Wednesday, April 30, 2008

وهكذا سقطت حميده

مسعد :وهكذا سقطت حميده , يا أيها الملوك أيها الأمراء يا من تركتم عروشكم وأوطانكم وزحفتم بجيوشكم إلى هنا عبر البحار تدفع سفنكم رياح الحقد المقدسة لتطهروا ارض المسيح من البرابرة أعداء الصليب هكذا سقطت حميده هكذا أصبحت الأميرة الصليبية من الخونة
زيكا : ايه يا عم هدي اعصابك هي البنيه عملت ايه . دي يادوبك بتحب الواد .. هو الواد فتحي البواب ظبطها في محطة بتاعة الخلفاوي كانت بتتخانق مع العسكري عشان اتحرش بيها فقام الواد بصفو نيه اتدخل وفشخ العسكري وضربه قلمين قامت حميده اعجبت بيه جدا والواد بصراحه يستاهل يعني .. ماتزعلش نفسك كده ولا انت يعني اكمنك راسم علي فتكاتينيا والراجل الجعر التاني العجوز ده قفشها منك .. عيب . عيب دانت راجل محارب قد الدنيا اما تقف قدام مستقبل البنت

مسعد : ما من احد هنا لا يعرف إن صلاح الدين همجي متوحش ...ولكن حميدة وحدها عارضتنا ...لا (يقولها وهوا يضحك بقسوة) م..
. صلاح الدين أحسن للأسرى
ثم العرب ليسو برابرة...ومدام ليسو برابرة فلا مانع من الاتصال بهم وهكذا
زيكا : مالك بروح خالتك متحمس ليه كده انت محسسني انك قفشتها في وضع مخل مثلا ولا قافشها في عربيه عالمقطم .. ولا يعني فتحي البواب ده معلقها من نادي اليخت .. ده الواد والبت بيحبوا بعض .. حب برئ يعني
مسعد : هكذا اقتلعت الكراهية المقدسة من قلبها

زيكا : ده عبيط ده ولا ايه

مسعد : وتقدمت خطوة فعرف حب العدو طريقة إلى قلبها, وأسلمت جسدها المسيحي المقدس إلى رجل عربي
حميده؟؟! الفارسة الصليبية !! تلقى بنفسها بين أحضان رجل عربي وتنسى تقاليد هذه الحرب الشريفة نسيت إننا لن ننتصر بغير حقدنا المقدس

زيكا : اه بص ممكن هنا يكون عندك حق انا هقولك اللي حصل هو خطفها وقالها تاسلمي بالعافيه قامت هي اسلمت او ممكن يكونوا وقعوا في الخطيئه ولما قالتلوا استر عليا الاهي يستر عليك والدنيا مطرت والشبابيك رزعت قالها لأ انا مسلم ومينفعش اتجوز غير مسلمه فانتي تعلني اسلامك ونغيظ الراجل ابوكي ده ونحطه قدام الامر الواقع عشان يرضي يسيبلنا الاوضه الرابعه اللي عندكوا ونتجوز بقي يا حميده يا
حبيبتي

مسعد : الحب اخذ مكان الحقد في قلبك فهويتي

زيكا : علي فكره ياض انت مش حلو .. من جواك كده اسود بصراحه يعني عمال من الصبح تقولي الحقد الكره و فهويتي ولا كانك طالعلي من قصيده للمتغبي ( مش غلطه في الكتابه هو ده اسمه الحقيقي علي فكره ) وبعدين وماله اما تهوي يعني اومال عايزها تعمل ايه في الحر ده
ال هويتي ال

مسعد : احرقوها كالساحرات انزلوا بأيديكم الضربة التي يريدها الرب
زيكا : اوه ماي جاد .. ياللهول ..و ياللصاعقه .. من انت بحق الجحيم يا رجل حتي تتكلم هكذا ولماذا تحرقها وتشوه وجهها الملائكي . اهذا بدلا من ان تجيبلها اتنين كيلو موز ولا خطين بيزنس هديه هي والعريس بمناسبة الزواج الميمون

دعدور قلب الليل لمسعد : وهكذا تكون الضربة التي يضرب بها الرب كل من يتآمر على اورشاليم
لحمهم يذوب وهم واقفين على إقدامهم ..
عار عليك يا فارس الصليب مسعد إي قناع زائف تضعه على وجهك ؟ ولكن كل الأقنعة تسقط إمام أرداه الرب أنت تأمرت على اورشاليم تأمرت على حياتنا وعلى مستقبل الملوك والأمراء وعلى دماء ألاف من الجنود المسيحيين الذين جاءوا ليرفعوا الصليب على قبر المسيح وستلاحقك لعنة الرب حتى وأنت في قبرك... العرب رفضوا مؤامراتك
صلاح الدين رفض إن يضع يده في يدك القذرة
اقرءوا اقرءوا أيها الملوك والفرسان والأمراء
ولتنزل ضربة الرب على كل من يتآمر على اورشاليم

زيكا : ايه يا عمنا هي المشرحه ناقصه قتلا . انت ايه اللي حشرك اساسا. يعني انا عمال اقنع في الراجل واهديه تطلع انت زي الحبهان كده وتقولي لعنة الرب وبتاع عيب عليك يا علي فكره
وعلي فكره بقي انت راجل صح الصح انك سيحت لكونراد قصدي مسعد قدام الناس كلها .. احسن هو يستاهل عشان يبطل غل وحقد ورمي ودن عالناس
وبعدين ايه يا راجل صليب ايه اللي هيرفعوه علي قبر المسيح ليه واحنا ايدينا في جيوبنا ولا ايه لا لا لا
المسيحية هنا تخدم وتصان وليتكلم عنا فتحي فهو مسيحي
فتحي البواب : شعارنا الدين لله والساعه بخمسه جنيه والحسابه بتحسب
مسعد : عميل من عملائه .. اغراه بالمال
زيكا : مسعد يعلم من هم الذين يشترون بالمال اما انا فلا .
المهم يعني خلاصة الكلام .. يا عم مسعد سيب الواد والبت وادعيلهم ربنا يهديهم بدل المشي البطال اللي هم ماشيين فيه ده
يتبع

Thursday, April 24, 2008

في عشق الحشيش

Photobucket
في عشق الحشيش انا كنت ضارب يوم
الله عليك يا ملك ...والكبير كبير يا محمد يا منير
اللي بيروح حفلات لمحمد منير هيكتشف التناقض الغريب اللي بنيعشه في مصر ؟
واللي بيطرح السؤال اللي ياما سالوه قبلنا
"ليه الحشيش ممنوع مدام لسه مصرحين بالخمره"
(علي سلامه)
في حفلات محمد منير هتلاقي ان الشباب مسموحلهم انهم يدخلوا بازايز البيره او الويسكي او اي نوع من انواع الخمره لكن مش مسموحلهم انهم يدخلوا باي نوع من انواع المخدرات.
اكيد انا مش بكتب بحثا عن حرية المدخرات .
انتوا مش شايفين اليافطه اللي علي اليمين ولا ايه ؟
اوقف المخدرات ..... غير حياتك .... بطل قرف ... ياللا ياض
السؤال مش جديد وانا مش اول واحد يساله
ساله قبل كده كل واحد فكر في الموضوع
بالذمه مش سؤال وجيه
الخمره حرام .. والحشيش حرام
دي بتذهب العقل ... ودي بتذهب العقل
دي بتضيع الفلوس ... ودي بتضيع الفلوس
دي بتضر الجسم ... ودي بتضر الجسم
ليه دايما بنسمع عن شركات لانتاج الخمره
وعمرنا ما سمعنا عن
شركة الاهرام لانتاج افضل انواع الحشيش
تورا بورا افغاني
يعني تانشه ماشي
غرقانه ماشي
ماتشربش .. بارضه ماشي
ايه مالكوا مهيسين كده ليه
اصل انتوا ما تعرفوش اللي حصل ؟
قالولي تعالي نشرب حجرين
قلت وماله من حقي كمواطن مصري اني احرق صدري
والشيشه حلال شرعا
" ال حلال ال "
حجر فحجر .. حسيت اني بشرب تراب
ايه يا عم قص دي ولا سلوم ولا ايه الهباب اللي انا بشربه ده ؟
جري ايه يا زيكا .. انت ماشربتش حشيش قبل كده ولا ايه
لا لا لا .محبوش
ولا احب اللي بيشربوه ولا اللي بيبيعوه
طب ماللي بتشربه ده حشيش
ايه
اللي انت بتشربه .. ده حشيش
ده ... حشيش
الله يخرب بيتك . وبيت اللي خلفوك .. وبيت اللي يعرفوك وبيت اللي عايزين يشوفوك
.. اومال انا حاطت اليافطه في المدونه ليه ...ديكور
"انا مين انا ايه انا ليه ما خلااااص . زيكا انتهي"
يا سعاد .. انا شربت حشيش يا سعاد
يالهوييتييييييييييييييييييي

Wednesday, April 23, 2008

الجمال

الجمال نعمة من عند ربنا ... كتير من الناس بتبص بسطحية للجمال . علي انه الشكل او المظهر الخارجي .. لكن الحقيقه ان الجمال . هو كل حاجه في الدنيا . لكن بمقاييس مختلفه من انسان لانسان
ومن مجتمع لمجتمع ومن تفكير لتفكير
لكن اللي مفيش اختلاف عليه هو جمال الطبيعه
اه ممن يبقي متعدد
ممكن واحد بيحب يشوف المساحات الخضرا . واحد بيلهمه جو البحر والشط وكده واحد بيحب يبص للسما واحد بيتامل في الشمس واحد بيتامل في القمر في الليل في النهار

لكن الجمال اللي انا بحبه هو
جمال الاطفال
مش قصدي علي شكلهم
مش بتكلم عن الاطفال اللي بيطلعوا علي علب الزبادل والبامبرز
انا قصدي الاطفال عموما
في جراتهم . في براءتهم في جمالهم اللي ربنا اداهولهم
مين اللي ميقدرش يتعاطف مع طفل ؟
مين مبياذيهوش انه يشوف طفل بيتعذب وبيشتغل بدل ما يدور علي انه يلعب ويتعلم
مين اللي ما بيعذبوش انه يشوف ام بتسيب ابنها في الشارع ؟
مين ما يتضايقش انه يشوف اب سايب اطفاله وهربان من المسؤليه ؟
يا ماما سوزان ... انتي اي وليه ... فين الاطفال اللي انتي بتهتمي بيه
يا تري الاطفال اللي بيتعلموا في مدارس كويسه والفصل فيه 10 تلاميذ ولا المدارس اللي فيها 85 تلميذ
يا تري الاطفال اللي بتطلع علي علب الزبادي ؟
ولا الاطفال اللي بتطلع علي علب الزباله
يا تري الاطفال اللي في الليسيه ؟
ولا الاطفال اللي عند كباره السمكري ؟
الاطفال هم المعني الحقيقي للجمال . هم المعني الحقيقي للجمال اللي ربنا بيتكلم عليه وبينادي بيه الاسلام وغير الاسلام
الجمال اللي هو جمال القلب . جمال العقل . صفو النيه
اطفال الشوارع اللي هم فريسه سهله للانحراف
انا بشوف اطفال سنهم ما يزيدش عن 10 سنين . اتحولوا في لحظات بسبب الاهمال والقسوه والغباء والجهل وقلة الدين والفساد والفقر والجنس
.
عرفت معني الجمال الحقيقي لما عشات يوم في دار ايتام في القاهره وشوفت ااطفال عمري ما شفتها .
شفت اطفال الشوارع المستقبليه
دار الايتام دي عملت مشروع
انها تلم اطفال الشوارع من اطفال الشوارع وتضمهم للدار عندها عشان يعيشوا حياة افضل
حتي رغم الفاظهم الزباله .. حتي رغم طريقة كلامهم اللي ماتعودناش عليها من الاطفال اللي حوالينا
لسه البراءه في عنيهم . ليه طفل . زي ماهو الطفل . زي ما ربنا خلقهم .
Photobucket

Photobucket
.........................
ملحوظه : الصور ملهاش علاقه بدار الايتام . دي مجرد صور متجمعه علي النت

Sunday, April 20, 2008

الحق

جرب تسال نفسك يعني ايه الحق ؟
-
-
-
-
-
يا تري الحق بالنسبالك هو ايه
ايه الفرق بين الحق والعدل ؟
طب اومال ايه هو القانون ؟
يا تري ايه علاقة القانون بالحق وبالعدل ؟
لكن
كلنا عارفين ان القانون ده هو مجموعة النظريات والقواعد العامه اللي بتهدف لتنظيم سلوك الافراد
والعدل . هو اننا نطبق القانون بحذافيره يعني اللي يمشي عالصغير يمشي عالكبير واللي يمشي عالغني .. يمشي بارضه عالفقير
لكن يعني ايه الحق
؟
ممكن الحق يتعرف من كذا ناحيه
يعني الحقوق عندنا كتير
عشان كل انسان بيتولد بمجموعه من الحقوق " الطبيعيه " بمعني ان كل انسان بيتولد وله الحق في الحريه
( حرية العقيده , حرية الاتجاه , حرية المذهب )
حق في الحياه
وفيه حقوق مكتسبه
حق العمل , حق الملكيه
وهكذا
اللي انا عايز اقوله ..... يعني ايه حق ؟
وليه ليكون للحق تعريف لوحده ونظرية لوحدها ودراسه لوحدها ليه ميكونش ضمن القانون , او العدل
وليه كلية الحقوق اسمها كلية الحقوق
ماسمهاش كلية القانون
بارضه لسه موصلكوش اللي انا بقوله ؟
الحق ده اللي انا مش قادر اعرفه , هو اللي انا حسيته في اليوم ده
.
.
كنت رايح في يوم وسط البلد وكنت سايق عربية واحد صاحبي وكانت الساعه 7 بالليل ومش لاقي حتة اركن فيها العربيه ازاي معرفش , وكان صاحبي ده مستنيني علي قهوة البورصه . فقررت اركنها جمب البنك
ايوه
عند يافطة ممنوع الوقوف قطعيا
بالظبط بالظبط
عند السلك الحديد اللي حاطينه عشان محدش يركن
جه واحد ظابط كده ( هو مش ظابط هو ماتفهمش عسكري ولا امين شرطة ولا بيشتغل ايه ) بس اهو واقف كل ما حد ييجي يركن يف المكان المخصص للركن بيقوله
لأ ممنوع ... ممنننوع ممنووووع ممنووووع
يا بيه بنجولك ممنوع
وانا طبعا رايح اركن في مكان غريب
رغم ان اليوم ده كنت عامل فيه خير وكنت مبسوط جدا
لكن سبحان الله قررت في اليوم ده اني اخالف القانون مره في حياتي
وطبعا بموقفي السلبي ضد الناس اللي بتلبس اسود ومعاها مسدسات خرز وفالحين يتشطروا عالناس الغلابه وسايبين الكلاب عماله تنهش في البلد
ولما لقيت العسكري تنح اوي كده
قولت اما اعمل فيه خير واعلمه الادب
روحت بكل برود وشيلت اليافطه زقيتها .. طلعتها فوق الرصيف
وروحت رامي العربيه وقعدت ازمر عشان ياخد باله
لحد ما خد باله
وقه كده وتنحلي ؟ وبصلي بصة بتقول :: معرفش ليه تنحت للدنيا كده . فجاة لقيتني مسكون بالملل
وبص لنفسه وبصلي وبص عالشارع وبخطوات ثابته
" بدا الرجل في الاقتراب من النقطة الحمراء التي وضعها له خيط الشمس الرفيع علي افق مستمر في الانسحاب "
" حتي كلما اقترب من ضالته ( اللي هي انا ) بدات هي في الاقتراب منه مرة اخري "
وبكل سذاجه " فيه حاجه ؟
انت بتستهبل يا بيه ( لاحظ قيمة النعت مع المنعوت ) بتستهبل ويا بيه
وانا اعملك ايه ماهو مفيش ركنه
يا عم انت شارب حاجه ده انت شيلت اليافطه بالسلك وحطيتها فوق الرصيف وركنت ولا اكن فيه حاجه حصلت
قلتله بقولك ايه ماتقلبش دماغي .... ايه رايك " تشرب شاي " * وانت ساكت
اهو كده يا جميل انت كده حلو ونشيلك البنك كمان لو عايز
قومت ظارفه عشره جنيه في ايده وروحت ماشي
لسه همشي بقيت واحده بسيات ابيزا رايحه بتشيل السلك عشان تركن ... وقفت اتفرج
لقيت الراجل رايح وداخل لها نفس الدخله
راحت قالتله : اشمعنا يعني سيبته يركن ولا هي حرام لناس وحلال لناس
قالتله انها لو خدت مخالفه هتروح تبلغ عنه
" تبلغ عنه فين ماعرفش "
وقالتله : انا موافقه تديني مخالفه بس علي شرط تكتبله مخالفه هو كمان
انا كل ده واقف مبسوط باللي هيا بتعمله ونفسي اروح احييها بس لو حيتها هتقول عليا عبيط ونفسي كمان اضرب العسكري ميت جزمه
ونفسي اضرب نفسي ميتين جزمه اني اديته فلوس
رغم اني كان ممكن ماديهالوش اساسا واركن بالعافيه " بس اعمل ايه كنت مبسوط ونفسي كل الناس تبقي مباسيط زيي" وبعدين
قولت ما بدهاش بقي... روحت مادد رجلي خطوتين قلتله الست عندها حق اذا كنت هتوقع عليها مخالفه يبقي لازم تعملي مخالفه انا كمان
الراجل بصلي بضهول وقاللي تحت امرك يا باشا
" كده من غير اعتراض"
وكله توفيق من عند ربنا .. لا دجل ولا شعوذه ولا دخلنا السجون ولا شوفناها بس اسمنا محفور جواها
الست بصتلي بنابهار ممزوج باستغراب ممزوج باستهبال
والراجل كمان وكتبلي مخالفه وراح لازقها عالعربيه وراح ظارفها مخالفه في ايديها
وبعلو الصوت : روحت مزعق وقايل
هات بقي العشره جنيه خساره في امثالك
وبكل بساطه وقرف راح مطلع العشره جنيه ومديهاني
سيبكوا من ان الموضوع طلع بمصلحه ان الست قعدت معايا عالقهوه بتاع ساعه ونص
وانا انبسط بالموضوع وقولت
هوبا ايه هوبا اه وان شاء الله هنظبط
لكن الموضوع ان انا خدت بالي من حاجات كتير اوي
..
طبعا القصه في منتهي الهبل لكنها الحقيقه عرفتني حاجات كتير
اول حاجه
طول مانت معاك حق .. يبقي كل اللي ضدك هيخاف منك
او علي الاقل هيحترمك
طول مانت بتطالب بحقك وبتعلي صوتك عشانه هيوصلك وممكن يوصلك باتفه الطرق زي ما حصل للبنت
الحق مش هيوصلك لوحده
لازم انت تروح تاخده
بالنسبه لصاحبي المخالفه ماكانتش حق خالص
لكن بالنسبالي
الحق اللي عمري ما عرفت يعني ايه
فهمته
ايه هو مقدرش اقولكم لاني معرفش يعني ايه
لان الحق ما بيتعرفش .. الحق بيتحس
لكن علي سبيل الاحتياط
" الحق هو تنفيذ القانون بالعدل "
لان القانون
هو اللي بيعبر عن حقوق الناس

Wednesday, April 16, 2008

الحق والخير والجمال 1

الجزء الاول : الخير
طول عمري كنت بفكر في مدي سذاجة التلت معاني دول بالذات .. افتكر مره سمعتهم في اغنية لعبد اللحيم حافظ بيتمني من ربنا ان التلت صفات دول يقدر يحبهم " علمني حب الخير حب الجمال والحق " طول عمري كنت فاكر ان دول هم المعني الحقيقي لكلمة سذاجه عشان بقم صعب تلاقيهم في الدنيا
وفجاه وفيوم واحد
لقتني فهمتهم هم التلاته
الصبح وانا داخل الجامعه ( وده في حد ذاته شئ غريب ان انا اروح الجامعه ) وعلي الباب ولسه بطلع الكارنيه لقيت واحد ماسك واحد في ايده وبيقولي دخله معاك بعد اذنك بصيت علي الولد التاني لقيته " كفيف " دخلته معايا وصلته لحد المكان اللي هو عايزه , في السكه القصيره اوي اللي مشيت معاه فيها حسيت براحه او بحاجه كويسه معرفش ايه هي حسيت انه مش مخنوق من حياته يمكن عشان حياته حجمتله احلامه وحددتهاله ومنعته من انه يحلم اكبر منها , ويمكن عشان هو راضي بحاله وسواء كده او كده اهو علي الاقل .. مرتاح
وصلته لحد المكان اللي هو طلبه وعرضت عليه اني اكمل معاه الطريق لحد اخره . ضحك ضحكه طيبه وقاللي انه هيقدر يكمل طريقه من هنا ... هو عارف سكته , وهيقدر يكمل لوحده زي ماهو متعود مديت ايدي عشان اسلم عليه مسك ايدي بقوه وداس عليها وقالي كمل طريقك متخليش حاجه تعطلك
لكن طول اليوم علي قد مانا كنت بفكر في كلامه كنت حاسس اني مبسوط رغم المشاكل ورغم الارف اللي الواحد بيشوفه كل يوم ومتعود عليه , حسيت اني بقالي كتير اوي صدري ماكنش مفتوح للهوا زي اليوم ده . في اليوم ده حسيت اني عايز اعمل كل حاجه حلوه
اتصلت بصحابي اللي كنت افش عليهم . روحت مبسوط حسيت بالصلاه وكاني اول مره اصلي في حياتي قريت قران وكاني لاول مره بقرا قران
حسيت ان الجو جميل . فعلا ماكنش فيه اجمل من اليوم ده
اليوم اللي اتعلمت فيه معني الخير

Monday, April 14, 2008

في عالم قلبي


جوه فعالم قلبي عايش

واحد مجنون مجنون

لا بيعرف يستر علي فكره

وبيحكي الاسرار بجنون

كتب وقصص وقصاقيص

مرسومه بحبة احاسيس

وتذاكر الفيلم بتتباع

دايما بقليل ورخيص

هنا في القلب مكان العتمه

وهنا في القلب مكان النور

جمب اوضه مقفوله وكتمه

ساكن ورد مربي زهور

شمس وقمر وكواكب

دول المجموعه الشمسيه

اقرا الضحكه بعد الدمعه

اخبار اهرام جمهوريه

اقرا الحادثه اقرا الكارثه

اقرا الاحلام الوهميه

اقرا الايام الحزينه

اقرا الالوان الورديه

سينما وبتاع فيشار

ومسرح جد وحبة هزار

الطرق داخله فبعضها

وخريطة قلبي بتنهار

حكايات

و فصولها كتيره

وعمارات

سكانها اسيره

وبنات

قتلتها الغيره

ومحطة مترو

واتوبيسات

ومظاهرات ومسيره

وبارات

ومحل بيره

وكوبايات

الناس بتشرب فيها للمره الاخيره

وواحد علي شغله عمال داير

انا كوكب دايره متحوطه بدواير

وهناك في مطعم مشهور

وجمبه كشك سجاير

وشيشه بتكركر

قاعده لوحدها عالقهوه

وبنات بتضحك وبتهزر

وبتروح منها الايام علي سهوه

كل حاجه طبيعيه

والكون هنا هادي وجميل

وساعات تكون مليانه قسيه

وناس بتبكي همومها لنيل

Wednesday, April 9, 2008

اخبار اهرام جمهوريه

Photobucket
في اطار حملة الشعب المصري تجاه كل ما هو حكومي
قررت الناس كلهااااااا انها تقاطع الجرائد الصفراء المسماه بالجرائد الحكومه , الجرايد اللي بتعلم الناس الكذب الجرايد اللي بتشرح المعني الحرفي لكلمة نفاق .
في الفتره ما بين 11/4 ل 18/4

ال يعني حد بيشتريها

ـــــــــــــــ


هم السته بتوع صيدله ؟ ايه اللي حصل للمدونة بتاعتهم ؟؟
لما باجي ادخل بالاقيني محتاج دعوه للدخول

يا خبر النهرده بفلوس !! بكره يبقي بانفيتيشن
ـــــــــــــــــــــــــــ

ياريت كل المدونين يوم 4/5 يكتبوا تهنئه للريس بطريقتهم الخاصه في المدونات بتاعتهم

ـــــــــــــــــــــــــــ
الافلام دي محدش يشوفها :
1- كامب
2- نقطة رجوع
3- شارع 18
4- بنات وموتسيكلات
5- the mist
الافلام دي اللي ما شافهاش لاااازم يشوفها
1- جنينة الاسماك
2- ورقة شفرة
3- no country for old men
4-american gangster
5- vanatge point
6- beowulf
7 - Charlie.Wilsons.War
ـــــــــــــــــــــــــــــــــــــــــــــــــــ
اسيبكم بقي مع القصيده بتاعتي

في بلاد الحزن
كان هناك طفلا
قتيلا .. يرقد
بعد ضياع محصول القطن
في بلاد مليئه بالذكريات
واشجار الزيتون ماتت
ورفرفت اعلام الاهات
والهويه .. ضاعت
كمثلها من المدن
كما ضاع علم المجد
كما ضاع الوطن
كان الطفل يلعب
ياتي ويعود ثم يعود ثم يذهب
واذا سالته .من انت
دائما يكذب
طفلا يلهو
كمثل كل الاطفال
والحرب دائرة
تقتل حتي صخور الجبال
والمدن ليست ثائرة
كعادة الاجيال
انها نائمة مثلها مثل الاطفال
كرضيعة
وديعة
في جيب امها
وفي حضن ابيها
تعبث بايديها
وتعض انامل وجنتيها
الجميلتين
الرقيقتين
ومع الفرق
فالطفله كلما زادت
وداعتها
كلما زاد جمالها
وصفوتها
اما البلاد فتسكت
وكانما نزعت زرعتها
والنساء لا تفعل شيئا سوي العويل
والرجال وكانما فقدت خصيتها
يلهون في ليل طويل
يتحدثون
ويتسامرون
في قلب الليل
وسيل
من الطلقات
والصرخات ياتي من كل جانب
فتزيد الابتسامات
وتعلوا الضحكات
انه الممات
لا شئ الا الممات
فما ينفع البكاء
انه لم يعد جسدا
انه اشلاء
فما عادت تمطر
وزاد جحيم السماء
ولم يعد هناك هواء
ولم تعد تمطر مرحا
ولم يعد هناك شتاء
فما ينفع البكاء
الطفل الذي مات
فوق الغصن
في الربيع
وفي الصيف في موسم القطن
قتل الطفل
وزاد الحمل
فقتل الحلم
والطفل ما زال حتي بعد موته
يتالم
لعل احدا من اهله يتعلم
او يتكلم
او ربما يذهب ويقاتل من قتل الابن
وكيف ينام له جفن
هل قدم العدو الكفن
لا
بل زاد من القسوة
انه كالعفن
لا يمكن ان يكون في السماء
قد قطن
ارض القدس
اه بكل .حرقة وياس
كم جائك من منتصر يعرف ما معني البأس
اما هم
فهم ليسوا رجال
لقد نسوا كيف هزموا الفرس
قد قتل الليث طفلا جميلا
يبكي علي مجدا ضاع منذ زمنا طويلا
قد قتله حصان عربي
نسي انه اصيلا
نسي كيف كان سيفه يهزم الاعداء
قبل نزوله علي جسده كالوباء
يقطع كل الاشلاء
لقد نسي
سنوات الشموخ
وكما قال الرجل
قد ملاتهم الشروخ
انهم ليسوا عرب
انهم مسوخ
نعم انا عربي
ايها الطفل الغبي
ليس انا من قتلك
ولكني ايضا صبي
قد مات فيه الحلم
ومات حلم
عن عصر ذهبي
ومن اين ياتي الذهب
والكل يحب اللعب
الكل يكذب
ولتنزل لعنة الرب
علي كل من يكذب
اعرفك بنفسي يا صغيري
انا رجل عربي قد فقدت ضميري
وفقدت بأسي
فما عدت اصلح رجلا
وقد مات حاضري كما مات امسي
وسيضيع مستقبلي قريبا
وستبحث امك عني
تقتلني
من فوق جبل شاهق
تدفعني
وان كذبت عليها
تكذبني
فقد عرف الكل الحقيقه
لقد مت ايها الطفل
وانطفا بريق عينيك
ومن عنك
يعوضني
ومنذ دقيقه فقط
قد تعب الكلام
وقد بدا لي انه صمت
ولكنه لم يصمت
انه يتعنت
ويتشتت
كما الام الاباء
و الاهات
كما تشتت الاولاد
والبنات
كما نزحت الذكريات
الي مصر والخليج
وبلادنا الشاميات
ولجات الي الاغراب
كل الصحوات
وصرخات الامهات
تخرج من قلب السكوت
تمزق صدري واشلائي
وتبكي ...ولا يصعب عليها بكائي
وتعود بنا الذكريات
الي ارض الشتات
سيناء ومصر
من النيل الي الفرات
هل تعرف او تفقه يا طفلي العزيز
لقد فعلوها الانجليز
وقد قرات عليهم كتب القران
والانجيل والتوراة
فكذبوا كل اديان السماوات
واخترعوا اديانا
تكذب كل ما فات
تكذب التاريخ
والكتابات
وتمزق الخرائط والرسومات
نحن من سقطنا من فوق الصراط
وهوينا الي جحيم الشهوات
فزادت في بلادنا المصليات
ولم نركع ولم نسجد ولم نؤدي الصلوات
وزادت في بلادنا الموبقات
والمومسات
فقدنا حتي التراب
واصبح يمشي هو فوقنا
وحزن القران وتخللي عنا
من الذل الذي اصابنا
وقد فقدنا العبارات
وتاهت الكلمات
ورفضت ان تستجيب لنا
قصائد المحبه
وقصائد البذاءات
زادت
وما العن تلك الزيادات
وقد كرهتنا
الاشعار والبيوت
والاغاني
واصوات السكوت
وكرهتنا كل انوار الشوارع
حيث زادت المدامع
وزاد الخشوع
وزاد الخضوع
فوق اطراف المسامع
فامرونا
حكامنا بالسكوت
وبدا العدو في ملأ الشروط
فتبا لكل هذا
ايها الطفل
قل الان؟
لماذا ؟
لم تدافع انت؟
لا تقل لي انك طفل
فكلنا اطفال
فما عاد هناك
في بلدنا رجال

************************************************

Tuesday, April 8, 2008

هو ده النجاح

Photobucket
الناس اللي افتكرت ان يوم 6 ابريل فشل غلطانه .. لسببين
السبب الاول ان فعلا حصل اضراب والشعب شارك بنسبة 10 او 20 % او اقل ودي نسبة مش بطاله
السبب التاني ان الغرض من الاضراب اتحقق
طب كان ايه هو الغرض من الاضراب ؟
خفض الاسعار ؟
لأ
اقالة الحكومه ؟
يا خبر ابيض ... لأ طبعا
توليه احمد السقا رئاسة الجمهوريه ؟
انت عبيط ياض انت
اجبار حازم امام علي الاعتزال ؟
مش هيحصل
طلب من نادية الجندي والهام شهاين انهم يبطلوا تمثيل ؟
الطشت قاللي الطشت قاللي يا حلوه ياللي قومي استحمي
اومال ايه الغرض ؟
الغرض هو ان الناس تحس علي دمها .. وتخاف علي بلدها ويبداوا يتجعوا علي حاجه صح
مش هيجيب نتيجة ان الاخوان هم بس اللي يعملوا مظاهرات
مهما كان الاخوان وايجابياتهم لازم بارضه نعترف ونكون صرحاء مع نفسنا " الاخوان بيدوروا عالحكم في المقام الاول " وده بارضه مش من مصلحة الناس"
والاحزاب المصريه كلهم بلا استئناء عاملين زي الستات في فترة الياس , او زي الراجل اللي مبيعرفش " لا مؤاخذه يعني " بمعني ان عنده كل مقومات حياته لكن هو ضعيف وناقصه حاجه عان يبقي طبيعي
مافيش باديهم اي حيلة ..ومحاصرين من كل ناحيه
والامل مش فيهم
ومش في حركة كفاية " اللي بتلعب السياسه غلط خالص " لانهم بيدوروا عالمثقفين والممثلين ولرياضيين وهكذا
الحل هييجي علي ايد الراجل البسيط اللي ماشي في الشارع
مش هيجيب نتيجة ان المفكرين والصحفيين والمحاميين يعملوا مظاهرات , لانهم من ساعة ما بدات الخليقه وهم بيعملوا مظاهرات لان دول هم اللي في وش المدفع
امتي ييجي العدل ؟
لما الناس الفقيره هي اللي تعترؤض وتقول لأ
لما الناس ما تخافش
ومتبصش لرزق يومها وتفكيرها يبقي اوسع واكبر
وتبطل تخاف من الناس اللي زيها
وتبدا تخاف من ربنا
وتبدا تتخلص من عقدة الدين اللي عندها
وتبدا متعتمدش علي حد يتكلم عنها
ويتكلموا هم
الاضراب نجح
وهنكمل المشوار
رحلة بداية النهاية
والدليل ان اضراب 6 ابريل نجح
الدعوه اللي جاتلي النهرده عالفيس بوك بتاعي
اضراب يوم عيد ميلا الريس
4 مايو
وكل سنه ومصر ضاربه

Sunday, April 6, 2008

vote for me

Photobucket
في مسابقه للشعر علي الفيس بوك
في جروب اسمه
لينك المسابقه
ولينك التصويت
وهنيالك يا فاعل الخير والثواب عند الله والطريق للي راجع والاربعه باربعه وعشرييين
لو معجبتكش القصيده بتاعتي اوعي تصوتلها
لاصوت عليك

Thursday, April 3, 2008

خوفت كتير

Photobucket
خوفت كتير
وكتير بتمني الخوف مايجيش
معرفتش اطير وصبحت اسير
حبسوني كتير في غلاف في افيش
وقالولي كتير عن حلم كبير
لكن دورت لقيتني مفيش
وصبحت في اشعاري بموت
لكني صممت اني هعيش
انا روحت بلاش
ومدام ببلاش . مفيش بقشيش
سهل اتكسر
وكتير احزان مكسرتنيش
تعبان من ناس
اسمعها كتير ومتسمعنيش
اقبلهم ليه
وليه هم ميقبلونيش
اكمني مفيش
مقدرتش اعيش
سهل اتكسر زي القراقيش
وزاروني في فيلمي لقوني
يادوب .
اسم مكتوب علي افيش
ومتسالونيش
ليه لما بقراني
مبفهمنيش
مانا اصلي دورت عليا كتير
ومالاقيتنيش
وصبحت خلاص صوره مرسومه علي الجدران
وصبحت خلاص ورقه مضمومه في ايد حيران
والناس زيي مظلومه في كل مكان
وكتير بشتاق لطفولتي
واحس بشوق لزمان
واحس باني طفل طليق
معرفش شئ
اسمه قضبان
معرفش اكيد
اكمني وليد او
كنت عجوز
معرفتش اكون حتي اراجوز
معرفش اذا كانت سامحتني
ولا لسه ما سامحتنيش
مانا عارف دنيتي وعارف
انها ما تعرفنيش
ـــــــــــــــــــــــــــــــــــــــــــــــــــــــــــــ
ممدوح عبد الحميد