Saturday, March 28, 2009

عندما قابلت الشيطان



كلما افكر في عدد المرات التي حاولت فيها ان اتخطي هذا الحاجز بيني وبين الله وان اقترب اليه اكثر فأكثر يبعدني كأسا اخر من الفودكا عن تلك الخطوات بخطوات اكبر من تلك التي اخطوها نحو الشيطان وبكل ثقة وبدون تردد وبدون خوف وبدون ادني رغبة في العودة

عندها ايقنت تماما ان شيطاني ليس شيطانا عاديا

حقا لا يمكن ان يكلف ابليس شيطانا من شياطينه بمهمة صعبة مثلي

فانا

انا املك تلك العقيدة التي تبقي في الذهن كما يبقي كأس الفودكا في الدم


اذن ربما شيطاني هو

هيرموس


او ربما لوسيفر ذاته


او ربما واحدا اخر


لكني اريد التقرب اكثر الي الله وليس الي الجحيم


حسنا


انا اعلم كيف اصل الي اقصي درجات التفاعل مع تلك المخلوقات اللعينه


لا اعلم ذلك السبب الذي جعل الله يخلق الشياطين ؟


خلق بنا ما نطلق عليه النفس الاماره بالسوء


اما كانت تكفي


مزيدا من الفودكا . اقسم ان اصل الي ذلك الشيطان


نعم ساحاوره ساطلب منه الابتعاد


ساطلب منه التوقف


ساطلب منه .. لا ... بل سأأمره ان يتوقف عن الظهور في احلامي


كأسا اخر من الفودكا


لا استطيع ان اري شيئا . ولكني مازلت بكامل قواي العقليه


ربما يترنح هذا الجدار قليلا


تهتز هذه الصوره , لا اعرف لماذا تدور الغرفة من حولي


ولكني مازلت بكامل قواي العقليه


حسنا ربما قطعا من الفراوله ستذهب بي حيث اريد


ما اجمل الفراوله عندما يليها كأسا من الفودكا


حسنا .. اري بعض الملامح .. ربما اذن .. هل هذه قرون


ياللبشاعه


كم هو سئ ان تري كل هذا اللعاب سائلا


تلك الشعيرات بالاسفل


ماذا ؟


انه هو . انه هو اللعين يجلس امامي؟

عيناه تحدقان وبشده ..

يرغب بشدة في ان اخاف منه وان استعيذ بالله منه ؟


لا أقسم اني قادرا علي هزيمتك


لا .. انا لست خائفا


ربما مزيدا من الفودكا


اشعر براسي تصطدم علي الارض


والان


استطيع ان أري الصورة كامله .. نعم انا وهو .. وحدنا في تلك الغرفه .. تحت هذا الضوء الخافت


تبا انه ابليس .. كنت اعرف ان شيطاني ليس طفلا ... كنت اعلم ان كل هذا الشر لن ياتي الا من إبليس


إ بليس الذي وقف امام آدم وعيسي وموسي ومحمد عليهم السلام يقف الان امامي


كم تمنيت هذا اللقاء كثيرا


أري تلك النظره الباسمة علي وجهه .. لقد تغيرت النظرات المرعبة الآن


حسنا .. اردت لقائي ... كنت تظن اني اخاف لقائك .. ولكن ها أنا ذا .. بشحمي ولحمي أقف امامك منتظرا محاكمتك , حسنا تكلم الان ما كنت تريد ان تقول .


كم تمنيت لقائك


لماذا ما الرائع في ان تقابل شيطانك


لطالما اردت التقرب الي الله . ولكنك دائما كنت تعبث بعقلي وتبعدني عنه .


بل لطالما ابعدك كاس الفودكا الذي تحمله


ومن اغواني الي كأس الفودكا


نعم . انا أغويتك لكي تشرب كاسا من الفودكا . حسنا كيف استفدت من ذلك ؟


ارتكبت ذنوب ؟


انت ترتكب الذنوب كل يوم بأمر مني او بأمر منك . لا تلومني وحدي إذاً


اذن توقف عن الوسوسه في صدري


انا اغويتك بالفودكا . هل اغويتك ايضا بان تزني مع تلك المرأه , هل اغويتك ان


توقف انك تدفعني الي الجنون


ان وصولك للجنون ما هو الي راحة ابدية لك . لا اتمناها لك


لقد افسدت حياتي . ابعدتني عن الله . لقد فعلت كل ما تراه انت مضحكا وما اغضب الله مني يوما بعد يوم


( انفعل ابليس كثيرا وقام من مكانه بحركة سريعه ثم اختفي ثم توقف امامي ممسكا بقميصي بعنف )


ان تظاهرك بالعفه والطهارة وانني السبب في كل ما وصلت اليه يجعلني اشعر بانك احد هؤلاء الذين خلقوا من نور ويسمون الملائكة وأقسم اني لم اكره في حياتي شيئا مثل الملائكة . لذا اذا كنت تريد محادثتي لا تجعلني انفعل مثل هذا مرة ثانية , لا تبدا بالكذب

لم يستطيع احدا ان يجيد الكذب مثلما فعلت انا , لذا توقف عن استفزازي


( ابتلعت ريقي وتراجعت خطوة الي الوراء )


حسنا , انا أعلم اني لست ملاكا , ولكني لست شيطانا . انا هذا الوسط اللعين بين ذلك وذاك , انا اللعين إبن ادم , انا من خلق من تراب

انا الوسط بين الخير والشر

انا مزيجا غبيا من الملائكة والشياطين , انا لست مثلك ولست مثلهم انا لا اعرف اذا كنت في الجنه مع الملائكة او في النار بجوارك


من خلال تاريخك المليء بالاحداث يبدو انك ستكون بجواري


( دام الصمت للحظات )


اشعلت سيجارة وتوقفت أمام الزجاج انظر الي ذلك الشارع البائس الذي ولدت فيه بينما جلس الشيطان علي الاريكه مستمدا راحته من اشعالي تلك السيجارة


وبدا الحديث يدور ثانية


يعتقد العالم اني اردت هذه المكانه ,

يعتقد البشر جميعا اني انا اللعين الذي اغضب الله وطرده الله من مملكته الرائعه

ولكن طرد بعدها آدم الا تعتقد الان باننا متساوون في كل شئ

الا تري ان الله فعل بك ما فعله بي

الا تري اننا ملعونان بذلك الامر الالاهي الا تري اننا في كل هذا معا


لا انا لست مثلك .. علي الاقل لدي فرصة لدخول الجنه


انا ايضا لدي تلك الفرصه .. ولكني لا اريدها , لقد اخترت النار منذ زمن بعيد , كرامتي . ذلك الشئ الذي ينغص علي حياتي , اهون علي هذا الجحيم من ان اعود واعتذر عن ذنب لم افعله ؟

لقد فضلك الله علي وهذا لم يعجبني ولن يعجبني انت لست افضل مني

لطالما كنت فتى السماء المدلل , عندما ولدت احتفت بي السماء كلها ولم تتوقف الاشياء عن الرقص الا عندما امر الله بالسكون

تبا . لقد كنت الافضل دائما

كمحاولت كثيرا ان اعود اليه راجيا ان يغفر لي , ولكن كما خلقني لكي اقسو عليك وابعدك عنه خلقك انت الاخر كي تبعدني عنه

كلما رايت ابن ادم يتقرب اليه ويرضيه ويغنيه عني , كلما ازداد ذلك الجرح الموجود في قلبي

كلما زادت كراهيتي لبني البشر كلما ابتعدت خطوة عن الله

لا يجب ان اسمي شيطانا

بل انت تسمي شيطانا , انت السبب في طردي من رحمة الله , كنت الافضل عند الله وبسببك , اين انا؟

ارقد في الجحيم منتظرا قطعة من الطين كي تركع وان اوسوس لها

منتظرا قطعة اخري من الطين تريد ان تزني فاباركها

اخري تريد ان تلهو فالهو معها

اربع وعشرون ساعة من الهباء اقضيها مع الملاعين امثالك

والان تاتي وتتهمني بانني ابعدك عن الله

اذا كنا ابعدتك عن الله خطوة . فلقد ابعدتني الكثير عنه


حسنا هل انتهيت ؟

هل قلت كل ما لديك , هل انتهي هذا الحديث الغبي , دائما ما كنت اتوقعك اذكي من ان تكذب بكل تلك السذاجه , ليت احدا يشاهدك الان معي

إبليس الكاذب اللعين يتكلم مثل الاطفال , هل تعتقد بأني بكل هذه السذاجه كي اصدقك , هل تري ان مزيدا من التمثيل الزائف سيقنعني

بان حياتي ليست في خطر ؟

ماذا افادني الان ان استمع الي كل هذا الهراء

لماذا اذن لا توقف تلك المهزله بيدك الان

توقف عن الوسوسة في صدري والهامي بكل تلك المعاصي وربما يعفو عنك الله وحينها لن نجد مكانا افضل من الجنه لكي نقضي فيه ساعات من النساء الجميلات والخمر والهواء الطلق

ابتعد انا عن ذلك القلق الرهيب من مصيري وتبتعد انت عن ذلك الجحيم الذي تعيش فيه منذ الابديه


لا ، لا يمكن ... لم تقنعني حاول الكثيرين ان يكونوا مثلك , ان يكونوا ابطال تلك المعركة التي لا اريدها ان تنتهي والتي ستتوقف بأمر مني

وليس بأمر منك


بل بأمر من الله


( يتحدث بلهجة عنيفه )


لم يامرني الله ان احثك علي المعصيه , لم يامرني الله بان اتحداه هو شخصيا , لم يامرني الله ان اظهر لك الان

لم يامرني الله بفعل شئ وهذه هي الحقيقه

لم يأمرني الله الا قليلا

ولم يكن من بين تلك المرات ان اصل بك الي ما وصلت انت بقدميك

ليته يأمرني يوما , كي يتوقف هذا النحيب الذي لا ينتهي

كي تتوقف تلك الموسيقي اللعينة عن الهمس بأذني

انت

انت تزني وتسرق وتقتل وتسب هذا وتلعن هذا وفي النهايه ... من هو ابليس ؟

لا بالطبع ليس انت

انه انا

انا ابليس اللعين انا من يرجم يوميا

انت اخرجتني من النعيم
وليس انا من اخرجك منها

انا من يلعن كل دقيقه

انا وليس انت

لماذا ؟

لا اعلم


كنت اعتقد اني من ساتحدث في ذلك اللقاء ولكن لم افتح فمي بما يكفي

اشعلت سيجارة اخري

ثم كأسا اخر من الفودكا

ثم كأسا اخر

حتي بدات الصورة تتلاشي , بدا يبتعد ويبدو عل يوجهه الذهول والخوف وعلامات الهروب تتجول في مخيلتي , بينما يزداد وجه ابليس شحوبا ورعبا


نعم لقد فهمت الان ايقنت ان هذا سيحدث

عندما سمعت المؤذن يؤذن لصلاة الفجر

اشعلت سيجارة أخري

و

لقد انتهت زجاجة الفودكا .. سافتح زجاجة اخري

( يظهر الصوت )


الله اكبر الله اكبر

الله اكبر الله اكبر

اشهد ان لا اله الا الله

اشهد ان لا اله الا الله


لم تتوقف السيجارة عن الاحتراق

لم ينتهي الكاس ابدا


( واستمر الصوت بعذوبة )


اشهد ان محمدا رسول الله

اشهد ان محمدا رسول الله

حي علي الصلاة

حي علي الصلاة

حي علي الفلاح

حي علي الفلاح

لا استطيع ان امحو نظرة الشيطان الاخيرة من عقلي ، كنت اعتقد ان مفعم بالكلام ولكن يبدو ان كتلة النار تلك لديها الكثير لتقوله

حسنا هذا اخر كأسا للفودكا الليله


(وفي الاثناء )


الصلاة خير من النوم

الصلاة خير من النوم


حسنا سأنام الآن


الله اكبر

الله اكبر

لا اله الا الله

Monday, March 23, 2009

انا

عدسة : احمد الصباغ




خليط من الليبراليه


مع حبة تدين


علي شوية رقص


علي كراهيه فظيعه للسياسه والسياسيين بشكل عام سواء حكوميين او معارضين


علي حبة اشعار كده بتاع خمسميت بتنجانه نفسهم يتلموا في ديوان بس مش عارفين


علي معلقتين غنا


نص كوباية عادل امام


كوبايتين ونص احمد ذكي


كوز من اليوسف شاهينيه


مع فرم كيلو من كتابات احمد خالد توفيق


ثم تخلط كل هذا لمدة 8 سنين


ثم تضيف ثلاثة كيلو جرامات من محمد منير ولوازمه


شوية افلام لشريف عرفه


وحط شوية نرفزه بس ما تكترش


علي حبة نحس واتوصي


كوبايتين بيض مضروبين في الخلاط والحدق يفهم


علبتين مارلبورو ابيض


وولاعه


جونتي هاف


مج نيسكافيه تقيل سكر زياده


شيشه تفاح


تحط كل ده في الفرن بس ما تطولش اوي


وماكينة حلاقة ( موسير الماني ) ليها اهميتها


مكيالين من الملل


نص شيكارة صبر


علي ربع شيكارة زهق


واستني لحد اما الخميره تخمر وتبقي تمام


طلع الصينيه اللي كانت في الفرن وحط عليها الخميره


وشوف كده هيطلعلك ايه ؟

Wednesday, March 18, 2009

يا ابو كف رقيق وصغير



ماكنتش بحب كارتون بكار , كنت بحس انه زياده اوي ان عيل عنده سبع سنين يدوخ مشرط ومابيعملش حاجه غلط وزي القشطه .. ده طفل يعني لازم يحط صباعه في الكهربا ويضرب ابوه بالقلم ويطلع يجري ومايعملش الواجب ويضرب صحابه .. معلش يعني ماحدش شاف بوجي وطمطم

فاكرين شخصية زيكا

احم احم

ايوه جدي الله يرحمه سماني زيكا تيمنا بالشخصيه دي

ماكانش حد يقدر يمد ايده علي كيس الشيبسي بتاعي

ويالهوي لو حد غلط وعلي صوته وانا قاعد .. ايه مافيش هدوء يا ولاد الل

هو الواحد مايعرفش يتفرج عالكارتون بهدوء في البيت ده ولا ايه

ماما : بس يا واد انت ماتعليش صوتك عيب

زيكا : واد ... ده انتي نهارك مش فايت .. امشي انجري علي اوضتك ياللا

ذكريات الطفوله

زمان وانا صغير كنت بحلم ابقي كبير زي هشام عباس

بس ماعرفش ليه كنت عايز ابقي كبير

يمكن عشان ماروحش المدرسه , ولو اني دلوقت بتمني ولو يوم من ايام المدرسه

انا فاكر اول شريط كاسيت اشتريته في حياتي , وكنت لسه ساعتها شاري ( الووكمان ) وكنت عاوز شريط اشتريه بنفسي

تشتري ايه يا واد يا زيكا

تشتري ايه

كان عندي ساعتها 8 سنين

قولت بس

مافيش غير البوم الفرحه

" والدنيا لو جارحه .. لونها لون فرحه , ماهو ايه بيغير عمر الواحد غييييير .. غير الفرحه"

اشتريت الفرحه وعجبني اوي , اكيد كان عندي 8 سنين ماكنتش فاهم اوي الالبوم بيتكلم عن ايه بس حبيت منير اوي

لما كان كارتون بكار بيشتغل في التليفزيون انا كنت ببقي مركز في الفطار بصراحه ( عشان انا لما باكل كل حواسي بتقف )

كنت بحب اوي اسمع الاغنيه

بكار بكار بكاااااار

من صغره وصغر سنه عارف معني انه من قلبه وروحه مصري

تاريخ ارضه بلاده بيجري جوه دمه

يطلع الكورال بقي والاطفال تشتغل

" من قلبه وروحه مصري والنيل جوه بيسري "

اصحابه كتير كتير قده قدهم طابور الصبح تضرب اجراس تلمهم

وموسيقي نشيد بلادي بيجري في دمهم

كنت دايما بعلي مع منير اوي في الحته دي

" وموسيقي نشيد بلادي بتجري في دمهم"

تمرين اوي وتاني وسؤال في عينيا تاني

يا بلادي انا امتي هاكبر , أطول النخل واقدر

واطوف من ورد توشكي واعملك عقد مرمر

ياااااااااااااااااااه

لسه لحد دلوقت بسال السؤال ده

يا بلادي انا متي هاكبر

وهاطول النخل واقدر

واطوف من ورد توشكي

واعملك عقد مرمر

ما تردي يا بلادي ولا اخرسيتي .. انا متي هاكبر

ولو يعني فيه نخل , امتي هاطوله وامتي هاقدر

ويا تري لما هاكبر هاندم بارضه اني كبرت وارجع ابقي عاوز بشده ارجع تاني عيل صغير

تشتغل الاغنيه تاني في وداني

الشمس عروسه جميله بتحب تلم العيله وبتعمل ميت هليله لما تشوف الحلوين

خطاويك السما حارساها هتمد الند معاها هتهدي هنستناها اومال هندلع مين؟

يا ابو كف رقيق وصغير

وعيون فنان محتار

يا ابو ضحكه وصوتها فقلبه

بيضوي الف نهار

زمان ايام الطفوله ماكنتش بخاف زي العيال الصغيره بالعكس انا فاكر مره عمي جاي يقولي عاووووووووووو

قلتله انت عبيط يا اونكل ولا ايه

لكن علي العكس دلوقت

بخاف من حاجات كتير اوي

بخاف جدا لا ييجي بكره ويطلع مش زي مانا كنت عايزه

وبخاف اكتر لما افكر يااه لو فعلا جه اليوم ده عكس مانا كنت عاوزه يا تري هيحصل ايه؟

عارفين مشكلة الناس اللي بتكتب شعر او بتحبه ايه؟

انك تصحي من النوم الساعه 5 الفجر وينزل عليك الوحي مره واحده وتقوم في عز احلاها نومه , عشان تكتب اللي جه في دماغك والمشكله انك ماتعرفش تنام تحس مثلا انك لو نمت ممكن تنسي وتقوم تكتب الكلمتين وتقول اكمل بكره

او يمكن ما تكملش

في يوم قبل مانام

قعدت افكر كده .. يا تري بكره في ايه؟

وعمال ادندن

يا بلادي انا متي هاكبر واطول النخل واقدر واطوف من ورد توشكي واعملك عقد مرمر

ولما نمت

صحيت الساعه خمسه الفجر وكتبت دي



يا نجوم الضلمه يا حابساني


جوه الليل والليل التاني


وجوه المواويل


يا حمامه يا طايره فوق عشي


يا تمشي الوقت يا اما امشي


ده انا ليلي طويل


انا خايف لا الليل ده يطول


ييجي غيره واعيشه من الاول


وانا صبري قليل


انا خايف بكره لا مايجيش


زي مانا راسمله


واحكي للناس وماتفهمنيش


وتقول اهو حظه ومقسومله

Friday, March 13, 2009

الهويه



كان الحضور اكثر مما توقعت

وقف الخليقة علي الجانبين

كنت عاريا تماما .. وكذلك هم

كان الكل يترقب ذلك المشهد العظيم

نقف علي ارجلنا منذ ما يقترب من الف عام

كل قد تم حسابه

الا انا

بقيت انا

والكل ينتظرني

انا اخر من سيذهب الجحيم

او

اخر من سينعم الي الابد

انا اخر ولد ادم

كام مليارا اذن ينتظرون حسابي

اذا كان المليار هو اقصي ما وصل اليه عقلي ربما المليارات من المليارات اذن

حسنا انا الوحيد الان اعلم من في الجنة ومن في النار

بينما لا يعلم العالم اين انا

كما لم يستطيع احدا في الدنيا ان يعلم

صمت رهيب

الكل ينظر الي في ترقب

في خوف

ملأ الحقد من ذهبوا الي الجحيم فيريدوني معهم

بينما اري عددا لا باس به من البشر يتمنون لو يغفر الله لي

يري اهل النار اني لست اقل منهم ذنبا

انا

انا هذا الفاجر الفاسق

فعل كل الذنوب الا قليل

يري صديقي هذا اننا كنا نشرب الخمر سويا اذن فانا لست بافضل حالا منه

هذه المرأة التي ضاجعتها رفعت الصوت الي السماء

لماذا انا وحدي؟

لماذا ؟

تلك الفتاة التي خنتها , لم تتكلم

ولكني اعلم ما يدور في ذهنها الان

تتمني الان لو ان الله لا يحاسبني الا علي هذا وحينها

سابقي انا وحدي في الجحيم

بينما يري الكثير اني لم اترك صلاة

لم اكذب ابدا

كنت دائم العفو

اري هذا الشيخ ذو اللحية البيضاء يبتسم

هل لي ان اطمئن الان؟

اري امي تبكي

تريدني معها في الجنه

اعلم فيما تفكر

ستبدو الجنة اوسع مما يجب عليها بدوني

اما حبيبتي

ستبدو الجنه قفرا

ربما ليست باسوأ حالا من صحراء الارض


تقدمت بخطوات لا ثابته ولا واثقه

بل خاشعه

بل خاضعه

ما اسمك

انا ... انا .. لقد نسيت

بمن تؤمن

بك ليس الا

ولمن حييت

لك ليس الا

كم كذبت

كم صدقت

كم غدرت

كم وفيت

كم وكم

ان لا اهتم

كل ما ارجوه ان تغفر لي تلك المعاصي

كل تلك الذنوب

لا اؤمن بغير رحمة

من صفاتك ان تتوب

عاد الصمت من جديد

ربما زاد الذهول

اتذكر الان ذلك الرجل الذي نباني بالجحيم

قال لي بالحرف الواحد :

الي الجحيم حيث لا اراك

ربما تلك مصادفة غريبه

كم يتمني الان لو اني ارافقه في الجحيم

تلك السيده

الان اذكرها

تبادلنا النظرت لدقيقتين في طريق سفري

فقط لدقيقتين ولكني مازلت استطيع رسم ملامحها

حسنا حسنا

حان الوقت الان

ساذهب للصراط

لا يتبعني احد

لا تسطيع امي مساعدتي

ابي يقف عاجزا الان عن مساعدتي

لم يتحرك صديق

انا؟

لم اكن اعلم الي اين انا ذاهب

حقا لا اعلم

فعلت الكثير من هذا وذاك

الخير والشر

الطيب والقبيح

الحلال والحرام

ولكن

ساعلم الان

ادنو بخطوات خائفه

مرتعشه

وضعت قدماي

كم هو رفيع هذا الصراط

فتحت يداي كما يفعل الرجال علي الارض حتي يحصلون علي المال

مازالت قدماي في البدايه

حسنا ساعبر الان

Monday, March 9, 2009

حظوظ

قصيدة بعنوان الخطاوي في اخر البوست
ـــــــــــــــــــــــــــــــــــــــــــــــــــ
اه والله الدنيا حظوظ , زي ما قريت في العنوان كده .. وهي كلمه ابرك من عشره
حظوظ
عارف عارف هتقولولي الاجتهاد
والكفاح
والجد
والشغل
ايوه سامعك ياللي هناك .. بتقول ايه ؟
نجاح
اه ايوه ايوه سمعت عنه
عارف بارضه هتقولوا ايه
نزرع اللي ناكله وناكل اللي بنزرعه و نكتب اللي بنحسه
و الدنيا عربيه مانيوال مش هيدروماتيك
ماشي بس ده مش موضوعنا بارضه
ماهو بارضه مايمنعش ان بارضه دي حظوظ
يعني مثلا
ليه ابويا ابو مصطفي
ليه مش ابو غالي موتورز مثلا
او ليه ماكانش قريب ابن خالة علي ابو شادي
او مش متجوز بنت عمة ابن خالة وزير الصحه
او جوز بنت ابن عم اللي جابوا وزير التعليم
او كان لعيب كوره
اه
يعني مثلا انا ليه اسمر
ليه مش اخضر مثلا . انا بحب اللون الاخضر جدا وعلي الاقل هابقي مميز شويه
اه
ليه مش بعرف العب كوره زي ابو تريكه
او مش حريف زي اسماء عوني
ومش جرئ زي احمد فؤاد نجم
انا ليه دمي مش خفيف زي عمرو اديب
او مش واثق في نفسي زي محمود سعد
ليه
انا مقتنع ان كل واحد عنده موهبه
بس اشمعنا انا عندي الموهبه اللي مابتاكلش عيش وفيه منها كتير
يعني
انا عندي موهبتين
الكتابه والتمثيل
الاولانيه دي بيشحتوا بيها علي الرصيف
والتانيه بيتفرجوا بيها علي الشحاتين بتوع الرصيف الاولاني ويتحسروا ويقولوا ليه يارب مش عارفين نشحت زيهم
ايه ؟
اثبات ؟
حاضر
كلنا سمعنا اغنية حدوته مصريه
ودايما لما نسمعها
الله يا ملك .. الله يا منير
الله يا شاهين
بقولك ايه ياض يا مش عارف ايه هافولك علي معلومه يوسف شاهين هو اللي شال الصولوهات من الاغنيه
يا راجل يا سلام .. ايه العبقريه دي
عمر حد سال مين اللي كتبها؟
عمر حد حس بعبد الرحيم منصور
عرم حد شافه في الشارع وسلم عليه وقاله انت بجد استاذ
انا بحب شجر الليمون اوي
الله يا استاذ عبد الرحيم بصراحه اغنية قول للغريب دي جميله
بلاش منير
بلاش الاغاني
حد فيكوا بالزمه يعرف مين كتب فيلم الهروب بتاع احمد زكي ؟
ها؟
حد عارف الاجابه؟
اكيد لأ
اصلا حد سمع اسم مصطفي محرم قبل كده
مش ممكن
ماصدقش
اصلا لما اتفرجنا علي مسلسل لن اعيش في جلباب ابي
ماحدش سال مين اللي كاتب النص ده
لان طبعا ده كاتب اسمه مصطفي محرم
مع ان المسلسل ضرب اوي مع واحد ماعندوش فكره عن التمثيل زي محمد رياض
مش بقولكوا حظوظ
اه والله حظوظ
طب وربنا حظوظ
مش بقول ان انا فقري
او ان حظي وحش وانا كده فريد من نوعي
بس مش تفتكروا بارضه ان لو حاجه من اللي فوق دول حقيقيه كانت هتسهل العمليه شويه
يعني بارضه معلش
ليه كل الناس بتتعلم الاستيميشن وتفهمها
وانا ببقي قاعد زي دكر الضفدع في موسم التزاوج . قاعد بضحك ومهيبر لاني مش فاهم اي حاجه
بشوفهم بيحطوا اوراق وبعد كده بيلموها
هي حظوظ
ماهو ماحدش يقنعني ان مثلا مثلا ابن الوزير الفلاني كان خايف في يوم من الايام علي مستقبله
او ان بنت فيفي عبده , ماتعرفش تشتغل في المجال اللي هي عايزاه من غير ما حد يفتح بؤه
مش امها رقاصه
بارضه ماحدش هيفتح بؤه
بالعكس
دول هيبقوا فخورين بيها
حظوظ
ملحوظه : علي فكره انا مش بحسد الناس اللي فوق دي ولا انا مكتئب ولا كان نفسي امي تبقي رقاصه ولا حاجه
بالعكس انا مش زعلان ومش ندمان
وعمري ماندمت علي حاجه عملتها او قلتها , وفخور بنفسي وباهلي وبمستوايا العلمي والادبي والاجتماعي والفسدقي والبحلقي
بس بااااااااارضه
هي حظوظ
الخطاوي

شوفت الخطاوي يا نيل

شوف ماشيه بيا لفين

صبر الحياري يا ليل

ماشي بدربي حزين

رغم اختلاف العصور

والناس وراها ناس

نفس الضيا يا النور

واصل مدي الاحساس

ابعد بطول السور

سور اللي فاصل بيني

وبين اللؤا يا نور

شوف عدي كام ليله

شوف فاتنا كام نهار؟

لا في قوه ولا حيله

غير صبر وانتظار

انا عمري يوم ما زعلت

علي كلمه او صوره

وكتمت فيا وشيلت

والحيره منظوره

بايديا ايه انا غير

حبة كلام وصداع

بيجيلي منه كتير

باين الدوا خداع