Saturday, August 6, 2011

مصادفة



كنا وحدنا نقسو على الخطوات في شارع مظلم

قلت لها : ألا يعيد الرب قوّتنا وعاداتنا وأيامنا والقدامى العائدون على الطريق
وأشلائنا التي فقدناها في حربنا مع السماء


قالت لي وهي تنفث دخان سيجارتها في وجهي في ملل :
عندك ميّه سخنة في الحمام ؟

Friday, August 5, 2011

بالنسبة لي

بالنسبالي :

إن أسوأ من غنى" أنا هويت " هي فيروز
وإن شايف البحر شو كبير من عبير نعمة أحسن كتير من فيروز
ولازم نتأكد إن أغنية ربك لما يريد مش حلوه
ولازم نعرف إن عمرو دياب بيهذي في آخر ألبوماته
وإن السود ..سود عشان ربنا خلقهم كده
وإن الرفيعين مش ضعاف
وان التخان مش أغبيا
وإن الدكاترة والمهندسين مش أكثر علما من المحاسبين والمحاميين
وإن الجيش مش هو اللي بيحمي مصر
وإن 6 ابريل مابياخدوش تمويل ولا تموين
وإن الشعرا مش مسهوكين
وإن الشيوعية مش معناها إني أبقا معفن
وإن الليبرالي ده مش حد مستهتر
وإن السلفي ده مش شرير بطبعه
وإن اللي بيديني حاجه ييجي ياخدها
وإن الملحدين غالبا .. دمهم تقيل وفاكرين نفسهم فاهمين كل حاجه ومتعاليين جدا
وإن المؤمنين غالبا فاكرين إنهم كده كده داخلين الجنة
وإن الزمالك مش هو أكبر مثال على مصر إنما هو أكبر نموذج لفشل مصر
إن الإخراج والفن عموما مش تضييع وقت ومستقبل
وإن الشغل حلو مهما كان تعبه ..لأن الفلوس شيء كويس
وإن الحب في الوقت ده كلام فارغ تماما
وإن الناس مش دايما بتظهر زي ما هم بيوروك من ولاء وانتماء وشرف