Tuesday, December 27, 2011

من مجموعة نصوص بعنوان - ضد الكسر


الوقفة في الشارع
البَص في عينين جميلة شابكها ايدها في ايد حبيبها
رؤية العصافير تمرجح ضحكها
لحظة ما صاحب السجن يسيبها
كل دي لحظات .. ببلاش بجد
بشرط
تدفع تمنها
وحدة
وحسرة
وانتظار .. للصدفة اللي هاتجيبها

Friday, December 23, 2011

ديسمبر

ديسمبر يأتي بالخطيئة

ويذهب بالكريسماس

كل عام

يطعم الأطفال حلوى مسممة

ثم يذهب ليعبث بهدايا سانتا كلوز ... وحده

Sunday, December 11, 2011

أغنية في رثاء الثورة

يالا حالا بالا بالا حيوا أبو الفصاد
النهردة الأربع عيده
والكلبش اللي في ايده
كان بسبب الاعتراض
يالا حالا بالا بالا حيوا أبو الفصاد

الشهيد مابقاش له قيمة
المظالم مستديمة
والبطل هايعيش بعاهة
أو بنص عين سليمة
ميت خساره ع الولاد
يالا حالا بالا بالا حيوا أبو الفصاد

يالا حالا بالا بالا قوموا صلّوا
كل ثاير داير حاير ع اللي حصلّه
فتّح عينك خاف على عينك واوعى تقولّه
زارع ثورة ودم وشهدا والخوف الحصاد
يالا حالا بالا بالا حيوا أبوالفصاد


مين اللي ثاير مين
مين اللي خاين مين
على حيطة الزنازين
يا حسرة الثوار
بلا طريق أو زاد
يالا حالا بالا بالا حيوا ابو الفصاد

ساقية بتطرح دم ولادها
والبقر بيدور
وقعت حبه في ايد مولانا
وفي ايد النسور
حبه قالوا دول م الصرب
وحبه من الموساد
جتكم نيله وستين نيله
حيّوا أبو الفصاد