ماتخافش ... هاتموت

ماتخافش
كل ده هاتاخد عليه
كل دي اعراض طبيعيه للسكون
العنكبوت اللي ناسج خيوطه فوق شباكك المتوارب
والشمس اللي بتشق بنورها خيوط العنكبوت
فترميلك شوية ضل
على شوية ضي متسرسبين
فتترمى شوية حبال لضوء الشمس على سريرك
اللي جنب الشباك
فتبان كانك متقسم مليون خط بالعرض
عرق الناس اللي بيتمسح في عرقك في زحمة الميكروباص
التراب اللي مغرق تفاصيلك
حتى وانت قاعد ع القهوه
بيترمي التراب في حضنك كانك رصيف
دخان سيجارتك اللي مخليك مش شايف كويس
وحاجات كتير تاني بتقول انك قربت تموت
فتسكت ولما تقرر السكوت تاخد نفسك وتروح على القهوه
اكتر مكان بيتجمع عليه الكلام
وبيتبعتر في الهوا بدون داعي
المرايه اللي بطلت تشوف فيها حد غيرك
التراب بدا يرسم عليها ملامح واحد .. شبهك
قنوات التليفزيون بتذيع خبر وفاتك بكل جنون
وانت . قاعد بتقلب الزمن بالريموت
وبتجري ورا عقارب الساعه وبتحاول . على الاقل
تلحق عقرب الدقايق
تفاصيلك بقت ممله
ومحفوظه
وصدقني .. ماتقلقش
انت كده ابتديت اول خطوه على طريق النهايه
انت كده خطيت اول خطوه على سكة .. مافيش
وماتخافش
هاتاخد على كل ده
لانك خلاص ... هاتموت