Thursday, April 3, 2008

خوفت كتير

Photobucket
خوفت كتير
وكتير بتمني الخوف مايجيش
معرفتش اطير وصبحت اسير
حبسوني كتير في غلاف في افيش
وقالولي كتير عن حلم كبير
لكن دورت لقيتني مفيش
وصبحت في اشعاري بموت
لكني صممت اني هعيش
انا روحت بلاش
ومدام ببلاش . مفيش بقشيش
سهل اتكسر
وكتير احزان مكسرتنيش
تعبان من ناس
اسمعها كتير ومتسمعنيش
اقبلهم ليه
وليه هم ميقبلونيش
اكمني مفيش
مقدرتش اعيش
سهل اتكسر زي القراقيش
وزاروني في فيلمي لقوني
يادوب .
اسم مكتوب علي افيش
ومتسالونيش
ليه لما بقراني
مبفهمنيش
مانا اصلي دورت عليا كتير
ومالاقيتنيش
وصبحت خلاص صوره مرسومه علي الجدران
وصبحت خلاص ورقه مضمومه في ايد حيران
والناس زيي مظلومه في كل مكان
وكتير بشتاق لطفولتي
واحس بشوق لزمان
واحس باني طفل طليق
معرفش شئ
اسمه قضبان
معرفش اكيد
اكمني وليد او
كنت عجوز
معرفتش اكون حتي اراجوز
معرفش اذا كانت سامحتني
ولا لسه ما سامحتنيش
مانا عارف دنيتي وعارف
انها ما تعرفنيش
ـــــــــــــــــــــــــــــــــــــــــــــــــــــــــــــ
ممدوح عبد الحميد

5 comments:

ANN said...

بجد كلمات رائعة ودى تالت مرة اقراها على فكرة لانها معبرة جدآآ بجد..ربنا يوفقك

Zika said...

ann
شكرا يا آن علي كلامك
ويارب دياما منوراني كده علي
واتمني ان دي متكونش اخر زياره لمدونتي المتواضعه

appy said...

يا نهار بسم الله ماشاء الله على المواهب يا زيكا ايه التعبيرات القويه دى بجد هايله ومن قلبى

Zika said...

appy
:D
حلوه يا نهار بسم الله ما شاء الله دي
شكرا شكرا يا آبي يا رافعه معنوياتي
ربنا يخليكي يارب
:)

رهف said...

زيك
تجنن حلوه بجد
وموضوع القرقيش ده جامد اوى
ربنا يوفقك فى المسابقه