Thursday, November 12, 2009

طلقتين في الهوا

(1)

من كام يوم اتعزمت على فرح شعبي وجاتلي الدعوه كالآتي

السيد / ممدوح عبد الحميد زيكا وحرمه

اموت واعرف مين " حرمه " ده ولا هي الدعوه جايالي غلط ولا ايه

يتشرف البرنس محمود ابو هيام بدعوة سيادتكم لاحلى الليالي واجمل الليالي

احتفالا بزفاف كريمته

" H "

على المعلم احمد محروس

" ماعرفش كاتب اتش ليه ماهو هو اصلا اسمه محمود ابو هيام يعني هو الاتش ده هيكون بيعبر عن ايه .. هشام ابن خالتي مثلا ما اكيد هيام "

وهذا بحضور لفيف من افضل المطربين الموجودين بالساحه

بحضور

الراقصه وعد

يحيي الحفل الفنان " العالمي " عبد الباسط حموده والفنان محمود الليثي والفنان شعبان بغبغان

الاخراني ده اسمه جامد اوي

بصراحه القعده في الفرح كانت لذيذه على الاقل شوفت عبد الباسط حموده وانتوا لأ هههههههههههه

الافراح اللي كنت باروحها كان بيبقا فيها بوفيه مابقربلوش

او شوية حاجات سخنه او مثلجات

لكن ان البوفيه يبقا عباره عن حشيش وبانجو بانواعهم

اهو ده بقا اللي جديد عليا

والدرينك كان ستيلا اربعه ونص المعفنه دي

اما بالنسبه للمعازيم .. فكانوا لفيف من المجرمين وسواقين الميكروباص والذي منهم

بمناسبة المجرمين

وبمناسبة شغفي اليومين دول بالجو ده عشان سمعت كلام الاستاذ احمد سيمر فرج المخرج الجميل اللي قاللي ان المخرج الشاطر لازم يشوف كل حاجه ويتعلم على قد ما يقدر


لكن الغريب ان البيره دي عادي يعني موجوده في الشارع كده قشطه كانها شمعدان يعني

واحد كان قاعد جمبي بيقولوله يا عم غريب

هو فعلا كان غريب

اول ما قعدت طلبلي بيره

" وطلبلي بيره وطلبلي بيره "

البيره اصلا طعمها مختلف عن البي ... ااايه قصدي اقول ان استغفر الله العظبم يعني طلبولي بيره انا يطلبولي بيره

انا

انا الطاهر العفيف الشريف اللي من البيت للجامع ومن الجامع للبيت

بعد الفرح روحت مع لفيف من الاخوه المعزومين

لقهوه قريبه ... قهوه لطيفه خالص حتى اللي شغالين فيها انا طلبت بيبسي وتفاحه زي اي بني ادم بيقعد على قهوه بلدي طبيعي جدا يعني مافيش اي حاجه غريبه


وانتبهت بقا لما واحد منهم بصلي وقالي لا يا " ابن عمي " ماتلاقيش هنا الحاجات دي تشرب معسل ؟
لا شكرا مابحبوش
هات شيشه معسل هنا يا توفييييييق وهاتله شاي
بس انا مش بحب الشاي يا كابتن
خلاص هاتله شاي فتله

انا مقتنع ان فيه شوية اختلافات بينا وبين الناس دي من حيث يعني انك تبقا قاعد

حاطط العلبه المارلبورو في وسط لفيف " عجباني لفيف دي اوي " من الكولوباطرا هي بتنطق كده كليوباترا دي اكيد واحده قريبتها

انك تبقا مش لابس دبله حتى لو مش خاطب

انك وسبحان الله مش حاطط جيل

انك سبحان الله بارضه مايبقاش عندك شنب

كل ده مقبول

لولا اختلاف الاذواق لبارت السلع


(2)

البوست ده اعتراضي لا محل له من الاعراب

(3)

كل اللي يدخل هنا يقول لياسمين كل سنه وانتي طيبه
بمناسبة عيد ميلادها
بما ان ياسمين مش حد عادي
يبقا اكيد عيد ميلادها مش عادي
وان شاء الله السنه الجايه اشوفك في بيت العدل ياختي يارب
وتكوني كده بقيتي اي حاجه حلوه ان شالله تبقي رئيسة مهرجان القاهره السينمائي
وهابي بير دار تو روووووو

وفي النهايه بمناسبة العالم البيئه اللي انا قعدت معاهم
وبمناسبة ماتش الجزاير وبمناسبة حاجات كتيره اوي مالهاش علاقه بعيد ميلاد جيسي
احب اقول لكل الناس كلمه واحده

كلمه واحده هارد بيها على كل كلامكوا

اجوجوجوجوجوجوجوجو

7 comments:

adel said...

انا اسيبك يومين يحصلك كده برضه
هههههههههههه
لابس عاجبني البوست ده يا واد

وكل سنة و ياسمين طيبة

-------
مين ياسيمين دي ؟؟؟
سؤال بايخ التنين يعني

وفكك من احمد سمير فرج ياعمونا
:):)

z!zOoOo said...

ازيك يا زيكا

يارب تكون بخير

مش عارف ليه كنت هعلق علي لفيف ديه
هههههههههههههههههه

حاطط العلبه المارلبورو في وسط لفيف " عجباني لفيف دي اوي "

فكرتني بفؤاد المهندس لما قال " عجباني قوي حكايه الازازه في البزازه ديه " ههههههههههههه

تصدق انا كمان مش عارف ليه عندي عقده من البوفيهات دا انا في فرح اختي مامديتش ايدي عليه ههههههه


انك تبقا مش لابس دبله حتى لو مش خاطب

انك وسبحان الله مش حاطط جيل

انك سبحان الله بارضه مايبقاش عندك شنب

افهم بقي ايه المأساه في الجزء ده

علل

:D


وكالعاده موضوع مهيس زيك

دمت مهيسا يا برنس الليالي

:)

Mahmoud البطراوى said...

يخرب بيت ام الهييس اللى كل مره اجى الاقيك عامله فى المدونه بتاعتك دى
:D

ربنا يدمها نعمه ويحفظهالك :D

Che said...

ايييييييييييييه يا زيكا
كده ماتسألش عليا و انا غايب المده دى كلها ... اخيييييى عليك يا زيكا
المهم بالنسبه لموضوع الفرح ده جااااااامد ... ابقى تعالى و انا اقعدك على افراح من دى كتير .... و فعلا طعم البيره بيبقى غريب ... بس ده فى الغالب عشان حاسه الشم و التذوق بتبقى بايظه وسط خليط روايح الحشيش و البانجو
انا هنا بضم صوتى لصوت عادل ... مين ياسمين دى ... و على كل حال
هابى بيرث داى يا ياسمين

micheal said...

يا خسارتك يا زيكا..ما كنت كويس يا ابني
:)
وبعدين فرح البوفيه فيه كله حشيش ومتقولش لصاحبك
اهيء اهيء
هو إيه حكاية عبد الباسط حمودة اليومين دول
سؤال إعتراضي
:)

سارة نجاتى said...

انت بتتكلم جد؟؟

رحت الفرح ده بجد؟؟

Anonymous said...

loooooooooooooooool gamdaaaaa wallhi begad enta gaaaaaaaaaaaamed :D:D
we tyyyy ya 7abiby rabna ye7'aleek lyaa yarab ya rafe3 ma3nwyaty dayman :D:D