Friday, October 30, 2009

ازاي احبك


ازاي احبك حب خالي من الوجع

وازاي احارب ميت طريق لاجل الوصول

وتطلبي

قلبي يجيلك مرتجع

وازاي يحبك حب خالي من الفضول

مليون حكاية قصه منهيه بأسى

والدمع فيها بيسري جوه اليوم

داء الوطن يلعن قصايد حبي ليكي في غربته

فازاي احبك حب خالي من الهموم

مليون حكاية جوع ومكسيه بأسى

مليون شهيد مكتوب على قبره وطن

جرح الوطن لو يتنسى

ازاي احبك حب خالص م الشجن

بتقولي ليه عايزه احضنك

تحت المطر وسط الخريف

وماهمكيش احساسي ايه

في ضلمة الليل المخيف

قلبك خلاص

مابقاش بيفهم في الملامح والوشوش

مابقاش يحس باي خوف ؟

مابقاش بيستحمل خدوش

وماهمكيش معنى الظروف

مابقاش يناسب حبنا حال الوطن

ماقدرش احبك وانا .. ماقدرش اطير

مضطر اقدم حبنا للناس كفن

ماقدرش احبك حب منزوع الضمير


ممدوح عبد الحميد زيكا

6 comments:

magi said...

جميله يا زيكا
اكتر مقطع عجبنى
مابقاش يناسب حبنا حال الوطن
ماقدرش احبك وانا .. ماقدرش اطير
مضطر اقدم حبنا للناس كفن
ماقدرش احبك حب منزوع الضمير

مواطن مصري said...

جامدة يابو الزيك

mimi said...

مش مصدقة عنيااااااااااااا

أنت زيكا المخرج؟

كننت فين؟
وحشتني كتاباتك أوي

كنت فين الفترة اللي فاتت دي كلها من زمااااااااااان أوي

بجد نورت مدونتي...

اتغيرت خالص

فاتك يمكن 20 بوست ...

بلوم تقراهم كلهم يا مدحت وتقوللي رايك فيهم

بس رجوعك قوي ... هايل البوست ده

"مابقاش يناسب حبنا حال الوطن"

إيه الجمال ده

ما شاء الله عليك يا زيكا

م/ الحسيني لزومي said...

من اجل
وطن آمن مستقر...حياة افضل.
من اجل
محاربة الفساد....مقاومة التزوير
من اجل
ان تكون مقدرات هذا الوطن بأيدينا
شارك في الحملة الشعبيه للقيد بالجداول الانتخابية
ضع شعار الحملة علي مدونتك
عذرا علي عدم التعليق علي البوست

micheal said...

جامدة يا زيكا بس حاسس أني قرأتها قبل كده
يمكن تكون كتبت حاجدة شبهها
:)
متأخدش في بالك
ذاكرتي مهنجة دلوقتي

dr.lecter said...

انت مابقيتش تدون ليه كتتير زي زمان ياممدوح؟ واحشانا بوستاتك