Saturday, January 31, 2009

للكبار فقط




كلمة للكبار فقط بقيت اشوفها علي اي فيلم مش ناقص غير افلام هنيدي كمان اللي ناقص يقولوا عليها للكبار فقط بارضه , رغم انك لما تدخل الفيلم تلاقي بؤين حمضانين مالهمش اي معني او معناهم خفي من حيث يعني انهم يبانوا انهم بيفهموا وكله عايش في دور يوسف شاهين .....




دايما بلاقي في الافلام حاجه غريبه اوي اسمع قبل ما ينزل الفيلم ان فيه مشاكل مع الرقابه كبيره جدا .. وبعد اما ادخل الفيلم الاقي المشاهد الخارجه موجوده ومفيش اي مشكله والحياه حلوه .. الله ده علي كده الرقابه متفهمه اهو اومال ايه ؟


اقولكوا انا اومال ايه رغم انها مش محتاجه نباهه يعني اي حد يفهمها


الحقيقه ان الرقابه ما بتبقاش علي المشاهد الخارجه بالعكس انا حاسس ان الرقابه بتنبسط من الحوار ده لكن الرقابه بتبقي علي جمل سياسيه تتخطي الحدود الحمراء الحدود الحمراء طبعا اللي مش ضمنها الجنس خالص عشان ماحدش يضحك عليكوا


الخطوط الحمرا هي الدين والسياسه فقط


بدليل ان فيلم حين ميسره اتشال منه حاجات كتيره بذلة لسان من خالد يوسف لكن من غير ما تتشال منه مشاهد سميه الخشاب




فيه مشكله في عقول الرقابه ازاي بيقولوا ان افلام اليومين دول بقت تتركز علي المشاهد دي .. كانت فين الرقابه في افلام السبعينات والتمانينيات لحظي السئ اني بقابل بالصدفه كل ما اتنيل اقعد علي التليفزيون افلام من النوع اللي هي بتبقي لونها مصفر دي ايام ماكانش فيه في مصر الوان غير اصفر واحمر .. كنا يادوب الالوان دخلت السينما العالميه بقالها قرنين بس مش كتير يعني


نرجع لموضوعنا .. ايه مفهوم الرقابه علي المشاهد الجنسيه


يعني هل هو لبس معين للست او للراجل


ولا علاقه بين الاتنين ويا تري ايه حدود العلاقه دي


حاكم انا اصلي عمري ما شوفت فيلم لعادل امام او نور الشريف او محمود عبد العزيز والتلاته دول بالذات .. مافيش فيلم غير لما بلاقي فيه مشاهد ماحدش بيقدر يعملها دلوقت ولو اتعملت بنلاقي ضجه كبيره


هل زمان كنا متفهمين ودولقت متخلفين ولا العكس




مين اللي حط الخطوط الحمرا , وليه يبقي فيه خطوط حمرا هو احنا ضالين يعني ومش عارفين الصح من الغلط , وفطبعا محتاجين حد يقولنا لا كده عيب وكده كخه وولد .. بنت عيب مايصحش


الرقابه الوحيده اللي ممكن اوافق عليها هي الرقابه العمريه لان اننا في مراحل معينه بنفهم الحياه بزوايا مختلفه عن اللي بنشوفها بيها واحنا اكبر لكن بعد كده .. لا للرقابه ولا للخطوط الحمرا




كلمة للكبار فقط بقت كلمه عاديه هي بس مجرد دعايه مش اكتر عشان تلم اكبر عدد من اللي عايزين يعرفوا ليه لكبار فقط مع ان الفيلم ولا للكبار فقط ولا نيله

42 comments:

micheal said...

صح يا أبو الزيكا انت حلتها في اخر البوست..لاجملة بقت للدعاية ليس أكثر
علي فكرة متفق معك مليون في المية في كل البوست
ومبسوط أكتر أني سبقت الكابتن وبقيت أول كومنت
:)
تحياتي

البت المشمشية حلوة بس شقية said...

بص انتا عندك حق
انا بردو مع نفسى فكرت فى كدى
هما اكيد بيكتبو للكبار فقط عشان يجذبو الناس للفيلم
وافلام تانية تخوش تلاقى قلة ادب امال الرقابة بتعمل ايه بقه

فتــافيت (رحاب الخضري) said...

انت مزعل نفسك ليع وعمال تقول الخطوط الحمرا ديه منين؟؟
من عند عم حسبو بتاع الخطوط الحمرا تحت الكوبري او شارع شمال

بص يا معلم كلمة للكبار فقط من رأي بتتحط علشان تلم اكبر عدد من الشباب الغلبان اللي مش لاقي اي حاجة ملموسة من بتاعة الكبار فقط ديه

فبكدا الفيلم هايلم تلت تربع الشعب من اللي مش لاقيين

بس لما بيدخلوا بيعرفوا انها مش للكبار ولا حاجة.. لان الست هيفا والاخت دانا مظبطين الشباب التعبان

ومش مقتنعة بحت انهم بيحذفوا الحاجات الخارجة عن الدين والا فيلم الريس عمر زفت كان اتحذف كله وخالد صالح شغال الحاد فيه كأنه الإله عمر حرب .. استغفر الله يعني

السياسة بقى مش واقعية برضو لان السياسة هنا بتحب الافلام المعادية للسياسة علشان تثبت مدى الديمقراطية في البلد

فالرقابة بتبقى حاجة زي نوع من الدعاية او للحاجات الاوفر اوي في الكلام السياسي وشكرا

سوري طولت عليك

Tamer Diab said...

طبعا هي جملة بقت للدعاية لا اكثر ولا اقل
ولكن انا معارض شوية موضوع ان الرقابة تبقي ع المراحل العمرية فقط
يعني انا مخرج اروح اجيب واحدة قاعده علي رجل واحد في عربية في المقطم بالليل والعربية بتتهز واقول الي يدخل الفيلم ده يبقي من سن الثامنة عشر
ليه !؟ هو الشهوة قبل كده مش موجودة ولا مش حرام بعد ال18 وحرام قبلها !!؟
طبعا الصح صح والغلط غلط وكلنا عارفينة يبقي مش لازم البوس الهادف والسرير الي في سياق الدراما
وال....... الي عشان الحبكة الدرامية
انا زهقت وقرفت وجالي شلل من النوعيات المتخلفة الي كلها معمولة اكل عيش وبس ومحدش اصلا عنده مبدأ ولا نيلة
الموضوع كله عبارة عن
نحتاية اكل عيش

Unknown said...

للكبار فقط...امممممم بحس انها جملة ساخرة على فكرة...على كدة بقى يبقى ركوب المواصلات للكبار فقط والمشى فى الشارع للكبار فقط والرد على النمر الغريبة على الموبايل للكبار فقط...اقوللك احنا المفروض نحط على حياتنا كلها يافطة كبيييييييرة حياة المصريين للكبار فقط...دة هجص دة كل واحد حر ومالهاش معنى الجملة لانها بقت مفقوسة اوى انها جملة دعائية...حلو البوست يا زيكا كالعادة

أحساس لسه حى...كلام من جوه روح لكل روح said...

Zika

موقفك واضح يا زيكا انت مع الشهداء بس مسموح تتعامل مع حد يهاجمهم

انت ضد اراء كتيره من اراء قطه بس مش ضد انك تبعد عنها مهما كانت ارائها زباله وقذره

وياريتها كانت قريبتك ولا صحبتك كنت قولت حق الصحبه لاكن ازاى وهى لاشئ ليك قابل تستحمل قذرتها وهجومها على التدين والمقاومه والشيوخ و..................لا ده محتاج كتاب

انا مش عاوزك تتفق معايا لما تلاقينى بهاجم شئ غالى بالنسبالك فى ربع اللى بتهاجمهم قكه ابقا هزقنى انا واهلى

رابع شئ

ما الناس هى اللى ساكته على وقحتها وزبلتها ومعلش لو هى زباله لنها بتغلط فى المقاومه وحاجات كتير

اللى بيخش عندها شريك معاها فى كل كلامها لانه بدخوله عندها بيوضحلها ان كلامها مش بحجم قذارته

خامس شئ

اكيد ربنا هيحكم على وعليك وعلى البشر كلها وانت اهم شئ عندك انك تفضل تخش مدونتها مهما كانت قذرتها
بس فى حاجات لاى انسان لازم يكون موقفه فيها غير المعارضه الاليقه

وانت محتاج ايه علشان تهزقها تهاجم مين تانى

سادس شئ

اكيد سلاح القاطعه سلاح سلبى فى سلاح انك تهزقها وتبهدل كرمتها لما تغلط فى شئ غالى

ايه ده ضد كل ما تكتبه قطه عن غزه

بس انت لو بطلت تخش عندها يبقا عملتها كمجرمة حرب

ياااه انت بس عارضها بصوت عالى وهتشوف القذاره على اصولها

وانت تيجى المدونه واروحلك بس هلشان اهجمك واعارضك لاكن كصديق خلاص

مش بصاحب من يتعامل مع القذارة

ومش همسح ردك ولا همنعه


وهوريك قذارتها فى اخر موضوعتها

وردك الساذج عليها

هى كاتبه عن اغتصاب 13فرد سعودى لامراه

انت بقع ردك ونظرتك السطحيه بتقولها ده بيحصل فى كل الدنيا

وطبعا العقل بيقول انها عارفه ان ده موجود فى كل الدنيا

يعنى كلامك مش تعليق بيقرى ما وراء الكلام

هى مش جايبه الخبر علشان حادثة الاغتصاب

لان فى مصر فى كفر الشيخ 11اغتصبوا امراه واتحكم على 10منهم بالاعدام

اى انسان محترم هيقهم انها كاتبه الموضوع علشان تهاجم السعوديين والتديين

والكلمتيين المهميين دول همج عرعر حافيين

تعليقك كان المفروض تسالها انتى مهتمه تكتبى بالجرايم فى العالم كله

ولا متخصصه بس فى السعوديه

يا ريت متخشش تعلق على موضوع ودور على هدف اللى مكتوب من الموضوع ايه

قبل ما تعلق عليه

زى..... الباشا

مش تقولها دخ فى كل الدنيا هو ملهاش دعوى بالدنيا مش عاوزه تهاجمهم

زى ما طول العدوان بتهاجم المقاومه ومش اسرائبل

لما تعرف ليه تعالى جوبنى

ليه السعوديه

ولا الشيوخ

وليه الاخوان

وليه حماس

لنا تغهن ليه

نتناقش

واى حد علق على الموضوع وهاجم السعوديه علشان الجريمه

اولى يقول الكلام ده عللى مصر اللى حصلت غيها نفس الجريمة

يا ريت تفهم لا تفكر وتفهم

سلاااام

Unknown said...

زيكاوي صديقي العزيز بس مش اوي

انا مش فاهمه ايه الحكمه من جملة للكبار فقط دي

طيب و هما مين الكبار يعني فوق 16 سنه ولا 18 ولا 21 وا الي طلعوا معاش

بعدين فعلا افلام سهير رمزي ونبيله عبيد و نور الشريف و محمود عيد العزيز و شمس البارودي و حسن يوسف مكنش ليه عليها للكبار فقط مع ان كان فيها مشاهد جريئه

الرقابه دلوقتي متفاهمه جدا و انا بحترم علي ابو شادي اوي الموضوع كلو دعايه مش اكتر لاننا شعوب بتحب الفضايح

Zika said...

michael
واضح ان الكابتن راحت تصيف يا مايكي ههههههههه
نورت يا معلم

Zika said...

مشمشه
مش عارف تحسي انهم عكسوا الموضوع بقي الافلام الزباله تلاقيها عادي والافلام اللي مافهاش حاجه تلاقي مكتوب عليها للكبار فقط عشان الكبار بس هم اللي بيدخلوا الافلام المحترمه هههههههههه

Zika said...

فتافيت
طب ابقي هاتيلي معاكي خطين بس يكونوا بيزنس هع هع هعععع

حلوه مش لاقي اي حاجه ملموسه دي

خالد صالح كان بيقول اراء فلسفيه في الفيلم لكن ما خرجش عن السياق ابدا
وبعدين المقصود باللي يخص الدين
العلاقه بين المسلمين والمسيحيين
مش علاقة الانسان بربنا لان فيلم زي بحب السيما الرقابه ما قالتلوش لأ

مش حقيقي ده هم كلمتين لكن لو فيه معني حقيقي بيتحذف
افتكري
الكرنك قعد اد ايه علي بال ما اتعرض وبيتعرض كل اد ايه
والبرئ
واحنا بتوع الاتوبيس
والعصفور ( فين فيلم العصفور ) وهكذا

لا ولا يهمك طولي انتي بس ومالكيش دعوه انا موافق

Zika said...

tamer diab
هي فعلا نحتايه يا تامر
بس صدقني موضوع الرقابه العمريه ده موجود في العالم كله وده لان علميا
الناس في سن معين بتفهم الشئ بطريقه مختلفه وتوجهات البني ادم بتتغير بعد المرحله دي
الشهوه موجوده بس مش موجهه
وممكن تتوجه اتجاه خاطئ لو اتفهمت بطريقه خاطئه

وتحديد العمر ده بيختلف من مكان لمكان ومن بلد لبلد
16 او 18 او 21 وهكذا
نورت يا معلم

Zika said...

enjy
اه حياتنا بقت للكبار فقط
وكلها خطوط حمرا وسودا
زي ما نكون داخلين مبني وزارة السياحه ( لو مافهمتيش ابقي قوليلي عشان ده ليه تجربه معايا )

نورتي كالعاده

Zika said...

حسام
اللى بيخش عندها شريك معاها

هاتلي دليل من القران بيقول كده

وانت تيجى المدونه واروحلك بس هلشان اهجمك واعارضك لاكن كصديق خلاص

مش بصاحب من يتعامل مع القذارة


انا ماطلبتش نكون اصدقاء ( وليا الشرف ) بس انا ماقولتش كده لان احنا ماكناش اصدقاء اصلا يعني تنور المدنه في اي وقت

وردك الساذج عليها
اشكرك بس انا عمري ما كنت ساذج ولا ردودي كانت ساذجه


انت بقع ردك ونظرتك السطحيه بتقولها ده بيحصل فى كل الدنيا

تاني تطاول عليا وبشكرك عليه جدا وواضح انك علي عكسها تماما زي مانت بتقول وبتتفهم الردود المخالفه ليك ما شاء الله ونعم الاختلاف ونعم احترام الغير اي حد مخالف ليك يبقي سكحي اشطه .

اى انسان محترم هيقهم انها كاتبه الموضوع علشان تهاجم السعوديين والتديين


وانت بتقول اني مافهمتش يبقي انا مش محترم
شكرا شكرا شكرا مش عارف اقولك ايه انت كبرت في نظري اوي .. الله عليك يا حبيب والديك , كمان انا مش محترم كل ده عشان قلت رايي .. ربنا يخليك ليا يا ريس

يا ريت متخشش تعلق على موضوع ودور على هدف اللى مكتوب من الموضوع ايه
حاضر .. تصدق انا كنت محتاج النصيحه دي فعلا لاني قبل كده كنت زي الحمار ادخل عند اي حد واعلق عنده من غير ما افهم نوااياه وشخصيته

قبل ما تعلق عليه

زى..... الباشا


وجود نقط قبل الباشا يوحي ان كان فيه جمله تدل علي احترامك للغير واحترامك للناس اللي بتدخل عندك لانها كان عندها ظن انك بتقبل الراي الاخر وعلي فكره انا مش هندي انا بفهم بين السطور كويس وده من حظك السئ

لما تعرف ليه تعالى جوبنى
طب ما تروح تسالها هي

وانت محتاج ايه علشان تهزقها تهاجم مين تانى

انا عمري ما هزات حد انا طول عمري محترم لا عمر حد هزأني ولا انا هزات حد

ياااه انت بس عارضها بصوت عالى وهتشوف القذاره على اصولها


أوعدك لو اختلفت معاها في يوم وخرجت عن النص زي ما حضرتك بتعمل دلوقت بوعدك مش هادخل عندها تاني


واى حد علق على الموضوع وهاجم السعوديه علشان الجريمه

اولى يقول الكلام ده عللى مصر اللى حصلت غيها نفس الجريمة


خاقتبس كلمه من كلام المدونه ساره نجاتي وهاقول
زي ما واحد يقول لواحد انت حرامي التاني بدل ما يبرر او يدافع او يصلح او يرد يقوله وانت نصاب
ده نصاب
وده حرامي
الاتنين في النار

اشكرك علي زيارتك ليا دي اللي فهمتني حاجات كتيره اوي كانت غايبه عني عن عالم التدوين المثير اللي الواحد بيعيشه وبيتفرج عليه علي ام بي سي اكشن
تحياتي جدا
احتراماتي جدا
نورتني وبصدق جدا جدا

Zika said...

emy
جزريكاوي صديقتي العزيزه بس مش اوي

الحكمه انهم يعملوا دعايه لافلامهم زي كده دايما افلام جودنيوز تلاقيها هي بس اللي داخله القسم الشرفي لمهرجان كان وماحدش غيرها مع ان افلام كتيره افضل ما بتدخلش وليه هم بس
اقولك انا اصلهم بيتشروا الريد كاربت ودي دعايه بس لسه ماوصلناش في مصر ان دي دعايه لانها طالما مش داخله المهرجان الرئيسي يبقي هم شاريين حق عرضها في القسم الشرفي
حوار كده بيضكوا بيه علي الناس ويعملوا الاعلان بالانجليزي علي اساس ان الفيلم عالمي يعني هههههههههه

والله فيه مصر اكتر من كده يا ايمي

اما بالنسبه للرقابه صدقيني الرقابه دي في مصر من اسوأ الاشياء في الدنيا
واساليني انا
كلام ما ينفعش يتكتب علي المدونه يا بنتي
نورتي جزريكا

aMr saYed said...

للكبار فقط
كان مممكن موضوعك ياخد عنوان تاني للحمار فقط بجد كلامك فيه حق كتير اوي فاكر اكيد فيلم عمارة يعقوبيان كان فيه كلمة اد كده مكتوب للكبار فقط واحد صاحبي دخل الفيلم لقا السنيما كلها دون 18 طبعا كلمة للكبار فقط على الافيشات تدخل في القاموس الحكومي الكبير جدا لكلمات ليس لها اي تفسير و ده ملهوش غير تفسير واحد
في مصر

اعمل الي انت عايزه بعيد عن الدين والسياسة يعني متقولش قال الله و قال الرسول و متقولش لا يعني من الاخر على مصر مكتوب كلمة عشان تعيش

للحمار فقط

سلام يا زيكس

مواطن مصري said...

بص هوا اساسا فلم البيبي دول دة طلع فلم مقلب و تعبان


و كويس مدفعتش فيى جنية واحد و مش عارف لية انا بقول ان كلمة للكبار فقط دعاية و بتجذب الجماهيرر


زي الفلم قصة ولا مناظر بس انا دخلت الريس عمر حرب و فلم القصة بتاعتو جامدة اخر حاجة

سارة نجاتى said...

زكزك

طبعا حوار للكبار فقط ده استهبال , لأن كل السينمات بدخل أى حد و محدش بيسألك عندك كام سنة , ده حتى عيال ابتدائى دخلوا الريس عمر حرب و غيره من الأفلام , عايزه أقولك دى بتشجع الناس أكتر أنها تدخله , نوع من الدعاية يعنى.

مفيش حد واصى على حد , المشاهد مش طفل عشان نكون أوصياء عليه أنا مع الغاء الرقابة تماما , ماعدا زى ما أنت قلت وجود مواد سواء كانت زى فيلم "سو " الأمريكى و هو رعب أو فيلم الريس عمر حرب المفروض مش يشوفها الأطفال , و احنا برده مش أوصياء كل واحد يعمل رقابة على عياله و خلاص

سلام يا باشا

اسماء عوني said...

حلوه حكاية للعيال فقط دي يا زوكي
عارف هاقولك علي حاجه
انا من وانا عندي 11 او 12 سنه وانا بدخل سينما وكنت بدخل اي فيلم في اي موضوع وماحدش كان بيقولي رايحه فين
هههههه
ده مجرد دعايه مش اكتر زي مانت قلت
عاااات بوسه

!!! عارفة ... مش عارف ليه said...

موافقك في التصنيف الاخير

لدور الرقابة

وإن المشكلة

بس في السياسة والدين

والدليل التحرش اللي كان في وسط البلد

وغضت الطرف عنه الشرطة

على عكس اللي حصل مع التجماعات المناصرة للقضاه
عند دار القضاء العالي

تحياتي
وليد

Unknown said...

بقولك ايه يا زيكا انا قررت نتقابل انا و انت و مايكل و اسماء

الاول العب مع مايكل ريست و اغلبه و بعدين نلعب كوره سوا و نغلبك انت اكيد و تعزمنا علي الغدا و عصير قصب

اكيد موافق طبعآ

اسماء عوني said...

زيكوووو
وحشتني يا زيكو نفسي ارجع عشان اشوفك يا باشا والله
تخلل يا زيكا
اسكندريه مالهاش طعم من غيرك علي فكره
يا موزز
يا موززز واحشني بجد
عاااات بوسه يااض

أحساس لسه حى...كلام من جوه روح لكل روح said...

زيكا

اكيد اللى يخش عندها ويصادقها شريك معاها

مش ساكت على وقحتها وكلامها الزباله

اللى حضرتك بتقولى مش عجبك معظمه

مش عجبك بس بتصر تخش عندها

شوف انا لما قولت مش اصدقاء مش بقلل من شأنك واعلى من شأنى
بس ده قرار جوايا اللى يسمع لنفسه يتعامل مع انسانه زباله زى دى يبقا جواه شئ غلط بالنسبالى ولازم اخد منه موقف

شوف انا جبتلك مثل موضوع السعوديين علشان اوضحلك العقليه دى بتهاجم مين وليه

وانت وحطيت ادامك كام سؤال قوتلك قبل ما تعلق ليه مفكرتش فيهم
مسالتش ليه بتحتار اخبار السعوديه ومصر فيها جرايم اكبر من كده الاولى تنقد مصر والشعب المصرى يعنى انت

لاكن انت ردك ان ده بيحصل فى العالم كله وده هى عرفاه بس هتكتب ليه عن العالم واقول عليهم متخلفين هى عاوزه تقول المتديينين متخلفين بس

وانت جبت من الاخر
لازم تخرج عن النص معاك علشان تبعد عنها

تشتم حماس مش مشكله

تهاجم المشايخ تستحمل

تهاجم التدين ولا هيهمك

تستهزئ بشهيد برضوا هخش عندها

المهم ما تخرجش عن النص معايا

كده معاها وهخش عندها للابد

وكلمة ساره نجاتى المفروض تقولها لقطه

لان بلادها اولى بالكلام اللى كتبته
والبوست الجاى هوضح اكتر حاجات كتير وتبقى رد بس على كلاامى لانك مردتش ليه اختارت السعوديه بالذات لو عارف جوبنى

شوف يا زيكا الفرق بينى وبينك

انى بعرف اخد موقف من حد لما يهين حد معرفهوش حتى او يظلمه

لاكن انت زى ما جحا ما بيقول

بدل ال.....بعيد عن بيتى يبقا خلاص

وانت سكوتك وتواصك معاها رغم كل الزبالات اللى بتكتبها

وتوجهتها القذره الواضحه طبعا لاى حد بيقرى كلامها

لبخلينى اخد موقف منك
وده اقل شئ بعمله لكل من اهانته قطه

وبعمل مع كل اللى بيزوروا قطه

ولما افضى واروق هبقا اوضحلك بروقان اكتر

والبوست الجاى هجيب سيرتك واجيبك كمثل للتعليقات اللى عند قطه
واكيد لو فى كلام اهانه ليك مش بقصد اهين شخصك كانسان

انا بهين تهاونك فى حق انسان تانى بدل مش بيمسك

Zika said...

mr.fox
حلوه اوي دي يا عمور
للحمار فقط
بس انت كده بتظلم الحمير
نورت يا عمرو مستني جديدك
سلام يا نجم

Zika said...

ساره نجاتي
اييييون كل واحد يعمل رقابه علي نفسه وعلي بيته
تسلم الافكار يا ساره
اموت واعرف بتغيبي كل ده بتروحي فين
نورتي يا حاجه

Zika said...
This comment has been removed by the author.
Zika said...

اسماء عوني
ماهو الحل يا اسماء ان فعلا تبقي في رقابه عمريه فقط
هو ده مفهوم الرقابه في العالم كله الا عندنا
اصل سمعة مصر عند المصريين
تفرق عن سمعة امريكا عند الامريكان

Zika said...

عارفه ... مش عارف ليه
ده بقي حال بلدنا يا وليد
متهيالي اول زياره
تنورني دايما
ارجو دوام الزياره
نورت يا معلم

Zika said...

emy
مش انتي قررتي ورسمتي خطة اللعب كمان
خلاص بتاخدي رايي ليه هههههههههههههههههههههههههههههههههههههههههههههههه
بس انسي حوار العزومه ده
لكن ممكن تجيبي عصير القصب وانتي جايه معاكي

اكيد موافق طبعا بس المعلم اسماء في اسكندريه وهيهبأ علي الاردن مفيش منه رجا
شكلنا مش هنلحق نخطفه

Zika said...

اسماء عوني
ايه يا بنتي مالك
يخرب عقلك
اهدي كده يا ماما شويه عيب احنا عالهوا
خدي بوسه اهو
موااااا
يخرب بيت زلومتك ياللااا

Zika said...

كلام من جوه الروح لكل روح
ماردتش علي تجاوزك عليا اللي كان واضح وداخل بتتكلم في موضوع تاني بعيدا عن تطاولك عليا
اللي هو اكبر دليل علي انك بتعرف تختلف زي مانت بتقول علي عكس قطه

اما بخصوص تعليقك
اولا اي سؤال يخصها توجهه ليها ماتوجهوش ليا انا
انا قلت فعلا ان الحاجه الوحيده اللي تخليني مادخلش مدونتها انها تتعدي علي شخصي المتواضع وده مش معناه ان مايهمنيش انها تشتم حماس او الفلسطينيين اومال بعلق عندها بالاعتراض ليه
لييه
لييييييه فهمني يا عم مانا مش هاعد اقول الكلام وانت تاخدوا علي مزاجك وترد كمان علي مزاجك
عموما تكتب عني ف يمدونتك تاخدني كمثال انت حر في مدونتك
لك تمام الحريه

وطبعا موقفك مني انت حر فيه مش عايز ارد عليك بنفس طريقتك ولكن مش هيفرق معايا كتير اهانتك ليا

شوف
الفرق بيني وبينك فعلا
هو انك متسلط ( لا مؤاخذه يعني ) وعايز كل الناس تبقي وراك
اما انا فشايف ان كل واحد فحاله وكل واحد حر في رايه

الفرق بيني وبينك
انك بتتدخل في اراء الناس
اما انا
فمش بتدخل حتي في رايك

الفرق بيني وبينك
اني شايف التدوين حاجه جميله اوي وملتقي ادبي عوضني حاجات كتير في حياتي
ومجال كبير للاختلاف باحترام والتعرف علي الراي والراي الاخر
اما التدوين بالنسبالك فهو
ام بي سي اكشن
ونادي المختلفين في الراي للمصارعه الحره
وبرنامج لمس اكتاف
بس انا هاقولك علي حاجه لما تحب تصارع حد صارعه لوحدك
الرياضه علمتني كده والتدوين كمان علمني كده
اخيرا
جيب سيرتي براحتك ده شرف ليا يا باشا
تحياتي
نورت

Zika said...

مواطن مصري
أنا اسف يا باشا والله انت وقعت سهوا وانا برد علي التعليقات
غلطه مطبعيه غير مقصوده يا ريس

انا علي فكره مابقتش تفرق معايه دعاية الفيلم قد ما اني ماحكمش علي الفيلم

حلوه حكاية قصه ولا مناظر دي ههههه
الريس عمر حرب فيلم فعلا حلو
واداء خالد صالح فيه عبقري
هو خالد يوسف جامد يا عم الحاج

ستيتة said...

زيكا باشا
أولا انا زرت مدونتك الرائعة المخرج وزهلت "إي وكتاب الله المجيد" معقول عندك 19 سنة وبالنضوج ده كله ربنا يكملك بعقلك وعقبال ما اشوف الولية مانوسة بنتي اللي اصغر منك بثلاث سنين بس بكل هذه الثقافة يامعلم

كلامك عن الرقابة اتفق معك فيهومستنية المسرحية اللي قلت عليها

انت نورتني والصور علشان الناس تضحك في الايام المضلمة دي
ياأهلا بيك عندنا في حارة الخالة سوتيتة

وينكى said...

هههههههههه
دانت شكلك محروق قوى يا حبة عيني
بس اقولك على سبب كمان
احيانا مشاكل الرقابه دى بتبقى من افعال هيئة الانتاج نفسها عشان يضمنوا جمهور فضولى متحفز ويتسابق على شباك التذاكر
الرقابة السياسية عارفينها من زمان
انت عاوز تعرف دماغ الرقابه واللى فيها شوف الكائن المتحجر اللى بيقول اه او لأ دا تبع ايه ومين اللى بيحركه
والحدق يفهم
:)

م/ الحسيني لزومي said...

اقرأ نص اتفاقية منع تهريب السلاح لغزة
وادعوا الله ان يثبت مصر في عدم التوقيع عليها

break said...

سالخييييييييييييييييير
ازيك
عامل ايه
انت لسة زى مانت
:D


صورة البروفايل تحفة

انا بصراحة موضوع للكبار فقط بحتار فيه
ساعات ببقى مقتنعة ان المفروض الافلام فعلا تتصنف على حسب العمر
و احيانا ببقى حاسة انه مينفعش المفروض اى فيلم ينفع يشوفه الكبير والصغير



حمدلله على سلامتى :)

الدرعمي said...

السلام عليكم يا زيكو

بص يا سيدي أولا انت عندك حق بس كان نفسي تتكلم عن الفيلم ده اللي حاطط أفيشه

لأني عاوز أعرف رأيك

أنا بجهز بوست عنه

يا ترى إيه رأيك فيه ؟؟

وفقك الله

Zika said...

ستيته حسب الله الحمش
ازيك يا خاله
ايه ده بجد انذهلتي
يا خاله انا ليا الشرف بدخولك المدونه
هات حاجه ساقعه هنا لخالتك يا واد يا دقدق
اصغر مني بتلت سنين تبقي يف تالته ثانوي
ربنا معاها ان شاء الله
وهابقي اقولك علي مدعاد المسرحيه ان شاء الله
نورتي يا خاله ستيته
نورتي

Zika said...

وينكي
ايون انا محروق محروق خالص محروق جدا
اهئ عااااااااااااااااااااااااااااااااااااا
برغم اني حدق اوي
بس مافهمتش ههههههه
نورتي يا وينكىىى

Zika said...

م\ حسين لزومي
ماعيش فكه

Zika said...

break
لولولولولولولولولولولولولولي
سالخييير يا ستي
حمد الله علي سلامتك
والله انا النهرده انشكحت كده
فينك كده وفين ايامك يا هانم
نورتي يا بريك

Zika said...

الدرعمي
لولولولولولولولولولولي
كمان واحده عشان خاطر ادم
ايه ده يا جدعاان انا حاسس اني هنا في فرح
بريك وادم في يومين يا للهول
يا للصاعقه
بجد حمد الله علي سلامتك يا ادم

هو ايه البوست ولا الفيلم يا ادم
ههههههه
انت عارف بقي هههههه
نورت يا ريس والله
تحياتي

Anonymous said...

حج مبرور وسعي مشكور وذنب مغفور إن شاء الله. .وكل عام وأنتم بخير. بالنسبة للقاح إنفلونزا الخنازير، ألم إجبارياًّ؟!!