Wednesday, April 22, 2009

عمود نور



لما تبقي الدنيا ضلمه في شارعنا , وانا بمشي في الطريق علي ضوء عواميد النور اللي في الشارع وبغني , الساعه اتنين تلاته بالليل


قعادي عالقهوه لوحدي الساعه 4 الفجر وبصوت عالي شاي خمسينه يا اسماعيل

ويرد اسماعيل .. شيشتك ؟

اساسي


لما اقعد اكتر من عشرين يوم بحاول اذاكر بس ماقدرش واحس ان فيه مانع قوي لاني ذاكرت كويس اوي التيرم الاول ورغم كده شيلت مادتين .


خروجاتي مع صحابي اللي بحس فيها اني لوحدي


خوفي من اني احب من جديد بعد رنا ودينا الله يرحمهم


لما اقابل واحد صاحبي . بقالي كتير اوي ماشوفتهوش ويعد يكلمني عن حياته ييجي نص ساعه وفي الاخر يقولي

ياللا سلام ........ عاوز حاجه يا حماده ؟


لما افتح الانسر ماشين الاقي الناس بتسكت اول ما الاوتو انسر يفتح . زي ما يكون في كائن فضائي رد عليهم


احساسي وانا بارقص رقص ارتجالي عالمسرح لوحدي وحسام بتاع الاضاءه مركز النيون عليا انا


احساسي وانا بقرا الاشعار والاغاني والقصص اللي انا باكتبها والتناقض اللي بيجيني ما بين اني بكتب كويس او لأ


شعوري دايما بالخوف من الالم اللي في ضهري انه ينهي مستقبلي


الخوف من السقوط , ومن الفشل


الضحكه اللي بتطول اوي رغم انها من غير سبب ,, والدمعه اللي ليها اسباب كتير اوي للاسف مابتستمرش اكتر من اربع خمس ثواني


ضحكة طفلة صغيره جميله اوي واحساسي انها بتحبني اوي , واحس انها بتاعتي نفسي اكون اب لبنت زي دي , وفجاه ييجي ابوها وامها وياخدوها ويبتسمولي ويمشوا بعيد



عمود نور

ممدوح زيكا

( فترة توقف )

20 comments:

MǿиY El-Shreef said...

ايه الاحاسيس الكتير الي جواك دي يازيكا

انا حاسه انك حزين شويه

الله اعلم

ربنا يخفف عنك

:)

مواطن مصري said...

ما اقعد اكتر من عشرين يوم بحاول اذاكر بس ماقدرش واحس ان فيه مانع قوي لاني ذاكرت كويس اوي التيرم الاول ورغم كده شيلت مادتين .


خروجاتي مع صحابي اللي بحس فيها اني لوحدي



نفس الاحساس دة بيجيلي و عايشة الايام دي
و الله

اوقات كتير بحس اني لوحدي ب الرغم وجود الاصحاب


اكنك بتتكلم عن نفسي

adel said...

نفش الاحاسيس بالملي عندي
ماعدا اني مش بشيش
:):):)

Unknown said...

اشطة
شد كرسى وتعالى اقعد هنا يا فندم
مربا بك فى نادى المغتربين نياهاهاا

micheal said...

نفس الخوف ونفس الهواس مع اختلاف السبب الظاهري
ألمتني يا فنان بجد
بس ايه فترة توقف دي
معلش..أنا حدخل واستني الجديد وعلي فكرة أنا علقت علي بوست البيض اللي كان فايتني
:)
تحياتي

مواطن مصري said...

الظاهر يابو الزيك ان اغلب المجتمع التدويني مريض نفساوي



:(((

msafa said...

حلوه احاسيس الفنانين اوى اوى
روعه

aMr saYed said...

توقف يا اخي ........
..
قال توقف قال هع هع هع هع هع

يا اخي ........

ليه بس كده وبعدين تخرج معانا وتحس انك لوحدك يا راجل ديه المعمورة تشهد عليك والبورصة والوالي وشبابيك اداب و كابتشينو الساعة 5 ووووووو هعدلك ايه ولا ايه وبعد كل ده تقول لوحدي يا اخي ..........

بقولك ما تيجي نروح بكرة نتفرج على الماتش في البورصة عشان عمو هبا بقا والله راجل عسل

سلاموز يا عم الوحيد

شاب كــ طخين ـــــا said...

ايه الكلام والأحساس العالى ده يا زيكا
بجد بوست جميل اوى

سارة نجاتى said...

هو ايه ده اللى فترة توقف ؟؟

اوعى تكون ناوى توقف , ح أبعت لك صاروخ أرض أرض عندكوا ع الجيزة و لا انت قصدك حاجة تانية و انا اللى مش فاهم

لازم نزعل شوية و نزهق شويتين عشان نحلف بحياة اللحظات الحلوة , ده اللى أختك سارة اكتشفته مؤخرا

سمراء said...

احساسك صادق

سمراء

dr.lecter said...

انت هتبطل ولا ايه يابني؟

مالكم فيه ايه كلكم عاوزين تبطلوا ليه؟

z!zOoOo said...

السلام عليكم

ازيك يا زيكا يارب تكون بخير

واحشني علي فكره وكنت بفكر فيك كتير

أفتكر إني قلتلك إني حاسس إنك شخص قريب مني رغم معرفتنا البسيطه

واليومين الي كنت غايبهم كنت قلقان عليك وكنت عايز اجيب نمرتك عشان اطمن عليك


ندخل في الموضوع


خروجاتي مع صحابي اللي بحس فيها اني لوحدي


ساعات كتير بحس كده



لما اقابل واحد صاحبي . بقالي كتير اوي ماشوفتهوش ويعد يكلمني عن حياته ييجي نص ساعه وفي الاخر يقولي
ياللا سلام ........ عاوز حاجه يا زيزو ؟


برضه ساعات عادي يعني



احساسي وانا بارقص رقص ارتجالي عالمسرح لوحدي وحسام بتاع الاضاءه مركز النيون عليا انا


تصدق ياض يا زيكا نفسي قوي اعمل كده
بس يلا زي ما بيقولك سبع صنايع والبخت ضايع

( انا عارف تلاقيك بتقول اهو نقكم ده الي جايبنا ورا )

احساسي وانا بقرا الاشعار والاغاني والقصص اللي انا باكتبها والتناقض اللي بيجيني ما بين اني بكتب كويس او لأ

يووووووووووووووووه علطول بحس كده وافضل احقر من نفسي بس عارف بشوف حلاوه الحاجه الي بكتبها في تعبيرات الي بيقروا حاجاتي

وكمان لما حاجه بتتسرق مني بعرف إن كتاباتي علي مستوي



الخوف من السقوط , ومن الفشل

الضحكه اللي بتطول اوي رغم انها من غير سبب ,, والدمعه اللي ليها اسباب كتير اوي للاسف مابتستمرش اكتر من اربع خمس ثواني

ضحكة طفلة صغيره جميله اوي واحساسي انها بتحبني اوي , واحس انها بتاعتي نفسي اكون اب لبنت زي دي , وفجاه ييجي ابوها وامها وياخدوها ويبتسمولي ويمشوا بعيد

نو كومينت


محدش ما بيمرش بفتره احباط

أنا اليومين دول حدث ولا حرج

لدرجه إني لما باجي اعمل اي حاجه بحبها بحس بالذنب تخيل ؟

مش حاسب لحاجه ولا دريان بالي حواليا ومش من غير هدف زي الطفل التايه


طيب هوانا هحكيلك قصه حياتي ليه

تصدق إني لما بكون مخنوق وعايز ارفه عن نفسي بدخل مدونتك الاشعاريزم وافضل اقرا فيها حاجات حتي لو كانت نكد بحس اني انا الي كاتبها

بص صدقني يا زيكا لو حسيت إن البعد افضل ليك الفتره ديه يبقي ابعد فتره


لكن تقدر تسيب كل الناس الحلوه ديه قلقانه عليك

طيب قولي

تقدر تنساهم ؟؟

كل واحد وبتجيله فتره ركود وحزن وإكتئاب وكمان إنتفاخ :)

لكن حاول تعديها بسرعه وقضيها

اظن إن أ،ت عارف الي انا فيه بس اهو بحاول افك علشان لو مفكيتش هطق وياريتني عارف

يلا الحمد لله علي كل شيء

معلش انا طولت قوي

بس عادي بقي اولا انت بتحب تعليقاتي ( إنت الي قولت )

ثانيا اعتبرنا قاعدين علي المصطبه

يلا عايز حاجه يا حماده

همشي بقي ايه مش انا حكيت الي عندي :) :)

عايز تكون صامد كده يا واد

واسمع عنك كل خير

ربنا يوفقك ويوفقنا جميعا لما يحب ويرضي

في رعايه الله

z!zOoOo said...

نسيت اقولك صحيح

إحساسك في البوست عالي قوي

:) :) :) :)

مواطن مصري said...
This comment has been removed by the author.
MaNoOoSh said...

على فكرة انت مكتئب
طبعا هتقول منا عارف.. يعنى ايه البنت الرزلة دى اللى بتقوللى كدة
ههههههههههههههه
عادى اننا نكتئب يعنى محنا بنى ادمين.. بس حاول متسمحش للاحساس دة ياخد وقت طويل
ربنا يحققلك ما تتمنى من خير

ست الحسن said...

بصراحة
صعب أوي الواحد ميعلقش على تدوينة دافية أوي زي دي

انت بتعرف تكتب فعلاً
لأنك قدرت تنقل إحساسك بصدق

ومش عارفة أقولك إيه
أكتر من انك تتمسك بإيمانك بنفسك
وبموهبتك

وإحساس الطيران ع المسرح ده
خاص جداً
والأسئلة عن ان الواحد بيعرف يكتب كويس ولا لأ
دي أسئلة مبتتنتهيش

..........

روق بس
وكل حاجة هتبقى كويسة

ومتشكرة أوي ع البوست الجميل ده

....

الدرعمي said...

وجعت قلبي يا زيكا .. خصوصا موضوع وانت بترقص والنيون مركز عليك .. استهدا بالله @ ربنا يهدي بالك @

Unknown said...

هو فترة التوقف لسة مخلصتش؟؟
بلاش انت والنبى الله يخليك

اسماء عوني said...

وحشني كلامك ومواضيعك
يالا انهي فترة التوقف دي ماهو انا مش الناس اللي بحب اقرالها تاخد فترة توقف واتفقع انا بقي