Thursday, December 24, 2009

كلنا ليلى .... وان ماقدرتش ع الحمار




انا ام الاشياء جميعا

سيدة العناصر

بادئة العوالم

حاكمة ما في السماوات من فوق

وما في الجحيم من تحت

انا مركز القوه القوه الربانيه

انا الحقيقه الكامنه وراء كل الالهات والالهه

عندي يجتمعون كلهم في شكل واحد وهيئه واحده

بيدي اقدر نجوم السماء ورياح البحر وصمت الجحيم

يعبدني الناس بطرق شتى وتحت اسماء شتى

لكن اسمي الحقيقي هو ايزيس

به ارفعوا الي ادعيتكم وصلواتكم


( ترنيمه مصريه , الدوله القديمه )


----------------

اصلي اليك

يا سيدة السيدات

وربة الربات

يا عشتار .. ملكة كل الناس .. الهادية الى السبل المستقيمه

الرحمه يا سيدة السماء والارض

يا راعية المتعبين

الرحمه يا سيدة الحرب المسيطره على كل المعارك

ايتها الساطعه

يا لبؤة ايجيجي , يا قاهرة الالهه

ايتها الممجده , يا ذا الثبات والعزم

ايتها البطله عشتار

المتالقه , مضيئة السماء والارض

عظيمة القوه, جامعة الحشود

الهة الرجال , وربة النساء التي لا يعرف خططها احد

عبدك المعذب المكروب يستصرخك

فانظري الي يا سيدتي .. وتقبلي صلواتي

عديني بالمغفره فان موج الطوفان يتقاذفني


( ترنيمة سومريه - القرن 23 ق.م )
الاشعار دي موجوده في
رواية ظل الافعي .. يوسف زيدان

--------------------------------------------------


في قرون ما قبل الميلاد . كانت المرأه شئ عظيم جدا .. القداسه نفسها .. هي الالهه المسيطره .. في مصر وفي اثينا وغيرها لحد ما الانسان بدا يتحضر

عشان كده كل ما كان الانسان بيتحضر وبيتقدم . كانت بتقل قيمة المراه .. مش عشان يقللوا من فايدة المراه .. ولكن لان الراجل بعد السنين دي كلها اكتشف ان هو اللي بيعمل كل حاجه

هو اللي اكتشف كل النظريات واخترع كل الالات والتكنولوجيه الحديثه

اخترع القطر

والتليفون واللمبه

وطورهم

حس انه أهم .. مش لانه زهق من سيطرة المراه

لأ ..

لان هو اللي بيحارب . وهو اللي بينتصر .. وكمان اكتشف

ان فيه اله واحد بس المفروض يتعبد .. وله صفة الذكوره

في العصور الحديث ( مش الحاليه ) كان دور المراه مهمش لدرجة التحقير في كل دول العالم

وكانوا بيتناوبوا التحقير على سنوات

سنوات يكون التحقير في اوروبا

وسنوات يكون في العالم الشرقي

وكل ما بيمر اي جزء من العالم بمرحلة تخلف او ظلام .. بيكون سبب رئيسي فيه ان المرأه دورها مهمش وجانبي او يكاد يكون معدوم


في بداية التمانينات والتسعينات .. حصلت طفره كبيره جدا في حقوق المرأه

المراه بقت تاخد مراكز قياديه كبيره

في العالم كله

المرأه بقت وزيره

بقت عضو مجلس الشعب

بقت رئيسة تحرير مجله

بقت مقدمة برامج كبيره وسياسيه مش بس طبيخ وموضه

بقت مديره على الرجاله

بتاخد مراكز قياديه كبيره في شركات كبيره

لو راجل وست اتقدموا لشركه واحده وفيهم نفس المواصفات .. هياخدوا الست بنسبة تسعين في الميه


لكن ايه المشكله ؟


مشكلة ليلى


ليلى اللي بتقول ان حقها ضايع

انهي حق؟


حق انها تمشي من غير ما حد يعاكسها

حق ان ماحدش يظن فيها اي سوء لمجرد اسلوب حياتها

حق انها تطالب بحقها


اذن احنا وصلنا هنا لحقوق اجتماعيه مش سياسيه


طيب الحقوق دي مين السبب في ضياعها ؟

الراجل ؟

اطلاقا

اساسا ضياع الحقوق والكرامه .. مش مشكلة الست بس

مشكلة الستات والرجاله وكمان المعيز والخرفان اللي بتتدبح في العيد


لما نبقا حرين كبشر

كبني ادمين

كشعب

كفكر


ساعتها نبقا نفكر مين له حقوق ومين عليه واجبات


لكن المتهم الحقيقي في اللي ليلى بتعاني منه في العصر ده في المكان ده بالذات بعيدا عن اي فكر تاني واي بلد تانيه


هي ليلى نفسها


ليلى اللي بدل ما تشتغل وتوصل بنفسها يحترمها العالم ... بدات تفكر في انها تصرخ بس

تصرخ تقول

انا ليلى

انا مظلومه

انا مقهوره

انا عندي طلبات

انا ماحدش راضي يحققلي الطلبات


ليلى هي اللي سابت حقها .. وبتدور دلوقت على حد يجيبهولها


المجتمع


هو المتهم الاول من وجهة نظر ليلى لضعف حال ليلى

اتهام الرجل بانه بيخاف من حقوق المراه

رغم ان الواقع بيقول ان الست دلوقت في اوقات كتيره بتاخد مراكز مش من حقها لمجرد انها مراه وان لازم يكون ليها تواجد

مش بمقياس الكفاءه .. لكن بمقياس المجامله وادعاء التحضر

ربما نسيت ليلى انها نص المجتمع اللي هي بتتكلم عليه


العادات والتقاليد

ماعندناش بنات تسهر لبعد الساعه تمانيه

ماعندناش بنات بتعمل كذا

ماعندناش بتعمل كذا

كل الكلام ده كنا بنسمعه من الام قبل الاب

باعتبار ان الام دايما بتبقا اقرب للبنات

من حيث الاحتكاك

والأوامر العائليه


ام ليلى ... اللي هي ليلى نفسها

هي سبب رئيسي ان المجتمع يكون بالصوره اللي هو عليها في تقبل وجهات نظره


مشكلة المرأه الحقيقيه

مش في المجتمع ... لانها نفسها بتمثل المجتمع اللي بتتهمه

مش في الراجل .. لان الراجل قبل خلاص الاختلاط بالمراه .. وبانها تكون مديرته ورئيسته واحيانا .. وزيرته او عضو مجلس الشعب اللي بيتكلم عن حقوقه قدام الدوله

والامثله الناجحه للمراه بدل المثال الف

وماحدش بيسخر من المراه ومن تطورها ومن نجاحها


مشكلة المراه الحقيقيه ... هي القاء سبب المشكله الرئيسي على حد غير المتهم الحقيقي


عارفين مين ليلى


مصر هي ليلى


مصر كلها


اللي بجد محتاجه مساعده

اللي بجد حاسه بضعف في كرامتها وفحقوقها تجاهنا

هي مصر


وعارفين مين المتهمين


احنا .


المصريين


حق المصريين اللي ضايع


هو السبب ان الرجاله ماتقبلش الستات


وان الستات تقول ان الرجاله عنصريين ومتخلفين


عملا بمبدا


" ماقدرتش ع الحمار "

18 comments:

z!zOoOo said...

اسمحلي اقولك مبدئيا

برافو يا زيكا

طريقه عرض هايله

والكلام اجمل

وليا عوده تانيه

عشان اعلق علي الموضوع

اسماء عوني said...

شوف يا عم زكاوه
رايك ده راي ذكوري بحت
انك تتوه عن المشكله الرئيسيه وتبعد وتنيمنا في اول البوست ونقول ان الواد ده مناصر لجمعيات المراه بعدين تهزانا بين السطور
ليلتك زي وشك

اولا اينعم البلد كلها مطحونه
بس الست مابتجيش ع الراجل
الراجل هو اللي بيجي ع الست
ف الست يا عم زيكا مش هاتستحمل غباوة الحكومه
وسوؤ الاوضاع
لا وكمان تحكمات الراجل

طبعا بما اني عارفاك كويس وعارفه اني مش هاخلص

وعارفه كمان انك ضد جمعيات حقوق المراه وعارفه رايك فيهم
بس ده مايمنعش يعني انك لازم تاخد على دماغك

لان المجتمع مش المقصود بيه الراجل
المجتمع مقصود بيه التخلف العام
رجاله وستات
ولنا في الحديث ده بقيه

Che said...

انا كل يوم يا زيكا بتأكد اننا شبه بعض اكتر من اليوم اللى قبله
عارف يا زيكا مشكله من مشاكلنا اننا عايشين الحياه بتأخير زمنى فظيع
يعنى لما نتكلم على الحريه السياسيه تلاقى ان الدنيا كلها عملت كده من ايام فحت البحر و احنا لسه بنتكلم
تتكلم على الحريه الشخصيه دلوقتى فى الوقت اللى الثوره الفرنسيه اتكلمت عليها قبلت و مش هقول بكام 100 سنه
تتكلم عن حقوق المرأه مع العلم ان دى زى ما دكتور احمد خالد توفيق قال فى مقاله كانت فكره حلوه فى الستينات
يا زيكا طول ما احنا بنتكلم و مش بنعمل هنفضل كده
انا زيك مش ضد المرأه ولا ضد حريتها ... بس ضد انها تاخد منافع الحريه دى و تسيب المسئوليات او الواجبات المترتبه على الحريه دى
مفيش حاجه فى الدنيا ببلاش يا عم زيكا

dr.lecter said...

من اول سطؤين افتكرت علي طول ظل الافعي وظني طلع في محله

شفت فيلم احكي ياشهرزاد

قال نفس رايك بالظبط

الغلط علينا احنا سواء دكره او حريم

كلنا بناعاني مش الست بس كلنا حقوقنا وكراممتنا ضايعين واحترمنا لذاتنا

micheal said...

ههههههههههههههه..وطبعا الكلام ده رد عليا
ماشي ماشي يا أبو الزيك
أنا عن نفسي متخدعتش بالبقين الناعمين اللي في الأول
بس وأنا بقرأ كنت مستنيك تقع في غلطة معينة وكويس أنك وقعت في الفخ بلسانك وقلت

المراه بقت تاخد مراكز قياديه كبيره
في العالم كله
المرأه بقت وزيره
بقت عضو مجلس الشعب
بقت رئيسة تحرير مجله
بقت مقدمة برامج كبيره وسياسيه مش بس طبيخ وموضه
بقت مديره على الرجاله
بتاخد مراكز قياديه كبيره في شركات كبيره
لو راجل وست اتقدموا لشركه واحده وفيهم نفس المواصفات .. هياخدوا الست بنسبة تسعين في الميه

لقد وقعت في الفخ يا زيكا والدليل أهو
عض في ده يا وديع
http://amyasser.blogspot.com/2009/07/blog-post.html

اقراه كويس وبعين محايدة كإنسان وليس بنوعك كذكر
بالنسبة بقى لكلامك أن ليلى هي اللي مضيعها منفسها وحقوقها فكلامك فيه جزء من الصحة بس مش دقيق خالص
الفكرة ببساطة أن المجتمع الذكوري اللي احنا فيه بيعتبر ليلى الحيطة المايلة اللي يطلعوا فيها عقدهم وجهلهم وساديتهم كمان ..ممكن تستنى الثلاث بوستات الجاية بتاعة عمك العميد عشان حتفهم فيها ليه ليلى ممكن تنفسن على ليلى وهل ليلى ضحية دائما؟
أصلي لو كتبتلك الكومنت هنا حضطر أجحيب ال3 بوستات دي كوبي وبيست وحيبقى التعليق طويل جدا وفي غاية الملل
مشكلتك يا زيكا (بلغة الكورة اللي أنا وانت نفهمها) أنك جيتلي في ملعبي
ده كان بحث التخرج بتاعي يا باشا
:))
عموما انتظر بس ال3 بوستات الجاية وأهلا بأي تعليق ليك

magi said...

بص يا زيكا مشكلتك الرئيسيه انك مش شايف المشاكل الى بنتعرضلها بس لاننا بنات انت بتبص للموضوع من زاويه احاديه لو جربت تحط
نفسك مكان الطرف الاخر وتبص للامور من الناحيه التانيه هتلاقى الوضع مختلف
انت نفسك جربت رخامه المجتمع لانك اخترت مجال زى الرقص واكيد بيتقالك
عيب انت ولد ازاى ترقص احنا بقى بيتقالنا عيب انتى بنت مش فى حاجه واحده فى كل حاجه يعنى عنصريه بيمارسها المجتمع رجالا ونساءا فلما بنطالب بحقنا ده مش موجه ضد الرجل ولا طلب لميزه اصل لما ابقى اطالب بحقى فى الامان قى الشارع فى التعليم فى المساواه دى مش مميزات دى حقوق
اجتماعيه بقى سياسيه اهى حقوق والسلام
وبعدين انا ضد ان واحده تتحط فى منصب لانها ست
عتدها القدره والكفاءه تروح معندهاش يبقى لا بس سؤال مين فى مصر دلوقتى بيتحط فى منصب عشان كفء ليه
ومين قالك اننا سايبين حقنا ولا عايزينه يجيلنا جاهز انا من مؤيدى ان الى ليه حق يدور عليه ويجيبه والحمله مش فكرتها كل واحد يكتب كلمتين وخلاص
فكرتها اننا نغير ونتغير نفكر مع بعض بصوت عالى ونوصل لحلول

Zika said...

زيزو

مستني ردك

Zika said...

اسماء عوني

شوفي
رايي مش ذكوري بالمره بس فنطيه وافهميه بعيدا عن منطقك الانوثي البحت
زي ما بطالبوا الراجل انه يراجع نفسه ويبص للامور بحياديه
بصي انتي كمان للامور بحياديه

لما قلت المجتمع ست وراجل مش راجل بس
معني كده اني باحط الراجل في نفس خانة الاتهام .. مش استبدلته بالست

الست بتيجي ع الراجل
حقيقي
والنسبه بتزيد مش بتقل
خصوصا في السنتين الاخرنييين دول بالذات

انا مش ضد جمعيات حقوق المراه ولا جمعيات حقوق المعيز حتى انا قلت انا مش ضد ان اي حد في اي حته عنده اي حق يدافع عنه

مستني بقية حديثك لان ده كان اي كلام :D

اه
وحشتيني :)

Zika said...

تشي

الله يفتح عليك يا عمرو والله لخصت

وعلى فكره مصر اول دوله في العالم بتجري توقع على اي اتفاقيه او معاهده لحقوق اي حد والسلام وكده
واول دوله بتضضرب المعاهده دي بالجزمه
يعتي معاهدات كده وكده

Zika said...

dr.lecter
هو ده معنى البوست بالظبط كده
تمام

Zika said...

مايكل
لا يا بوب الكلام ده مش رد على حد الكلام ده رايي الخاص

على فكره انا عارف ان ده كان بحث التخرج بتاعك

على فكرة الاحصائيات مش معارضاني فحاجه لاني ماقولتش اي نسبه
او اي مطلق في كلامي
ان الست بتاخد مكان الراجل وبما انك العميد اكيد شوفت ده في انترفيو من انترفيوهاتك لان انا شوفته في مجال الرقص والسينما والصحافه

لما نسبة الرجاله اكتر من الستات وماعرفش ليه انا اصلا كنت حاسس بكده من قبل ما اقرا اصلا
ونسبة الشغل اكتر للراجل
فده شئ طبيعي
نسبة وتناسب
وعدم خروج المرأه للمشاركه في العمل دي مشكلتها لما يبقا فيه كفاءات
بياخدوا مراكزهم لكن طالما مافيش ... هايشتغلوا بالعافيه
عشان كده باقول ان دلوقت بالذات في السنين الاخيره
الست بتتجامل على حساب الراجل عشان يعوضوا النسبه دي

ده كلامك بياكد كلامي
وكمان الاحصائيات بتاعة المدونه التانيه بارضه بتوضح كلامي

والله لو ركزتوا يا بشر هتلاقوني مش ضد حقوق المراه انا باقول نقطه كافره

المشكله مش مشكلة مرأه دي مشكلة بلد

ال يقولك الستات مابتشتغلش
طب مانت مش بتشتغل يا عميد
رغم انك كفئ في مجالك ومفيش منك اتنين
ورغم انك خريج كليه محترمه نفسك تحقق ذاتك بره بيتريقوا عليك
وانا راجل اهو وبيتريقوا عليا عشان بارقص

مشكلة بلد
مستني التلت بوستات يا ميشو
وابقا قولي استقريت على ايه في اسم الكتاب يا نجم

Zika said...

ماجي

مشكلتكوا انتوا يا ماج ان انتوا مش باصين ع البوست كويس
صدقيني انا حاطط نفسي مكان كل واحد وواحده عايشين في البلد دي
وعارف الكلام بتاع ان البنت بيتقالها لأ لمجرد انها بنت
والله انا قايل كده في البوست

بالنسبه لحقك في الامان في الشارع
انا ممكن اموت نفسي دفاعا عن واحده بتتعرض لاذي في الشارع ولعلمك هاعتبر شهيد
اي والله

حقوقك في التعليم

مالها ؟

المساواه

المساواه في ايه بالظبط ؟

انتي بتقولي امين في مصر دلوقت بيتحط فمنصب عشان كفء

بالظبط هو ده اللي انا باتكلم عنه
عشان كده لو فرضنا ان راجل خد مكان ست رغم انها احق

ده مش لانه مجتمع ذكوري
ده لانه بلد فاسد

وانا اصلا معاكوا في الحمله دي عشان شايف ناس بتطالب بحقها
ما فيه خمسين مليون جمعية حقوق مراه في كل شارع
اشمعنا انتوا يعني اللي رديت عليكوا

ولا ايه ؟

سارة نجاتى said...

بص أنا مقرتش الموضوع بس لما لقيتك مقتبس من ظل الأأفعى احب أقولك

" أستاذ "

سارة نجاتى said...

صعب أخد موقف معين من كلامك
بس سيبك
انت ظل الأفعى كيفتنى منك ههههه
أصلى عملت عليها زى بحث عبيط كده
و عندى تسجيلات عنها مع يوسف زيدان ابقى فكرنى ابعتهالك
مع علينا....
بص يا أيو الزيك
فى شق من الكلام أنت بترجع السبب لنفس السبب اللى أنا مقتنعة بيه
و هو صورة كبيرة من القمع جواها صور أصغر
الأصغر دى بقى لست , للفقراء , للأقليات ...
و ده انا بيس معاك فيك
نقطة أن منطلقك ذكورى ..لا هو مش ذكورى
هو بس أنت عاوز تقول " ما تنشفوا كده أمال ؟؟" ههههههه
و ده أنا معاك فيه برده مش بحب ماركة اتجرحت و اتوجعت أو اتقمعت
و المشكلة هى ازدواجية معايير من منطلق اجتماعى
بس دى مع احترامى للى أنت قلته يا زيكا مش شوية زى ما أنت حاسس ..
دى أكثر تعقيدا من تمييز ممنهج ...
و انت عارف قصدى و رأيى فى الحته دى بالذات بخصوص المطالبة بحق بين واضح..
المشكلة أنه واضح أنك بتتعامل مع نماذج محترمة شوية
و علميا اللى انت بتقوله بتاع أن الست لوحدها هى اللى جايباه لنفسها مينفعش .... لأن احنا بنعيش فى مرحلة أبوية صعب جدا جدا نتجاهل ده.
أه طبعا الموضوع يقع على عاتق الاتنين
بس أنا مستغربة اوى جملتك بتاعت

ولكن لان الراجل بعد السنين دي كلها اكتشف ان هو اللي بيعمل كل حاجه
هو اللي اكتشف كل النظريات واخترع كل الالات والتكنولوجيه الحديثه
اخترع القطر
والتليفون واللمبه
وطورهم
حس انه أهم .. مش لانه زهق من سيطرة المراه
لأ ..
لان هو اللي بيحارب . وهو اللي بينتصر .. وكمان اكتشف
ان فيه اله واحد بس المفروض يتعبد .. وله صفة الذكوره


أنت كده جبتها من الأخر خالص هههههههه
دى ليها تفسير أنثربولوجى لوحده
اللى أنت بتعبره سبب هو نتيجة يا زيكا ...
نتيجة
لظهور فكرة الحيازة و الملكية الخاصة...
يعنى مينفعش تقول أن الراجل لقى نفسه عبقرى وصاحب الانجازات .. فاتفرعن لأ ..

كفاية كده عاوزه انام ... فكرنى نتكلم فى مضوع النتيجة و السبب ده بعدين عشان ده موضوع ملعبك أوى ههههههه

سلامات

Zika said...

ساره
طب كملي بقا وبعدين هابقا ارد عليكي على بعضك

سارة نجاتى said...

ههههههههه
ياللهوى لسه
أكلم ف موضوع الحيازة و الملكية الخاصة
طب ما أنت اكيد عارفه
لا خلاص كل سنة و انت طيب

سارة نجاتى said...

ما ده فى ظل الأفعى برده يا ابنى

Zika said...

ساره
نورتي المحكمه
اتفضلي هانبقا نبعتلك :D:D:D:D