Sunday, November 15, 2009

انت عايز ايه ؟



تقريبا باحلم نفس الاحلام من وانا في ابتدائي , حلم اني باقع من فوق .. من فوق اوي لحد ما اصحى وانا حاسس اني خبط

في الارض بكل قوه

حلم اني متاخر ع الامتحان

مش هالحق ادخل

وباجري اجري

اجري

لكن بارضه مالحقش

انت عايز ايه ؟

سؤال بيتوجهلي كتير

وكتير مابعرفش ارد

فيا منا كتير بيعملوا حاجات كتير وبيحبوها ومتقنين حاجات منها وحابين يدرسوا حاجات تانيه

بس الواقع بيقول انك لازم تختار حلم واحد بس تعيشه

والاصعب بيقول

ان احتمال حلمك يكون مابيوفرلكش الحياه اللي انت بتحلم بيها عشان تقدر تدي كل جهدك للحلم ده

والاغرب انك حتى لو بتحب الحلم ده

وبتقدر تدي فيه كل مجهودك وحياتك

وعايز تديله كل حياتك

احتمال ماتوصلش فيه غير لاول السلم

لان فيه ناس سابقاك بحاجات وخصائص مش من حلمك لكنها من الحياه اللي اتفرضت عليك

كل ما الاحلام بتكتر وكل ما بتكبر وبتقرب من حلمك .. بتلاقي التفاصيل بتوسع . والخرايط بتزيد خطوط والحيطان بتتملي شقوق والمفروض انك تقف على رجلك الاتنين وانت واقف على صراط الحياه

ومش عارف هاتقع

ولا هاتعدي

ولو هاتعدي هاتعدي على طول ولا بعد اما الرعب يملاك ويملا كل الناس اللي واقفين بيتفرجوا عليك

7 comments:

magi said...

مش حالك لوحدك اغلب الناس كده
عشان كده المفروض تعمل الحاجه الى انت شاطر فيها مش الحاجه الى بتحبها
لان الحاجه الى شاطر فيها نجاحك فيها هيزقك لقدام وهيخليك على المدى البعيد مبسوط لكن لو حاجه بتحبها بس مش ناجح فيها هينتهى حالك بمجموعه متلاحقه من خيبات الامل لاغير

yasser esmail said...

بجد مدونه جامده جدا وفيها موضوعات حلوه

تمنياتى بالتوفيق دائما

أميرة علي كوكب مهجور said...

هههههههههه ده اول رد فعل ليا اول ما قراءت البوست بتاع الفرح

اما بالنسبه للاحلام كلنا كده احلامنا كل ما نبكر بتصغر حبه حبه لحد ما بتتلاشي المهم تشوف ايه اللي انت شاطر فيه وتعمله وتحاول تحقققه ولو متحققش دي مشيئه القدر واكيد الخير في حته تانيه نعكش انت عليها

ربنا يوفقك

مروة الزارع said...

حاسة فى كلامك نبرة يأس .. لية؟

على فكرة الواحد ممكن يحقق اكتر من حلم مع بعض

micheal said...

اااااااااااه يا زيكا
نفسي أحلامي تتحقق مرة وتبقى واقع بدل ما تتحول لرغبة مكبوتة كالعادة
نفسي أبقى فاعل بدل مفعول به
بوست جامد ميطلعش غير من واد زيكا
:)

Che said...

مش عارف اقولك ايه يا زيكا .... انت عارف انى ساعات بستغرب من الناس اللى بلاقيها عارفه حلمها ايه .. حتى لو حلم تافه او بسيط او مش حلم اصلا و هما معيشين نفسهم الوهم .... بس اكيد هما فى وضعيه احسن منى عشان انا مش عارف حلمى ايه لغايه دلوقتى

سارة نجاتى said...

مش عارفه أقولك ايه

بتعرف تنشن أنت على الحته الصح
أكتر حاجة حستها

كل ما الاحلام بتكتر وكل ما بتكبر وبتقرب من حلمك .. بتلاقي التفاصيل بتوسع . والخرايط بتزيد خطوط والحيطان بتتملي شقوق والمفروض انك تقف على رجلك الاتنين وانت واقف على صراط الحياه

حقيقى نفس ألاقى شبه اجابات برده