Saturday, January 30, 2010

الضرب في الميت .. في معرض الكتاب

عشان تعرفوا تشتروا كتب دار المصري
والتلت كتب في منتهى الروعه
الضرب في الميت .. احمد الصباغ
وظيفه ما تمت .. مايكل محسن
احبني لتعرف من أنا . ايناس حليم ولبنى غانم


1
دار ليلى سراى كندا
(وانت داخل من البوابة الرئيسية بعد ما تسيب الشروق على ايديك الشمال بعدين سراى الجامعة الامريكية بعدين سرايا ألمانيا بعدين سرايا كندا تدخل هتلاقى دار ليلى على ايديك الشمال)

2
دار أكتب صالة 3 علوى
(فى الشارع اللى قصاد المطاعم تالت مبنى على ايدك الشمال)

3
ودار شمس صا...لة 2 أرضى
(فى الشارع اللى قصاد المطاعم تانى مبنى على ايدك الشمال)

4
والعالمية للنشر والتوزيع المانيا ب بسرايا 6 بالمعرض

Sunday, January 24, 2010

الضرب في الميت - كتاب مصري ساخر





أخيرا وبعد طول انتظار بجد ..أحمد الصباغ هاينزل في معرض الكتاب ان شاء الله
بكتاب
الضرب في الميت

واضح من الاسم انه يشد ومستني انه يكون كتاب ممتع
خصوصا ان احمد الصباغ من المدونين القليلين اللي مستمرين في ابداعهم الجميل ولاننا في حاجه للنوع ده من الادب الساخر .. بعد ما انتشر في الفتره الاخيره حاجات أٌقل من المستوى
اللهم الا قليل

عمر طاهر - اشرف توفيق - وغيرهم طبعا

اما دار المصري فاستمرارا لتقديمها حاجات مختلفه ومحترمه

وبعد كتاب الرائع مايكل محسن
وظيفه ما تمت

بتقدم لنا فرصه جديده للاستمتاع بالادب الساخر مع الساخر الموهوب احمد الصباغ

عموما

في انتظار معرض الكتاب بفارغ الصبر عشان الكتاب الرائع
الضرب في الميت - كتاب مصري ساخر - احمد الصباغ

---------------------
والكتاب ده على ضمانتي الشخصيه انه هايكون كتاب رائع ان شاء الله

Thursday, January 21, 2010

ال دي في دي والكسب السريع




كانت الساعه الواحده ليلا وقد قاربت على الساعتين من اللف والدوران في اراضي امبابه وغير امبابه في البحث والتنقيب عن محل يبيع مستلزمات الكمبيوتر . بحثا داميا عن اسطوانة دي في دي لنسخ عليها ما قد تم انقاذه من اشعار وكتابات و صور وذكريات جميله قم تم انتشالها بعد فاجعة " الهارد وير " الاخيره التي لاقت فيها كثير من اشلائي " الشعريه " مصرعها على جنبات "السوفت وير" بعد اصابة جهاز الكمبيوتر الخاص بي بانفلونزا الهاردات

ساعتين اسير هائما في الشوارع أبحث عن محل يتيم يوحد ربه يبيع تلك المستلزمات التافهه فلم اجد .. وشعرت انني عدت الى زمن " ما قبل الكمبيوتر " حيث ما كنا نحلم حتى بهذا التطور المريب للتكنولوجيا

عادت بي الذاكره ايضا الى ما يقرب من اربع او خمس سنين عندما بدأ استخدام الكمبيوتر ينتشر في مصر ويتوسع انتشاره ليشمل كل غرفه في كل بيت من بيوت المحروسه ..وقتها كان جميع اصحاب راس المال يتجهون صوب تجارة أعضاء الكمبيوتر هذا الاختراع المريب الذي يشتريه كل الناس ويقبل عليه الناس من كل صوب وحدف باحثين عن مقتنياته .. تاركين نهمهم المستفز في افتتاح المطاعم أو محلات الملابس

كلما كنت أسير في أي شارع حتى ولو كان "ربع شارع " كان لابد أن أجد على الاقل محلين تلاته يبيعون مستلزمات الكمبيوتر
بل أن احيانا كان يقابلني أحدهم في الطريق ويوقفني متسائلا .( مش عايز اسطوانات دي في دي ) فاتجاهله غير مباليا .. بينما أسير الان متلهفا وراء كل من يبدو عليه انه تربطه علاقة ما باجهزة الكمبيوتر لأستعطفه ( والنبي مالاقيش معاك اسطوانة دي في دي ) فينظر الي شرذا ويتركني أعاني أثار القهر والحرمان

تجمعت وقتها افكاري الضائعه وبدات استرجع مزيدا من الذكريات والأسئله .. فتذكرت انه بعد مرور سنوات قليله ايضا .. اختفت صناعة الكمبيوتر ومحلاتها من شوارع المحروسه لتحل محلها صناعة الموبايلات . والنغمات والرنات ثم عملا بمبدأ ( ان دامت لغيري ماكانتش جاتلي ) احتلت السنترالات محل محلات مستلزمات الموبايل بكل تواضع . ثم السيبرات .. ثم محلات البلاي ستيشن . ثم مع انتاج ميكروسوفت جيل جديد من الأجهزه عادت مره اخرى تجارة الكمبيوتر للظهور لتختفي مع انشغال الجميع بمواسم الاعياد واتجاه التجار لصناعة الملابس وهكذا .. واظن انه في السنين القليله القادمه كلما يظهر اختراع ما . سيلهث وراءه الجميع تجار ومشترين الى ان ينتهوا منه .ويملوا تجارته وتقل فلوسه ..فيذهبون الى جارية اخرى وهكذا

والمبدأ هو العرض والطلب .. فكلما زاد العرض .. قل الطلب وقلت الفلوس وكلما قل العرض . زاد الطلب وكثر الباعين لهذا المنتج حتى يتم تحوي العرض بقدرة قادر من عرض قليل وطلب كثير .. الى العكس تماما

لا أعلم هذا السر الرهيب الذي يجمع المصريين بهواية الكسب السريع , كل ما رايت في التليفزيون او قرأت في الجريده اليوميه هذا الحادث المكرر بشكل ممل . عن مجموعه من المواطنين منصوب عليهم . وان هناك رجلا ما اقنعهم بانه يستطيع تحويل الجنيه الى ألف في ثلاث ثواني وأن المدير كذا والمهندس فلان والدكتور علان قد ائتمنوا صاحب شركة التوظيف تلك او غيرها وبالطبع تنتهي الحدوته بالنصب . وخيانة الرجل للأمانه
لا أعلم ايضا لماذا يقع ضحية هذا التهور متعلمين ومثقفين واصحاب مراكز عليا . اظن ان لديهم من خبرة في الحياة ما يكفيهم ليعلموا ان الجنيه لا يمكن باي حال من الاحوال ان يكون عشره في غضون دقائق .

ضلت رأسي الطريق الذي أسير فيه منذ أكثر من ساعتين وخانتني قدماي حتى وجدتني أقف على بعد كشك سجاير من بيتنا ووقفت أمام الكشك واقتربت من عم احمد صاحب الكشك
ودنوت منه قليلا . وهمست في أذنيه بصوت خافت ..ماتعرفش حد بيبيع اسطوانات دي في دي يا عم احمد ؟

Thursday, January 14, 2010

كشف حساب

كان نفسي ابقا حد من دول

النوع الاول

بتاع الناس اللي مريحه دماغها
ابعد حاجه بيفكروا فيها بكره .. بكره اللي هو بكره . مش بكره المستقبل
النهرده هايخرجوا مع مين بكره رايحين فين
واللي هم مش فاكرين اخر مره حاولوا يعملوا حاجه
الحياه بالنسبالهم سهله اوي ومش محتاجه اي تعقيد . النوع ده بيلاقي النجاح في حياته بسهوله . رغم انه اصلا ماتعبش كتير . النوع ده مش من طبقه معينه .. اطلاقا هم بس حاسين ان الحياه اتفه من انهم يفكروا فيها .. عشان كده هم اصلا ما بيفكروش فعشان كده دماغهم مرتاحه
دول بقا جابوا مجموع قليل اوي في الثانويه العامه . وبيخرجوا كل يوم وبيروحوا في كل حته معظمهم الكوره بالنسباله متابعه . والسينما خروجه مع اصحابه بعد ما يتعشوا في اي حته واللي هم ماكانوش بيسمعوا الكلام والمدرسين كانوا بيطردوهم من الحصه . وهم كانوا بيفرحوا اوي لانهم هايقدروا يعملوا اي حاجه تانيه بدل الحصه الممله ولما بيكبروا بيبقوا مرتاحين اوي عشان غالبا ماعندهمش هم يشيلوه واهلهم بيبقوا فخورين بيهم جدا لانهم لما بيكبروا بيبقوا حاجه كويسه اوي



النوع التاني

اللي هم جابوا مجموع كبير في الثانويه العامه . دخلوا كليه كويسه وكانوا بيذاكروا في الكليه . مابيفكروش في حاجه غير انهم يذاكروا وياخدوا كورسات ويجيبوا تقدير كويس . ويشتغلوا في شركه محترمه
اللي هم مابيخرجوش كل يوم . وغالبا مش بيشربوا سجاير ويمكن معظمهم مش متابع كوره والسينما بالنسباله خروجه مع خطيبته اللي غالبا اتجوزها من غير ما يحبها . اللي هم وهم صغيرين كانوا بيسمعوا الكلام . وبياخدوا صح وعشره من عشره . واهلهم كانوا فخورين بيهم جدا لانهم لما بيكبروا بيبقوا حاجه كويسه اوي

Monday, January 11, 2010

امتا هاننضف ؟

البوست ده عباره عن سؤال
محمود معروف بيشتم جوزيه وشمتان فيه
المسلمين والمسيحيين بيتخانقوا لاسباب
ظاهريه : اللي هي التعصب الديني
باطنيه : مشاكل خناقات وجهل وتخلف وعصابات ومجرمين ومسجلين خطر بس كل الفرق ان المره دي كانوا مسلمين ومسيحيين
الزباله لسه في الشوارع رغم ان الموضوع بدأ يموت اعلاميا
الدكاتره لسه بيكفروا الطلبه في عيشتهم
انفلونزا الخنازير بتنتشر ... واحنا البلد الوحيد في العالم اللي مستمر فيه الانتشار بالطريقه دي
الناس بقت انتهازيه وكله عايز يطلع مصلحه من كله
انا عايز اسال سؤال وياريت ماحدش يرد عليا ب.. طب هانعمل ايه . ربنا ع الظالم والمفتري وبان الحرام .. . ماحش يقولي الكلام الحمصي
ده .. الحكومه خلاص مابقتش تفرق معاها .. يبقا لازم احنا تفرق معانا
قبل ما نفكر في الحكومه نفكر في نفسنا شويه
لو كل واحد نضف نفسه من جوه كلنا هاننضف غصب عن عين الحكومه
لو كل واحد شال الخبث والغل والحقد والشماته والوساخه والانانيه وحط مصلحة البلد قدامه هاننضف
بس انا بارضه عايز اعرف
امتا البلد دي هاتنضف .. شكلا وموضوعا .؟

Thursday, January 7, 2010

الشذوذ واشياء اخرى

سواء اتفقنا او اختلفنا على حريات المثليين فانا هافضل مقتنع طول حياتي ان الشذوذ ده مش هو الطريق الصح
وان زي ما قالتلي الوجا س. جاكمان
صديقتي الكاتبه والباحثه الامريكيه
GaY IS Not God way
واتمنى ان ييجي اليوم واصحابي المثليين ييجي عليهم اليوم ويشوفوا الطريق الصح
اللي ربنا ذكره في القران ومش محتاج تأويل
ولحد ما ييجي اليوم ده . انا مش مستعد اخسر أي صديق بسبب هو مين او بيعمل ايه او بيفكر ازاي

محمد منير .. مثلي الأعلى بيقول
اعرف بشر
عرفوني لأ .. لأ ما عرفونيش
قبلوني .. وقبلتهم
بمد ايدي لك . طب ليه ما تقبلنيش
لا يهمني اسمك ... لا يهمني عنوانك
لا يهمني لونك .. ولا ميلادك .. مكانك
يهمني الانسان .. ولو مالوش عنوان

ايوه انا كده مايهمنيش انت مين يهمني انت بالنسبالي ايه وانا بالنسبالك ايه

بالمناسبه دي

بعت ليا واحد على الفيس بوك رساله
بيقولي في الرساله
hi you are very cute wish we can be friends
قلت يمكن الرساله مبعوته بالغلط .. فرديت بعلامات استفهام ؟
i'm half american half egyptian boy . and i realy like the way you look
i think you are so hot
wish you can be my ..... i will not fill the blanks as of now
but who knows maybe one day thanks for your accpetance
by the way i'm 19 years old i'm in egypt now on vacation. wish you can come with me to usa we can have so much fun togther

ليه الناس بتتكلم على المثليه باشمئزاز رغم ان الناس المثليين اللي على الاقل انا اعرفهم اتحدا اي واحد فيهم انه من اول ما يشوفهم ويعد معاهم يعرف او حتى يلاحظ انه مثلي
ده لان بالنسبالهم المثليه دي حاجه خاصه بيهم . ومش لمجرد الجنس
لكن امثال الشخص ده . اعتقد ان هو اللي بيظهر المثليه بالمظهر ده
انا هنا مش بدافع عن المثليه او بهاجم
انا هنا باحدد موقفي
انا مش مع المثليه .. ولكن مع المثليين

ماعرفش ليه كلامي دايما بيتفسر غلط
لما اتكلمت عن كلنا ليلى كل اللي كنت اقصده ان ماينفعش اقول انا عايز حقي . واسيب حق الناس
اطالب الناس بالحريه وهم مايعرفوش شكلها
وقبل ما نقول الحكومه مابتديناش حريه
تعالوا نراجع نفسنا

لما المسلمين يدوا حريه للمسيحيين
والمسيحيين يدوا الحريه للمسلمين
والاتنين يدوا حريه للبهائيين وغير البهائيين
لما الملحدين يبطول يتعدوا على حدود الاديان
والغني يدي الحريه للفقير
لما البيض يدوا الحريه للسود
والسود يدوا حريه للبيض
لما الكبير يدي حريه للصغير
والصغير يدي حريه للكبير
لما الاهالي تدي الحريه لاولادهم في اختياراتهم
لما تدي لنفسك انت حريه في انك تعيش حياتك بالطريقه اللي تحبها مش اللي الناس فارضاها عليك

انا مش باقول خطبه .. انا باقول كلام اتقال من اكتر من 1400 سنه قالها واحد تسبب في انه يعطي الحريه لمليارات بعد كده
هو سيدنا محمد عليى الصلاة والسلام
لما كل واحد فينا يفهم معنى الحريه ويطبقها بنفسه ساعتها نقدر نتكلم عن الحريه ونقول للحكومه اه ولأ

بمناسبة الحريه

انا ليا صديقه ( هي عارفه اني باتكلم عليها دلوقت ) ومش مهم اسمها
هي بتشتغل ...... شرموطه
اه .. هي بتنام مع ناس وتاخد فلوس
هي مش صديقه بالمعنى الحرفي . لكن بما ان الجنس ده بالنسبالي حاجه مقننه جدا .. ومش شايله على كتفي .. كنت ممكن انام معاها في اي وقت ودي فرصه اي شاب بيحلم بيها خصوصا لو واحده في جمالها او حتى في ربع جمالها
لكن لان الجنس اسمى واكبر من اننا نمارسه لمجرد سد شهوه ..كنت دايما بارفض
الجنس ده حياتنا
وكلنا جينا ع الارض هنا بسبب خطيئه
ارتكبها سيدنا ادم في الجنه
" فأكلا منها فبدت لهما سوءاتهما وطفقا يخصفان عليهما من ورق الجنة "
صدق الله العظيم
من سورة طه
لما ادم وحوا كلوا التفاحه .. حسوا ان عندهم حاجه لازم يخبوها ويتكسفوا منها رغم انهم كانوا عايشين مش مكسوفين منها قبل كده
اللي هي الاعضاء التناسليه .. ومن هنا اتولدت الشهوه واتزرعت في جسم كل واحد فينا
بسبب خطيئه ؟
ولما جه ابليس يوسوس للبني ادم
اللي ساب الجنه والعز اللي ربنا كان معيش فيه ابليس قبل ادم .. اول حاجه لعب عليها كانت الشهوه
واول انتصار . يحسب للبني ادم انه ينتصر على شهوته
لكن ؟
ايه علاقة ده بكلامي عن وجود صديقه ليا في نظر اي واحد في الدنيا مجرد حثاله
او ليه يصاحب مثليين ويعتبرهم اصدقاءه
الحريه
الحريه اللي عشنا محرومين منها .. حسيت ان الحريه مش لازم اخدها من الناس
لأ
الحريه دي لازم احنا اللي نعيشها جوه نفسنا الاول
قبل ما نطلبها من الناس
قبل ما اطلب من الناس انهم مايضايقونيش
اني اسمر
او اني بارقص
او اني أي حاجه تانيه
كان لازم ماضايقهومش بكونهم اي حاجه ممكن يبقوا عليها
الحريه المطلقه هي أسوأ انواع الحريه
وسقف الحريه
بيقف
لما تيجي لحد عندي .وتاخد حته مني
ساعتها هاقولك لأ دي مش حريه
وعشان كده رفضت الاخ اللي بعتلي رساله ع الفيس بوك مضمونها جنسي
لاني مش كاتب على صورتي انا مثلي
ولاني مش مثلي
انا انسان طبيعي ومش من حق اي حد انه ياخد من حريتي او ينتهك مبادئي
ومن حريتي ان الناس ماتفكرش فيا زي ما هم عايزين او زي ما هم شايفين .. لكن زي مانا فعلا
وعشان كده عمري ما هاقطع علاقتي بصاحبتي اياها .. لانها لم تتعدى حدود حريتي لحد النهرده
بشرط اني طالما شايف ان اللي بتعمله حرام وفلوسها حرام
مش هاخد منها
زي ما كنت باقول لأي حد يقولي فلوس الرقص حرام
خلاص
ماتاخدش منها
لما ابقا اعزمك على حاجه ماتاخدهاش مني
ارفض اي هديه هاجيبهالك
لكن نفضل صحاب
مفهوم الصداقه
من اسمى مفاهيم الحريه
خصوصا لما يبقا ليا صديق زي احمد عبد الحليم( مايعرفش اني باتكلم عليه دلوقت ) وماعندوش نت ومش مدمن منير وبيختلف معايا في كل حاجه
الا انه اعز اصدقائي بلا اي حدود
فضلنا صحاب وانا شايفه مش زيي وهو شايفني باتغير عن الطفل اللي كان شايفه
وانا شايفه بيكبر وبيبقا مش هو الطفل اللي انا عارفه
وده ببساطه
لاننا عمرنا ما بنتعدي حرية بعض
وعشان كده يمكن الايام دي بنحتفل ب 10 سنين كامله
من الحريه ومن الصداقه
الحريه بمفهومها السهل البسيط بدون اي مصطلحات ساذجه
عشان كده تعالوا نعمم الحريه بكلام من الدين
الدين اللي هو اول حاجه عرفنا بيها الحريه
" يا أيها الناس إنا خلقناكم شعوبا وقبائل لتعارفوا إن أكرمكم عند الله أتقاكم إن الله عليم خبير "
صدق الله العظيم
وللحديث بقيه

Friday, January 1, 2010

تلت سنين تدوين

زمان وانا صغير كنت بحب الشخبطه ع الحيط . يقولولي لو شخبط ع الحيطه تاني هاتضرب .. بس مش عارف كنت باحس بمتعه وانا باشخبط ع الحيطه وبالون ع الازاز وباحفر خطوط واسامي ومربعات وارقام ع المكتب .. يدوني ورق .. بس ماعرفش ماكنتش بلاقي حريه في الورق .. الحيطه كانت اوسع .. وكل الناس كانت بتشوف انا كتبت ايه لكن الورقه كانوا بيقطعوها ويرموها
كنت فاكر ان الكتابه حاجه وحشه وبتبوظ البيت .. لكن لما كبرت قدرت اخيرا افهم ان مش الكتابه هي اللي وحشه لكن الكتابه ع الحيط بتبوظ شكل الشق .. وقدرت اتحكم في نفسي وابطل اشخبط ... لكن ماقدرتش امنع ولاد عمي وابن خالي الصغيرين وانا باشوفهم بعيني بيشخبطوا على كتبي ومكتبي وحيطة اوضتي .. ماقدرتش اقولهم ماتشخبطوش
سنة 2002 ابويا اداني اجنده زرقا لسنة 2003 والكلام ده كان في اخر 2002 لكن كل ما كنت اجي اكتب فيها .. ماكنتش باعرف . كنت باحس اني المفروض افكر بس لان كل ما اكتب اللي بافكر فيه .. الاقي نفسي باكتب حاجه تانيه لحد ما جه الوقت وبدات اكتب فيها تقربا كان في 2004 او 2005 لما بدات اكتب قصص كانت كلها بتتكلم عن حاجه واحده ... ايه اللي بيحصل من ورايا .. الناس بتقول عليا ايه .. يا تري س بيقول ايه وص بيقول ايه و م و ع يا ترى بيفكروا ازاي كانت تقريبا كلها عني .. لدرجة اني زهقت وزعلت من نفسي . وقلت انا مش هاكتب تاني لاني بكل بساطه الكتابه بتخليني اناني واكتب عن نفسي . ومافكرش في الناس واتكلم عن احلامي وطموحاتي وشكلي انا ... انا بس
مع اواخر الفتره اللي فاتت كانت بداية لازدهار استخدام النت ف مصر . ايام زيرو سبع سبعات ... كنت باعد ع النت كتير جدا لقيت ان القرايه ع النت اسهل كتير من قراية الكتب اللي في مكتبة ابويا .. اكتشفت كمان ان الكتب . مش هي بس اللي عند ابويا في المكتبه .. اكتشفت كمان .. ان القرايه احلى من الكوره واحلى من الرياضه
احلى من اني ادخل بطولات العاب قوى طل سنه واخد مراكز كبيره وفي الاخر ولا حاجه .. كنت باروح لوحدي وباجي لوحدي ورافض ان اهلي ييجوا يتفرجوا عليا وانا في البطولات دي وباحقق مراكز ..رغم اني كنت بازعل اوي كل اما اروح الاقي كل لاعب معاه ابوه وامه بيشجعوه حتى لو خدت مركز اول . وقت اعلان الفايزين .. الناس كانت بتصقف في المركز التاني والتالت اكتر من اعلان فوزي بالمركز الاول
حسيت ان القرايه والكتابه احسن من اني العب كوره واتاخد في الفريق الاول للنادي وانا عندي 15 سنه حسيت اني عايز اخلص التمرين وارجع بسرعه عشان اكتب .. او عشان اخلص قصه
او عشان امسك القلم واعمل نفسي باذاكر
حسيت اني عايز ارجع اناني تاني واكتب عن نفسي
فتره طويله قضتها مع العالم الافتراضي .. اللي ماعرفش ليه هو افتراضي .. ليه الناس ماتكونش على طبيعتها يقولوا اللي بيحسوه .. اللي نفسهم يقولوه .. اللي شايفينه غلط .. يبطلوا كدب .. يبطلوا ادعاء يبطلوا تظاهر بانهم مثاليين وادباء وعظماء ليه الناس ماتتكلمش عن نفسها ليه الناس خايفه تقول احنا هنا .
شوفت كتير ناس بتكدب وناس بتسرق شغل بعض . وناس مابتحسش ببعض وناس بتضحك على بعض . وناس على النت غير حقيقتهم .بيهزر في النت ودمه خفيف وغني وبيعيش حياته وبيروح هنا وهناك . لكن في الحقيقه . هو عادي جدا ومابيعملش حاجه من دي . وكمان دمه تقيل
واحد متدين اوي وبيكتب عن الدين ويزعل لما حد يشتم او يتكلم عن السينما او الشعر او الاغاني .. وهو كل ما بيشوف واحده بيعاكسها ويعض على سنانه
واحده جريئه جدا وبتتكلم عن كل حاجه لكن ماحدش بيشوف شكلها في الواقع .لانها في الحقيقه خايفه من الواقع خايفه الناس تشوف واقعها الكداب وانها مش بالتحرر ده ومش بالحريه دي ومش بالثقافه اللي بتبان عليها
واحده بريئه جدا ... لكنها في الحقيقه عظيمه جدا واحسن من اي حد في الدنيا ..ناس بتزعل اني باكتب بالطريقه دي وناس مابتدخلش لاني ساعات باكتب بحريه يمكن ناس تشوفها زياده عن اللزوم
عالم التدوين كان ملجأ لناس كتير عشان تتكلم بحريه ..وانا ... من 3 سنين زي النهرده كنت سهران في ليلة راس السنه لوحدي فرحان اني اخيرا بقيت بارقص كويس .فرحان اني اخيرا عجبت اسماء عوني وبقت تطلب بنفسها ترقص معايا بعد اما كانت بتعلمني الخطوات وانا مكسوف امسك ايديها
بعد اما كانت بتعد مش واخده بالها حتى ان انا قاعد وموجود على وش الدنيا اصلا .. من تلت سنين قررت اني اكتب بجد مش على منتديات عشان الناس تقولي مشكووور ولا على زوربيا او ماي سبيس قررت ان ناس تانيه تشوفني ناس يمكن ماتهتمش بالكلام اللي باكتبه او ماتحبوش او تكرهه او تلعنه او تقول عليه اسفاف وقلة ادب
ناس بتكتب بطريقه منظمه زياده عن اللزوم . ناس بتكتب ع ال وورد قبل ما تنقل الكلام على بلوج سبوت....... وناس بارضه بتكتب زيي وبتحب انها تتكلم عن نفسها باي طريقه كانت
من تلت سنين عملت مدونه وسميتها " العربي " على اسم فكرة فيلم نفسي اعمله .. وكنت باحلم ساعتها اني ابقا مخرج او اكتب قصيده شعر الناس تحس بيها او امثل ف الناس تحس بيا . او اغني والناس ماتضايقش من صوتي او ارقص والناس ماتضحكش عليا .. او اكتب والناس تقرا
في ال 3 سنين دول انا درست اخراج وباجهز لاول افلامي ( فيلم قصير ) في 2010 وباجهز لاول ديوان شعر ليا في ال 2010 في ال 3 سنين دول مثلت في فيلمين قصيرين . دربت رقص ل 73 بني ادم اغلبهم كانوا عاوزين يتدربوا صلصا مع اني كنت باحب ارقص تانجو
دربت صلصا ل 30 واحد وواحده و23 انسان علمتهم هيب هوب و20 باني ادم حببتهم وحببوني في التانجو
ال 73 دول غير السامبا والرومبا
حاسس اني غيرت حياتهم وغيروا حياتي
ومره على مره لقيت ان اللي باعتبره انانيه في الشعر وفي المقالات يمكن مايتعبرش انانيه لما يكون بيعبر عن حد تاني كمان فهمت اني فيه ناس بتفهم اللي باقراه وبتحسه ... ومابتعتبروش تفاهه وكلام فاضي
تلت سنين تدوين . شوفت فيهم حاجات كتير وكتبت فيهم حاجات كتير وعرفت فيهم ناس كتير خصوصا اخر سنه اللي باعتبرها اصعب واجمل سنه في التلت سنين
السنه اللي فشلت فيها اني ابقا زي مانا عايز واجلت الحلم لالفين وعشره السنه اللي سقط فيها للمره التانيه في الكليه السنه اللي اتفاجئت اول شهر اتنين اني نسيت حسام الله يرحمه وفاول شهر تلاته نسيت دينا الله يرحمها وفاخر شهر حداشر نسيت رنا الله يرحمها
السنه دي حسيت فيها بقيمة السنين اللي فاتت حسيت فيها معنى الفشل والنجاح والصداقه الحقيقيه والصداقه المزيفه حسيت فيها بغربه وبفرحه وبحزن وبفخر وبجرأه وجبن وحيره واستقرار وثقه وخوف وتردد ووحده ولمه وحسره وباني انسان حتى لو باحلم والناس مش شايفه الحلم ده حتى لو باقول والناس مش مصدقه ده .. حتى لو بافكر والناس مش حاسه ده حتى لو باحس والناس مش فاهمه ده حتى لو باكتب والناس مش عايزه ده ... حتى لو بارقص والناس مش قابله ده .. حتى لو باسكت حتى لو باتكلم حتى لو ماليش أي قيمه في الحياه . حتى لو ليا قيمة كبيره اوي
كل حاجه
اخر حاجه لو حد زعل مني في السنه اللي فاتت او في التلت سنين اللي فاتوا لو نسيت حد لو قسيت على حد لو اتريقت على حد لو زهقت من حد لو كرهت حد لو حبيت حد وهو مايستاهلش لو ماقدرتش حد وهو مايتقدرش بتمن بعد تلت سنين تدوين
اقدر اقولكوا
انا اسف