Thursday, December 24, 2009

كلنا ليلى .... وان ماقدرتش ع الحمار




انا ام الاشياء جميعا

سيدة العناصر

بادئة العوالم

حاكمة ما في السماوات من فوق

وما في الجحيم من تحت

انا مركز القوه القوه الربانيه

انا الحقيقه الكامنه وراء كل الالهات والالهه

عندي يجتمعون كلهم في شكل واحد وهيئه واحده

بيدي اقدر نجوم السماء ورياح البحر وصمت الجحيم

يعبدني الناس بطرق شتى وتحت اسماء شتى

لكن اسمي الحقيقي هو ايزيس

به ارفعوا الي ادعيتكم وصلواتكم


( ترنيمه مصريه , الدوله القديمه )


----------------

اصلي اليك

يا سيدة السيدات

وربة الربات

يا عشتار .. ملكة كل الناس .. الهادية الى السبل المستقيمه

الرحمه يا سيدة السماء والارض

يا راعية المتعبين

الرحمه يا سيدة الحرب المسيطره على كل المعارك

ايتها الساطعه

يا لبؤة ايجيجي , يا قاهرة الالهه

ايتها الممجده , يا ذا الثبات والعزم

ايتها البطله عشتار

المتالقه , مضيئة السماء والارض

عظيمة القوه, جامعة الحشود

الهة الرجال , وربة النساء التي لا يعرف خططها احد

عبدك المعذب المكروب يستصرخك

فانظري الي يا سيدتي .. وتقبلي صلواتي

عديني بالمغفره فان موج الطوفان يتقاذفني


( ترنيمة سومريه - القرن 23 ق.م )
الاشعار دي موجوده في
رواية ظل الافعي .. يوسف زيدان

--------------------------------------------------


في قرون ما قبل الميلاد . كانت المرأه شئ عظيم جدا .. القداسه نفسها .. هي الالهه المسيطره .. في مصر وفي اثينا وغيرها لحد ما الانسان بدا يتحضر

عشان كده كل ما كان الانسان بيتحضر وبيتقدم . كانت بتقل قيمة المراه .. مش عشان يقللوا من فايدة المراه .. ولكن لان الراجل بعد السنين دي كلها اكتشف ان هو اللي بيعمل كل حاجه

هو اللي اكتشف كل النظريات واخترع كل الالات والتكنولوجيه الحديثه

اخترع القطر

والتليفون واللمبه

وطورهم

حس انه أهم .. مش لانه زهق من سيطرة المراه

لأ ..

لان هو اللي بيحارب . وهو اللي بينتصر .. وكمان اكتشف

ان فيه اله واحد بس المفروض يتعبد .. وله صفة الذكوره

في العصور الحديث ( مش الحاليه ) كان دور المراه مهمش لدرجة التحقير في كل دول العالم

وكانوا بيتناوبوا التحقير على سنوات

سنوات يكون التحقير في اوروبا

وسنوات يكون في العالم الشرقي

وكل ما بيمر اي جزء من العالم بمرحلة تخلف او ظلام .. بيكون سبب رئيسي فيه ان المرأه دورها مهمش وجانبي او يكاد يكون معدوم


في بداية التمانينات والتسعينات .. حصلت طفره كبيره جدا في حقوق المرأه

المراه بقت تاخد مراكز قياديه كبيره

في العالم كله

المرأه بقت وزيره

بقت عضو مجلس الشعب

بقت رئيسة تحرير مجله

بقت مقدمة برامج كبيره وسياسيه مش بس طبيخ وموضه

بقت مديره على الرجاله

بتاخد مراكز قياديه كبيره في شركات كبيره

لو راجل وست اتقدموا لشركه واحده وفيهم نفس المواصفات .. هياخدوا الست بنسبة تسعين في الميه


لكن ايه المشكله ؟


مشكلة ليلى


ليلى اللي بتقول ان حقها ضايع

انهي حق؟


حق انها تمشي من غير ما حد يعاكسها

حق ان ماحدش يظن فيها اي سوء لمجرد اسلوب حياتها

حق انها تطالب بحقها


اذن احنا وصلنا هنا لحقوق اجتماعيه مش سياسيه


طيب الحقوق دي مين السبب في ضياعها ؟

الراجل ؟

اطلاقا

اساسا ضياع الحقوق والكرامه .. مش مشكلة الست بس

مشكلة الستات والرجاله وكمان المعيز والخرفان اللي بتتدبح في العيد


لما نبقا حرين كبشر

كبني ادمين

كشعب

كفكر


ساعتها نبقا نفكر مين له حقوق ومين عليه واجبات


لكن المتهم الحقيقي في اللي ليلى بتعاني منه في العصر ده في المكان ده بالذات بعيدا عن اي فكر تاني واي بلد تانيه


هي ليلى نفسها


ليلى اللي بدل ما تشتغل وتوصل بنفسها يحترمها العالم ... بدات تفكر في انها تصرخ بس

تصرخ تقول

انا ليلى

انا مظلومه

انا مقهوره

انا عندي طلبات

انا ماحدش راضي يحققلي الطلبات


ليلى هي اللي سابت حقها .. وبتدور دلوقت على حد يجيبهولها


المجتمع


هو المتهم الاول من وجهة نظر ليلى لضعف حال ليلى

اتهام الرجل بانه بيخاف من حقوق المراه

رغم ان الواقع بيقول ان الست دلوقت في اوقات كتيره بتاخد مراكز مش من حقها لمجرد انها مراه وان لازم يكون ليها تواجد

مش بمقياس الكفاءه .. لكن بمقياس المجامله وادعاء التحضر

ربما نسيت ليلى انها نص المجتمع اللي هي بتتكلم عليه


العادات والتقاليد

ماعندناش بنات تسهر لبعد الساعه تمانيه

ماعندناش بنات بتعمل كذا

ماعندناش بتعمل كذا

كل الكلام ده كنا بنسمعه من الام قبل الاب

باعتبار ان الام دايما بتبقا اقرب للبنات

من حيث الاحتكاك

والأوامر العائليه


ام ليلى ... اللي هي ليلى نفسها

هي سبب رئيسي ان المجتمع يكون بالصوره اللي هو عليها في تقبل وجهات نظره


مشكلة المرأه الحقيقيه

مش في المجتمع ... لانها نفسها بتمثل المجتمع اللي بتتهمه

مش في الراجل .. لان الراجل قبل خلاص الاختلاط بالمراه .. وبانها تكون مديرته ورئيسته واحيانا .. وزيرته او عضو مجلس الشعب اللي بيتكلم عن حقوقه قدام الدوله

والامثله الناجحه للمراه بدل المثال الف

وماحدش بيسخر من المراه ومن تطورها ومن نجاحها


مشكلة المراه الحقيقيه ... هي القاء سبب المشكله الرئيسي على حد غير المتهم الحقيقي


عارفين مين ليلى


مصر هي ليلى


مصر كلها


اللي بجد محتاجه مساعده

اللي بجد حاسه بضعف في كرامتها وفحقوقها تجاهنا

هي مصر


وعارفين مين المتهمين


احنا .


المصريين


حق المصريين اللي ضايع


هو السبب ان الرجاله ماتقبلش الستات


وان الستات تقول ان الرجاله عنصريين ومتخلفين


عملا بمبدا


" ماقدرتش ع الحمار "

Thursday, December 10, 2009

the last exorcism !

الجلسه الاخيره


if a double-decker bus Crashes into us To die by your side Is such a heavenly way to die And if a ten-ton truck Kills the both of us To die by your side Well, the pleasure - the privilege is mine

Monday, December 7, 2009

The exorcism 3

الجلسه الثالثه
مسمار في غيط شواكيش
دقوا على راسي لكن ماثبتونيش
من قصيدة ايزيس .. هشام الجخ

Sunday, December 6, 2009

the exorcism 2

الجلسه الثانيه


انا اسف
so part of the plan

the exorcism of Me

الجلسه الأولى

اذا لم يكن لك هدف تعيش من اجله
لن يكون هناك دافعا تموت من اجله
لو مالكش حاجه نفسك تعيش عشانها ... هاتموت ليه

Wednesday, November 25, 2009

الفـَـكـَـــســان



بفتح ال فاء

والقاف

والسين

وتنطق

الفـَـكـَـــســان

فـَكـَس - يفكِس - إفكس

فهو فكسان وهي فكسانه


الفـَـكـَـــســان هو التعبير الحقيقي لجملة " الرزق يحب الخفيه " و " اللي يحب النبي يزق " والفكسان في حد ذاته ليس مجرد مبتدأ

ولكنه صفه

ينعت بها كل من قام بافتكاسة ما غير صالحه للاستخدام العام


كثيرا ما يستحضرني هذا التعبير في هذه الايام . خصوصا انه لم يعد يوجد ما هو غير فكسان بداية من الحياه العامه والدراسه والعمل والبيت والدنيا

وما دايم الا وجه الله

الا انه ومنذ اكثر من شهر وانا استخدم تلك الكلمه المعبره بشئ مطلق مما جعل بعض اصدقائي الفكسانين يقومون باطلاق لفظ فكسان على كل ما يرضيني . ليس لشئ انما لمجرد معاندة شخصي المتواضع


الفـَـكـَـــســان الذي دام اكثر من شهر في حياتي جاء بسبب مباراة كرة قدم .. تؤهل فريقا ما لبطوله فكسانه " وانا اطلق عليها فكسانه عملا بمنطق ( اللي مايعرفش يقول عدس ) وبما اني كمصري ولله الحمد لا اعرف شيئا عنها سوى ان مصر لا تشارك فيها فهي بالنسبة لي بطوله فكسانه "

ولكن

ما الذي جعل حياة شاب في مثل سني فكسانه بهذه الطريقه

سأفتح قلبي وأخبركم

منذ ما يقرب من شهر ومنذ ان وضع الله كلمته في قدم العبد الضعيف حسني عبد ربه واعاد به الامل الينا في ممارسة الحلم الجميل الذي نحلمه كل اربع سنين ونفوق منه على جردل ميه مثلج

والاعلام المصري يصور لنا ان حياتنا وحياة هذا الجيل البائس كله متوقفة على الذهاب لتلك البطوله السابق ذكرها

وأن كل طموحاتنا وآمالنا وأحلامنا ومجدنا وفخرنا ينتقل الان اعزائي المستمعين الي اذاعه خارجيه بين اقدام محمد ابو تريكه واحمد حسن وعمرو ذكي وغيرهم

وأن العدو الاول اللعين الوغد هم أيضا جمهور فكسان لدوله فكسانه مثلنا تماما اسمها الجزائر

فانا اثق تمام الثقه انه لو بحثنا في المنتديات لوجدنا شاب جزائري فكسان يكتب مثل هذا الكلام الفاكس ولكن بالفرنسيه

الفكسانين

مدحت شلبي ومصطفي عبده واحمد شوبير وخالد الغندور وجريدة الشروق الجزائريه والاعلامين المصري والجزائري

هيئونا بكل وضوح لاستقبال يوم فاكس علينا او على الشعب الجزائري

فأجل القدر هذا اليوم من يوم 14

الى يوم 18

ليس لشئ ولكن لترك مساحه لمزيد من الفـَـكـَـــســان في ملعب الطرفين

فهناك مزيدا من الاعلانات الفكسانه التي تدعي وتقول

" كل الناس بتقول يارب "

او انها المشروب الرسمي او الرئيسي او الراعي للحمهور الفكسان من الشعبين الشقيقين الفكسانين

مصر والجزائر

هما وجهان لعملة واحده أكلها الصدأ

ف بلادي وبلاد الراي تختلف في كل شئ الا

الفساد والتوريث

والقمامه والجهل

والسرقه والجرائم

والاعلام الجاهل

والشباب الفكسانه

فبلادي لم تذهب الى تلك البطوله الداعره منذ عام مولدي

أما الشقيقه الخضرا فلم تذهب لكأس العالم من عام زواج أبي وأمي

لا أحمل أبي وأمي الان أي من هذا الفـَـكـَـــســان ولكني فقط اشركهم في الكلام باعتبار ان البر بالوالدين واجب بارضه


الاعلام الفكسان حول مبارة كرة قدم الى ثكنات عسكريه

فكلما كنت افتح احدى قنوات المتوحدون ( مودرن - الحياه - دريم ) ... كان هناك مثلا تنطقه جدتي دائما .. " اتلم المنحوس على خائب الرجا " ادام الله بقاءها

او اتطلع في الجرائد الجزائريه

وجدتني ابحث في كل مكان عن اي دواء للبروستاتا نظرا للتضخم الذي يحدث فجأة في حينها

لست من هواة التطبيل والفكسنه فأقول كما يقول البعض ان كرة القدم غير مهمة او اننا تركنا اسرائيل لنحارب في جبهة الجزائر او ان الكره جلد منفوخ أو هذا الهراء الفكسان ولكن

لطالما كنت رافضا بشده ان اكون اسفنجه

تمر منها الماء فلا تعترض والغريب ان الماء ينسال من الجانب الاخر ولا تتحرك الاسفنجه .. فهي اسفنجه

اما انا فقد خلق لي الله عقلا كي أعمله في بعض المواقف واركنه على الرف في مواقف اخرى

اما الان

فعقلي يرفض بكل شده ان أكون شاب فكسان كغيري من الفكسانين

انا اصلا لم يعجبني الامر منذ البدايه .. وحدث الكثير من الهراء هنا وهناك قبل وبعد المباراه الاولى والمباراة الثانيه

اما انا فلم يشغل بالي سوى

تسعون دقيقه اولى فزنا في دقائقها الاخيره بجول اوف سايد .. وتسعون دقيقه اخرى لم نفعل فيها شيئا سوى سب كل شئ حتى اسماعيل القهوجي عندما يمر من أمام الشاشه

حتى اذا انتقلنا بعد المباراة وسمعت اخبارا عن ان الجمهور المصري الفكسان الذي تم ارساله الى السودان قد تم ضربه والاعتداء عليه من قبل بعض الجمهور الجزائري الفكسان واقسم انه لو خرج شابا واحدا من هؤلاء الشباب الذين يرتادون " فعلا " الى المباريات غير منتظرين لاحدى الكاميرات حتى يلوحون لها بعلامة النصر

لكنا سمعنا الان عكس ما يحدث تماما .


عزيزي المواطن المصري الجزائري الفكسان

اعلامنا الفكسان

حياتنا الفكسانه

لقد ملأ الفـَـكـَـــســان أخرام حياتنا كلها

كفانا عبثا فكلانا قد شبع ضحكا على الذقون وكلانا قد أخذ فيها على رأي الشاب المصري الجزائري أحمد مكي

وبدلا من ان يقوم كل شعب منا ولا يقعد ويطالب بالاعدام والحرق والضرب لكل ما هو يخص الآخر

او يقول أني سافعل وأسوي . فلنبحث عن شئ آخر نعبث به بشرط ألا يكون فكساناً فكلا الشعبين الفكسانين يعرف تمام العلم أن


" العل. كان نفع نفسه "

Thursday, November 19, 2009

ماتخافش ... هاتموت

ماتخافش
كل ده هاتاخد عليه
كل دي اعراض طبيعيه للسكون
العنكبوت اللي ناسج خيوطه فوق شباكك المتوارب
والشمس اللي بتشق بنورها خيوط العنكبوت
فترميلك شوية ضل
على شوية ضي متسرسبين
فتترمى شوية حبال لضوء الشمس على سريرك
اللي جنب الشباك
فتبان كانك متقسم مليون خط بالعرض
عرق الناس اللي بيتمسح في عرقك في زحمة الميكروباص
التراب اللي مغرق تفاصيلك
حتى وانت قاعد ع القهوه
بيترمي التراب في حضنك كانك رصيف
دخان سيجارتك اللي مخليك مش شايف كويس
وحاجات كتير تاني بتقول انك قربت تموت
فتسكت ولما تقرر السكوت تاخد نفسك وتروح على القهوه
اكتر مكان بيتجمع عليه الكلام
وبيتبعتر في الهوا بدون داعي
المرايه اللي بطلت تشوف فيها حد غيرك
التراب بدا يرسم عليها ملامح واحد .. شبهك
قنوات التليفزيون بتذيع خبر وفاتك بكل جنون
وانت . قاعد بتقلب الزمن بالريموت
وبتجري ورا عقارب الساعه وبتحاول . على الاقل
تلحق عقرب الدقايق
تفاصيلك بقت ممله
ومحفوظه
وصدقني .. ماتقلقش
انت كده ابتديت اول خطوه على طريق النهايه
انت كده خطيت اول خطوه على سكة .. مافيش
وماتخافش
هاتاخد على كل ده
لانك خلاص ... هاتموت

Sunday, November 15, 2009

انت عايز ايه ؟



تقريبا باحلم نفس الاحلام من وانا في ابتدائي , حلم اني باقع من فوق .. من فوق اوي لحد ما اصحى وانا حاسس اني خبط

في الارض بكل قوه

حلم اني متاخر ع الامتحان

مش هالحق ادخل

وباجري اجري

اجري

لكن بارضه مالحقش

انت عايز ايه ؟

سؤال بيتوجهلي كتير

وكتير مابعرفش ارد

فيا منا كتير بيعملوا حاجات كتير وبيحبوها ومتقنين حاجات منها وحابين يدرسوا حاجات تانيه

بس الواقع بيقول انك لازم تختار حلم واحد بس تعيشه

والاصعب بيقول

ان احتمال حلمك يكون مابيوفرلكش الحياه اللي انت بتحلم بيها عشان تقدر تدي كل جهدك للحلم ده

والاغرب انك حتى لو بتحب الحلم ده

وبتقدر تدي فيه كل مجهودك وحياتك

وعايز تديله كل حياتك

احتمال ماتوصلش فيه غير لاول السلم

لان فيه ناس سابقاك بحاجات وخصائص مش من حلمك لكنها من الحياه اللي اتفرضت عليك

كل ما الاحلام بتكتر وكل ما بتكبر وبتقرب من حلمك .. بتلاقي التفاصيل بتوسع . والخرايط بتزيد خطوط والحيطان بتتملي شقوق والمفروض انك تقف على رجلك الاتنين وانت واقف على صراط الحياه

ومش عارف هاتقع

ولا هاتعدي

ولو هاتعدي هاتعدي على طول ولا بعد اما الرعب يملاك ويملا كل الناس اللي واقفين بيتفرجوا عليك

Thursday, November 12, 2009

طلقتين في الهوا

(1)

من كام يوم اتعزمت على فرح شعبي وجاتلي الدعوه كالآتي

السيد / ممدوح عبد الحميد زيكا وحرمه

اموت واعرف مين " حرمه " ده ولا هي الدعوه جايالي غلط ولا ايه

يتشرف البرنس محمود ابو هيام بدعوة سيادتكم لاحلى الليالي واجمل الليالي

احتفالا بزفاف كريمته

" H "

على المعلم احمد محروس

" ماعرفش كاتب اتش ليه ماهو هو اصلا اسمه محمود ابو هيام يعني هو الاتش ده هيكون بيعبر عن ايه .. هشام ابن خالتي مثلا ما اكيد هيام "

وهذا بحضور لفيف من افضل المطربين الموجودين بالساحه

بحضور

الراقصه وعد

يحيي الحفل الفنان " العالمي " عبد الباسط حموده والفنان محمود الليثي والفنان شعبان بغبغان

الاخراني ده اسمه جامد اوي

بصراحه القعده في الفرح كانت لذيذه على الاقل شوفت عبد الباسط حموده وانتوا لأ هههههههههههه

الافراح اللي كنت باروحها كان بيبقا فيها بوفيه مابقربلوش

او شوية حاجات سخنه او مثلجات

لكن ان البوفيه يبقا عباره عن حشيش وبانجو بانواعهم

اهو ده بقا اللي جديد عليا

والدرينك كان ستيلا اربعه ونص المعفنه دي

اما بالنسبه للمعازيم .. فكانوا لفيف من المجرمين وسواقين الميكروباص والذي منهم

بمناسبة المجرمين

وبمناسبة شغفي اليومين دول بالجو ده عشان سمعت كلام الاستاذ احمد سيمر فرج المخرج الجميل اللي قاللي ان المخرج الشاطر لازم يشوف كل حاجه ويتعلم على قد ما يقدر


لكن الغريب ان البيره دي عادي يعني موجوده في الشارع كده قشطه كانها شمعدان يعني

واحد كان قاعد جمبي بيقولوله يا عم غريب

هو فعلا كان غريب

اول ما قعدت طلبلي بيره

" وطلبلي بيره وطلبلي بيره "

البيره اصلا طعمها مختلف عن البي ... ااايه قصدي اقول ان استغفر الله العظبم يعني طلبولي بيره انا يطلبولي بيره

انا

انا الطاهر العفيف الشريف اللي من البيت للجامع ومن الجامع للبيت

بعد الفرح روحت مع لفيف من الاخوه المعزومين

لقهوه قريبه ... قهوه لطيفه خالص حتى اللي شغالين فيها انا طلبت بيبسي وتفاحه زي اي بني ادم بيقعد على قهوه بلدي طبيعي جدا يعني مافيش اي حاجه غريبه


وانتبهت بقا لما واحد منهم بصلي وقالي لا يا " ابن عمي " ماتلاقيش هنا الحاجات دي تشرب معسل ؟
لا شكرا مابحبوش
هات شيشه معسل هنا يا توفييييييق وهاتله شاي
بس انا مش بحب الشاي يا كابتن
خلاص هاتله شاي فتله

انا مقتنع ان فيه شوية اختلافات بينا وبين الناس دي من حيث يعني انك تبقا قاعد

حاطط العلبه المارلبورو في وسط لفيف " عجباني لفيف دي اوي " من الكولوباطرا هي بتنطق كده كليوباترا دي اكيد واحده قريبتها

انك تبقا مش لابس دبله حتى لو مش خاطب

انك وسبحان الله مش حاطط جيل

انك سبحان الله بارضه مايبقاش عندك شنب

كل ده مقبول

لولا اختلاف الاذواق لبارت السلع


(2)

البوست ده اعتراضي لا محل له من الاعراب

(3)

كل اللي يدخل هنا يقول لياسمين كل سنه وانتي طيبه
بمناسبة عيد ميلادها
بما ان ياسمين مش حد عادي
يبقا اكيد عيد ميلادها مش عادي
وان شاء الله السنه الجايه اشوفك في بيت العدل ياختي يارب
وتكوني كده بقيتي اي حاجه حلوه ان شالله تبقي رئيسة مهرجان القاهره السينمائي
وهابي بير دار تو روووووو

وفي النهايه بمناسبة العالم البيئه اللي انا قعدت معاهم
وبمناسبة ماتش الجزاير وبمناسبة حاجات كتيره اوي مالهاش علاقه بعيد ميلاد جيسي
احب اقول لكل الناس كلمه واحده

كلمه واحده هارد بيها على كل كلامكوا

اجوجوجوجوجوجوجوجو

Wednesday, November 4, 2009

الاصلاح العيالي

الدكتور احمد نظيف بيقول اننا لازم نبطل بقا خلفه وكل واحد يتحددله عيلين فقط لا غير واعتقد ان تنفيذ القرار ده محتاج مقومات مش موجوده في الشعب المصري حاليا
خصوصا مع تزايد السلع الجنسيه يا جدعان الفياجرا بقت بتتباع عند البقال وادي الغشاء الصيني اهو هيزروط السوق
وهاتبقي مليطه
واساسا البلد هاتبقا عامله زي صفيحة الزباله اللي في اخر الشارع عندنا حيث يعني لما بتتجمع القطط وبتبقا بزرميط كده كله على كله وخد فكره وتعالي بكره
اصلا الشعب المصري - واخص بالكلام هنا المتجوزين - مش الشباب اللي مقضينها بورنو ولا البنات اللي مقضينها سهوكه انا اقصد المتجوزين بالذات
اللي هم مين
اللي هم واحد او واحده بيحبوا بعض او صالونات مش هاتفرق المهم انهم مابيقدروش يعملوا حاجه غير كده اذا عرفوا اساسا
كل طاقة الشعب المصري بتخرج في يومين ورا بعض
خميس وجمعه
الجمعه عشان صلاة الجمعه والتعب الذهني اللي الشعب المصري بيواجهه من خطب صلاة الجمعه
اما يوم خميس
فهو عيد الاله " بس " بالنسبه للمصريين
وللي ماخدش تاريخ فرعوني
الاله " بس " ده اله المسخره عند قدماء الفراعين
ماعرفش ليه
وبصراحه بقا هاموت واعرف ليه
شكمن يعني الخميس وراه الجمعه فبياخدوا اجازه .. طب وايه يعني طب ما الجمعه وراه السبت اجازه وبعدين هم يعني هايحتاجوا اجازه ليه هو ماتش اهلي وزمالك
المهم عشان مانخرجش بره الموضوع
انا باقترح حل بدل موضوع تحديد الخلفه ده
اقولكوا ليه
اولا لان مقومات وجود عمليه جنسيه من غير حمل مكلفه بالنسبه للشعب المصري الغلبان اللي احنا بنقوله ماتخلفش عشان تعرف تصرف على ولادك
لكن القانون ده طبعا لا يسري على بعض فئات الشعب - الوطني - اللي هم عندهم امكانيه تربية عشرتاشر عيل
والحل بسيط
وهو اننا نعمل قانون الاصلاح العيالي
حاجه كده فضلة خيركوا زي قانون الاصلاح الزراعي بتاع عبد الناصر
بمعني
ان اي اسره عندها مثلا ست عيال
ودول اللي هم هنسميهم " الاقطاعيين " هيتاخد منهم اربع عيال ونبدا نوزع العيال على الاسر التانيه
اللي ماعندهوش ياخد اتنين
واللي عنده واحد ياخد واحد
واهو بالمره اللي نفسها في واد تقدر تبدل يبقا واد قصاد بت
واللي نفسها في بت تقدر تبدل الواد بتاعها ببت مع دفع الفرق
المهم ان عدد الاراضي الزراعيه - قصدي العيال يعني - يبقا اتنين لكل فئات الشعب
الحل التاني بقا اننا نوقف عسكري امن مركزي - من اللي مابيتفاهموش دول - جوه اوضة نوم كل مواطن مخلف عيلين
ليه بقا
اي اب وام هيتعدوا حدودهم يتضربوا بالنار في ساعتها
مافيش هزار في الحاجات دي يا جدعان
مصر اهم من يوم الخميس
وبكده تقدر البلد تتحرك بينا - وناخد بالنا ان البلد هي اللي بتتحرك مش احنا عشان احنا شعب ما بيحبش يتحرك - واهو كلنا نركب البلد والبلد تمشي بينا وتوصل وندفع الاجره ويا دار مادخلك شر

Tuesday, November 3, 2009

til kingdom come


This song is amazing. When someone you really love goes away, this song helps you to comfort yourself. No matter how much time it takes him to come back, you'll see him one day, even if it takes a long time.. TIL KIGDOM COME

http://www.youtube.com/watch?v=9NMxT1DYfaM&feature=related

til kingdom come ... coldplay

Still my heart and hold my tongue
I feel my time, my time has come
Let me in, unlock the door
I've never felt this way before

And the wheels just keep on turning
The drummer begins to drum
I don't know which way I'm going
I don't know which way I've come

Hold my head inside your hands
I need someone who understands
I need someone, someone who hears
For you, I've waited all these years

For you I'd wait 'til kingdom come
Until my day, my day is done
And say you'll come and set me free
Just say you'll wait, you'll wait for me

In your tears and in your blood
In your fire and in your flood
I hear you laugh, I heard you sing
I wouldn't change a single thing

And the wheels just keep on turning
The drummers begin to drum
I don't know which way I'm going
I don't know what I'll become

For you I'd wait 'til kingdom come
Until my days, my days are done
And say you'll come and set me free
Just say you'll wait, you'll wait for me.

Just say you'll wait, you'll wait for me.
Just say you'll wait, you'll wait for me.

Friday, October 30, 2009

ازاي احبك


ازاي احبك حب خالي من الوجع

وازاي احارب ميت طريق لاجل الوصول

وتطلبي

قلبي يجيلك مرتجع

وازاي يحبك حب خالي من الفضول

مليون حكاية قصه منهيه بأسى

والدمع فيها بيسري جوه اليوم

داء الوطن يلعن قصايد حبي ليكي في غربته

فازاي احبك حب خالي من الهموم

مليون حكاية جوع ومكسيه بأسى

مليون شهيد مكتوب على قبره وطن

جرح الوطن لو يتنسى

ازاي احبك حب خالص م الشجن

بتقولي ليه عايزه احضنك

تحت المطر وسط الخريف

وماهمكيش احساسي ايه

في ضلمة الليل المخيف

قلبك خلاص

مابقاش بيفهم في الملامح والوشوش

مابقاش يحس باي خوف ؟

مابقاش بيستحمل خدوش

وماهمكيش معنى الظروف

مابقاش يناسب حبنا حال الوطن

ماقدرش احبك وانا .. ماقدرش اطير

مضطر اقدم حبنا للناس كفن

ماقدرش احبك حب منزوع الضمير


ممدوح عبد الحميد زيكا

Monday, October 26, 2009

تقريبا نفس المشهد






نفس الديكور مع اختلاف الابطال انا حاسس كده ان الموضوع بدا يقرب يبقا بجد . كتير باحسه بيبعد لكن ارجع اقول اللهم اخزيك يا شيطان ابعد ابعد يا ابن الوسخه مش طالباك بس الاقي المخرج بيركز اوي وبيزعق


دور صوت


فيرد عليه واحد من بعيد


انا داير


دور كاميرا


انا داااير


الله ده هو هو نفس الكلام حاجه غريبه انا حاسس اني باعمل نفس الدور مش عارف ليه خايف لا الوقت يعدي وماشوفش غير المشهد ده نفسي امثل المشهد التاني بقا


ولو ان المخرج مش راضي او يمكن ماخر الموضوع شويه لحد اما اتقن المشهد ده


جايز عايز يعودني على المشاهد الصعبه .. الله اعلم


لكن المهم اني فعلا زهقت من تمثيل الدور ده ونفسي ابطله بقا

Saturday, October 24, 2009

ليه مصر مش بتخصب اليورانيوم ؟؟؟




هو ليه مصر مش بتخصب اليورانيوم ؟


- الرجاله تعبانين


- مصر مابتعرفش


- عشان مصر عندها مشاكل في الخصوبه عامة


- عشان اليورانيوم بيخصبها


- اصلا مصر مؤنث


حد عنده تعليق

Thursday, October 15, 2009

شامي وبلدي

قالتلي ازيك قلتلها الحمد لله ... قالتلي انت اسمك ايه قلتلها ممدوح ... قالتلي بتشتغل ايه قلتلها بادرب رقص .... سكتت .... قلتلها وباكتب شعر .... سكتت ... قلتلها وبادرس اخراج .... سكتت ..... قالتلي بابا بيشتغل ايه يا ممدوح ... قلتلها مهندس ... قالتلي وماما بتشتغل ايه يا ممدوح قلتلها مدرسه ... قالتلي بابا مهندس وماما مدرسه ومخلفين رقاصه . قلتلها ك .. ام حضرتك وسيبتها ومشيت
فاكرين الايام بتاعة زمان دي ايام ماكانت الشرطه في خدمة الشعب .. قبل ما يقبضوا ع الشعب ويشغلوه مع الشرطه ويبقوا هم الاتنين شغالين عند سيادة القانون .. يعني سيادة القانون يطلب واحد شاي تقوم تفز تعمله .. سيادة القانون مش مرتاح تعمله مساج ... سيادة القانون مزاجه مش رايق تقومي ترقصيله عشره بلدي .... فاكرين الايام بقا بتاعة زمان .. ولما انتوا فاكرينها . قاعدين فيها ليه
كل اما اقول حاجه تعترض لحد اما في مره قلتلها احا هو انتي كل شويه تعترضي هو انا كافر .. قالتلي كلمة احا عيب .... احا طب مانا عارف ان كلمه احا عيب
ساعات بتبقا الايام من غير ملامح يعني تبص على يوم التلات كده تلاقيه يشبه يوم الاربع كتير اوي , تركز مع السبت تلاقيه مدي على الخميس ... تصحي يوم الاتنين تلاقي صلاة الجمعه شغاله كده يعني
وساعات تلاقي يوم السبت والاحد والاتنين والتلات والاربع والخميس .... كلهم ... جمعه
حاجه غريبه بتحصلي اليومين دول حاسس ان انا ابن ميتين كلب
على فكره لما بكتب شعر ذم مابقصدكيش انتي ولما باكتب شعر حب مابقصدكيش انتي ولما باتكلم باسمي مابقصدنيش انا ولما باكتب وطنيات مابقصدش مصر
بيقولي :
عارف يا ابو الزيك .. لو كانت اتباست مره كنت قلت معلش لو كانت طلعت المقطم الفجر مع صاحبها في العربيه مره .. بارضه معلش تلت تربع البنات اللي انا اعرفهم جايبهم من ع المقطم ساعة فجر اساسا . عارف لو بتشرب كتير عادي ماحنا سكرانين طينه اهو .. عارف لو بتشرب حشيش ممكن اخليها تبطله .. بس المشكله بجد ان البت دي مسقطه عيلين قبل كده .. وانا بيني وبينك حاسس اني عايز اخلف في يوم من الايام واخاف البت تطلع مابقتش تخلف تاني تبقا مشكله .
قلتله :
الازازه خلصت قوم هات اللي في العربيه .

Sunday, October 4, 2009

مجرد لعنه

فيه ناس اتخلقت عشان تنجح في الدراسه وفي الحياه العمليه وتتجوز بدري ويلاقي شغلانه حلال ويتجوز بنت الحلال ويبقا كل طموحه يعمل واحد حلال ويخلف عيلين يربيهم
فيه ناس اتخلقت عشان تحب الهندسه او الطب
فيه ناس اتخلقت عشان تبقا حد مشهور جدا في ابحاثها العلميه وياخد منصب كبير
انا مش من الناس دي بقا
لكن فيه ناس بقا اتلعنت
ممكن تبقى لعنه حلوه وممكن اللعنه تبقى كارثه .. الناس اللي اتلعنت
بداء الشعر . والادب
ولعنه تانيه اسمها " سينما " وبيسموها بارضه الفن السابع وده لانها جواها الست لعنات التانيه
العمارة والموسيقا والرسم و النحت والشعر والرقص
ست لعنات وهي السابعه
وفيه ناس اتعلنت بكذا لعنه من دول
انا منهم ؟ ... مين كمان ؟

Saturday, September 26, 2009

بتتغير

بتتغير
كل اما تلمح في العيون
ضي عايش ع الامل
كل اما بتلاقي الامل
علي خيط بيوصل فكرتين ..
تسال ساعتها ليه بكيت
وتشوف طريق
بيترسم
جايز ملامحه تتوصفلك
م البكا
جايز ملامحه تتحكيلك ضحكتين ..
وتلاقي كل الامثله
بتكون حلول للمشكله
وتصلي سجدة شكر
بخشوع الملايكه
وتآمن ان الحظ .. مكتوب ع الجبين ..
وبتآمن ..
بتلقي الناس بوش بشوش
وتتلاقي مع عيونك
وشوش الناس
ضمير مغشوش
وتبقي الدنيا فتحالك على الصفين ..
ومادّالك . عشان اللحن ليك كفين ..
وتتغير
كل اما بتلاقي الطريق
مفتوح أوي ..
تدخل بجرأه وبالجنون
بتقيس مقادير العطش
بازاي هاتقدر ترتوي ..
تفوت ع الشوق
تفوت ع الغنا ..
تفوت على دروب الصحاب
تفوت تدور ع الازمنه .
وفآخر الضحك المجيد
تلمح بطرف عينيك حاجات مش ممكنه .
بتلاقي يوم مافهوش صحاب
تلقى الوشوش متعكننه .
تلمح بطرف عينيك بشر
عايشين حياه متلخفنه .
وتفوق على دمع الصبايا المحرومين ..
من كل الوان الغنا.
وتفوق على طعم العطش
وتفاجئك الاحزان على
صوت الكمان
فتشوف كمان
تلبس ازاز العتمه نضارة طريق
ماتشوفش شئ
ويفاجأك القلب بمتين مليون
سؤال
- ايه اللي خلا الحزن فوق الاحتمال ؟
وتقابلك الضلمه
وتحكيلك ..
تبقا الكآبه وشم مرسوم فتفصيلك ..
متحني بيك كعب الالم
حتى ولو.. كل الصبايا هاتنحنيلك ..
حتي ولو .. طعم الخمور احلى
حتى ولو .. دخان سيجارتك بينسي
وبيعتم .. فيتكلم على .. طعم السكات بالسوء
تبدأ تفكر ان مهما الفرح
بيحاول ساعات
يخطف من الاحزان .. كوبليه وحيد ..
باقي الغناوي اتلحنت
احزان اوي
من لحظة الخلق المجيد .


ممدوح عبد الحميد
" زيكا "

Tuesday, September 15, 2009

رخامه

بما ان الشيطان واخد اجازه .. ابن المحظوظه .. وانا لأ فقررت اني ارخم على خلق الله عملا بمبدا ان غاب شوشو العب يا زيكا
ولكن وللاسف اتقلب السحر على الساحر ازاي
حد يقولي ازاي؟
ااقولكوا انا ازاي
من كام يوم ركبت تاكسي من التحرير للمعادي الساعه اتنين بالليل
واحد ذكي يسالني ويقولي ايه اللي يوديك اخر الدنيا في ساعه زي دي
وطبعا مش هارد ...
واحد تاني يسالني ويقولي مش هاترد ليه ؟
رخامه
المهم ... ركبت التاكسي وقولتله ع العنوان ونزلني تحت البيت بالظبط .. بعدين افتكرت اني ماعيش سجاير قلتله رجعني بس عند الكشك اجيب سجاير
رجع
رجعني عند البيت تاني بقا معلش
رجع
اخ .. نسيت اجيب مناديل
- مش هاينفع يا استاذ بقا
- يا عم ارجع وهاحاسبك
رجع
وبعد ما رجع
طلعت من جيبي سجاير ومناديل وانا بحاسبه وماحاسبتوش ع الزياده
===========
اظاهر كده بيقولوا ان فيه حمله عشان الزباله تتلم من محافظه الجيزه عبال ما يتفاهمه مع شركة الزباله
وبما ان رمضان جه
وانا قررت
ابقى
" رخم بزياده "
لقيت شباب زي الورد لابسين كويس وحاطين حاجات على بؤهم ولابسين جوانتيهات وبيلموا الزباله وشباب وبنات زي الورد
قررت اني اشوف شغلي بقا
لا يا ناصحين مش هالم الزباله
قررت اني ارخم
جيت جمب ولد وبنت من اللي بيشيلوا الزباله
وقلتلهم
بالذمه دي بلد دي لما شباب زي الفل كده يلموا زباله
- هانعمل ايه بقا يا كابتن بارضه دي بلدنا ولازم نحافظ عليها
- يا راجل تحافظ عليها مين هو يعني لما تشيلوا الزباله الناس مش هاترميها تاني .." العيب في النظام يا كاويركات"
- يا عم عندك حق ده حتى الناس فاكرانا من شركة الزباله وعمالين يشتموا فينا
- اه يا عم وبعدين بصراحه بقا يا مان انت زي اخويا .. مناظركوا عره خالص وانتوا بتشيلوا الزباله
- الواد رد ( محبطا ) هانعمل ايه بقا يا عم ماهي مش هاتنضف غير كده
وسيبتوا ومشيت
ساعه الا ربع ورجعت لقيته بارضه بيلم الزباله
البلد لسه بخير والله
===========
طبعا انتوا عارفين ان الجواز قسمه ونصيب
وانا روحت اتقدمت لواحده
من سني
ومن توبي
وابوها صاحبي واسمها ليه معايا ذكريات حلوه
قرينا قاتحه الحمد لله
اينعم هو ماكانش حافظ الفاتحه اوي بس مش مشكله
اتفقنا على كل حاجه ولو ان البنت اصغر مني ف بالتالي هاضطر استني شويه
بتاع عشرين سنه كده
لكن الحمد لله خلاص اتفقنا على كل حاجه
المهر
بامبرز اكيد
لأ مش ليا يا غبي ليها هي
وطبعا هي مش هاتاخد مساحه عشان عندها سنه وشهرين
وان شاء الله انا اللي هابقي اغيرلها
وهاصرف عليها لحد اما تبقى عشرين
حيث بقا انا ابقي شاب كونت نفسي وعندي بتاع اربعين سنه
فاتقوم هي سايباني وتتجوز واد مقطقط كده من سنها

========
واحد ظريف وباله مش طويل يقولي انت كاتب البوست ده ليه
رخااااااااامه
اعملكوا ايه
مش لاقي حاجه اعملها وبعدين الرخامه دي من اسمى معاني الحياه
بالذمه حد يقدر يعيش من غير ما يرخم على بني ادم
شوف يا اخي ظلم الانسان لاخوه الانسان
ماحدش يستحمل صاحبه كده ابدا

Monday, August 31, 2009

نهارك لذيذ




اخوتي واحبتي في الله .. اخوتي واحبتي في الوطن .. اخوتي وخلاص

لا استطيع ان اتوقف عن النوم اثناء صلاة الجمعه في اكبر مساجد المنطقه واقربها , لكن الحمد لله لقد تذكر مسؤولوا المسجد ان هناك شمسا تضرب في نافوخ اللي خلفونا وعملولنا مظلات تحمينا من آشعة الشمس هذا وقد , دعى الكثيرين من رواد المسجد بالحمد والشكر واثنوا كثيرا علي ادارة المسجد حيث لم يكن باستطاعتنا النوم في عز الشمس اما الان فهي ضلة تناسب صلاة الجمعه والنوم الذي يصاحب صلاة الجمعه .. وهذا وقد قررت الا اتوقف عن الدعاء علي شيوخنا الكرام وتلاوة اجزاء من صلاة الجمعه التي حفظتها عن ظهر قلب , فهي تلك التي اسمعها منذ نعومة اظافري حتي اصبحت شحط قاربت علي العشرين



اخوتي واحبتي في الهلس .. اخوتي واحبتي في التهييس .. انت يا واد منك ليها

لا اعلم لماذا يكره الكثيرين منا المطرب تامر حسني , انا عامة لا اكرهه وهذا لا يعني اني بحبه لا قدر الله لكني لست متخلفا . فاذا ربنا فتح عليه وغني اغنيه حلوه باسمعها وبانبسط بيها واذا لم يفعل اهو موجود وخلاص وزيه زي غيره

وهنا وجب علي ان انوه لشئ هام جدا

ألا وهو

الرقه والرومانسيه

عندما استمع لاغاني عمرو دياب مثل

تفتكرني .. او تنسيني مابقاش فيكي شئ يغريني

او

مااااااااالك .. مش خلاص حبيت ناس بقيت معاهم .. الخ

اتذكر هنا اني من الممكن اني عندما ربنا يفتحها في وشي والاقي بنت الحرام اللي هاتقبل تعاشر واحد زيي رخم ودمه تقيل وخلقي وكئيب واسود ورفيع وطويل .. لا تمت ملامحه للرجوله ابدا فهو راقص ومدرب رقص ومصمم رقصات وبيدرس اخراج وليعاذ بالله

اتذكر اني من الممكن اقول لها هذا الكلام دون ان تشعر ولا مؤاخذه اني - خول - لكني لا استطيع ان اقول لفتاه ما سواء احبها او ماشي معاها

ايه يا جامده اللي انتي عملتيه .. او يا تاعبه كل الناس

او اقف بجانبها واقول لها بكل صراحه

اااااااااااااااااااااااااه حسيني

عندها اشعر ان كل ما يقوله ابي عن - اغاني اليومين دول- حقيقي فاتذكر كلمات والدي العظيم عندما شاهد احدي كليبات احد المطربين المعروفين وقال ولاول مره - بلاش علوقيه ناشفه - والعلوقيه الناشفه هي في نظر والدي كل ما لا يليق بالرجل ان يقوله وهي قد تكون مناسبه للمعني الاخر الذي تقوله امي وهو .. - مياعه وقلة حيا - وهذا بحكم ان ابي يتعامل مع سواقين وميكانيكيه وسمكريه ام امي فتتعامل مع مدرسين وطلبه والذي منه وكمان في مدرسة بنات

فهنا يجب ان نفرق كمستمعين بين رقة الرجل ورقة المراه

فلا اتصور نفسي يوما ما وانا خبر - نفسي - اني قد

"بوست ايديا عشان سلمت عليك"

عندها اعلم تمام العلم ان نفسي ستلعن اليوم الذي ولدت فيه وتطلعلي وتشخرلي وتقولي

- ياخي احا -



اخوتي واحبتي في اللت والعجن ... اخوتي واحبتي في الرغي ... انت يابني منك ليها

يهل علينا هذه الايام . احد اسوا الايام في تاريخ البشريه الا وهو 1-9 فانا اتذكر وبكل فظاظه ذلك اليوم الذي اخرجني الدكتور الذي يقول والدي عنده دائما - اخص عليك وعلى الداء اللي سحبتك - اتذكر يداه وهي تصفعني علي جسدي ثم اتزحلق فاقع علي الارض باكيا .. ناظرا له بكل شراسه فاقول له - طب وديني لما اكبر يابن التيييت - اتذكر ايضا ان كل الاحادايث الدائره في بيتنا واسرتنا عن هذا اليوم البائس من سنة الف وتسعمائه وتسع وثمانون

حيث تراوحت الاقاويل من بين مؤيد ومعارض ولاعن لهذا اليوم وسلسفيل امه

حيث يتذكر والدي وقتها انه اقلع عن السجائر والاغاني والعديد من الموبقات .. حتي يتحمل هذا الاختبار الذي ابتلاه به ربه وانه قد راي في المنام ما يؤيد ان خيرا قادما له .. وهو من يومها .. لا يصدق ما يراه عندما ينام . الا اذا كان متغطي كويس

اما امي . اطال الله في بقائها واعانها علي انا واخي الذي سيهل هو الاخر بعد يوم مولدي بثلاث ايام فقط في عيد مولده هو الاخر

فكانت تقول عن هذا اليوم انه كان يوم اسود من اوله

دكتور رخم .. وممرضه رخمه .. ومستشفي زي الزفت وقعدت ساعتين تعيط عشان حد يفهم انها بتولد وان ده مش سهوكة ستات حتي خرج من جسدها هذا البلاء .. اللي هو انا

اما جدتي

فكانت تقول انه تمت تسميتي يوم مولدي

حيث كانت جدتي مع امي في المستشفي وكانت تشاهد مع امي فيلما لحسين فهمي كان يؤدي به دور واحد اسمه ممدوح فقالت لامي بضحكة صفراء .. " يالا اتشطري عشان تجيبيلنا ممدوح زي ده " والغريب ان امي اقتنعت بهذه النظريه واسمتني ممدوح حتي نكمل امبراطورية ميم

والاغرب اني لا اشبه اطلاقا لحسين فهمي ولا اقتنع العالم باسمي فغيروه لما يسمي ب - زيكا - وزيكا هو الاسم الذي اطلقه جدي علي عندما شاهد احدي حلقات بوجي وطمطم واصر انني اشبه تلك الشخصيه الوسخه اللي اسمها زيكا التي لا تفعل الصواب اطلاقا

جدي الذي كان دائما يقول اني افضل ما جائت به تلك العاءله التي ابتلاه به ربنا ... وانه تزوج من جدتي بعد مشاورات كثيرا حيث لم يكن يقتنع بان يتزوج واحده هو مابيحبهاش لكن جدي ابو جدي اخبره انه سيحرمه من الميراث اذا لم يتزوجها .. - صباحو افلام قديمه يا جدي - الله يرحمك



الما عادل العربي

قد تكون صدفة ان يكون يوم مولدك هو نفس يوم مولدي

قد تكون صدفة ان تسافري الي لبنان بلدك الاصلي قبل يوم عيد ميلادنا مما منعنا من الاحتفال به كباقي البشر الخيبانين الذي يحتفلون بضياع عاما اخر من عمرهم

قد تكون عجيبة تلك النظريه التي تقول بان - مراية الحب عميه - والتي لم اصدقها في حياتي الا عندما قابلتك

فانظري الي حالك

وانظري الي

لتعرفي كم ان الحب عماكي .وحقيقة قد عما غيرك قبلك ولكن الحمد لله لقد افاقوا جميعا من ذلك العما المؤقت وكل ما ارجوه من الله ان يديم مراية حبك العميا ليا . فانا وبكل ما بي من عبر بالنسبة لك - احسن اختراع بعد الكهربا - وانت

بعيناكي

بابتسامتك بجراتك بلبنانيتك .. التي تطورت في مصر لتزاداد خفة وجاذبية فضرب كل ذلك بخلاطا بديع فخرجتي انتي - يا خراشي ع الكوكتيل الجميل - وخرجتي انتي لتخبري كل خلق الله انك تحبين هذا الانسان الذي ابتلاه الله بحاجات غريبه منها الرقص والشعر ونهم السينما والرفع والقولون واشياء اخري قد تفكر بها اي امراه ترغب بالحب ولكن فقط .. حينما اكون انا الوحيد المتبقي على هذا الكوكب وهي تفاضل ايضا بيني وبين المخده

اما انتي سيدتي

فلقد فتحتي باب قلبك علي مصراعيه لادخل انا بطولي - ومن غير ما اقلع الجزمه - بكل بلاهه .. وعندما تقفين امامي لتقولين بكل بجاحه - وحياة الله بحبك وبيقبرني هالسمار اللي بيجنن - واموت انا واعرف يعني ايه بتقبرني التي اخاف ان تكون شتيمه لا سمح الله او كلمة قبيحه بس باللبناني

فارد انا بكل بلاها وكما الاهتم . فاشاور باصبعي علي صدري واومئ براسي بالموافقه .. اينعم

" اقصد ان اقول وانا كمان "

ولكن كما تعرفين فانا خيبة في ذلك الكلام الملئ بالرومانسيه والحب بسلاطاته ببا غنوجه وانا اعترف الان لكي واعلم انك ستقراين هذا البوست - الرمضاني الخالص - باني لا اكتب القصائد امام احد ولا استطيع ان اكتب قصيدة وهناك ولو ذبابه غافلة مستهتره في غرفتي



اسماء عوني

يعلم الله كم انا سعيد بخطوبتك ويعلم الاخرون وانا اعلم انهم يعتبرونني احمقا لعدة اسباب واني واطي واني ندل واني ابن ستين كلب معفن وماليش في الطيب نصيب وتعلمي انتي اني لست كل هذا وقد ايقنت تمام مقولة " قسمة ونصيب " واعلم ان هناك بتاع مليار رجلا يافعا وسيما محبوبا جميلا يحلم كل يوم بان تمدي يداكي الناعمتين لتسلمي عليه فقط , وكل ما ارجوه من الله ان اراكي يوما ما سعيدة بحياتك مع خطيبك وزوجك المستقبلي وان تملأي علينا الدنيا بمكعبات سكر مثلك

وان تملأي الدنيا اشراقا وسعادة وحبا بابتسامتك الرائعه التي لطالما ابكت قلوبا ونيمت رجاله بشنبات وان تملأي الدنيا نجاحا وان يوفقك الله دائما ومن نجاح لنجاح ومن سعادة لسعادة وان يجمعني بك يوما ما في الدنيا قبل الاخره



آخر كلام

والان وبعد عشرون عاما - الا يوم - استطيع ان اقول وبكل جرأه ان الله يحبني ... بل يفضلني عن الكثير واعلم تمام العلم انه بعد كل هذا الخرا في حياتي وبعد كل تلك البلاوي وعندما اقف عاريا امامه يحاسبني وعندما امشي علي الصراط سيدفعني هو بكل قوه الى الجانب الاخر - الجنه - ليس لانني استحقها فانا وبكل جداره - فيا كل العبر - ولكن لانه هو الله الغفور اما انا فهذا العبد الضعيف النحيل الاسمر الذي يدعي

ممدوح عبد الحميد

ويلقبه الاخرون ب زيكا

صاحب العشرون عاما

Wednesday, August 26, 2009

مطلوب وطن





اخر رسومات الولد كانت حاجات




تشبه ملامح للبلد وقت السكات




احرق بقى كل الصور




وطفي كل الراديوهات




ايه معني لما يكون بلد




ماتشوفش فيه ضحك البنات




وزقزقة طير ع الشجر




والحزن في وشوش البشر




مالي الجرايد اعلانات




ان الوطن ... باينه مات




اخر خبر ان الوطن




مش باقي منه غير سكات




ورسمه للنيل والولد .. والاهرامات




اخر خبر موجود في كل الراديوهات




ان الوطن .. باينه مات




مش باقي منه غير آسى يهد البدن




انسان ولكن .. مات ومن غير الكفن




اخر خبر .موجود ولازم تسمعه




ان الوطن .. باينه مات




احرق بقى صورك وكل الذكريات




ده ماعادش لسه فيه امل




يقدر يطيب جرح فات




اخر خبر .. تقراه وتضحك وبسكات




ان الوطن ... باينه مات




مافاضلش منه غير احاسيس الخطر




وصوت غناوي عود ومقطوع الوتر




ماطلعش منه غير غناوي ع اللي فات




اخر خبر .. تقراه في كل الاعلانات




مطلوب وطن .. اصل الوطن . باينه مات






ممدوح عبد الحميد



زيكا

Tuesday, August 18, 2009

صحيح انا اسمر




When I born, I Black

When I grow up, I Black

When I go in sun, I Black... Read More

When I scared, I Black

When I cold, I Black

When I sick, I Black

When I ill, I Black

When I die, I still Black

And you white fella

When you born, you pink

When you grow, you white

When you go in sun, you red

When you scared, you yellow

When you cold, you blue

When you sick, you green

And when you die, you gray

And you calling ME Coloured?

القصيده كل اللي اعرفه عنها ان كاتبها طفل افريقي

Friday, August 14, 2009

حبة حرية


انا نور متعلق ع الحيطه


بيشق ضلوع


وماليش في الزحمه وف الزيطه


وغناوي دموع


انا طير متعلق متشعلق


في بواقي كتير


وانا قلبي بسرعه بيتعلق


بقلوب ويطير


ويسافر علي كل حبيبه


ويروح مشاوير


انا قصه ولكن منسيه


انا قصه ولكن


مكبوت الحب الساكن فيا


بتضيق علي قلبي


تشيرتاتك


وبتوسع مني الحريه


علشان تحجيبه


مش عارف اغنيلك حتى


" الطول واللون والحريه "


علشان تـَحْجـِيبه


مالاقتش في حبك غناويا


وعينيكي السوده المِحْمره


مش فاهم فيها


ولا فاهم معنى انك حره


لما تغطيها


الدين على عيني


بس انا عاشق


طلعان ديني


من شوق راشق


في ضلوع الرسمه اللي راسمها


ب خطوط الميل


وانا راسم جسمك وملامحك


مليون تفصيل


انا عيل في الحب وعايز


حبة حريه


وهايضفل متشعبط فيكي


والضي هيتشعبط فيا


وهاتلمع عيني اما تشوفك


محروم من حبة حنية


خطاويكي المليانه محبه


هاتبحبح علي قلبي الشوق


وتنقط احساسك حبه


وتبوح بالسر المخنوق


والنور المتعلق يوصل


للكون ويفوت


وهايرسم من صوتك غنوه


تعزفله سكوت


وانا قلبي العاشق الهايف


هايموت ويحسك بشفايف


هايدوقها ولو مره وحيده


وبعديها يموت


ويموت في كلامك وسكاتك


وكانه مات صباحية عيد


وهايدخل بيها ف جناتك


وكانه شهيد

ممدوح عبد الحميد
" زيكا "

Monday, August 10, 2009

مصوراتي


عواميد النور بتبرقلي
وبتحرقلي
احلام الصوره اما بصور
ع الشجر الطير
وبنورها الاصفر الغامق
بتعتم قلبي بملامحها
من غير تفسير
وساعات بانطح
واقاوح صورتي ال مش باينه
- غاوي التصوير -
واصور تاني وتصويرتي بتضيق وتضيق
والافق الواسع انا شايفه
وكانه لا شئ
واتخيل في الحلم براحي وكانه طريق
واستاذن طيبتي المعهوده
في براح الصوت
واتصور محبوس في الاوضه
علي امل الموت
عواميد النور الغرقانه
ف شوارع بتنور عتمه
علي ناس بتبانلك حزنانه
تاثير الكتمه
تاثير الحزن المتوزَّع
في بطاقة كائن
مسموح بغباؤه
متبرع جدا
باخواته وبباقي اعضائه
علي نفس السيره
بيقولك
لازم تضحك
لو راح تتصور تصويره
وتقول وتحكّي
والوقت المرمي علي كتافك
لو شافك
هيموت م الضحك اللي يبكي
عدسة عينك تفرق ايه
عن عدسة قلبك ؟
مش فالح في الوقت الحالي
غير انك تسكت
وتكلم نفسك
وبحاول القط في الصوره لكني بامل
عواميد النور المكسوره
بتضايق عدسة احساسي
من رد الفعل
صوّرتك تكدب بلسانك
فكَّرتك حي
وبتحلف بارضح بايْمَانك
"ده العيب في الضي "

ممدوح عبد الحميد
" زيكا "

Thursday, July 30, 2009

حكمت الاقدار

حكمت الاقدار
الصلاة خير من النوم
لم يعد يصلي الفجر .. فقد ايمانه بفكرة ان الصلاة خير من النوم ولكنه لم يبد عليه التاثر كثيرا
دائما ما يتصارع مع النعاس فيغلبه دائما في الثانية عشر بالتحديد ثم اربع ساعات ونص اخري حتي يسمع المؤذن بصوته المؤذي " الصلاة خير من النوم " ثم يسمع صوت كحة ثم صوت بصاق- يبصقه المؤذن غالبا- ثم صوت الراديو بجانب المؤذن عندها تقرر عيناه ان تفتح فيسمع الصوت مرة اخري " الصلاااااة خير من النوم " تاتي زوجته لايقاظه
- اصحي يا ابو محمد الفجر اذن
- حاضر حاضر هاصحي
ينام
يستيقظ في السابعه يبدو عليه ارهاق رجلا لم ينم منذ سنوات يشرب قهوته ويهم بالبحث عن ملابسه
تساله زوجته ؟
- مش هتقرا الورد بتاع النهرده يا ابو احمد ؟
- هابقي اقراه في السكه
الان فقط وبعد عشرون عاما بالتحديد ايقن انه لم يحب الله قط ولكنه لا يعلم بالتحديد اي واقعة في تلك العام هي سبب ذلك
من عشرون عاما
فقد امه
ولكنه يعلم تماما ان " الموت علينا حق " وان احمد صديقه فقد امه ايضا قبل ذلك بعام . هل عندما توفي جنينه الاول في رحم زوجته .. او ربما عندما اتي له والده في المنام يحترق هل عندما القي القبض عليه وهو يختلس مبلغا من خزينة الشركه لينقذ ذلك الجنين ولكنه لم يفعل وتم القبض عليه ومات جنينه الاول والاخير
ربما ذلك
لم يكن الاول الذي يختلس مالا من خزينة المصلحه في بلاده بل ان هذا تقريبا شيئا عاديا جدا
ولكن دائما ما كان يردد في زنزانته التي استمر فيها ثلاث سنوات
" اشمعني انا يارب "
" ما حسنين بيه وكيل الوزاره اختلس وسابوه ومدام سميره اختلست والست ام ابراهيم بتيجي المصلحه تقشر بطاطس"
ظل طيلة عشرون عاما يعتقد ان الله يعاقبه في الدنيا حتي يزيح عنه بلاء الآخره ولكن دائما ما كانت تراوده احلامه بحق الله اي لعنة هي اشد من تلك التي يعانيها
يعلم تماما ان الفقر الذي يعيه هو نتاج سبع سنوات من الزنى يعلم تماما ان " وعزتي وجلالي لافقرن الزاني ولو بعد حين " ولكن ايضا كانت تراوده وسوسات شيطانه اللعين
" اشمعنا انا يارب "
كم زاني هنا في مصر .. الشعب كله يزنى بشكل او بآخر فهو اما ناكح واما منكوح وتحتم علينا اداب النكاح ان نتكتم عليها ولا نخبر احدا اننا شعبا قد عشق النكاح
ولكن " اشمعنا انا " يقطع صوت صلوات تفكيره ذلك المواطن الذي بدا عليه الشقي
- حضرتك استاذ محمد عبد الباقي ؟
- ايوه
- حضرتك انا بقالي اسبوع داير علي كعب رجلي عايز امضة عشان اخد معاش ابويا وكل شويه يشحططوني
مد ذراعه ليلتقط ورقة الشاب البائس ليلحظ انه قد وضع تحتها عشرة جنيهات
ربما كان يغضبه ذلك كثيرا منذ فتره لربما قد شتمه وسبه ولعن كل راشي ومرتشي في تلك المحروسه ولكن حينها لمع في عيناه بريقا جديدا
بالعشرة جنيهات ربما يشرب مارلبورو اليوم بدلا من الكيلوباترا التي تجعل فمه مثل سلة القمامه
ربما يذهب الي بيته في تاكسي اليوم
ثم
" هي يعني جت عليا "
اذا كان ثلاثة ارباع الشعب هو اما راشي او مرتشي اذا
فقد لعن الله شعب مصر لعنة رهيبه
بين الزنى والرشوه اذن لابد انه هناك في جهنم قسم خاص للمصريين
وضع العشرة جنيهات في جيب القميص ثم بكل بساطه وقع للرجل علي ورقته
- ربنا يخليك لينا يا باشا
- متشكرين يا سيدي اطلع بقي لمدام هند خليها تمضيلك . قولها عم محمد بيقولك امضيلي هنا
اخرج العشره جنيهات من جيبه
ثم مسك طرفيها بيمينه ويساره واخذ يقلبها .. كم كان هذا سهلا يستطيع الحصول علي واحده مثل تلك الورقه علي كل جرة قلم يجرها منذ الان وفيه نهاية اليوم ربما يعود يوميا بخمسون جنيها علي الاقل
قطعت صلوات تفكيره صوت مؤذن مسجد المصلحه .. " حي علي الصلاه " " حي علي الصلاه " وضع العشرة جنيهات في جيبه ثم استلقي علي مكتبه من التعب
عندما قال له الحاج سمير مديره في العمل
- مش هاتصلي الضهر يا ابو احمد ؟
- حاضر حاضر روح انت وانا جاي وراك
كان يحب دوما ان يقال له ابو احمد رغم ان زوجته لا تنجب منذ حادثة حملها الاول والاخير رغم انه لم ينجب يوما علي الاطلاق لم يعد يطيق هذا الاسم
هو محمد عبد الباقي لا يجب ان ينجب طفلا يجب ان يذهب هذا العام ليصتاف مره في حياته بعد ان رفض بعد كل تلك السنين ان يذهب ليستجم مع تلك البائسه زوجته التي تذكره دائما بالصلاه والورد وان " ماحدش بينام من غير عشا " رغم ان وجبة العشاء لم تكن اساسيه يوما ما بمنزلهم الفقير
ولكن ليس بعد الان
سيذهب ليغطي وجهه بمياه الاسكندريه وليمتع نظره بجمال منظر البحر مع جمال ارجل المصطافات علي الشاطئ لن يعتبر المصيف حراما بعد الان
قطعت صلوات تفكيره صوت سواق التاكسي
- معلش يا باشا هاتنزل هنا عشان الشارع اللي جوه ده بايظ وانا لسه مغير عفشه وصاحب العربيه مش راحمني بيحاسبني بالخبطه
قبل ان يبدأ سواق التاكسي بسرد قصة حياته اشار له بالموافقه
اعطاه العشرة جنيهات
ثم ترجل من السياره وفتح باب شقته ليجد زوجته تقرأ سورة يس بصوت عذب
ابتسمت له زوجته واكملت تلاوتها
أخذ منها المصحف
اغلقه
وضعه بجانبها ثم اخلعها حجابها
" قد اعتادت عند قراءة القرآن ان ترتدي حجابها وتتوضأ "
احاط وسطها بذراعيه واقامها من مكانها
وضع قبلة علي راسها
اشتم رائحة شعرها الزاكي .. اخذها من يده الي باب غرفة النوم
وهي تتمنع
- طب استريح من السكه يا ابو احمد
نظر اليها وابتسم .. ثم وضع يده علي فمها بعذوبه
- اسمي محمد عبد الباقي