Tuesday, May 25, 2010

حاسس اني عايز أقول

ان ده مش موود امتحانات لأ ده قلق حقيقي وزعل حقيقي ووجع بجد مش شـِعر وان فيه ناس اظاهر من كتر مانا مصدر ضحك وسعاده ليهم مش مقدرين ان انا ممكن أزعل او ممكن احتاج اتكلم جد
ولما اتكلم جد ماحدش يدخل يهزر او يتريق او مايقدرش موقفي او على الاقل ما يطبطبش عليا
وان ساعات باحتاج اتحضن ..أه اتحضن ... ماحدش يعمل نفسه مكسوف ايه مابتتحضنوش



حاسس اني عايز أقول اني مابعرفش أعيط وحاسس ان انا محروم من العياط مش باعرف اعيط بس هاعمل ايه عاوز اعيط - قبل كده حد قالي انك لما حد يحضنك هاتعيط
بس المشكله ان مارتينيا كانت جمبي هنا وكانت بتحضني وبارضه ماكنتش باعيط
واهي مارتينيا سافرت أمريكا
اللي كل اما احب حد تاخده مني هي والسويد الله يحرقها بجاز



حاسس اني عايز أقول ان انا بني ادم وان البني ادمين المفروض يبطلوا يستخفوا بمشاعر بعض



حاسس اني عايز اقول اني متضايق من نفسي اني بحب الهزار والضحك ومابحبش ارمي همومي على حد ودايما بقابل الناس وانا مبتسم حتى لو انا حاصلي ايه بارضه باضحك ولو فرحان ونفسي ازقطط واجري واقول نكت والاقي حد زعلان على طول في ساعتها أبقى زعلان ومحاوش استفز اللي قدامي بأي هزار نفسي بس لما أكون تعبان ومحتاج حبة هدوء جمبي
أو حد يزعل عشاني - مابلاقيش


حاسس أني عايز أقول اني عملت كتير أوي لناس بحبها وماشوفتش منهم من الحب أي جانب - أنا عمري ما بستنى مقابل او رد جميل لأني لما باخدم حد او باساعد حد او باضحك في وش حد باعمل ده لاني فعلا بابقا عايز اعمل ده
وبابقى متضايق فعلا لو هو متضايق
وبابقا سعيد اوي لما اشوف نجاحه
وبابقا مزقطط وانا باقول للدنيا كلها صاحبي عمل كذا وكذا وكذا
انا مش بستني رد فعل لكن لما احس اني باتعب عشان ناس ..مابتفكرش انها تتعب عشاني ولو للحظه بابقى زعلان على نفسي جدا
مش عشان كنت مستني رد جميل بس عشان بحس اني قيمتي عندهم مش نفس قيمتهم عندي


حاسس اني عايز أقول
اني عارف ان ربنا هايسيبني متضايق شويه عشان شايلي حاجه حلوه في الدنيا وعارف كمان انه مش هايسيبني في الاخره ازعل انا عارف ومتأكد ان كل اللي شوفته في الفتره اللي فاتت دي مش ببلاش عند ربنا وانه شايلي حاجه اكبر في الجنه


حاسس اني عايز اقول ان صحابي اللي ماتوا وحشوني جدا
مش عايز اعيش تاني اللحظه اللي اشوف حد فيها من صحابي بيموت قدامي وماقدرش اساعده
مش عايز اعيش اليوم اللي افقد فيه حد تاني من صحابي عايز أموت قبلهم
يمكن ساعتها هابقا مرتاح لأني مش هاعرف اذا كانوا هايزعلوا عليا ولا مش هايزعلوا


حاسس اني عايز أسكت

Tuesday, May 18, 2010

أمك اسمها ايه يا دكتور

الدكتور لطالب قاصص شعره راستا
قوم يابني اخرج بره انا مابدرسش لرقاصات عندي هنا

الطالب يقوم من مكانه ثم ينادي على زميل ليناوله شنطته

الدكتور
اخلص يا روح امك انت هاتعملك فيلم

الطالب في غضب هادئ
يا دكتور حضرتك انا امي ست محترمه بلاش سيرة الاب والام ... انا خارج

الدكتور في انفعال غير مبرر
الله وانا كل واحد امه تتشرمط بره وتسرحلي عيالها ييجوا يتشرمطوا هنا ويعلمونا الادب

الطالب ببكاء مكتوم وانفعال
تصدق ان انت مش محترم

الدكتور
وانت بقا اللي هاتعلمني الاحترام يا حيلة امك - مشيها حيلة أمك - هاه انت اللي هاتعلمني الاحترام ؟

الطالب في انفجار يتجه نحو الدكتور
قائلا
ماهو طالما مش محترم يبقا لازم تتربى
ثم صفعه على وجهه صفعة قوية جدا

الدكتور يتجه نحو الطالب في انفعال لحظة دخول الامن الى المدرج يلتفوا حول الطالب كل منهم معنفا اياه في مجاملة للدكتور ثم يأخذونه بعيدا

الدكتور في مواجهة الطلبه
وانتوا يا محترمين .... المنهج اللي انا شرحته كله لاغي وهاشرح منهج جديد وهاييجي كله في الامتحان واللي مش عاجبه يخبط راسه في الحيط

ثم يرمي الدكتور المايك في غضب تاركا المحاضرة

تمت

Tuesday, May 11, 2010

ما أشبه الليلة بالبارحة

في كل فترات الضعف اللي شافتها مصر كان لازم ييجي معاها على الصعيد الفني والأدبي ضعف وهبوط وتدني مستوى الذوق العام
تعالوا نبص بصة عقل على الزمن اللي بيسموه جميل
وتعالوا ناخده من الأول
ما قبل أم كلثوم
بغض النظر عن اني لا يناسبني كشخصيه وكتربية وكمزاج اني اسمع لام كلثوم - اللهم الا قليلا - وده مش عن عيب في أم كلثوم بس انا من جيل لم يرى كل الابداع اللي الناس شايفاه في أم كلثوم للأسباب دي
قبل أم كلثوم كان فيه مين بيغني ؟
محمد عبد الوهاب
ده اللي الناس تعرفه
قبل أم كلثوم كانت الاغاني اهبط بمراحل من موسوعة اغاني سعد وبعرور وكان فيها الفاظ جنسية تناسب المرحله دي ولما نيجي نقيس عليها نلاقي ان حتى بعرور وسعد افضل واكثر احتراما
عشان كده لما نيجي ندور على تاريخ مصر الادبي والفني قبل فترة عشرينيات والثلا ثينيات من القرن اللي فات - اللي هي فترة بداية ام كلثوم - هانتعب اوي رغم ان كان فيه ناس كتير جدا بتغني لكن ماحدش فيهم كان مؤثر وماحدش فيهم كان يتسمع كانت كلها أغاني كباريهات - بالظبط زي دلوقت - وافيهات جنسيه واصوات سخيفه كوميديه
الفتره دي بدات تقريبا مع تعمق الاحتلال الانجليزي وتثبيت اقدامه في مصر من 1882 لحد اما بدا يرتاح وياخد راحته ويفرد معسكراته على مصر كلها لظروف ما كان - حاشية - الخديوي ثم الملك بيوصولوله ان الشعل المصري زي الفل وبيحلب الجاموسه وبيقرا الورد بتاعه كل يوم الصبح
أم كلثوم كانت القشايه اللي اتعلق بيها المجتمع المصري في ظل عدم وجود منافس أصلا ليها فكان لازم تكون هي كوكب الشرق ..لأنها ببساطه مافيش كواكب تانيه .. ده مش معناه اني ضد ام كلثوم او باقول عليها حاجه وحشه بالعكس تماما اطلاقا ...ضرب مثل القشايه بام كلثوم مش شتيمه لان ببساطه أم كلثوم في الغنا
كانت زي سعد ومصطفى كامل ثم عبد الناصر في الحياه السياسيه في التوقيت ده
ببساطة لما مايكونش فيه مشروع سياسي او خطه مجتمعيه بيقابلها في نفس الوقت ضعف وتفكك ادبي وفني وبيظهر فارس من بعيد يعيد الاوضاع لنصابها الصحيح لكن للاسف بالتفاف المصريين حوالين أم كلثوم وان اي حد بيفكر يغني في الوقت ده كان بيترفض او بيظهر بمظهر الكومبارس الا ان انتهت ام كلثوم وده طبع الحياه والدنيا مش عن ضعف فيها
والا حد يفسرلي هرولة المصريين حوالين النقله اللي عملها منير مراد في الموسيقى المصريه في صورة عبد الحليم حافظ وانخفاض وقت الاغنيه من 40 و 50 دقيقه الى اغاني ماتزيدش عن 5 دقايق في فيلم لعبد الحليم
لو كان كلامي غلط حد يفسرلي مع ظهور مشروع الثوره وازدهار القوميه العربيه ازدهار الاغنيه في الوقت ده لعبد الحليم وفريد ونجاة وسعاد محمد وفايزه أحمد رغم اختلاف الفروق الفرديه بينهم وحد يفسرلي مع نهاية الحلم السياسي ده ب النكسه توحد المصريين حوالين نطاق فني واحد اسمه عبد الحليم حافظ الى ساعة النصر في اكتوبر عشان ترجع تاني السينما المصريه والغنا تقدملنا نماذج تانيه
نقتلها امتى ؟
فترة الضعف اللي بعدها على طول وهي فترة الكساد السياسي والمعتقلات والفقر المدقع في حياة السادات عشان نوصل لأسوأ فترة ضعف فني وافلام العلب الاحمر في اصفر عشان يرجع عبد الحليم تاني رقم واحد وبس وفترة ظهور الفرق الغنائيه الكتير اللي الشباب بيلجألها عشان يثبت لنفسه انه لسه قادر يغني غير عبد الحليم
الى ان تنتهي فترة عبد الحليم
وتبدأ فترة فراغ ( لم يغني في هذه الفتره سوى الباندات وتحول الموسيقى المصريه الى الموسيقى العالميه وبس ) ثم فترة ظهور خمول واخفاء ملامح أي مشروع وطني يقابله عدم وجود مشروع فني او ادبي وعشان كده ماكانش فيه غير الباندات اللي نقلت المزيكا عشان يبدأ يتجلي ظهور عمرو دياب ومحمد منير ويبقا اي منافس ليهم أضعف بكتير منهم
لحد ما نوصل للمستوى اللي احنا فيه فيه مليون مطرب وماحدش يعرف عنهم حاجه والكلام كله شبه بعضه
احساس اخير حسيته اننا مع ظهور مشروع وطني اخيرا وهو مشروع تغيير ومع ظهور الفرق الموسيقيه بشكل مكثف اوي في مواجهة مشاريع الغنا ( الحبيبي المكاتيبي الملاهيبي ) اظن اني اثبت - لنفسي على الاقل - ان الناس اللي بتقول ان الفن المفروض مايبقاش ليه علاقه بالحياه الاجتماعيه والسياسه ومصر غلطانين جدا جدا جدا في حق الفن
وحق مصر