Wednesday, July 8, 2009

فانوس مش سحري



الاستاد

ــــــــــــــ

ماتروحش الاستاد فيه مشاكل ومش ناقصين بلاوي , كفايه جريتنا وراك وشحططنا لما كنا في بورسعيد وبعدين اعمل حاجه مفيده بلا كوره بقي بلا زفت

انا باروح الاستاد من وانا عندي 12 سنه جاي دلوقت تخاف عليا وانا قربت علي 20 سنه ده انا باروح من ايام ما كنت باخد معايا سندوتشات وانا رايح وماكانش فيه موبايلات وقتها يعني ماكنتش بتعرف تطمن عليا هاتعمل دلوقت خايف ومهتم

عموما انا قلتها كلمه ماتروحش يعني ماتروحش

حاضر ماشي

ممدوح... انا قلتلك ماتروحش

يارب صبرني . يا عم انا باقولك حاضر ماشي

ماهو انا عارف حاضر بتاعاتك دي

مالها

معناها انك مش هاتسمع الكلام

طيب

ممدوح ؟

مالها طيب بقي ؟

معناها انك هتروح

....

...

ساكت ليه ؟

الله مانا كل ما اقول حاجه اطلع مش هاعملها قلت اسكت

مانت طالما سكت كده يبقي مالهاش غير معني واحد

ايه ؟

انك هاتروح

لا يا بابا خلاص مش هاروح اسكت بقي دماغك ودماغي


بعد مرور ساعتين


اووووووووووووه مصراوي اووووووه مصراوي اوووووووه مصراوي

========================================

ايمن

ـــــــــــ

صباح الخير

صباح النور

هاي ازيك عامل ايه

الحمد لله كويس ازيك انتي ؟

انا كويسه الحمد لله

استني اما اعرفك

ممدوح صاحبي . . داليا يا ممدوح

اه اهلا وسهلا ازيك يا داليا فرصه سعيده

انا اسعد

( احمد كل شويه يهز ايدي وانا متنح لداليا تتنيحه زي الزفت كان بقالي تلات ايام مانمتش ولازم انزل الجامعه اخلص ورق )

ممدوح . انت مركز معايا شويه صح؟

اه الحقيقه يا داليا انا مركز معاكي هو انتي اخت ايمن؟

ايمن !!

لا ماعرفش حد بالاسم ده .

غريبه

اشمعنا ؟

اصلك شبه واحد صاحبي اسمه ايمن

احمد غير الموضوع بسرعه جدا وقالي روح هات نيسكافيه يا ممدوح

طول السكه عمال افتكر مين ايمن ده

في الاخر افتكرت اني ماعرفش حد اسمه ايمن

بس هي البت كانت مديه علي ايمن اوي .. سبحان الله يخلق من الشبه اربعين

===========================

العفريت

ــــــــــــــــ

شبيك لبييييك عبدك وملك ايديك

ميييييين ؟

شبييك ولبيييك عبدك وملك ايديك

انت هتستعبط يا روح امك

ليه بس يا ممدوح ده انا عفريت

عفريت ايه . الله يخرب بيوتكوا هي ناقصاكوا غور ياض عالصبح

يا ممدوح ده انا هاحققلك تلت اماني

تلت اماني مين ياض . انت هتشتغلني انا غور

ليه يا ممدوح بس . انت عمرك ما طلعلك عفاريت قبل كده

انا . انا كل يوم بيجيلي كلب زيك ويقولي شبيك لبيك وفي الاخر

يقولي ادفع عشره جنيه وخمستاشر قرش وادخل السحب

طيب ماهو الشركه هي اللي حاطه الشروط دي

وهو انتوا بتشتغلوا تبع شركه

يا بيه خلاص الحاله بقت دنك ومافيش شغل . كلنا نازلين مبيعات عند عفركوش جروب وبنقلب رزقنا

امشي يابني الله يسهلك انا مش عايز احلم

طب احلم حلم واحد وادفع خمسه جنيه ونفعني

لا انا بطلت احلم يا عم الاحلام بتاعتكوا دي وغوور بقي ده محل اكل عيش

غوور

30 comments:

adel said...

واضح انك لسه مشربتش النسكافية

ههههههههههههههه

بس هي مداية قوي علي ايمن فعلا

و احسن حاجة نقولها لبابا حاضر
بترييح قوي

هههههههههههه
انت كمان بيطلعلك عفاريت

انا طلعلي واحد من يومين قلبته في اللي معاه

ههههههههههه

aMr tA3LaB said...

يا زوكي يا حبيبيم اننا حنا السود فاول حوار تعتبره معايا بس الفرق انك بتروح تتفرج واننا بروح العب

المهم تاني حاجة على فكرة انا طلعت المريخ من شوية كده لاقيت برده عفريت داخل عليا بيقولي مفيش شغل عندي انت تعرف كان اسمه ايه عفركوش ايوا هو بتاع الشركة اصله باعها

لسعااااااااااااااااااااااااااااااان
جناااااااااااااااااااااااااان

MǿиY El-Shreef said...

ههههههههههه

محتاج تنام يازيكا

بطل فرهدة بقىىى :))

وابقى حاول تروح المانيا يمكن تعمل حاجه ف الاهلي :@

وبركاتك تحل ونكسبلنا ماتش :D

فاروق عادل said...

ههههههههههههه حلوة خش نام وريح دماغك

micheal said...

ههههههههههههههههه..يعني رحت الاستاد برضه
يا عم أنا مش حكتلك ع البهدلة اللي حصلتلي
بلاش أنت متبتش من بعد بورسعيد
غريب أنت يا أبو الزيك
:))
وبعدين يا عم فرق أيمن من داليا
حد لاقي يطلعله عفريت
رووح يا زيكا وتعالي بسرعة
:)

dr.lecter said...

مش دي برده طنطا؟

لا مؤاخذه يابني بقالي 4 ايام مطبق شغل ورا بعضه

magi said...

ههههههههههه
حتى العفاريت اتخصخصت
بس ابقى اتغطى وانت نايم

سارة نجاتى said...

ههههههههههه

ده مش نسكافيه , ده أنت كنت واخد قرش كابيتشينو يا حبيبى

لا انا بيصدقوا الحاضر بتاعتى , أصل يا اما بقولهم حاضر و فعلا تبقى حاضر
يا اما افضل أجادل فيهم لحد ما حد فيهم يكفر ههههه

أما بالنوسبة للعفريت , ابقى ابعت لى واحد اشتغله شوية ههههههه

Che said...

صباح الصباح يا زيكا باشا

msafa said...

رائع الشغل ده يا ابو الزيك
على فكره
انا نفسى يكون لينا علاقه على مستوى المسرح ممكن ؟
انا مصمم ديكور

*البت المشمشية *حلوة بس شقية * said...

هههههههههههههههههههههههههههه
يا زيكا
ابقااتغطا وانتا نايم

Zika said...

طيب كلكوا متفقين اني لازم انام اتغطي وان انايم
الا ما في حد جابلي غطا ههههههههه
وبعدين غطا ايه في الحر ده

Zika said...

عادل
ايه ده هم بيطلعوا لكل الناس كده
طب كويس اصلي افتكرتهم افشني انا بس هههههههههههه
نورت يا عدول

Zika said...

عمرو تعلب
ماشي يا عم اللاعيب الكبير لما اخف فرقه قصاد فرقه ونشوف يا عموووووووور
ههههههههههههههههههههههههه

Zika said...

عمرو تعلب
ماشي يا عم اللاعيب الكبير لما اخف فرقه قصاد فرقه ونشوف يا عموووووووور
ههههههههههههههههههههههههه

Zika said...

موني
اه والله محتاج انام فعلا
لا انا مش رايح المعسكر مش محتاجه هههههههه

Zika said...

فاروق عادل
طيب تصبح علي خير يا راجل يا طيب هههههههههههه

Zika said...

فاروق عادل
طيب تصبح علي خير يا راجل يا طيب هههههههههههه

Zika said...

مايك
يا عم انت عارف السمك عمره ما يخرج من الميه يا موككااااااا

Zika said...

dr.lecter
ايه طنطا دي
لا يا عم احنا في القاهره هنا
هات كرسي لعمك يا دقدق
جلابيه لخالك يا بت
اشرب حاجه يا باشا طيب اشرب حاجه

Zika said...

ماجي
اتغطا ايه بس في الحر ده يا مااااجي
الجو حرر
اه احمد عز خد توكيل العفاريت خلاص
هههههههه

Zika said...

ماجي
اتغطا ايه بس في الحر ده يا مااااجي
الجو حرر
اه احمد عز خد توكيل العفاريت خلاص
هههههههه

Zika said...

ساره نجاتي
صصصصصصصص يا خطر انت يا خطر
طب وليه تتعبي نفسك وتتعبيهم يا ساره
حاضر دول بيجولي كتير اوي هابقي ابعتلك تلاته اربعه تشتغليهم

Zika said...

ساره نجاتي
صصصصصصصص يا خطر انت يا خطر
طب وليه تتعبي نفسك وتتعبيهم يا ساره
حاضر دول بيجولي كتير اوي هابقي ابعتلك تلاته اربعه تشتغليهم

Zika said...

تشي
صباح الفل يا عمووور
لاااااااااااااازم تشرب حاجه

Zika said...

مسافه
تسلم يا ريس
والله جميل اوي
ياريت يكون فيه بيننا تعاون
انا بامثل وباكتب
نورت يا باشا

Zika said...

البت المشمشيه
اتغطي اييييييه بس يا ناااس الجو حر

الدرعمي said...

جميل أنت يا زيكا .. إبداعك يعجبني دائما @ تحياتي لرأسك الزكي @ آدم الدرعمي

Bent Men ElZaman Da !! said...

ههههههههههههههههههههههه
سؤال بيطرح نفسه بنفسه
هى كل المواقف دى حصلت فى يوم واحد
والا انت مانمتش ايام كتير
الوضع شكله صعب اوى ههههههههههههه
صعبت عليا والله داليا
المفروض ماحدش يقف قدامك لما تكون مش واخد كفايتك من النوم ههههههههههههههههه

Zika said...

الدرعمي
ادم باشا . منور دائما ودايما بتفرحني برايك الجميل ده
تسلم يا باشا
والله يا جدع واحشني :)