الفجر

ده جزء من قصيدة ليا اسمها - فرصة لابتهالات القمر - القصيدة من مشروع ديوان ليا غير الديوان الحالي اللي دخلت بيه مسابقة ساقية الصاوي واللي بحاول انشره ..وطبعا بمجرد ما خلصت المشروع الاولاني ..حبيت أبدا على طول في المشروع التاني من دلوقت ودي مجرد بدايات ماعرفش ليه حسيت اني عايز احط الجزء ده لوحده في البوست ده

---------------------------
والفجر

بيضلل على سطح الجامع

وبيوصل من بكره لبَعدك

و ف بُعدك ياما شاور عقله

وبعقله .. بيصبر صوتي

فَ يصبر حسك بالغنوه

فتتوب الغنوه على ايديكي

ويتوب الفجر و بيآمن

فَ يصلي الصبح على وضوءك

وبيلمح صوتك على بُكره

فَ بتفرح شمسك وبتجري

فتنور بكره ويتصور

الصوره بتطلع من حسك

وبحسك تطلعله الغنوه

فيغني ويفرد للغربه

وتبوش الغربه من الملمح

وملامح وشي بتتغير

وانا باغسل جرحي وباتفرج

على نُص ملامحي بتتصبر

على بصة ملمح من عينك

على ضي عينيكي بتتشاقى

واستسلم لامبارح برضك

وانا راضي وطيفك نتلاقى