Thursday, January 14, 2010

كشف حساب

كان نفسي ابقا حد من دول

النوع الاول

بتاع الناس اللي مريحه دماغها
ابعد حاجه بيفكروا فيها بكره .. بكره اللي هو بكره . مش بكره المستقبل
النهرده هايخرجوا مع مين بكره رايحين فين
واللي هم مش فاكرين اخر مره حاولوا يعملوا حاجه
الحياه بالنسبالهم سهله اوي ومش محتاجه اي تعقيد . النوع ده بيلاقي النجاح في حياته بسهوله . رغم انه اصلا ماتعبش كتير . النوع ده مش من طبقه معينه .. اطلاقا هم بس حاسين ان الحياه اتفه من انهم يفكروا فيها .. عشان كده هم اصلا ما بيفكروش فعشان كده دماغهم مرتاحه
دول بقا جابوا مجموع قليل اوي في الثانويه العامه . وبيخرجوا كل يوم وبيروحوا في كل حته معظمهم الكوره بالنسباله متابعه . والسينما خروجه مع اصحابه بعد ما يتعشوا في اي حته واللي هم ماكانوش بيسمعوا الكلام والمدرسين كانوا بيطردوهم من الحصه . وهم كانوا بيفرحوا اوي لانهم هايقدروا يعملوا اي حاجه تانيه بدل الحصه الممله ولما بيكبروا بيبقوا مرتاحين اوي عشان غالبا ماعندهمش هم يشيلوه واهلهم بيبقوا فخورين بيهم جدا لانهم لما بيكبروا بيبقوا حاجه كويسه اوي



النوع التاني

اللي هم جابوا مجموع كبير في الثانويه العامه . دخلوا كليه كويسه وكانوا بيذاكروا في الكليه . مابيفكروش في حاجه غير انهم يذاكروا وياخدوا كورسات ويجيبوا تقدير كويس . ويشتغلوا في شركه محترمه
اللي هم مابيخرجوش كل يوم . وغالبا مش بيشربوا سجاير ويمكن معظمهم مش متابع كوره والسينما بالنسباله خروجه مع خطيبته اللي غالبا اتجوزها من غير ما يحبها . اللي هم وهم صغيرين كانوا بيسمعوا الكلام . وبياخدوا صح وعشره من عشره . واهلهم كانوا فخورين بيهم جدا لانهم لما بيكبروا بيبقوا حاجه كويسه اوي

6 comments:

MǿиY El-Shreef said...

امال انت ايه يازيكا ؟

adel said...

فين النوع بيتاعي و بتاعك يا زيكا ؟؟؟

dr.lecter said...

انا مش في ولا واحد منهم

اولع في نفسي؟

بطوط حبوب said...

انا فيا كتير من اول واحد :))

مياسي said...

يعني يا بتطخه يا بتكسر مخه؟

ما في حل وسط؟

سارة نجاتى said...

I like the fact that you noticed these two , I like also that the main point o comparison was magmo3 el thanwia el 3amma lol
Strange enough ( like u said ) the first kind manage to surpass others in his life and become a successful person , and I really do not know why