أنا بحب أنام ع الطرف ( في هجاء التفاصيل )

يا شيخة ملعون أبو التفاصيل اللي تخلّي الواحد يسيح في التوهان زي العيال الصغيرة ويفتكر كل كبيرة و 
وايه ؟
مفيش صغيرة .. مفيش تفصيلة صغيرة 
كل التفاصيل حتى لو بسيطة .. كبيرة ولو ماكانتش كبيرة ..أهي بتكبر مع الوقت

أيوه أنا لسه باحب أنام على طرف السرير والمشكلة دي مالهاش غير حل واحد .. اننا نحط السرير في نص الأوضة
عشان كل واحد فينا يبقا عنده الطرف بتاعه
وبالمرة نتقابل في المطبخ الفجر واحنا قلقانين في نص النوم

لسه بتفكّري في الأمومة اللي اتحرمتي منها طول حياتك ؟!  ربنا شال عنك كل تفاصيل الأمومة عشان لما يحرمك منها ماتتضايقيش أوي كده
الجرح على قد ما بيوجع بيعلّم .. ومابنحسِش بعلامة غير بعد فترة 


كلام هايف صح ؟


أه


- ازيك ؟
- الحمد لله أهلا ازيك 
- أنا كويس الحمد لله .. ألا قوليلي .. لسه بتشربي النيسكافية من غير ولا معلقة سكر
- يفرق معاك
- يفرق مع التفاصيل
- وايه فايدة التفاصيل ؟
- التفاصيل بتفرق في الذكريات
الذكريات اللي بتخليكي تبتسمي وتقولي ياااه
 " كبرنا .. كم كبرنا "
- درويش كان عارف
- درويش عارف على طول

القعدة جنب الشباك ؟
لأ لأ مش بتفرق .. خصوصا اني مابقتش أركب مواصلات كتير , بافضل المشي
وأه .. لسه بامشي على سطر وأسيب سطر
وفي شارع قصر النيل تحديدا البلاط الأحمر , عارف كل حاجة

شغل عيال معلش
الساعة اتنين بالليل تغوصي ايدك في الليل فتتعاص سواد
سيبيلي أنا اللون ده عشان بحبه
وشيلي ايدك بشويش من على خدّي , من غير ماحد ياخد باله
ماحدش هاياخد باله
ماتخافيش
كلهم ساكتين .. وبيتفرجوا
الشوارع مابتكلّمش حد .. مش كده ؟
الشوارع مابتكلّمش حد