Thursday, July 30, 2009

حكمت الاقدار

حكمت الاقدار
الصلاة خير من النوم
لم يعد يصلي الفجر .. فقد ايمانه بفكرة ان الصلاة خير من النوم ولكنه لم يبد عليه التاثر كثيرا
دائما ما يتصارع مع النعاس فيغلبه دائما في الثانية عشر بالتحديد ثم اربع ساعات ونص اخري حتي يسمع المؤذن بصوته المؤذي " الصلاة خير من النوم " ثم يسمع صوت كحة ثم صوت بصاق- يبصقه المؤذن غالبا- ثم صوت الراديو بجانب المؤذن عندها تقرر عيناه ان تفتح فيسمع الصوت مرة اخري " الصلاااااة خير من النوم " تاتي زوجته لايقاظه
- اصحي يا ابو محمد الفجر اذن
- حاضر حاضر هاصحي
ينام
يستيقظ في السابعه يبدو عليه ارهاق رجلا لم ينم منذ سنوات يشرب قهوته ويهم بالبحث عن ملابسه
تساله زوجته ؟
- مش هتقرا الورد بتاع النهرده يا ابو احمد ؟
- هابقي اقراه في السكه
الان فقط وبعد عشرون عاما بالتحديد ايقن انه لم يحب الله قط ولكنه لا يعلم بالتحديد اي واقعة في تلك العام هي سبب ذلك
من عشرون عاما
فقد امه
ولكنه يعلم تماما ان " الموت علينا حق " وان احمد صديقه فقد امه ايضا قبل ذلك بعام . هل عندما توفي جنينه الاول في رحم زوجته .. او ربما عندما اتي له والده في المنام يحترق هل عندما القي القبض عليه وهو يختلس مبلغا من خزينة الشركه لينقذ ذلك الجنين ولكنه لم يفعل وتم القبض عليه ومات جنينه الاول والاخير
ربما ذلك
لم يكن الاول الذي يختلس مالا من خزينة المصلحه في بلاده بل ان هذا تقريبا شيئا عاديا جدا
ولكن دائما ما كان يردد في زنزانته التي استمر فيها ثلاث سنوات
" اشمعني انا يارب "
" ما حسنين بيه وكيل الوزاره اختلس وسابوه ومدام سميره اختلست والست ام ابراهيم بتيجي المصلحه تقشر بطاطس"
ظل طيلة عشرون عاما يعتقد ان الله يعاقبه في الدنيا حتي يزيح عنه بلاء الآخره ولكن دائما ما كانت تراوده احلامه بحق الله اي لعنة هي اشد من تلك التي يعانيها
يعلم تماما ان الفقر الذي يعيه هو نتاج سبع سنوات من الزنى يعلم تماما ان " وعزتي وجلالي لافقرن الزاني ولو بعد حين " ولكن ايضا كانت تراوده وسوسات شيطانه اللعين
" اشمعنا انا يارب "
كم زاني هنا في مصر .. الشعب كله يزنى بشكل او بآخر فهو اما ناكح واما منكوح وتحتم علينا اداب النكاح ان نتكتم عليها ولا نخبر احدا اننا شعبا قد عشق النكاح
ولكن " اشمعنا انا " يقطع صوت صلوات تفكيره ذلك المواطن الذي بدا عليه الشقي
- حضرتك استاذ محمد عبد الباقي ؟
- ايوه
- حضرتك انا بقالي اسبوع داير علي كعب رجلي عايز امضة عشان اخد معاش ابويا وكل شويه يشحططوني
مد ذراعه ليلتقط ورقة الشاب البائس ليلحظ انه قد وضع تحتها عشرة جنيهات
ربما كان يغضبه ذلك كثيرا منذ فتره لربما قد شتمه وسبه ولعن كل راشي ومرتشي في تلك المحروسه ولكن حينها لمع في عيناه بريقا جديدا
بالعشرة جنيهات ربما يشرب مارلبورو اليوم بدلا من الكيلوباترا التي تجعل فمه مثل سلة القمامه
ربما يذهب الي بيته في تاكسي اليوم
ثم
" هي يعني جت عليا "
اذا كان ثلاثة ارباع الشعب هو اما راشي او مرتشي اذا
فقد لعن الله شعب مصر لعنة رهيبه
بين الزنى والرشوه اذن لابد انه هناك في جهنم قسم خاص للمصريين
وضع العشرة جنيهات في جيب القميص ثم بكل بساطه وقع للرجل علي ورقته
- ربنا يخليك لينا يا باشا
- متشكرين يا سيدي اطلع بقي لمدام هند خليها تمضيلك . قولها عم محمد بيقولك امضيلي هنا
اخرج العشره جنيهات من جيبه
ثم مسك طرفيها بيمينه ويساره واخذ يقلبها .. كم كان هذا سهلا يستطيع الحصول علي واحده مثل تلك الورقه علي كل جرة قلم يجرها منذ الان وفيه نهاية اليوم ربما يعود يوميا بخمسون جنيها علي الاقل
قطعت صلوات تفكيره صوت مؤذن مسجد المصلحه .. " حي علي الصلاه " " حي علي الصلاه " وضع العشرة جنيهات في جيبه ثم استلقي علي مكتبه من التعب
عندما قال له الحاج سمير مديره في العمل
- مش هاتصلي الضهر يا ابو احمد ؟
- حاضر حاضر روح انت وانا جاي وراك
كان يحب دوما ان يقال له ابو احمد رغم ان زوجته لا تنجب منذ حادثة حملها الاول والاخير رغم انه لم ينجب يوما علي الاطلاق لم يعد يطيق هذا الاسم
هو محمد عبد الباقي لا يجب ان ينجب طفلا يجب ان يذهب هذا العام ليصتاف مره في حياته بعد ان رفض بعد كل تلك السنين ان يذهب ليستجم مع تلك البائسه زوجته التي تذكره دائما بالصلاه والورد وان " ماحدش بينام من غير عشا " رغم ان وجبة العشاء لم تكن اساسيه يوما ما بمنزلهم الفقير
ولكن ليس بعد الان
سيذهب ليغطي وجهه بمياه الاسكندريه وليمتع نظره بجمال منظر البحر مع جمال ارجل المصطافات علي الشاطئ لن يعتبر المصيف حراما بعد الان
قطعت صلوات تفكيره صوت سواق التاكسي
- معلش يا باشا هاتنزل هنا عشان الشارع اللي جوه ده بايظ وانا لسه مغير عفشه وصاحب العربيه مش راحمني بيحاسبني بالخبطه
قبل ان يبدأ سواق التاكسي بسرد قصة حياته اشار له بالموافقه
اعطاه العشرة جنيهات
ثم ترجل من السياره وفتح باب شقته ليجد زوجته تقرأ سورة يس بصوت عذب
ابتسمت له زوجته واكملت تلاوتها
أخذ منها المصحف
اغلقه
وضعه بجانبها ثم اخلعها حجابها
" قد اعتادت عند قراءة القرآن ان ترتدي حجابها وتتوضأ "
احاط وسطها بذراعيه واقامها من مكانها
وضع قبلة علي راسها
اشتم رائحة شعرها الزاكي .. اخذها من يده الي باب غرفة النوم
وهي تتمنع
- طب استريح من السكه يا ابو احمد
نظر اليها وابتسم .. ثم وضع يده علي فمها بعذوبه
- اسمي محمد عبد الباقي

Sunday, July 19, 2009

the a7a thing

مش شرط خاااالص . خااالص بنتين ماشيين عالكورنيش لوحدهم الساعه اتنين تلاته بالليل يبقوا عايزين يتشقطوا
مش شرط علي فكره
فكرة ان دايما امين الشرطه اللي بيوقفك ويقولك بطاقتك . وهو مش لابس لبس رسمي ولا جمبه بوكس ولا ظباط . تعرف انه لا امين شرطه ولا حاجه ومربي شنب كده وكده عشان يبان ال يعني انه امين شرطه اسم الله وبكده تقدر بكل بجاحه
لما يقولك وريني بطاقتك
تقوله احا ليه انت مين ؟
الشغل في الحكومه مش عيب بس العيب انك تبقي شاب لسه متخرج وبتبدا حياتك وطلع ميتين امك في الكليه .. واول ما تبدا حياتك تقبض 150 جنيه
وتعالوا نحسبها
لو انا باخد ميه وخمسين جنيه وابويا مش عايش واخويا الكبير ما بيشتغلش وماليش غير شغلي
انا باقول مثلا
انا باشرب مارلبورو ابيض العلبه بتمانيه ونص
في اتنين
ب 17 جنيه
في تلاتين يوم
ب 510
يعني احا .. ماله الرقص .. مااااااله
ايه المغزي ان اي واحد راكبه في المترو ولا في مواصلات عامه وزنها تلاتين الف كيلو وساده السكه . تيجي تعدي من جمبها تقولك .. ماتحاااااسب
احاسب مين يا وليه وانا ذنب امي ايه انك بتاكلي اكل عيالك
وحتي لو مش الست تخينه
بارضه خلاص يا روح خالتك اعملك ايه يعني هو من جمال اللي خلفوكي باتمسح يعني
جتكم الارف مليتوا البلد
انا باكره سواقين التاكسيات عشان رغايين وانا ما بحبش الرغي
وباكره العيال السرسجيه عشان بيخلوا البلد شكلها ابن وسخه .. اكتر ماهي اصلا شكلها ابن وسخه
انا باكره الاسماعيلاويه عشان ما بيفهموش في البطيخ مش عشان الكوره . بعيدا ع الكوره هم اصلا شعب ابن ستين في سبعين
وباكره اي حد يعمل مهم في الدنيا لان مافيش حد مهم .. يعني من الاخر ما بحبش الغرور ولا المغرورين
واحد بضين يسال يقولي طب وانت كاتب البوست ده ليه
اقولك وانت مالك . انا حر دي مدونتي يا عم
باكره الشحاتين عشان دول اكتر ناس في العالم مش مؤمنين بربنا
باكره الملحدين لانهم بتاكلهم علي طول وماواراهمش شغلانه غير شتيمة الاسلام ما عايز تبقي ملحد ما تلحد بعيد عن اللي خلفونا يا عم هو حد قالك ماتبقاش . كل واحد متعلق من عرقوبه
وباكره الشباب اللي بيضيفوا صحابي البنات عندي عالفيس بوك وهاتك يا رخامه وتقل دم مش عشان حاجه بس ابو ام اختراع البرشطه والكلام لناس معينه واحب اطمن البعض . الناس اللي باتكلم عليهم مابيقروش الكلام ده دلوقت
وباكره الزباله اللي في الشارع ... واللي يرمي الزباله في الشارع
وباكره الزحمه
وباكره الحر .. والجو دلوقت حر
وانا حران
>>

Thursday, July 16, 2009

BLAYATCHY

i heard a joke once, man go's to doctor say's he's miserable an' life seems harsh and Cruel an' he feels all alone in this world , doctor say's treatment is simple the great clawn BLYATCHY is in town go see him that should cheer you up , man burst into tears ( but doctor
- he says - i am BLAYATCHY )

كل الجموع مستنيين
اللي لسه شاكك
انه يقدر
او قدر
واللي ماسك نفسه
من المضاحك
صبر
كان ورا الكواليس
مستني فقرته
واقف بيدور في الكراسي
بنظرته
اللي قاعد جمب واحده بيضحكوا
واللي قاعده ماسكه واد بترضعه
واللي عيل لسه فيه في عينيه امل
ولا اسره جايه تلعب
لا هتشوفه ولا تسمعه
كل الكلام ده بيوجعه
كل البشر مستنيين
وصوله
رغم انه من ساعة وصوله
مش لاقي حد يرجعه
وكله بيسال عن اصوله
وبيطرحوا في الاسئله وبيجمعوا
لما بدا مقدم الحفله الهمام
بدا الكلام
قالك ده ايه
بلياتشو ايه
ينط علي اجدعها حبل
ولو وقع مابيتكسرش
قالك يا بيه
انه حارب يوم اسد
وماتهزمش
شكله يضحّك
لبسه يضحّك
ضحكه يضحّك
دمعه يضحّك
وكل شئ جواه يضحّك
الله يسامحك
اكيد كدبت
لاني صابر
ياما صبرت
قال المقدم
فجاة جدا
مره واحده
ان المهرج
الليلادي
فقره واعده
راح ينط عالحبال
راح يضحك العيال
ومن حرارة الانتظار
الجمع كله بعيونه شد
نظره جد ورا الستار
افتح يا ستار
شبيك لبيك
اطلع يا نهار
ابدا مزيكا
دقوا الطبول
في صمت جايز من الذهول
الكل مستني
اما البطل
واقف وكانما هيغني
مشي عالحبال
حاجه يافندي فوق الخيال
لكن سمع
صوت صراخ عيل
وقع
ساد الذهول
وناس تقول عايش
وناس تقول
لا لا ده مش ممكن
مش معقول
اكيد ده جزء من فقرة الليله
ايوه صحيح
هو جزء من فقرة الليله
هي قلة حيلة
مرمي الغلبان
جثه
مات البهلوان
والناس بتصقف لسه
قفلو الستار
والناس مشيت مبسوطه
توته توته
فرغت الحدوته


Wednesday, July 8, 2009

فانوس مش سحري



الاستاد

ــــــــــــــ

ماتروحش الاستاد فيه مشاكل ومش ناقصين بلاوي , كفايه جريتنا وراك وشحططنا لما كنا في بورسعيد وبعدين اعمل حاجه مفيده بلا كوره بقي بلا زفت

انا باروح الاستاد من وانا عندي 12 سنه جاي دلوقت تخاف عليا وانا قربت علي 20 سنه ده انا باروح من ايام ما كنت باخد معايا سندوتشات وانا رايح وماكانش فيه موبايلات وقتها يعني ماكنتش بتعرف تطمن عليا هاتعمل دلوقت خايف ومهتم

عموما انا قلتها كلمه ماتروحش يعني ماتروحش

حاضر ماشي

ممدوح... انا قلتلك ماتروحش

يارب صبرني . يا عم انا باقولك حاضر ماشي

ماهو انا عارف حاضر بتاعاتك دي

مالها

معناها انك مش هاتسمع الكلام

طيب

ممدوح ؟

مالها طيب بقي ؟

معناها انك هتروح

....

...

ساكت ليه ؟

الله مانا كل ما اقول حاجه اطلع مش هاعملها قلت اسكت

مانت طالما سكت كده يبقي مالهاش غير معني واحد

ايه ؟

انك هاتروح

لا يا بابا خلاص مش هاروح اسكت بقي دماغك ودماغي


بعد مرور ساعتين


اووووووووووووه مصراوي اووووووه مصراوي اوووووووه مصراوي

========================================

ايمن

ـــــــــــ

صباح الخير

صباح النور

هاي ازيك عامل ايه

الحمد لله كويس ازيك انتي ؟

انا كويسه الحمد لله

استني اما اعرفك

ممدوح صاحبي . . داليا يا ممدوح

اه اهلا وسهلا ازيك يا داليا فرصه سعيده

انا اسعد

( احمد كل شويه يهز ايدي وانا متنح لداليا تتنيحه زي الزفت كان بقالي تلات ايام مانمتش ولازم انزل الجامعه اخلص ورق )

ممدوح . انت مركز معايا شويه صح؟

اه الحقيقه يا داليا انا مركز معاكي هو انتي اخت ايمن؟

ايمن !!

لا ماعرفش حد بالاسم ده .

غريبه

اشمعنا ؟

اصلك شبه واحد صاحبي اسمه ايمن

احمد غير الموضوع بسرعه جدا وقالي روح هات نيسكافيه يا ممدوح

طول السكه عمال افتكر مين ايمن ده

في الاخر افتكرت اني ماعرفش حد اسمه ايمن

بس هي البت كانت مديه علي ايمن اوي .. سبحان الله يخلق من الشبه اربعين

===========================

العفريت

ــــــــــــــــ

شبيك لبييييك عبدك وملك ايديك

ميييييين ؟

شبييك ولبيييك عبدك وملك ايديك

انت هتستعبط يا روح امك

ليه بس يا ممدوح ده انا عفريت

عفريت ايه . الله يخرب بيوتكوا هي ناقصاكوا غور ياض عالصبح

يا ممدوح ده انا هاحققلك تلت اماني

تلت اماني مين ياض . انت هتشتغلني انا غور

ليه يا ممدوح بس . انت عمرك ما طلعلك عفاريت قبل كده

انا . انا كل يوم بيجيلي كلب زيك ويقولي شبيك لبيك وفي الاخر

يقولي ادفع عشره جنيه وخمستاشر قرش وادخل السحب

طيب ماهو الشركه هي اللي حاطه الشروط دي

وهو انتوا بتشتغلوا تبع شركه

يا بيه خلاص الحاله بقت دنك ومافيش شغل . كلنا نازلين مبيعات عند عفركوش جروب وبنقلب رزقنا

امشي يابني الله يسهلك انا مش عايز احلم

طب احلم حلم واحد وادفع خمسه جنيه ونفعني

لا انا بطلت احلم يا عم الاحلام بتاعتكوا دي وغوور بقي ده محل اكل عيش

غوور

Monday, July 6, 2009

العبايه السوده


يا ام العبايه السوده

وشعرك والبياض ناصع

داري الرمش ده عني

ده انا من شوقي بيه والع

ونظرة عينك القاسيه

وانا في محرابي وبصلي

تخلي راسي مش راسيه

وهمسة صوتي بـِـتـْجَـلّي

واشوفك ماشيه تتدلي

دلالك هزني هزه

واحس حاجات بتحصلي

تحسسني بحاجات لذه

وضحكة وشك المرسوم

عليه الحب

وهزة وسط ع المقسوم
واشيل ميت ذنب

ده نظرة ليكي تحت وفوق

ملتني ذنوب

ويملاني كمان الشوق

وابص وادوب

واحلم بيكي ملهوفه

بتجري اوام في احضاني

واحسك مره مكسوفه

وانا فارس علي حصاني

ومن غير الكلام صايم

وعشقك في الصيام غيه

وافطر بيكي بالنظره

واتسحَّر ملاغيه

غويتي قلبي العابد

بتنهيدك

وعايزاني اكون عبدك

وانا سيدك

كفايه ولملمي شعرك

وداري عينيكي لو سامحه

وشيلي الوشم من ضهرك

وداري الحسن بالطرحه

اذا ماقدرش عالنظره

وهاقدر كيف علي سحرك

واعشق لو تطير شعره

طب اقدر كيف علي شعرك