Wednesday, August 26, 2009

مطلوب وطن





اخر رسومات الولد كانت حاجات




تشبه ملامح للبلد وقت السكات




احرق بقى كل الصور




وطفي كل الراديوهات




ايه معني لما يكون بلد




ماتشوفش فيه ضحك البنات




وزقزقة طير ع الشجر




والحزن في وشوش البشر




مالي الجرايد اعلانات




ان الوطن ... باينه مات




اخر خبر ان الوطن




مش باقي منه غير سكات




ورسمه للنيل والولد .. والاهرامات




اخر خبر موجود في كل الراديوهات




ان الوطن .. باينه مات




مش باقي منه غير آسى يهد البدن




انسان ولكن .. مات ومن غير الكفن




اخر خبر .موجود ولازم تسمعه




ان الوطن .. باينه مات




احرق بقى صورك وكل الذكريات




ده ماعادش لسه فيه امل




يقدر يطيب جرح فات




اخر خبر .. تقراه وتضحك وبسكات




ان الوطن ... باينه مات




مافاضلش منه غير احاسيس الخطر




وصوت غناوي عود ومقطوع الوتر




ماطلعش منه غير غناوي ع اللي فات




اخر خبر .. تقراه في كل الاعلانات




مطلوب وطن .. اصل الوطن . باينه مات






ممدوح عبد الحميد



زيكا

8 comments:

مواطن مصري said...

حلوة بس الوطن مماتش لان الوطن هو احنا


البني ادمين عايش فينا

أن مصر وطن يعيش فينا وليس وطنا نعيش فيه

z!zOoOo said...

السلام عليكم

ازيك يا زيكا

طبعا هايله

عارف ياض يا زيكا اشعارك ديه شبه اشعار ليا

بس اكتر شبه اشعار صديقه عزيزه ليا

بحس فعلا إنكم شبه بعض قوي

وهي برضه بتمثل مسرح

احساسكم شبه بعض جدا

بحس ان كتاباتك وكتاباتها وبعض كتاباتي شبه بعض جدا

فعلا تشابه يلفت النظر قوي حتي في التشبيهات والتعبيرات سبحان الله

لكن بصراحه انتوا الاتنين ما شاء الله عليكم

بس هي متميزه جدا جدا في القصائد العاميه

وجدا جدا جدا في الفصحي

وجدا من هنا لعشر سنين قدام في القصه

بس بجد قصيده حلوه رغم حزنها

لكن فعلا البلد بتلفظ انفاسها الاخيره

بتحتضر :(

ربنا يكرمك

وتمتعنا بحاجاتك الجميله يا ابو الزكازيك

:)

كل سنه وانت طيب

adel said...

عاجبتني قوي قوي
بس ليه ياعم قتلت البلد هي ناقصة
بس اللي بيموت مش البلد
احنا اللي بنموت و بالبطئ كمان

micheal said...

أستاااااااااااذ يا زيكا..هي دي الصورة اللي بعتهالك قبل كده في ميل؟
:)
تحياتي

Che said...

جامده جدا يا زيكا

magi said...

حلوه جدا يا زيكا
هو انت نزلتها قبل كده على الفيس؟؟

Zika said...

عمرو
الوطن رايح مشوار
زيزو
طيب يا ابو الزييز ماتورينا اشعارها يا اخي انا بحب اقرا في اللون ده واتعلم منه جدا
عادووول
كله بيطلع في الغسيل يا عادوول
مايك
ايوه يا برنس هي ولسه محتفظ بالالبون ده عندي جامد كييك ربا ما يحرمنا منك ومن ايميلاتك
عمرو بارضك
تسلملي يا حبي
ماجي
نزلتها في جروبات عالفيس لكن مانزلتهاش في نوت وكده

منورين يا كماحه

هبة الله said...

روعه يا زيكا