Sunday, October 4, 2009

مجرد لعنه

فيه ناس اتخلقت عشان تنجح في الدراسه وفي الحياه العمليه وتتجوز بدري ويلاقي شغلانه حلال ويتجوز بنت الحلال ويبقا كل طموحه يعمل واحد حلال ويخلف عيلين يربيهم
فيه ناس اتخلقت عشان تحب الهندسه او الطب
فيه ناس اتخلقت عشان تبقا حد مشهور جدا في ابحاثها العلميه وياخد منصب كبير
انا مش من الناس دي بقا
لكن فيه ناس بقا اتلعنت
ممكن تبقى لعنه حلوه وممكن اللعنه تبقى كارثه .. الناس اللي اتلعنت
بداء الشعر . والادب
ولعنه تانيه اسمها " سينما " وبيسموها بارضه الفن السابع وده لانها جواها الست لعنات التانيه
العمارة والموسيقا والرسم و النحت والشعر والرقص
ست لعنات وهي السابعه
وفيه ناس اتعلنت بكذا لعنه من دول
انا منهم ؟ ... مين كمان ؟

17 comments:

adel said...

انا منهم ياعمونا

ملعون سينما و رقص و شعر و ادب
وهبل علي قلة ادب
وكمان مزيكا

يارب

z!zOoOo said...

انا إسمي مكتوب

طيب

طيب يبقي قيد اسمي معاك بقي

انا لو علي اللعنات من النوع ده

خد عندك

شعر وغنا وتمثيل وفن شعبي وعزف
وكتيررررررررررر

خد المقوله ديه مني يمكن تتقال في ويم من الايام

كلنا في الفن ملاعين

:)

يارب تكون بخير دايما

mahasen saber said...

انا مش معاهم انا عليهم...

مين مش ملعون ولاا موصوم بوصمة السينما وسحرها وخيرى بشاره
يا عينى على افلامك يا خيرى يا بشاره

MǿиY El-Shreef said...

ana mnhom

3andi la3na bas ba7bha

esmaha la3net el 7ob :)

dr.lecter said...

وهي الادب والفن والسينما والموسيقي لعنه؟

علي كده انا فخور باللعنه دي ومش عاوز اخف منها ونفسي اموت وانا بتنفسهم
ماقدرش اعيش من غيرهم

هبة الله said...

ويلكم باك يا زيكا،منورD;
أنا بقى لعنتى مختلفه تماماً.. انا عايزه اتعلم حاجات كتير، مهتمه بحاجات كتير و بالتالى مجهودى موزع على حاجات كتير فلا أتقن شيئاً و لا أعطى له ما يستحق من التركيز :

إذا تعددت الأهداف ضاع الهدف.

هبة الله said...
This comment has been removed by the author.
*البت المشمشية *حلوة بس شقية * said...

انتا فيه ايه مالك

*البت المشمشية *حلوة بس شقية * said...

بوستاتك بقت غريبة

aMr SaYeD said...

طب في الصف يا اهبل يا .......
مش عارف كل اما تشتم تتمنع
واحشني يا حليب هارتي

سارة نجاتى said...

أنت عاوز تصقيفة على وصف ملعون دى

و بجد أنا مش عارفة أقولك ايه
أنت وصفتها صح
بس أنا عايزه أعرف رايك فى " ملعون " دى
يعنى ازاى ملعون ؟؟ - أصلها بتختلف من حد لتانى -
هو أنا عليا لعنة الأدب و القصة و الصحافة و الاعلام
ده غير كام لعنى تانية كده ملهمش دعوة بتصنيف معين بس تعبنى أوى , ابقى أقولك عليهم بعدين

بس الموضوع ده محتاج يتكتب فيه مرة تانية على فكرة بتفصيل شوية ؟؟
فى دماغى فكرة موضوع مشترك كده
ابقى أقولك بعدين برده
و تعالى قول لمدونتى كل سنة و هو طيبة و شوف ح تجيب لها خاتم سوليتير كام قيراط يلا

micheal said...

طبعا أنا وأنت عارف لعنتي كويس
:)

شاب فقرى said...

حلو ة فكرة اللعنات وفكرت فيها قبل كدا

لقيت انى بفكر كتير اوى

ممكن توصل لدرجة الفلسفة

وبكتب

وبسمع موسيقى

وبحب الشعر والسينما والفن بجميع اشكاله

فعلا لعنه :)

تحياتى

وحتما لنا عودة للمدونة

شاب فقرى

Bent Men ElZaman Da !! said...

تخيل بقى ان ناس مايبقاش عندهم اى لعنه حلوه
ولا ليهم فى الطب ولا فى الهندسه
دول بقى اللى انا منهم :D

مواطن مصري said...

انا ملعون ب الفن السابع زيك

عاوز ادرس سينما مستني ام الجيش و بعدها هقدم في مدرسة الجزويت

مجرد مدونة said...

على فكرة يا برنس الليالى العملية مش كده نهائى، صدق او ما تصدقش
واديك بتشوف كل يوم قدامك ناس بيبقوا حاجة وبيتحولوا لحاجة تانية تماما
وهكيلك حكاية يا برنز بس ما تاخدهاش بتحيز يعنى انا لا انا واعظ ولا شيخ
عشان انت بتقول كلام يعنى محسسنى انك خلاص عملت الذنوب اللى فى الدنيا كلها
طب خد دى عندك بقى
واحد كان شغلته قاطع طريق معلش انا مش بحكيلك افلام ابيض واسود وكده
انت عارف يعنى ايه قاطع طريق ده؟؟
يعنى فتوة كده بيقطع على الناس الطرق اللى بيسافروا او يمشوا فيها يسرقهم، وكان مشهور اوى وكان اسمه الفضيل
وكان من شهرته ان لو واحدة عايزة تخوف عيالها تقولهم اعملوا كذا وإلا هجيبلكم الفضيل، يعنى زى امنا الغولة كده عند العيال الصغيرة
المهم ان الراجل ده فى يوم رايح يسرق بيت فطلع ع الجدار سمع واحد بيقرأ قرآن بيصلى او كده وقرأ الآية:
{أَلَمْ يَأْنِ لِلَّذِينَ آمَنُوا أَنْ تَخْشَعَ قُلُوبُهُمْ لِذِكْرِ اللَّهِ وَمَا نَزَلَ مِنْ الْحَقِّ وَلا يَكُونُوا كَالَّذِينَ أُوتُوا الْكِتَابَ مِنْ قَبْلُ فَطَالَ عَلَيْهِمْ الأَمَدُ فَقَسَتْ قُلُوبُهُمْ وَكَثِيرٌ مِنْهُمْ} فَاسِقُونَ [الحديد:16]

سمع الآية حس انها ليه هو فتاب على طول، وصدقت توبته لدرجة انه بقى بعد كده إمام من أئمة المسلمين لحد اللحظة دى، هل تتخيل انت لو كنت تعرف بنى آدم بالشكل ده انه ممكن يتوب
يا صديقى احنا اللى بنلعن نفسنا بنفسنا
ادعى انت بس
*معلش بقى ما عرفتش أأبح معاك :))

نعكشة said...

طب انا عاوزة كله
ههههههههههههههههه؟

من اللى فوق و اللى تحت

كدة ابقى ملعونة برضو؟؟؟
مينفعشي؟؟؟

خير خير


سلام عليك