احنا بقي بتوع الاتوبيس احنا الشعب المصري الساكت اللي ماشي جمب الحيط لحد ما الدنيا افتكرته صرصار من كتر ماشيه جمب الحيط ...ورغم انه ماشي جمب الحيط ومالوش دعوه لا بالسياسه ولا بغير السياسه الا ان بارضه بيتضرب وبيتهان وبيتظلم ومهما زعق وقال " داحنا بتوع الاتوبيس يا اخواننا " محدش بيسال فيه . وسبحان الله رغم كله اللي بيحصله وبارضه خايف
خايف من ايه ..مش عارف ؟
ايه اللي ممكن يحصل لنا اكتر من اللي احنا فيه
ايه اللي ممكن يحصل للمواطن المصري الجبان اكتر من انه يبقي فقير وفاشل وبسيط لا بيتعلم كويس ولا بيدرس كويس ولا بيمارس حياته الطبيعيه بشكل كويس , " محدش مخه يروح لبعيد" قصدي يعني الرياضه والمواصلات وكده يعني
ليه بتبقي نيتكوا وحشه اوي كده
الله يرحمك يا حسام

Friday, March 28, 2008

هيستيريا

Photobucket

الف رحمه ونور عليك يا ملك . يا حبيبي يا قلبي يا جامد ياللي مالكش حل .. ياللي اتخطفت ياخويا .. يا مستتني يا احمد يا ذكي يا حبيب
قلب اللي خلفوني . الله يرحمك والله لولا الملامه يا ملك انا كنت انتحرت عشان اقابلك
انا مين ؟
اوبس
انا يا كينج زيكا اللي من وهو عنده 12 سنه نفسه يخرجلك فيلم ويمثل معاك او حتي يشوفك بالصدفه ويسلم عليك ايوه ايوه الاسمراني الطويل شويه ده
ايوه هو انا ده
المهم
انا فاكر فيلم هيستيريا بتاعك يا ملك اللي هو بالنسبالي من افضل افلامك . عارف ليه .. لا مش حوار عادل اديب وعبله كامل وشريف منير والكاست اللي مالوش حل ده انا بتكلم عليك انت . عشان انا كنت حاسس بيك , مش عشان انا قريب من الشخصيه دي من قريب او من بعيد , لكن عشان انت خلتني احس بان الراجل المظلوم ده انا , وفاكر كمان صوتك في اغنية ان مقدرتش تضحك
وعلي فكره يا ملك انا بسمعها كل يوم
وبغنيها كل شوية , لدرجة ان صحابي بيخططوا انهم يقتلوني عشان يرتاحوا من صوتي
...
عارف يا حمؤه ..
ما خلاص بقي مش بقينا اخوات والطرابيش قلعناها وبقينا سفله ولاد كلب , وخدنا علي بعضنا زياده عن اللزوم , وبعدين انت مش هتزعل مني عشان انت كده كده ميت .الله يرحمك ويبشبش الطوبه اللي تحت . راسك
تعرف بس من غير زعل يعني
سبحان الله يا اخي .. لله في خلقه شئون
انا ساعات لما بسمع عن موضوع انك كنت هتعمل فيلم عن الجدع الحيزبون اللي اسمه مبارك ده , بقول ان ربنا خدك في الوقت المناسب .
ايه مين .... عايز مين حضرتك .. انت مين اساسا
اهلا اهلا اهلا . حسني باشا مبارك والله لسه بجيب في سيرتك اسال ميدو اهو قاعد . كنت لسه بقوله اني مش بحبك واني عمري ما كنت عايز اشوفك ومن وانا عندي 12 سنه وانا نفسي اشوف وش غير وش سعادتك .
لا والله انت امور . انت مش وحش بس هي مسالة قبول يا ريس
فاكر يا ريس
فاكر
لما اتقابلت انا وانت في الاستاد
لما انا كنت قاعد انا في الدرجه التالته وانت كنت متشون في ازاز , بس عارف يا بوب
الفرق بيني وبينك
ان انا كنت قاعد مع صحابي , كنا كتير اوي كنا بتاع30 واحد وواحده , لكن انت كان نظيف وسوزان ومعاهم حسن حمدي وعيسي حياتو زانقينك في الاوضه الازاز اللي فوق دي . وبعدين انا كنت بقدر اقوم واجي براحتي من غير ما اخاف لا حد يقتلني , عشان انا عمري ما ظلمت حد وبعدين انا مش بخاف غير من ربنا
جادل في دي بقي ؟
ايوه ايوه انا عارف انك ما بتخافش منه , وكل الادله واضحه بس دي مش شطارة يا برنس . ده ربنا يعني هو الوحيد في الدنيا دي اللي يقدر عليك
يعني يقدر يسخطك قرد
يقدر مثلا يخليك مبتعرفش وساعتها هتبقي وقعتك سودا وفضيحة مصر هتبقي بجلاجل
يقدر مثلا مثلا يشيلك من الحكم ولو اني عارف انها صعبه شويه
مش صعبه علي ربنا لا سمح الله
لا صعبه ان ربنا يعمل لنا الخير ده ... حاكم احنا بارضه بصراحه شعب ابن ستين في سبعين مالوش في الجنه
بنكره بعضنا وبنشتم وبنتسافل وبنعط ومش مخليينلنا حاجه تشفعلنا عند ربنا نخليه يبعتلك اونكل عذرائيل مثلا . بعد الف شر عليك يا برنس يا صاحب اول طلعه جويه فتحت باب العربيه
قفلت الباب عليااااااااااااا
وصباعي اتعور ودخل في عينيا
.
متستغربش ياض منك ليها انت مش شايف مكتوب ايه في العنوان
المهم نرجع للملك
تعالي يا احمد
تعالي يا احمد
اه لا صحيح نسيت اقولك حاجه يا ريس يحسن انسي .. بالله عليك ما تيجي ماتشات للاهلي تاني .. وحياة ماما سوزان وحياة ابيه جمال وابيه علاء ولي العهد محمد باشا علاء , وانت عارف وانا عراف اعز الولد ولد الولد
المهم
يا حمؤه ... يا ذكاوه انت نمت ولا ايه
لا اصحي معايا
انا عايز اقولك اني بموت فيك .. ومستني اقابلك هناك ان شاء الله .. ماتخافش عن عمر قريب . وكله بامره . وبعدين لو حسيت انك لوحدك هناك اديني الو او اطلعلي في الحلم انا ليا حبايبي كتير هناك .. قولهم بس انا كنت اعرف زيكا . وهم هيتوصوا بيك زياده وبعدين دول كتير يا ملك وغاليين عليا اوي , وانا غالي عندهم اوي وهيكرموك اخر كرم . وصحيح فيه اعتصام يوم 6 ابريل يا ملك ياريت تنورنا , مصر مش هتعمل حاجه ومحدش هيشتري حاجه وهننزل بس عشان نتضرب في المظاهره ونرجع تاني
بس قول يارب وكله هيمشي في السليم
ولا يا حسام هات حاجه ساقعه لعمك احمد ذكي , بت يا رنا قومي حضري العشا يا بت ... ديناااا سيبي البلايستيشن وقومي حضري الاكل مع رنا
انت يا وحش ياللي اسمك بيشوي . بطل خناق انت وخلود وروحوا هاتوا اسلام من المدرسه , وشوفوا البت هبه مالها
الله يقطع الخلفه وسنينها

Tuesday, March 25, 2008

اشعار وخلاص

دي شوية حاجات كتبتها في الفتره الاخيره وجمعتهالكوا مره واحده وقومت رازعها في البوست ... ويارب تعجب حد ان شاء الله
....
حالة حزن
في حالة حزن ملياني
في حالة حزن في كياني
حاسبت نفسي
قلت اكيد انا اناني
لومت نفسي ولومت احزاني
لومت الحقيقه والحقيقه تعباني
لومت دماغي اللي مصدعاني
بالكلام والاغاني
بالاحلام والاماني
في حاجه فيا مموتاني
في حاجه فيا رافضاني
راضيه وعايشه وسايباني
ادوس علي جراحي من تاني
في حالة حزن ملياني
بتجيني ساعات لشهور
وتجيني ساعات لثواني
واقول خلاص هتروح
الاقيها تجيني من تاني
ازعل من نفسي ايام
نفسي ترجع مصالحاني
اقول خلاص اتصالحنا
الاقيها من تاني مزعلاني
في حاجه فيا مش مسامحاني
دي حالة حزن ملياني
رافضه الغنا , رافضه السكوت
رافضه الحياه , رافضه الموت
رافضه الشوارع , رافضه البيوت
رافضه النجاح رافضه السقوط
رافضه البحور , رافضه الشطوط
فارضه عليا كتير شروط
مركزه اوي علي ما بين الخطوط
(اتاكدت بالتاكيد اني اكيد مهما اكتب واعيد وازيد حتي لو كتبت كلمة كل دقيقه .. من غير ما اوصل للحقيقه)
هموت , هموت , هموت
دي حالة حزن واخداني
دي حالة حزن في كياني
ـــــــــــــــــــــــــــــــــــ
معذورين
الدنيا صفيت لما السما مطرت
والقمر راح لحاله والشمس نورت
ميت دليل عالايادي المجروحين
عذروا الليالي والليالي معذورين
عذروا الشوارع والحواري الضيقين
عذروا الشجر والورود الدبلانين
عذروا اللي شافوا واللي مش شايفين
عذروا يا حبيبتي الجنود اللي خايفين
عايزين يعذرونا بس مش عارفين
خايفين يجرحونا . وجرحونا سنين
حبوا يعدمونا بس مش قادرين
يخلصوا من ذنوبنا وهم في الذنوب عايشين
عذروا الحياه عذروا الموت
عذروا الغنا عذروا السكوت
عذروا الاها في كل صوت
ادي الله وادي حكمته, وادي خلقه ودي سماه
ادي واحد كان مفتح بس ظلم الناس عماه
بيدعي ربه في كل يوم , بس ما استجاب دعاه
صوته . بكل قوته . علاه
وصل لاخر الكون مداه
هو بيكبر كل يوم , والجنون بيزيد معاه
كلهم عذروا الموت , كلهم عذروا الحياه
كلهم عذروا السكوت و, وكل واحد طال غناه
عذروا الرمله علي الشطوط , عذروا الكلام في كل اه
ـــــــــــــــــــــــــ
عود ثقاب واحد
عود ثقاب واحد
يستطيع قتل كل عنائي
ساحرق جميع صوري
وساخفي جميع اوراقي
سامزق اليوم صدري
وسامحو غدا اشلائي
ما يجدي اليوم خوفي
ولا يجدي اليوم بكائي
ساهرب من نظراتهم
لا استطيع ان اعتذر لهم
لا استطيع الا ان ابتعد
وتموت ذكراي ورائي
ساهرب اليوم وابدا
فما نفعتني حياتي
ولا نفعني ذكائي
لا تعذبوني جميعكم
اما ارتحتم من قتلي
اما ارتضيتم بعد صرخاتي
لقد ندمت علي كذبي
ولقد ندمت علي افترائي
ويل لتلك النظرات
ويل لها
ولكل من زاد من ابتلائاتي
كرهت حبي وكرهت ابتساماتي
لقد كرهت نفسي وكرهت كل حياتي
قدري اغضبته بيدي
والان ارجوا رحمة السماوات
والحل عود ثقابا
يحرق كل نفاياتي
ان لم اعش شريفا وسط الاحياء
فلن اعيش عظيما بين الاموات
فلتسقط اليوم كتبي
, ولتتحطم راياتي
ولاكسر الان قلمي
ولامزق كتاباتي
فلن امسي اليوم حيا
ولن تطير جناحاتي
لقد طرت كثيرا في بحور الغضب
وما للبحر اجابة للندائات
ولابحث الان عن قبرا
يرضي معاناتي
يرضي سفيها كان عاش بينكم
وقتلته نفسه من كثرة الملامات
لن ابقي لكم شعري
فلم اعد ارضي تفاهاتي
ساحرقه معي
ومعه كل ماساتي
بكل الحزن والدموع
واللهو والضحكات
فلتنتهي اليوم احزاني
ولتنتهي حكاياتي
فلتنتهي اليوم قصصي
ولتنتهي خرافاتي
ـــــــــــــــــــــــــــ
لما ماتت
لما ماتت
كل حاجه في الدنيا ماتت
كل احلامي
كل ايامي اللي فاتت
كل الذكريات
كل حاجه في ثانيه راحت
كل طريق رسمته
كل حلم حلمت بيه وكتبته
كل الطرق في ليله تاهت
كل الطيور اللي عدت علينا
وعلي حبنا شهدت وشافت
كل الحاجات زعلانه
وحسه بالانهيار
كل البيوت حيرانه
وحاسه بالم وانفجار
حتي السنين وحشتها
يا حبيبتي لهفة الانتظار
كل حته فيها اتنين شافونا
كل حد في يوم فرحنا واللي جرحونا
كل اللي قالوا علينا هيعيشوا فسعاده
كلهم يا حبيبتي وافقوا يشربوا القهوه دي ساده
كل حاجه بعدك ماتت
كل حاجه مش عايزها
وكل شئ حزين وساكت
كل الدموع اللي جفت
كل الالام اللي خفت
رجعت من مطرح ما بدات
كلها في لحظه صحيت
من مكان ما في مره نامت
فاكره حبيبتي الجنينه
كل ازهارها صبحم مقهورين
صبحت الازهار حزينه
وصبحت الايام زي الورود الدبلانين
ومفيش شجره فيها راضيه
تضلل علي اتنين تانيين
كل حاجه بيكي حست
كل حاجه في ثانيه سكتت
كل حاجه نامت وبيكي حلمت
حتي احلامي حبيبتي.كل احلامي خلصت
ــــــــــــــــــــــ
للحزن اسير
مش عايز ابقي حلم اتسرق
مش عايز اكون حبر في ورق
مش عايز اموت في البحر غريق
ولا اكون زي واحد اتحرق
لا اخترت صمت ولا سكوت
لا اخترت حياه ولا اخترت موت
ياما جاتلي الكوره قصاد الجون
ومكانش عندي الجرأه اشوط
تعبت من كتر التفكير
لكني ليا رب كبير
اكيد في يوم راح يخلقلي
جناحين اقدر بيهم اطير

شوفت عرفت فنون وفنون
لكني هفضل ملك الكون
لاني عارف سر خطير
هو ببساطه اني مجنون

جنوني ورقه في ذكرياتي
جنوني كلمه في كتاباتي
جنوني حاسه في كل حاجه
جنوني مالي عليا حياتي

اه معترف
مش محترف
لكني بحلم حلم كبير
عن حد واحد اسمه الشرف

بقول لنفسي كفايه ترف
بلا احلام بلا قرف
فجاه الاقي قلمي بكي
وعن الورق قلمي انحرف

لكن كطير محبوس في السما
معرفش حاجه انما
الناس فاكره اكمني بطير
اني ورد مزهر نما

الناس فاكره اكمني بطير
فاكرني بعزف عالمزامير
لكن حقيقتي في الاساطير
اني اكيد للحزن اسير

Friday, March 21, 2008

العنصريه واشياء اخري

Photobucket
في البداية انا ضد التعميم عشان كده متاخدوش الكلام علي انه معمم
ــــــــــــــــــــــــــــــــــــ

في كل حتة في مصر وفي كل يوم , في الشارع في الاتوبيس في التاكسي في الجامعه في الكافيه , عالقهوه او في الشغل في العياده في الصيدلية في البيت في الراديو في التليفزيون , في البنزينه , او حتي في السوبر ماركت ومن خلال دقيقه واحده بس اتكلم مع واحد عادي مش مشهور مش مميز اتكلم معاه في اي موضوع وانت هتلاحظ كلامي كويس جدا . العنصريه في مصر زيها زي الفول والسجاير هتلاقيها موجوده جوه كل واحد فيهم . وبكل انواعها . والمشكله ان احنا بنعيب علي امريكا عنصريتها ضدنا وعمرنا ما فكرنا في عنصريتنا ضدها , بنستغرب اوي لما نسمع ان في عنصرية ضد اصحاب البشرة السمراء في امريكا رغم ان العن عنصرية ممكن يشوفها واحد اسمر .. هيلاقيها في مصر .. ايه مبتشوفوش الافلام .. عمركوا شوفتوا في فيلم عربي بواب اسمه عثمان ابيض .... اكيد لأ
لو قعدت اجمع اسامي الافلام اللي فيها عنصرية ضد السمر ده لو هنستبعد اننا نتكلم عن العنصرية في الشارع مش هخلص لان تقريبا مفيش فيلم كوميدي بيطلع من غير ما يقول افيه سخيف قد يكون اسخف ما في الفيلم علي البشره السمره ...
مش معني كده ان السمر معندهومش عنصرية . لو لاحظت ان السمر منعزلين مع نفسهم بارضه عن الالوان التانيه . وطبعا متحاولش تدخل وسطيهم لانك هتبقي مرفوض .. مبيفكركوش ده بحاجه ..
فاكرين حارة اليهود
العنصرية المزدوجه بين المسلمين والمسيحيين
وده ليه لان المسلمين ... غزاه محتلين اغتصبوا البلاد العربيه اللي ما كانتش عايزه تبقي عربيه علي ايد المغتصب عمرو بن العاص
(ياريت المسيحين اللي بيقولوا كده يقروا عن الاضطهاد الديني قبل دخول الاسلام مصر وحرق المسيحين وياريت يروحوا سينا والواحات ويفتكروا ليه كانوا بيبنوا دير في الصحرا ..يفكروا ولو لمره واحده في حياة المصريين قبل الاسلام . ) ثم ان انا لو كنت عايش قبل دخول الاسلام . اكيد كنت هتشرف باني اكون عربي وابقي فخور باني اكون عربي زي مانا دلوقت . ومكنتش هختار حال تاني
عارفين ليه العنصريه
لان المسلمين بيقولوا علي المسيحين كفره , اجانب ... ماتنافقش نفسك وتقول ان ده مبيحصلش .. تبقي حاجه من الاتنين يا اما منافق وكداب يا اما جاهل متعميش عينك عن دينك
دينك ضد العنصريه . ماتبقاش عنصري
ايه المعجزه اللي ممكن تخلي بني ادم يبقي مغرور ويسخر من بني ادم زيه لمجرد انه مختلف معاه عمل ايه في حياته وايه اللي ارتكبه بني ادم بانه يتهان لمجرد انه مختلف مع واحد تاني , ايه العيب ان يكون لونه اسود او ابيض او مسلم او مسيحي او رفيع او تخين او بيتكلم عربي او بيتكلم مش عربي او طويل او قصير او فقير او غني او ذكي او غبي .. .. ما كل واحد لنفسه . ك لواحد بيتقاس بعقله . مش بشكله .. مش بسنه .
انا هيجيلي شلل .. وانتوا مالكوا ومال سني , يابني انت لسه صغير .. ليه يعني .. محدش مسموحله انه يعاملني بحكم سني اه عندي 19 سنه .. اقولكوا علي حاجه .. انا لسه حتي ما بقتش 19
ايه علاقة ده بتفكيري , ما فيه ناس عندها 40 سنه وميعرفوش الالف من كوز الدره .. الجمله الاستفزازيه بتاعة ( يابني انت لسه صغير ) الرد بتاعها هيكون قاسي وقليل الادب , ياريت كل واحد يخلي باله من لسانه لو عقله هو اللي بيحركه ياريت يخلي باله منه , لكن لو لسانه بيتحرك من غير عقله يبقي اكيد مافيش لوم عليه .. ربنا يشفي .
....
قريت قبل كده قصيده معرفش مين اللي كتبها , لكن عارف معناها ايه
....
ضحكت فقالوا الا تحتشم
بكيت فقالوا الا تبتسم
بسمت فقالوا يرائي بها
عبست فقالوا ابدا ما كتم
نطقت فقالوا كثير الكلام
صمت فقالوا كليل اللسان
حلمت فقالوا صنيع جبان
لو كان مقتدرا لانتقم
يقولون شذ اذا قلت لا
وامعة اذا وافقتهم
فايقنت اني مهما ارد رضا الناس
لابد من ان اذم

Tuesday, March 18, 2008

مش انا روحت الجرنال

اول موضوع من المواضيع اللي قلت هعملها وكان نفسي اعملها
اني كنت اروح الرجنال اللي اتطردت منه بعد شهر واحد بس والسبب اني كنت بكتب مواضيع ضد سياسة الجرنال وده معجبش رئيس التحرير لان مواضيع الجرنال كانت عبارة عن مواضيع تعبير سخيفه ولا انه امتحان عربي للاعداديه .وكانت كل المواضيع عن حنان السيده الام سوزان مبارك وانجازاتها في مجال المراه والطفل والاسره ..وعن انجازات الاب الحنون الرئيس محمد حسني مبارك راعي مصر والمصريين وقيسوا بقا انتوا الباقي علي كده .
طبعا واحد غيري كان سلط عيال علي رئيس التحرير يمشوا وراه ويقولوله العبيط اهو .. العبيط اهو
لكن انا طلعت كويس وابن ناس ومحترم واكتفيت باني كلت علي قفايا وقبت الاقاله . وقبلت الاهانه وعرفت صورة الصحافه في مصر عامله ازاي ... 90% من جرايد بلدنا عايزه عود كبريت ويتحرقوا كلهم في ميدان عام برؤساء تحريرهم بصحفيينهم بسلطاتهم ببابا غنوجهم , يعني الجرايد اللي علي مقاس
الاخبار والجمهوريه والاهرام والوفد وروز اليوسف حتي بعض جرايد المعارضه .صوت الامه و الفجر وميمنعش ان حتي الدستور والمصري اليوم بيخرفوا ساعات بس اهم عالاقل ..عندهم حاجه اسمها " شرف "مش موجوده في اماكن تانيه كتير
كل اللي كنت عايز اعمله اني اروح ابص في عين رئيس التحرير واقوله انه فاشل
رغم اني عمري ما كنت بجح او قليل الادب لكن بارضه
قليل من القباحه يفي بالغرض
...صحيت بدري ....
روحت الجرنال
خبط عالباب ..نفس الورقه المعفنه اللي كانت موجوده من ساعة ما اشتغلت هناك
" اخيرا هقابل الراجل المنافق اللي ميعرفش يعني ايه صحافه "
" هقوله ان انت مش صحفي وانك معندكش شرف"
" هقوله ان انا فعلا عيل صغير زي مانت بتقول ..بس علي الاقل مش منافق ولا جاهل زي امثالك"
هقوله...
فتحتلي الست اللي في الشقه اللي قصاد الجرنال وقالتلي " عايز مين يا استاذ.
انا عايز الجرنال حضرتك
هو حضرتك متعرفش
خير
اصل الجرنال اتنقل لمكان تاني
طيب متعرفيش حضرتك فين ؟
لا يابني للاسف معنديش فكره
شكرا يا فندم اسف عالازعاج
لا مفيش حاجه
.....
كل اللي قدرت اعمله اني ارجع بيتنا وانا قفايا يقمر عيش...
لحد مالعيش اتحرق

Sunday, March 9, 2008

ساق صناعيه

صفحات من كتاب الصيف والشتاء
ساق صناعيه
امل دنقل


في الفُندقِ الذي نزلتُ فِيه قبلَ عامْ

شارَكَني الغُرفهْ

فأغلقَ الشُّرفهْ

وعَلَّقَ (السُّتْرَةَ) فوقَ المِشجبِ المُقَام

وعندما رأى كتابَ (الحربِ والسلامْ)

بين يديَّ: اربدَّ وجهُهُ..

ورفَّ جفنُه.. رفَّهْ

فغالبَ الرَّجفهْ

وقصَّ عن صَبِيَّةٍ طارحها الغَرامْ

وكان عائداً من الحربِ.. بلا وسام

فلم تُطِقْ.. ضَعْفَهْ

ولم يجدْ - حين صحا - إلا بقايا الخمرِ والطَّعام!

ثم روى حكايةً عن الدّمِ الحرامْ

(.. الصحراءُ لم تُطِقْ رَشْفَهْ..

فظلَّ فيها, يشتكي ربيعهُ صَيْفَهْ..)

وظلَّ يروي القصصَ الحزينةَ الخِتامْ

حتى تلاشى وجهُهُ

في سُحُب الدُّخانِ والكَلامْ

وعندما تحشرجَ الصوتُ بِه, وطالتِ الوقْفهْ

أدرتُ رأسي عنه..

حتى لا أرى دمعَتَه العَفَّهْ

ومن خلايا جسدي: تفصَّدَ الحزنُ..

وبلَّل المسَامْ

وحين ظنّ أنني أنام

رأيته يخلعُ ساقهُ الصناعيةَ في الظَّلامْ

مُصَعِّداً تنهيدةً

قد أحرقَتْ جوفَهْ
.......................................................
ـــــــــــــــــــــــــــــــــــــــــــــــــــــــــــــــــــــــــ
في الفترة اللي جايه ان شاء الله
هبدا في وضع المواضيع اللي كتبت عنها وان شاء الله عن قريب