Sunday, October 26, 2008

رساله الي الله

الكلام ده كان من زمااان اوي , من حوالي 10 سنين
كنت في ابتدائي لما المدرسه بتاعتي طردتني انا واواحد صاحبي بره الفصل عشان روحنا التمرين وماعملناش الواجب
وقالتلنا الكلام ده :
" انتوا ازاي ماتعملوش الواجب انتوا ماتعرفوش ان الي ما بيعملش الواجب بيروح النار ... انتوا كده ربنا هيدخلكوا النار عشان ربنا ما بيحبش الاولاد اللي زيكوا , الولاد اللي ما بتعملش الواجب وبتلعب .. ربنا ما بيحبش الولاد اللي بتعد تهزر وتلعب وتسيب مذاكرتها اي حد مابيحبش المدرسة بيروح النار وانتوا كده ربنا هيوديكوا النار "
رديت انا وقلتلها :
" بس يا ميس انا عارف ربنا مش هيدخلني النار عشان هو عارف اني كنت عايز اروح التمرين "
ردت وقالت :
" استغفر الله العظيم يا حيوان يا سافل في حاجه اسمها ربنا يعرفني اوعي تتكلم علي ربنا كده تاني يحسن تدخل جهنم "
طبعا ماكانش ينفع اروح اقول لاهلي ان الميس زعقتلي عشان ماعملتش الواجب
فكرت انا واحمد صاحبي نعمل ايه نعمل ايه
قولنا نبعت رساله لربنا نقوله فيها عاللي حصل
وجيبنا ورقه كبيره
وكتبنا من فوق
بسم الله الرحمن الرحيم
المرسل : انا ممدوح يارب ومعايا احمد ( احمد ابو نضاره يارب مش احمد التخين ) ز
المرسل اليه : ربنا
المكان : فوق في السما
الرساله :
"بص يارب احنا عارفين ان احنا غلطانين ان احنا مش عملنا الواجب بس نيرمين دي رخمه اوي ارخم ميس عندنا في المدرسه وطردتنا من الفصل وضربتنا كمان يارب مشيها من المدرسه او موتها او اي حاجه المهم مش تدينا تاني وشكرا
باي
"
قعدنا اسبوعين الميس ما اتحركتش من المدرسه
ابتديت اقتنع انا واحمد ان ربنا ما بيحبش الولاد الصغيرين عشان ما بيمسعوش الكلام و بيلعبوا ومابيعملوش الواجب
لحد ما قولنا نبعت لربنا رساله تاني
المرسل : ممدوح واحمد صاحبه ابو نضاره مش التخين اللي قاعد في تخته 3
المرسل اليه : ربنا
المكان : فوق في السما
الرساله :
" يارب احنا كنا بعتنالك رساله من فتره عشان تطرد ميس نيرمين من المدرسه زي ما هي طردتنا من الفصل بس هي مش انطردت هو انت فعلا يارب مش بتحبنا ... طب ليه يارب ده احنا بنحبك والله وعايزين ندخل الجنه وانا امبارح خلصت حفظ جزء عم كله .. يارب . هو انت ليه مش بتطلعلنا .. هو انت بتكرهنا زي ما هي بتقول , هو انت ليه بعيد اوي كده وعمرنا ما بنشوفك .. ممكن يارب نطلب منك طلب
عايزين ميس نيرمين دي تمشي من المدرسه لو سمحت
ياللا سلام
"
المهم قعدنا اسبوعين تاني وبعدها دخلنا الفصل واحده زي القمر قالتلنا
" ازيكوا يا ولاد انا اسمي ميس مي وانا هديلكم انجليش بدل ميس نيرمين عشان ميس نيرمين خدت اجازه لمدة سنتين "
فرحت انا و احمد جدا وقولنا هيييييييييييييييييييييييه
استغربت جدا الانسه مي وضحكت ضحكه رقيقه كده وقالتلنا ياللا نبدا الحصه بقي
بعدها بكام سنه كده عرفت ان ميس نيرمين كانت حامل وخدت اجازة وضع

6 comments:

سارة نجاتى said...

لأ متقوليش أن ده حصل , و قعدتوا تكتبوا فى ورق كمان , طب ممكن تكلم ربنا لكن انتوا عملتوا مرسل و عنوان , يا عم المدرسين بتوع ابتدائى بالذات محتاجين تأهيل نفسى , بس قولى تفتكر لو قعدت أكتب لربنا كذا مرة ممكن تيجى معايا زى ما حصلكوا كده ؟؟

ابقى نور مدونتى اليتيمة

سلام

~*§¦§ Appy §¦§*~ said...

عارف ده احنا بنعمله بس مش بورقه وقلم انت مبتكر بس ههههههههه
وربنا استجاب ليك
طيب قولى انت بعت الورقه على فين

Zika said...

ساره نجاتي
ده حصل
كتبنا ورقه وحطينا الورقه في جواب
وربنا استجابلنا
============
المدرسين بالذات محتاجين تاهيل نفسي
لان الانسه دي
قالتلنا اننا هندخل النار
رغم ان ربنا بيحب الاطفال
سابت ايه الاطفال مش بيعملوه وقالتلنا انه حرام
لو كلامها حقيقي ليه ربنا هيحب الاطفال ؟
ولا ايه ؟

Zika said...

appy
اه شوفتي يا ابي من صغري وانا عفريت ومبتكر
ههههههه
كنت مستني حد يسالني السؤال ده يا ابي
وانا مابعتش الورقه في حته انا حطيت الورقه في اقرب مكان ممكن كنت اوصله قريب لربنا
يعني حطيت الجواب فوق السطوح

EmY said...

ههههههههههههه بجد انت عسل يا زيكا
طفل فوق العاده بس بجد الجواب يجنن لازم يدخل في منهج المدارس
في مدرسين كده فعلا يكرهو الطفل في نفسه و في التعليم كلو
بس مكنتش بتعمل الواجب ليه كسفتنا

إياكش تولع said...

طب مادام انت سرك باتع كدة ما كنت كتبتلنا جواب عشان الريس يمشى من البلد...يا راجل يا بركة