Monday, July 6, 2009

العبايه السوده


يا ام العبايه السوده

وشعرك والبياض ناصع

داري الرمش ده عني

ده انا من شوقي بيه والع

ونظرة عينك القاسيه

وانا في محرابي وبصلي

تخلي راسي مش راسيه

وهمسة صوتي بـِـتـْجَـلّي

واشوفك ماشيه تتدلي

دلالك هزني هزه

واحس حاجات بتحصلي

تحسسني بحاجات لذه

وضحكة وشك المرسوم

عليه الحب

وهزة وسط ع المقسوم
واشيل ميت ذنب

ده نظرة ليكي تحت وفوق

ملتني ذنوب

ويملاني كمان الشوق

وابص وادوب

واحلم بيكي ملهوفه

بتجري اوام في احضاني

واحسك مره مكسوفه

وانا فارس علي حصاني

ومن غير الكلام صايم

وعشقك في الصيام غيه

وافطر بيكي بالنظره

واتسحَّر ملاغيه

غويتي قلبي العابد

بتنهيدك

وعايزاني اكون عبدك

وانا سيدك

كفايه ولملمي شعرك

وداري عينيكي لو سامحه

وشيلي الوشم من ضهرك

وداري الحسن بالطرحه

اذا ماقدرش عالنظره

وهاقدر كيف علي سحرك

واعشق لو تطير شعره

طب اقدر كيف علي شعرك


6 comments:

adel said...

جامدو جدا جدا
تحفة يابني

بس هي زي ما انا فهمتها كده ولا ليها معني تاني ؟؟

بزنس تعيش said...

جامدة جامدة
وأحلى حاجة فيها إنك بتتغزل فى بنت لابسة عباية وطرحة
يعنى بلدى يا معلم والبلدى يوكل
شكرا .. تقبل مرورنا
-----------------------
مع تحياتنا / حازم و هانى

MǿиY El-Shreef said...

قلتلك رأيي يا ساحر الكلام انت

بجد تسلم ايدك يازيكا

اسامه عبدالعال said...

تسلم ايدك يازيكا

سارة نجاتى said...

أنت عارف رأيى يا أبو الزيك
ح أقول لشمعى ينشرها فى الصفحة بتاعته دى

شمعى أسعد said...

علم يا سارة

وهى جميلة فعلا