Sunday, March 30, 2008

ارض الخوف

Photobucket
واحد صاحبي فمره قاللي ان مشكلة مصر مش في الحكومه
قلتله ازاي ؟
قاللي ان مشكة مصر بتكمن في الشعب المصري ذات نفسه
قلتله :( حلوه بتكمن دي ) ...فهمني
قاللي في البدايه ان اللي يلاقي دلع وميتدلعش يبقي .....( تيييت )؟ والحكومه المصرية بتطبق المثل ده بالحرف الواحد
الشعب المصري علي راي خالد صالح في فيلم عمارة يعقوبيان " ماسك في ديل الحكومه كانها امه اللي خلفته حتي لو كانت الحكومه دي ماشيه علي حل شعرها" ,, الخوف اللي بيعيشه المصريين الصغير منهم والكبير والمسلم والمسيحي علي حد سواء هو ده السبب الرئيسي في تمادي الحكومه في افعالها وكذبها , رغم انهم عارفين ومؤمنين ان كل حاجه في الدنيا بتحصل بتبقي مكتوبه علينا " قل لن يصيبنا الا ما كتب الله لنا " ومتهيالي كلنا شوفنا فيلم " احنا بتوع الاتوبيس " احنا بقي بتوع الاتوبيس احنا الشعب المصري الساكت اللي ماشي جمب الحيط لحد ما الدنيا افتكرته صرصار من كتر ماشيه جمب الحيط ...ورغم انه ماشي جمب الحيط ومالوش دعوه لا بالسياسه ولا بغير السياسه الا ان بارضه بيتضرب وبيتهان وبيتظلم ومهما زعق وقال " داحنا بتوع الاتوبيس يا اخواننا " محدش بيسال فيه . وسبحان الله رغم كله اللي بيحصله وبارضه خايف
خايف من ايه ..مش عارف ؟
ايه اللي ممكن يحصل لنا اكتر من اللي احنا فيه
ايه اللي ممكن يحصل للمواطن المصري الجبان اكتر من انه يبقي فقير وفاشل وبسيط لا بيتعلم كويس ولا بيدرس كويس ولا بيمارس حياته الطبيعيه بشكل كويس , " محدش مخه يروح لبعيد" قصدي يعني الرياضه والمواصلات وكده يعني
ليه بتبقي نيتكوا وحشه اوي كده
الله يرحمك يا حسام

3 comments:

appy said...

انا مش بخاف خالص متعرفش علاج للموضوع ده ربنا يكرمك هههههههههههههه


الا اصلا الشعب من صغرة اتربى على الخوف تعمل ايه بقى فيه نحركه كده شمال يمين يمكن يفهم انه صاحب حق

Zika said...

appy
بصي هو فيه حل انك تروحي تلعبي مصارعه او بوكس او كاراتيه وباااااااااارضه مش هيجيب نتيجه
.
وبالنسبه للشعب هو فاهم انه صاحب حق .. بس بيكبر دماغه من مبدا " وانا مالي "

كريم عاطف said...

ازيك يا زيكا
ثقافة الخوف دي مش في مصر بس لأن الأنظمة الديكتاتورية هي اللي بتزرعها في الناس، عموما الشعب دلوقتي بينتفض ودي حاجة كويسة، ماهو مافيش لا مية ولا عيش حتى، والاضرابات مالية البلد عمال و فلاحين وأطباء وأساتذة جامعات وناس كتييييييييير، ولسه يوم 6 أبريل ان شاء الله