Friday, March 21, 2008

العنصريه واشياء اخري

Photobucket
في البداية انا ضد التعميم عشان كده متاخدوش الكلام علي انه معمم
ــــــــــــــــــــــــــــــــــــ

في كل حتة في مصر وفي كل يوم , في الشارع في الاتوبيس في التاكسي في الجامعه في الكافيه , عالقهوه او في الشغل في العياده في الصيدلية في البيت في الراديو في التليفزيون , في البنزينه , او حتي في السوبر ماركت ومن خلال دقيقه واحده بس اتكلم مع واحد عادي مش مشهور مش مميز اتكلم معاه في اي موضوع وانت هتلاحظ كلامي كويس جدا . العنصريه في مصر زيها زي الفول والسجاير هتلاقيها موجوده جوه كل واحد فيهم . وبكل انواعها . والمشكله ان احنا بنعيب علي امريكا عنصريتها ضدنا وعمرنا ما فكرنا في عنصريتنا ضدها , بنستغرب اوي لما نسمع ان في عنصرية ضد اصحاب البشرة السمراء في امريكا رغم ان العن عنصرية ممكن يشوفها واحد اسمر .. هيلاقيها في مصر .. ايه مبتشوفوش الافلام .. عمركوا شوفتوا في فيلم عربي بواب اسمه عثمان ابيض .... اكيد لأ
لو قعدت اجمع اسامي الافلام اللي فيها عنصرية ضد السمر ده لو هنستبعد اننا نتكلم عن العنصرية في الشارع مش هخلص لان تقريبا مفيش فيلم كوميدي بيطلع من غير ما يقول افيه سخيف قد يكون اسخف ما في الفيلم علي البشره السمره ...
مش معني كده ان السمر معندهومش عنصرية . لو لاحظت ان السمر منعزلين مع نفسهم بارضه عن الالوان التانيه . وطبعا متحاولش تدخل وسطيهم لانك هتبقي مرفوض .. مبيفكركوش ده بحاجه ..
فاكرين حارة اليهود
العنصرية المزدوجه بين المسلمين والمسيحيين
وده ليه لان المسلمين ... غزاه محتلين اغتصبوا البلاد العربيه اللي ما كانتش عايزه تبقي عربيه علي ايد المغتصب عمرو بن العاص
(ياريت المسيحين اللي بيقولوا كده يقروا عن الاضطهاد الديني قبل دخول الاسلام مصر وحرق المسيحين وياريت يروحوا سينا والواحات ويفتكروا ليه كانوا بيبنوا دير في الصحرا ..يفكروا ولو لمره واحده في حياة المصريين قبل الاسلام . ) ثم ان انا لو كنت عايش قبل دخول الاسلام . اكيد كنت هتشرف باني اكون عربي وابقي فخور باني اكون عربي زي مانا دلوقت . ومكنتش هختار حال تاني
عارفين ليه العنصريه
لان المسلمين بيقولوا علي المسيحين كفره , اجانب ... ماتنافقش نفسك وتقول ان ده مبيحصلش .. تبقي حاجه من الاتنين يا اما منافق وكداب يا اما جاهل متعميش عينك عن دينك
دينك ضد العنصريه . ماتبقاش عنصري
ايه المعجزه اللي ممكن تخلي بني ادم يبقي مغرور ويسخر من بني ادم زيه لمجرد انه مختلف معاه عمل ايه في حياته وايه اللي ارتكبه بني ادم بانه يتهان لمجرد انه مختلف مع واحد تاني , ايه العيب ان يكون لونه اسود او ابيض او مسلم او مسيحي او رفيع او تخين او بيتكلم عربي او بيتكلم مش عربي او طويل او قصير او فقير او غني او ذكي او غبي .. .. ما كل واحد لنفسه . ك لواحد بيتقاس بعقله . مش بشكله .. مش بسنه .
انا هيجيلي شلل .. وانتوا مالكوا ومال سني , يابني انت لسه صغير .. ليه يعني .. محدش مسموحله انه يعاملني بحكم سني اه عندي 19 سنه .. اقولكوا علي حاجه .. انا لسه حتي ما بقتش 19
ايه علاقة ده بتفكيري , ما فيه ناس عندها 40 سنه وميعرفوش الالف من كوز الدره .. الجمله الاستفزازيه بتاعة ( يابني انت لسه صغير ) الرد بتاعها هيكون قاسي وقليل الادب , ياريت كل واحد يخلي باله من لسانه لو عقله هو اللي بيحركه ياريت يخلي باله منه , لكن لو لسانه بيتحرك من غير عقله يبقي اكيد مافيش لوم عليه .. ربنا يشفي .
....
قريت قبل كده قصيده معرفش مين اللي كتبها , لكن عارف معناها ايه
....
ضحكت فقالوا الا تحتشم
بكيت فقالوا الا تبتسم
بسمت فقالوا يرائي بها
عبست فقالوا ابدا ما كتم
نطقت فقالوا كثير الكلام
صمت فقالوا كليل اللسان
حلمت فقالوا صنيع جبان
لو كان مقتدرا لانتقم
يقولون شذ اذا قلت لا
وامعة اذا وافقتهم
فايقنت اني مهما ارد رضا الناس
لابد من ان اذم

15 comments:

break said...

بجد بوست هاااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااايل من هنا لبكرة

بس لو سمحت شيل كلمة الصيدلية من اول البوست
خلى الناس تعرف تسترزق

الجزء الأخير دا نشيد و فلاش عندى على الجهاز
مكتوب فى الفلاش ان الشاعر اسمه محمد منصور
بس فعلا معبر قوى

break said...

ممكن نبئا نسرق الصورة؟

Zika said...

break
بجد شكرا علي رفع معنوياتي كده
يالهوي
شكرا شكرا شكرا
متخافيش الناس هتسترزق بارضه باذن الله
فعلا النشيد ده معبر جدا
...
يا فندم انتوا تسرقوا البلوج ذات نفسه
الصوره لو تلاحظي فيها غلطات اصل انا اللي عاملها . طبعا طبعا اسرقوا براحتكوا :D

appy said...

يا ابنى انت لسه صغير عيب عليك كده ايه فهمك ههههههههههههههههههههه


لا بجد بص هو مين قال على عمرو ابن العاص كده بجد اول مرة اسمعها يا لهوى الا ده بجد

بص هو فيه عنصريه بس مش بمفهوم امريكا قليله شويه فهمت ولا نطول اصل الموضوع كبير وانت عارف انى عندى الضغط
طبعا كداب اللى يقولك مفيش عنصريه بس احنا بشر ودى حاجه جوانا

ceaser said...

عزيزى المخرج
أريت مدونتك -كلها- جميلة
بجد انت انسان ذكى (ليا اسبابى )
عجبنى قوى البوست بتاع v و على فكرة انت من الناس الأليلين اللى حسوا بالفيلم و فهموه (كلهم ناس بتفهم)
مستنى بوست جديد
ربنا يوفقك

رهف said...

بجد من غير هزار البلوج حلو قوى وكل بوست يدل على فكر عصرى مميز
بس فى حاجه هوانا حسيت انى بسمع برنامج حبه عسيلى طريقتك مميزه فى الكتابه
تحياتى لك وتمنياتى بدوام التوفيق

Zika said...

ceaser
نورت المدونه يا سيزر ويارب دايما منورها
وشكرا جدا عالكلام الجميل ده .. ده بس من زوقك

Zika said...

appy
ههههههههههههه
ماشي يا عم براحتك
:D
......
في مسيحين كتير يا اابي معتقدين في كده
انا فاهم بس لو عايزه تطولي طولي .. او اعملي بوست عن العنصريه عندك ...
معلش لما الضغط يعلي عندك ادبحيلك خروفين من خرفانك
....
اكيد يا اابي دي مش حاجه جوانا وحتي لو جوانا لازم نتحكم فيها ونراعي مشاعر الناس بدل ما نكسر نفسهم ونعذبهم في حياتهم ونطلع عينيهم اكتر ما هما طلعان عينيهم

Zika said...

رهف
العسيلي مره واحده :)
يا فندم ده بس من زوقك
نورتي المدونه
ويارب ما تنوريها دايما

Marvel said...

العنصرية موجودة في مصر بينا و بين بعض..بين المسلمين والمسيحيين..وبين الرجل والمرأة..وبين الابيض و الاسود..وبين اهل بحري واهل الصعيد..وبين اهل المدن والبدو

ده غير العنصرية اللي بين المصريين والعرب..دائما هتسمع كلمة ان المصريين هما اسياد العرب وان مصر ام الدنيا

اي الحل للموضوع ده..بصراحة مش عارف

Zika said...

marvel
والله يا مارفل المشكلة ان العنصريه حتي في الرياضه بين مثلا الاهلي والزمالك والاسماعيلي وكده
يعني معني كده انها حتي مش مشكلة طوائف دي مشكلة تفكير ... وده طبعا نتيجة لمشاكل التعليم ومشاكل الحياه عامة .فابالتالي كل واحد بيفكر في نفسه وبالتالي بتتولد العنصرية

Anonymous said...

المشكله يا حمار ان امثالك هم اللي موديين البلد في داهيه لان كلامك كله عنصرية اساسا ,
وبعدين يا اخي خللي عندك دم العنصرية دي موجوده في كل الدنيا
في امريكا واوروبا وايران ولبنان والسعوديه والصين واليابان والبرازيل وكل مكان في العالم اشمعنا مصر يعني اللي فالح تتكلم عنها

Zika said...

anonymous
والله انا محظوظ ان انا لسه موجود وتعليقك جه وانا اساسا كنت برد علي الناس
بص يا محترم
......
اولا العنصريه زي مانت قلت فعلا موجوده في كل الدنيا
وبكل وضوح انا بتكلم عن مصر لان انا بكل بساطه مصري
وبتكلم عن مشاكل مصر
وانا مالي انا اتكلم عن العنصريه في البرازيل ليه , ما نسيب البرازيلين هم اللي يتكلموا عنها
واكيد الهنود بيتكلموا عن العنصريه في الهند
والانجليز بيتكلموا عن العنصرية في انجلترا
وكل واحد حر يتكلم عن الموضوع اللي هو عايزه في المكان اللي هو عايزه في الوقت اللي هو عايزه
وهكذا
انا كمصري بتكلم عن حاجهع شايفها بعيني وحاسسها بعقلي , مش هتكلم عن حاجه سمعتها في الاخبار , انا بتكلم عن الحاجه اللي تخصني ومايشغلنيش ان تبقي في عنصرية في امريكا لان الامريكان اكيد في الوقت اللي سيادتك بتشتمني فيه بيناقشوا بعض باحترام عن العنصريه يف بلدهم
.....
اتمني ان دي ما تبقاش اخر زياره ليك , بس ياريت الزياره الجايه تغير فيها اسلوبك معايا وياريت تكتب اسمك او تدخل بلينك مدونتك لو انت بتدون
..
كنت ممكن ارد عليك بطريقتك وعلي فكره انا صاحب اطول لسان ممكن تشوفه في حياتك ولساني قليل الادب اوي مع اللي بيقل ادبه معايا ياريت تحترمني في كلامك عشان اقدر احترمك في كلامي
تحياتي

حدوتة مصرية said...

الله
فعلا العنصريه هى السبب
فى كل البلاوى اللى احنا عايشنها
فى البيت عنصريه فى الشارع عنصريه فى الافلام فى الكورة فى الدين امتى ربنا يرحمنا من الدنيا ديه ويطلعنا منها على خير

Zika said...

حدوته
الله عليك انت
...
انا حاسس اننا نا شاء الله هنطلع منها علي خير لاننا تعبنا فيها اوي .
...
تحياتي