Wednesday, May 28, 2008

انا عندي انونيموس ساعه يروح وساعه ييجي

Photobucket
اولا باعتذر عن عدم تكملة مواضيع " المعارضه المصريه في الميزان " عشان ظروف الامتحانات
واول ما اخلص امتحانات هكمل باذن الله
بس حبيت انزل البوست ده كنوع من التناحه
في البوست الاخير بتاع " كفايه " جالي تعليقين انونيموس " غير معرف" طبعا ( حسام الميرغني ) ده شر لابد منه
رغم انه بطل يكتب في مدونته ومسحها الا انه مصمم يكتب في مدونتي انا
لييييييييييييييييييه ؟؟؟ ماعرفش
المهم جالي تعليق من شخص غير حسام ( مصر الجديده ) ده
بيقولي :
fuck you son of bitch ....
طبعا الترجمه مش محتاجه مترجم ... فطبقا لاونكل انيس عبيد
الترجمه هي :
تبا لك ايها اللعين
يا حلاوه
والترجمه الاصليه طبعا مش محتاجه شرح
طب يا عم ايه تعليقك علي الموضوع
يا سيدنا انت داخل المدونه دي تشتم وخلاص
طب واشمعنا الانجليزي اللي داخل تشتم بيه
ولا انت شايفلك فيلمين اجنبي وجاي تتنطط علينا
ولما انت جامد كده يا روح خالتك ما بتدخلش باسم مدونتك ليه ولا انت نوعك ايه ولا ملتك ايه ولا جنسك ايه ولا توجهك ايه
الله اعلم ؟
..............
وفموضوع الاخوان
جالي تعليق من واحد اسمه السيد سفنجه
اه وربنا اسمه كده
"اللبه اتفتحت و اللي جواها باين من زمان وما يحبش ياكل اللي جواها غير الجعان سيبك منهم يا عم دول علام بتنجان"
يا حلاوه .. وفراشة الحاج يحيي تحييكم وتتمني لكم سهره سعيده
وبصبح علي كل الاخوه من سمالوط و باسم شباب مصر احب اهني السيد عباس الدهول علي عضوية مجلس الشعب عن الحزب الوطني وعنهم اخوهم ابو دومه ..
وطبعا التعليق ده بيفكرني بتاع بالشريط بتاع الشات اللي قي قناة ميلودي بعد ماتش الاهلي والزمالك
..............
في موضوع الاخوان بارضه
جالي تعليق من اللهو الخفي ( حسام الميرغني ) بيقول :

طبعا انت بتسال دلوقت راي حضرتي ايه في الموضوع ده" ؟"
اولا يا عمو حسام انا مسالتكش راي حضرتك يف الموضوع ده ايه ؟
وكفاية تفرض نفسك عليا ؟
"يا استاذ يا جاهل انت كاتب الموضوع ده للشهره عشان تبقي زي بقيت الناس اللي بتشتم في الاخوان وخلاص زي الناس اللي بتشتم في الملحدين وهم ولا بيفكروا مش تعاطفا مع الاخوان الاخوان زيهم زيك بالظبط اجهل خلق الله"
اذا كنت انا جاهل زي ما بتقول .. بتدخل عندي ليه
شهرة ايه يا موكوس هو في حد بيكتب عشان يتشهر غير امثالك .. وبعدين يا اخي انت زعلان ليه
ماشي انا موافق انا بكتب عشان الشهره .. طب وانت مالك ؟....وبرغم ان اصلا هم 7 او 8 اللي بيدخلوا المدونه
لكن مادام انت شايفني مشهور يبقي كلامك كله سليم يا معلم جدي
اه صحيح .. كل ما اقرا " اجهل خلق الله " اموت من الضحك عشان فعلا المفروض انك تضحك لما تسمع الجمله دي من واحد ملحد
"تقدر تفسرلي ليه نفسك تبقي مخرج وليه نفسك ينزلك كتاب وليه كل احلامك متعلقه بالشهره والفلوس"
انا حر يا اخي اشتغل مخرج اشتغل رقاصه انزل كتاب اقف ابيع مناديل في اشارات المرور ... اناااااااااااااا حر ... وانت زعلان ليه يعني ؟ ..ايه المشكله اني يكون عندي احلام نفسي احققها .. انت كمان هتدخل جوه دماغي .. مش كفاية جوه المدونه.
......................
وفي بوست " كفاية "
... نورني بارضه الاخ الغير مرغوب فيه حسام الميرغني في تعليق كمان وكمان
"كالعاده مالوش اي معني وبدون تحليل موضوعي وبدون اي صفه ادبيه"
مش زنب امي انك ما بتفهمش .. وما بتحسش كمان .. ده بدل ما تعلق داخل الموضوع .. رايح تشتم وتقل ادبك و وبعدين يعني انت لو اختلفت معايا وقولتلي لا انت غلط هقتلك .. ما فيه ناس كتير اوي مختلفه معايا بس بيتكلموا باحترام حاول تتعلم منهم .
وبعدين يا اخي مادام مش عاجباك المدونه ... بتدخل ليه
"ردا علي سؤالك ليا المره اللي فاتتفاحب اوضح اني بكتب من اجل الحريه والعلم"
صح انا بكتب عشان الشهره والفلوس وانت بتكتب عشان الحريه والعلم وكل واحد فينا بيدور علي اللي ناقصه
الله يرحمك يا برنارد شو ويبشبش الطوبه اللي تحت راسك
................
"اولا : انت بتلوم كفاية علي انهم ماعندهمش بديل طب ايه البديل اللي عندك انت ؟"
اخيرا اتكلمت في الموضوع
بص يا سيدي مكافأة ليك انك دخلت في الموضوع ... هرد عليك يا عم حسام يا بتاع الميرغني
اولا انا مش مطلوب مني اني احط بديل كل مهمتي بتنحصر في اني اقول اللي اقدر عليه واللي صح اقول ده صح واللي غلط اقول ده غلط لاني غير مؤهل لوضع سياسة دوله لان ولا مؤهلاتي ولا خبرتي السياسيه تؤهلني لده
وكل اللي اقدر اعمله اني لما اشوف ملحوظه اعلق عليها بحياديه واراعي ربنا في البؤين اللي بقولهم
..........................
بص بقي يا عم
انا عارف انك هتيجي تاني رغم الموضوع ده
عشان وانا بقرا بوست لاحد المدونين اتعلمت منه تعليق جميل اوي قاله علي واحد زيك
( الع.ء طي.ه بتجيبه )
انت مرحب بيك في اي وقت طول مانت بتدخل بمدونتك وبتحترم نفسك وبتحترم المدونه وبتحترمني وبتحترم كمان ذوق الناس المحترمه اللي بتدخل تلاقي شتايمك علي الهوا كده
انا مايهمنيش انك ملحد .. انا ليا اصدقاء ملحدين وشخصياتهم محترمه جدا ومن اعز اصحابي كمان
انا ميهمنيش ان ميولك الجنسيه غير ميولي الجنسيه مع احترامي لميولك اللي انا بختلف معاها بس ده ما يديكش الحق انك تبعتلي صور شذوذ علي الايميل وتقولي ايه رايك ؟
لان رايي مش محتاج صور قبيحه منك
انا ضد الشذوذ الجنسي مع احترامي لاي حد بيحترمني حتي ولو كان شاذ جنسيا .. وكل تعاملاتي مع المثليين كانت مع ناس طبيعيه جدا بخلاف ميولهم الجنسيه اللي انا كشخص ماليش دخل بيها
وعموما بما انك بتابع المدونه هتقرا موضوع كامل عن الشذوذ الجنسي قريبا
اخر الكلام
انا برحب باي تعليق من اي فرد حتي ولو كان قاسي جدا ومعارض ليا في كل كلمة بقولها طالما انه يكون داخل باسم مدونته .. ومش باحترم اي حد بيدخل غير معرف حتي ولو كان كاتب كلام كويس
لاني ما بكرهش في حياتي قد اللي ضد المناقشه وضد الحوار و الناس اللي بتخاف تدخل باسامي مدونتها عشان الفضيحه وربنا امر بالستر بقي
في حاجه اخيره بس يا حسام يا ميرغني ..
بمناسبة " الميرغني "
تحب تشد معايا ... مواتير ولا غرز ولا الاتنين يا حليوه ؟
اه صحيح ... واللي يقف في الاشاره يبقي .... انت عارف بقي

27 comments:

الدرعمي said...

السلام عليكم

عزيزي زيكا المخرج

تعرف شطر البيت اللي بيقول

فخير من إجابته السكوت

؟

بجد التنفيض ليه فايدة جامدة في الحالات اللي زي دي

أنا اللي بلاقيه رزيل وكلامه لا يتوافق مع توجهات المدونة

بحدفه وبحذفه

مش حجر على الآراء

بس انا بقبل الآراء المخالفة بأدب

بغير الأدب ملوش غير الحذف والحدف

وده أكتر شيء يحرق دمه وميضرنيش

لأنه هيعرف قيمة كلامه ومكانها الطبيعي

سلة المهملات

بس

تحياتي وحلو أوي البوست

ربنا يوفقك يا مخرج المستقبل


آدم

وجهة نظري said...

أنا شخصيا موافق علي أرائك في البوستين إلي كتبتهم وليا بوستات قديمه فيها نفس المعاني

تحياتي ليك

Zika said...

adam
وعليكم السلام ورحمة الله وبركاته
بس كان صعب يا ادم اني افضل منفض علي طول ... وبعدين كده يمكن يحسوا علي دمهم شويه
.....
ربنا يخليك عالتشجيع الجامد ده
نورت كالعاده
تحياتي

Zika said...

وجهة نظري
جميل... متفقين
وان شاء الله هاقرا القديمه عندك
نورت
تحياتي

كوارث said...

والله انتا مشكلة يا عم
هههههههههههههههههههه
ايه الموضوع ده
مشكلة التعليقات فعلاً
وعامة اذا كان الاخ حسام الميرغني اللي بتقول عليه غاوي شهرة فمعتقدش انه هيتمنى اكتر من كده
بوست جميل بفكر انقله لمدونتي بالنص مع تغيير اسماء الاانونيموس دول !
وانتا شكلك زهقان من حسام ده قوي عشان تكتبله المثل الحكيم اللي فوق
عامةً ربنا ياخد امثاله لو كان عليهم الغلط

Empress appy said...

ههههههههههه زيكا مش انا اتخبط واحد انونيمس هههههه
مش قولت لك سيبك انا عن نفسى مسحت تعليقه من مكانه علشان استفرس بيه وخدته كوبى وبست ومسحت بيه بلوج سبوت واخواته فى اخر موضوع بتاع انا والكين وهواك هههههههههه
وانا قولت لك سيبك دماغك هتصدع صدقنى
هشوف بتاع كفايه لانه فاتنى

Zika said...

كوارث
ربنا يخليك يا عم كوارث يارب
وعموما سيبه يتشهر براحته ...
انقل براحتك بس ابقي افتكرني باي حاجه كده
:D :D :D

Zika said...

appy
عادي يا آبي واضح ان انا خلاص بدات اتعود عليهم لدرجة اني مش هينفع اكتب في المدونه من غيرهم
بحس ان التعليقات فاضيه
هههههههههههه
والله هم عالم فاضيه بجد
ربنا يشفيهم يارب
برافو عليكي
بس عارفه لو ما مسحتيش التعليق بتاعه وماردتيش عليه هيتحرق دمه اكتر
:D
نورتي يا آبي

الفاتح اليعقوبي said...

السلام عليكم
استاذ زيكا انا سعيد باول زيارة لمدونتك
1
اما عن التجاوز في التعليق هذا اخلاقيا مرفوض تماما وكل يدل علي تربيته وخلقه
وعامة يقول تعالي :(واذا خاطبهم الجاهلون قالوا سلاما)فاجعل هذا مبدا في حياتك دائما في تعاملك مع اي متجاوز
2
انا قرات عن موضوعك بتاع الاخوان وحقك ان تنتقد وحقي ان اوضح اول شئ في البوست بتاعك لم يقم اخوان جامعة القاهرة باي مظاهرات عندما تفوه وزير الثقافة بالترهات التي قالها وانا من طلاب الاخوان ي جامعة القاهرة وكل الذي حدث هو مسيرة الاخوات عندنا ومؤتمر عند القبة وخلاص يعني مفيش امن اتدخل ولا حاجة وكل المشاكل والتدخل الامني كان في جامعة الازهر عندما دخل الامن مدينة الطالبات وتعدي عليهن
وحديث المرشد او غيره عن موضوع الحجاب بانه اخذ اكبر من حجمه
فنحن لاعلاقة لنا ي الثير من تحركاتنا كطلاب بمكتب الارشاد يعني كل علاقتنا بمكتب الارشاد هو في الخطوط الحمراء التي لايجب علينا تجاوزها واغلب تصرفاتنا خارجة منا نحن كطلبة
3
الاخوان ياسيدي لايبحثون عن مصلحتهم ولكنهم يفكرون ويعملون عقولهم ويدرسون خطواتهم جيدا وخاصة بعد احداث المحاكمات العسكرية
سامحني ياسيدي الفاضل هل يعقل ان واحد يقول يلا نعمل اضراب يوم كذا يبقي خلاص كلنا نمشي وراه
اين دراستك لقرارتك الشخصية ؟
اين دراسة رد فعل الامن ؟؟؟
ومن الاخر اعز ماكان علبي الامن ان الاخوان ينزلوا
يااستاذي لما اي جهة معارضة في مصر بتاخذ قرار فستاخذه من جهة واحدة وهي الجهة السياسية وسيكون قرارها سياسي
اما الاخوان فسينظروا الي الجانب التربوي والدعوي والسياسي والامني لان العملية مش سهلة
انك تحرك 500واحد ممكن تكون سهلة انما انك تحرك الالاف فدي صعبة للغاية ومحتاجة دراسة
ولكي ادلل لك علي كلامي مجلس الشوري وجه انتقاد مباشر لجماعة الاخوان من غير مايشاركوا كجماعة
4
اما عن دورنا فسامحني لهجة التخوين دعنا منها والكلام غير منطقي الصراحة بتاع الناس يعني لما يتقال ان الاخوان مشاركوش عشان الحكومة تتعطف عليهم وتطلع قيادتهم من المحاكمات
سامحني كلام غير منطقي وفيه هوي وليس عليه اي دليل
فيلياتي احد بدليل ان الاخوان اتفقت مع الحكومة علي ذلك (لادليل)ا
ومن اين اطلع الناس علي نوايا الاخوان انهم كانوا يستدرون عطف الحكومة لكي تفرج الحكومة عن قاداتهم بالرغم ان النية لايعلم ملك فيكتبها ولا شيطان فيفسدها فقط ارجو ان يكون النقد منطقي
طيب في ناس مش مقتنعة اساسا بفكرة الاضراب يبقوا خونة دول كمان
فارجو ان كان هناك نقد (وهذا حقك فلسنا جماعة ملائكة)ان يصاحبه دليل
5
معلش يااستاذي دعني استعرض معك مواقف الاخوان في الخمس سنوات الاخيرة
في تعديل المادة 76ووقتها الاخوان رحبوا باي تعديل دستوري يحدث تغير في الواقع السياسي المصري فتلاعب الرئيس بالتعديل ليفصله علي ولي العهد
فخرجت مسيرة وقتها قوامها حوالي من 15الي20الف في ميدان رمسيس واعتقل بعدها 3000من الاخوان
ومواقفهم في القضاة بالرغم انهم لم يرفعوا شعار الاخوان واعتقل منهم الكثير
خرجت قبل الاضراب مسيرات ضخمة في الغربية والبحيرة والشرقية علي ماافتكر عشان الغلا ايه اللي حصل الامن تعامل معها بل انه تعرض للاخوات وتم ضرب الاخوات في مسيرة البحيرة والغربية
وبالرغم من كل ذلك لم اجد احد يتكلم او يتحدث عن تلك المواقف او يشكر فيها
6
في عندنا في الادارة بما اني بدرسها بيقولك عند نقض اي مشكلة يجب ان تعرض اصل المشكلة ثم تتعرض لحلولها
يعني انت انتقدت موقف الاخوان وقوي المعارضة طيب زيكا عمل ايه ؟؟؟؟
ايه اللي انت قدمته لبلدك ؟؟؟
اذا سال الله الاخوان ماذا قدموا لدينهم ولبلادهم سيقولون قدمنا معتقلين وقطعت ارازقنا وانتهكت حرمات بيوتنا وضيق علينا في معيشتنا وقدم منا شهداء كثيرين في كل بقاع الارض
وحاولنا ان نجتهد قدر المستطاع وبذلنا اغلي واجمل ايام حياتنا من اجل هذا الدين وهذه البلاد

واعتقد ان تاريخ الاخوان وواقعهم يشهد بذلك فسامحني بالرغم من معتقلي 6ابريل فهم لايصلوا الي ربع معتقلي الاخوان وانا كفرد من الاخوان لما كان طالب بيسالني في الجامعة اشارك ولا اقوله شارك وكلمت الناس عن الموضوع ده وشاركت في المسيرة اللي كانت في جامعة القاهرة وناس كتير من اخواني قعدوا في بيوتهم منزلوش تضامنا مع الاضراب

بالله عليك بلاش لهجة التخوين وان الاخوان بيعملوا لنفسهم وسيبك من كلام ناس لاهم لها في الدنيا الا محاربة الاخوان سواء عملوا صح ام خطا
7

انا عندي راي
مثلا الاخوان كان رايهم انهم لن يشاركوا في الاضراب كمؤسسة كما ذكرت انت فهذا رايهم وخرج علينا من يخونه وكان رايهم المشاركة في المحليات وهذا حقهم السياسي والدستوري عشان محدش يقولي انهم باعوا القضية فهذا وجهة نظرهم لكسر الظلم وفضح النظام وبالفعل فضح النظام اما العالم اجمع

طيب ليه الاخوان مثلا مخونوش اللي قالوا انهم مش هايشاركوا في المحليات مااحنا كنا ممكن نهلل ونقول انهم خدوا اوامر من الحكومة عشان يسيطروا علي الناس ويفضوا الساحة في المحليات للحكومة بس كل واحد ليه وجهة نظره ومن حق كل واحد انه يحافظ علي كيانه
وكل اللي نزلوا في اضراب 6ابريل في وسط البلد حوالي 500 واحد وبص للارقام التانية وانت تعرف الفرق بين ادارة 500 واحد وبين ادارة وتحريك الالاف
8
اخر حاجة
معلش استحملني
لو تبصلها بشكل اخر تلاقي ان مصلحة البلد ان الاخوان مشاركوش في الاضراب لان الاخوان بقوا فزاعة بيخوف بيها النظام العالم الخارجي ويقولهم يعني انا لومشيت هيجي مكاني الاخوان بتوع الجهاد سبيلنا والكلام ده
فاري انه اتضح انه يمكن ان يتحرك الشعب بدون وصاية من احد



حاجة علي جنب

......................................
في مدونات مثلا تلاقيها بترحب بالشواذ واسمهم الطبيعي كده شواذ او لوطيين او سحاقيات بلاش مثيلين دي لانه ممكن يجي وقت ويتقال اه ده في نوع من الجنس اسمه المثلية ودي حرية شخصية
وتلاقي المدونين دول بيحربوا في الاخوان ولا يتقبلوا اي نقاش معاهم نهائيا وبالفعل حصلت مشكلة مع احدي المدونات هي نزلت بوست عمالة تشتم في الاخوان واللي خلفوا الاخوان وشوية تقول منافقين ولو حد من الاخوان قال كلمة منافقين دي علي اي حد يالهوووووووووووي علي اللي هايتقال يقولك بيكفرونا وبيطلعونا بره الملة
لكن اذا قيلت كلمة منافقين علي الاخوان فلا باس وايه المشكلة
ووقتها يمكن زميلي في المدونة نزل بوست بيعتب علي اخوانا انهم وصلوا مع المدونة دي لاسلوب الحوار ده بالرغم من ان كثير من الذي دخلوا ليدافعوا عن الاخوان لم يكونوا اخوان
وشوية هتلاقي ناس تقول لك الاخوان بيكفروا اللي بيخالفهم وخلي بالك اعتقد ان رد المدونين الاخوان في البوست بتاعك وضح لك كذب هؤلاء وافتراءهم والا فلياتوا لي باي احد كفره الاخوان



معلش كلمة علي جنب كده
بالنسبة للمدونين الشواذ او الشواذ عامة فمثل هؤلاء التعامل معهم مصيبة في حد ذاتها
في قصة سيدنا لوط هلكت زوجته معهم اتعلم لما ؟؟؟؟
لانها كانت تؤيد فعلهم وتجلس في مجالسهم ولكنها لم تفعل فعلتهم
اذا كنا نغضب لاهلنا حق علينا ان نغضب لربنا سبحانه وتعالي عندما تنتهك حرماته
وورد في السيرة ان الله امر الملائكة بان تهلك قرية فقالت الملائكة يارب ان فيها عبدك فلان يعبدك ويسبح بحمدك
قال سبحانه به فبدا لانه راي حرماتي تنتهك ولم يتمعر وجهه عليها

فمن باب اولي وهذا راي انا ان لا يعلق احد علي مثل هؤلاء ويعزلوا ومن اراد منهم المساعدة ليتغير فهذا هو من نقف بجانبه ونسانده الي ان يتغير واما هؤلاء الذين يتفاخرون بانتهاك حرمات الله ومبارزته بالمعاصي فمن باب اولي ان نغضب لربنا
واسف ياصاحبي ان كنت طولت عليك وبعتذر ان كان في تعليقي اي كلام دايقك
واتمني اننا نكون اصحاب لعلك لتعرفنا اكثر
والسلام

Zika said...

الفاتح اليعقوبي
اولا يا سيدي مافيش حاجه اتضايقت منها بالعكس
انا بجد والله وربنا يعلم سعيد جدا بتعليقك عندي
وبجد نورتني
واسمحلي ارد علي ردك واحده واحده
..........................
اول شئ في البوست بتاعك لم يقم اخوان جامعة القاهرة باي مظاهرات عندما تفوه وزير الثقافة بالترهات التي قالها وانا من طلاب الاخوان ي جامعة القاهرة وكل الذي حدث هو مسيرة الاخوات عندنا ومؤتمر عند القبة وخلاص يعني مفيش امن اتدخل ولا حاجة وكل المشاكل والتدخل الامني كان في جامعة الازهر عندما دخل الامن مدينة الطالبات وتعدي عليهن
وحديث المرشد او غيره عن موضوع الحجاب بانه اخذ اكبر من حجمه
فنحن لاعلاقة لنا ي الثير من تحركاتنا كطلاب بمكتب الارشاد يعني كل علاقتنا بمكتب الارشاد هو في الخطوط الحمراء التي لايجب علينا تجاوزها واغلب تصرفاتنا خارجة منا نحن كطلبة

مش عارف والله ازاي بتقول ما حصلش مظاهرات منكوا كطلبة دي كانت اول مظاهرات اشوفها مباشرة في حياتي بحكم انها كانت اول سنه ليا في الجامعه
وبعدين
الامن بيتدخل لو واحد من الاخوان زعق جمب باب رئيسي . وده انا مش ببالغ فيه دي حقيقه
وبعدين يعني هم الاخوات دول مش بارضه اخوان يعني طلبه . ولا لازم يكون الطلبه ولاد . وكمان هو عقد مؤتمر عند القبه ما يتحسبش تظاهر
اومال ايه مفهوم التظاهر في وجهة نظرك ؟
ثم طلاب جامعة الازهر من الاخوان يدخلون تحت الكلام اللي اتكلمت عليه . لاني مش بقصد طلاب جامعة القاهره بس . لكن انا ذكرت جامعة القاهره عشان انا منها وبالتالي حاجات شوفتها بعيني .. لكن اي مظاهرات تانيه شوفتها في التلفزيون علي القنوات الاخباريه
.
وده بيثبت بالدليل القاطع الانقسام اللي بين الطلبه وبين مكتب الارشاد
اللي هو المفروض انه الرئيس بتاع الجماعه
ماهو ماينفعش مركب من غير ريس والا هتغرق .
وكمان ماينفعش مركب يبقي فيها ريس اللي هو المرشد وكمان ريس اللي هو الطلبه
اكيد المركب دي هتغرق .
وبعدين بعد الطلبه عن مكتب الارشاد ده بصراحه حاجه غريبه اوي
يعني مثلا ينفع اني انضم للحزب الوطني وتبقي تصرفاتي غير تصرفات الرئيس وهكذا امال دخلت الحزب ليه طالما اني همشي علي مبادئ تانيه غير اللي بيستخدمها الحزب ..
( بلاش الحزب الوطني عشان ماتفهمش غلط )
خليها حزب الوفد
:)
...................
الاخوان ياسيدي لايبحثون عن مصلحتهم ولكنهم يفكرون ويعملون عقولهم ويدرسون خطواتهم جيدا وخاصة بعد احداث المحاكمات العسكرية
مصر كلها وقفت قدام المحاكمة العسكريه واتفق مع الاخوان كل بني ادم حتي لو مش من الاخوان .. طيب اذا كان الاخوان بيدرسوا فعلا خطواتهم ... وهم درسوا فعلا انهم مش هيدخلوا الاضراب ده
.. تبقي المصيبه اكبر .. انهم بيدرسوا غلط .
.......
سامحني ياسيدي الفاضل هل يعقل ان واحد يقول يلا نعمل اضراب يوم كذا يبقي خلاص كلنا نمشي وراه
اين دراستك لقرارتك الشخصية ؟
اين دراسة رد فعل الامن ؟؟؟
ومن الاخر اعز ماكان علبي الامن ان الاخوان ينزلوا
يااستاذي لما اي جهة معارضة في مصر بتاخذ قرار فستاخذه من جهة واحدة وهي الجهة السياسية وسيكون قرارها سياسي
اما الاخوان فسينظروا الي الجانب التربوي والدعوي والسياسي والامني لان العملية مش سهلة
انك تحرك 500واحد ممكن تكون سهلة انما انك تحرك الالاف فدي صعبة للغاية ومحتاجة دراسة

اسمحلي طريقتك في الحديث عن الاضراب فيها شئ من الاستهزاء والتقليل
وبعدين ده مش واحد ده حزب الوسط والعمل هما اللي حركوا الاضراب وبعدين الاضراب مشي في سكة الناس
بقت الناس البسيطه جدا هي اللي بتتكلم عن الاضراب وهي اللي بتحرك الاضراب سواء عن طريق النت او غيره
ودي كانت حركه شعبيه بسيطه بتقول للناس ان البدايه جايه وزهقنا من اننا نقول لأ
والاضراب نجح رغم عدم وجود الاخوان فيه
اعذرني بس مايهمنيش ان الاخوان يبصوا للجانب التربوي او الدعوي او اي حاجه تانيه
انا اللي يهمني هو تصرف الاخوان
وهل بيقول الجانب التربوي ما نشتركش في الاضراب
هل بتامرنا الدعوه اننا لا نشارك في الاضراب
وبالنسبه للامن ايه الجديد
لو كان الاخوان قابلين مزيد من التضحيات كانوا اكيد اشتركوا وماهمهومش الامن زي ما بيعملوا كل مره .. ولا يعني هي المره دي مش علي هواهم عشان ماجتش منهم .
عزيزي .. مش لازم كل حاجه صح يعملها الاخوان .. ليه الاخوان ما اتقنعوش بحركة كان فيها فئات معارضه تانيه
؟
الاخوان مش هم المعارضه الوحيده في مصر ..
طيب وايه الفرق ما بين 6 ابريل و4 مايو ولا 5 مايو
اقولك انا
ده قبل المحاكمه وده بعد المحاكمه
ده الاخوان ما اشتركوش فيه ونجح .. وده الاخوان اشتركوا فيه وفشل
.....................
اما عن دورنا فسامحني لهجة التخوين دعنا منها والكلام غير منطقي الصراحة بتاع الناس يعني لما يتقال ان الاخوان مشاركوش عشان الحكومة تتعطف عليهم وتطلع قيادتهم من المحاكمات
سامحني كلام غير منطقي وفيه هوي وليس عليه اي دليل
فيلياتي احد بدليل ان الاخوان اتفقت مع الحكومة علي ذلك (لادليل)ا
ومن اين اطلع الناس علي نوايا الاخوان انهم كانوا يستدرون عطف الحكومة لكي تفرج الحكومة عن قاداتهم بالرغم ان النية لايعلم ملك فيكتبها ولا شيطان فيفسدها فقط ارجو ان يكون النقد منطقي
طيب في ناس مش مقتنعة اساسا بفكرة الاضراب يبقوا خونة دول كمان
فارجو ان كان هناك نقد (وهذا حقك فلسنا جماعة ملائكة)ان يصاحبه دليل

اولا لو رجعت لتدويناتي السابقه وللتدوينه بتاعة الاخوان الاخيره بالذات هتلاقي اني عمري ما اتكلمت بلهجة تخوين ودخلة تخوين دي بصراحه اجتهاد شخصي منك
وعدم دخول الاخوان ... ( رغم موافقتهم عليه )انا ماسمتوش تخوين انا سميته تخاذل وتراجع وهروب من القضيه
وبعدين النيه دي هي احد الفروض اللي فرضتها والله اعلم بالنوايا طبعا
بس وجود الحدث بين الاحداث .. بالذمه محتاج واحد بيفهم في النوايا .
في فرق بني الناس اللي انتقدت الاضراب والناس اللي وافقت عليه لكنها تخاذلت انها تشارك دي حاجه تانيه
............
معلش يااستاذي دعني استعرض معك مواقف الاخوان في الخمس سنوات الاخيرة
عارفه ومتابعه وياما رفعت القبعه للاخوان في تدوينات سابقه
وياما تعاطفت مع الاخوان وياما حييت الاخوان علي مواقف كتيره عملوها صح
علي فكره دي مش اول مدونه ليا
انا بدون من سنة 2006
وصدقني كانت عندي مدونات اخري وشجعت الاخوان كتير ويمكن تلاقي تدوينات هنا في المدونه في الارشيف تدل علي كده

Zika said...

معلش نكمل عشان بس خوفت لا النور يقطع
.....
6
في عندنا في الادارة بما اني بدرسها بيقولك عند نقض اي مشكلة يجب ان تعرض اصل المشكلة ثم تتعرض لحلولها
يعني انت انتقدت موقف الاخوان وقوي المعارضة طيب زيكا عمل ايه ؟؟؟؟
ايه اللي انت قدمته لبلدك ؟؟؟
اذا سال الله الاخوان ماذا قدموا لدينهم ولبلادهم سيقولون قدمنا معتقلين وقطعت ارازقنا وانتهكت حرمات بيوتنا وضيق علينا في معيشتنا وقدم منا شهداء كثيرين في كل بقاع الارض
وحاولنا ان نجتهد قدر المستطاع وبذلنا اغلي واجمل ايام حياتنا من اجل هذا الدين وهذه البلاد

واعتقد ان تاريخ الاخوان وواقعهم يشهد بذلك فسامحني بالرغم من معتقلي 6ابريل فهم لايصلوا الي ربع معتقلي الاخوان وانا كفرد من الاخوان لما كان طالب بيسالني في الجامعة اشارك ولا اقوله شارك وكلمت الناس عن الموضوع ده وشاركت في المسيرة اللي كانت في جامعة القاهرة وناس كتير من اخواني قعدوا في بيوتهم منزلوش تضامنا مع الاضراب

بالله عليك بلاش لهجة التخوين وان الاخوان بيعملوا لنفسهم وسيبك من كلام ناس لاهم لها في الدنيا الا محاربة الاخوان سواء عملوا صح ام خطا

انا بدرس اذاره بارضه بس مش فاهم ايه علاقة دراسة الاداره واصل المشكله بايه اللي عملوا زيكا ؟
انا مش من الناس دي ومش معني اني انا بنقد الاخوان اني لا هم ليا في الدنيا الا محاربة الاخوان .
انا لما الاخوان بيعملوا حاجه صح بقول عليها صح
ولما بيعلموا حاجه غلط بقول عليها غلط
اما بالنسبة ل ايه اللي قدموا زيكا ؟
احب اقولك ان زيكا لما يلاقي جبهة معارضة منظمه محترمه ويكون هو مقتنع بيها وبسلميتها وبنضافتها هيكون اول واحد يشترك
لكن مش همشي لوحدي في الشارع وارفع يافطه بتقول طظ في الحكومه
المعارضه لازم تكون منظمه عشان تبقي ليها قيمه
يعني انا مثلا ماينفعش ادخل في جماعة اعضائها مالهمش علاقة برؤسائها
وماينفعش ادخل حركه مالهاش معني ولا بديل
وماينفعش ادخل احزاب . كل همها تلم تبرعات
ولما ربنا يسالني قدمت ايه لبلدك ؟
هقوله يارب انا نقدت اللي بيضحكوا عالبلد
هقوله يارب انا مالقتش حاجه اقدمها للبلد غير كده ولو كنت لقيت كنت عملت
هقوله يارب
انا شوفت المنكر بعيني ما اقدرتش اغيره بايدي .. فغيرته بلساني
وصدقني ربنا غفور رحيم

انا عندي راي
مثلا الاخوان كان رايهم انهم لن يشاركوا في الاضراب كمؤسسة كما ذكرت انت فهذا رايهم وخرج علينا من يخونه وكان رايهم المشاركة في المحليات وهذا حقهم السياسي والدستوري عشان محدش يقولي انهم باعوا القضية فهذا وجهة نظرهم لكسر الظلم وفضح النظام وبالفعل فضح النظام اما العالم اجمع

طيب ليه الاخوان مثلا مخونوش اللي قالوا انهم مش هايشاركوا في المحليات مااحنا كنا ممكن نهلل ونقول انهم خدوا اوامر من الحكومة عشان يسيطروا علي الناس ويفضوا الساحة في المحليات للحكومة بس كل واحد ليه وجهة نظره ومن حق كل واحد انه يحافظ علي كيانه
وكل اللي نزلوا في اضراب 6ابريل في وسط البلد حوالي 500 واحد وبص للارقام التانية وانت تعرف الفرق بين ادارة 500 واحد وبين ادارة وتحريك الالاف

باااارضه لهجة التخوين دي ماخرجتش مني . وخرجت منك انت .ياريت ما تدخلش حاجات انا ما قولتهاش عشان تقوي بيها موقفك . ارجوك
المهم
هي مش ذلة ان الاخوان عددهم اكبر . فعشان كده هم بيتعبوا وبيعملوا المعجزات وعشان كده هم لازم يحسبوها . وبعدين هم مش 5000 زي ما بتقول لانك لازم تشيل عدد الطلاب اللي في الجامعه اللي بيتصرفوا علي مزاجهم
ليه ما اتصرفوش علي مزاجهم في الموضوع ده بالذات .. ولا دي كانت اشاره حمرا بارضه ؟ ويا تري ايه كمان ممكن يبقي خطوط حمرا في المستقبل ...
.......................

اخر حاجة
معلش استحملني
لو تبصلها بشكل اخر تلاقي ان مصلحة البلد ان الاخوان مشاركوش في الاضراب لان الاخوان بقوا فزاعة بيخوف بيها النظام العالم الخارجي ويقولهم يعني انا لومشيت هيجي مكاني الاخوان بتوع الجهاد سبيلنا والكلام ده
فاري انه اتضح انه يمكن ان يتحرك الشعب بدون وصاية من احد

مصطلح العالم الخارجي ده بيفكرني بالفضاء ولا حاجه
:)
المهم يا سيدي انا مايهمنيش راي العالم الخارجي .. طظ في كل دوله بتتدخل في شئون مصر .. ثم ان الحكومه تصرفاتها لا تعنيني في شئ لانهم غلط قلبا وقالبا وما بني علي باطل فهو باطل . يبقي ما يهمنيش هم بيقولوا ايه للعالم . لاني مش منتظر منهم انهم ينصفوا البلد في حاجه
...................
في مدونات مثلا تلاقيها بترحب بالشواذ واسمهم الطبيعي كده شواذ او لوطيين او سحاقيات بلاش مثيلين دي لانه ممكن يجي وقت ويتقال اه ده في نوع من الجنس اسمه المثلية ودي حرية شخصية
وتلاقي المدونين دول بيحربوا في الاخوان ولا يتقبلوا اي نقاش معاهم نهائيا وبالفعل حصلت مشكلة مع احدي المدونات هي نزلت بوست عمالة تشتم في الاخوان واللي خلفوا الاخوان وشوية تقول منافقين ولو حد من الاخوان قال كلمة منافقين دي علي اي حد يالهوووووووووووي علي اللي هايتقال يقولك بيكفرونا وبيطلعونا بره الملة
لكن اذا قيلت كلمة منافقين علي الاخوان فلا باس وايه المشكلة
ووقتها يمكن زميلي في المدونة نزل بوست بيعتب علي اخوانا انهم وصلوا مع المدونة دي لاسلوب الحوار ده بالرغم من ان كثير من الذي دخلوا ليدافعوا عن الاخوان لم يكونوا اخوان
وشوية هتلاقي ناس تقول لك الاخوان بيكفروا اللي بيخالفهم وخلي بالك اعتقد ان رد المدونين الاخوان في البوست بتاعك وضح لك كذب هؤلاء وافتراءهم والا فلياتوا لي باي احد كفره الاخوان

عندك حق طبعا في مدونات مثلية او شواذ وكمان مدونات ملحدين ما بتقبلش الراي الاخر نهائي وانا ضدهم طبعا وذكرت ده كتير زي ما في اخوان ما بيقبلوش المناقشه . في ملحدين وشواذ ما بيقبلوش المناقشه دي مرض في مصر مش في الاخوان بس
وده مايمنعش ان الاخوان معظمهم بيرفض فكرة المناقشه وماتبصش لمدونتش لان انا اصلا معظم تدويناتي بعيده عن السياسه وكمان انا مفيش ناس كتير بتدخل علي مدونتي
فا متاخدش مدونتي مقياس
.........................
معلش كلمة علي جنب كده
بالنسبة للمدونين الشواذ او الشواذ عامة فمثل هؤلاء التعامل معهم مصيبة في حد ذاتها
في قصة سيدنا لوط هلكت زوجته معهم اتعلم لما ؟؟؟؟
لانها كانت تؤيد فعلهم وتجلس في مجالسهم ولكنها لم تفعل فعلتهم
اذا كنا نغضب لاهلنا حق علينا ان نغضب لربنا سبحانه وتعالي عندما تنتهك حرماته
وورد في السيرة ان الله امر الملائكة بان تهلك قرية فقالت الملائكة يارب ان فيها عبدك فلان يعبدك ويسبح بحمدك
قال سبحانه به فبدا لانه راي حرماتي تنتهك ولم يتمعر وجهه عليها

فمن باب اولي وهذا راي انا ان لا يعلق احد علي مثل هؤلاء ويعزلوا ومن اراد منهم المساعدة ليتغير فهذا هو من نقف بجانبه ونسانده الي ان يتغير واما هؤلاء الذين يتفاخرون بانتهاك حرمات الله ومبارزته بالمعاصي فمن باب اولي ان نغضب لربنا

انا لا اؤيد الشذوذ يا صديقي ولكن انا من اصحاب راي ان الشذوذ مرض وليس جريمه
فيبقي لابد اننا نقف جمب الشواذ دول ونحاول نقربهم للمجتمع لان بعدهم عن المجتمع ده اصلا هو سبب شذوذهم وبيديهم دافع انهم يستمروا في ميولهم الغير طبيعيه ولازم نواجهم بالمجتمع ونقولهم لأ انتوا غلط ونحاول بطل الطرق اننا ننقذهم ونحافظ عليهم .. يا صاحبي دول فيهم مسلمين ما بيفوتوش صلاه في الجامع صدقني من خلال معرفتي بيهم احب اقولك انك ممكن يجيلك ذهول من مين شاذ جنسيا حواليك لانهم عندهم قدره علي الاختفاء رهيبه نظرا لانهم طبيعين في كل حاجه ما عدا ميولهم الجنسيه
وعموما استني مني في الاجازه موضوع عن الشذوذ الجنسي
...................
واسف ياصاحبي ان كنت طولت عليك وبعتذر ان كان في تعليقي اي كلام دايقك
واتمني اننا نكون اصحاب لعلك لتعرفنا اكثر
والسلام

ولا يهمك يا سيدي انا بجد فرحت جدا بتعليقك وباعتذر انا عن اي شئ ممكن يدايقك في كلامي وارجو انك ما تاخدش اي حاجه من اللي انا قلته علي انه هجوم شخصي .. احييك
ويشرفني جدا اننا نكون اصحاب
تحياتي
سلام

break said...

انا مكنتش عايزة ارد فى البوست ده
عشان اترك المجال لاصحاب الموضوع يردوا


ربنا يشفيهم ويهديهم
ومتلاقيش واحد منهم اعمل بلوج باسمك
:D

Anonymous said...

السلام عليكم
عمي زيكا ازيك ياجميل عامل ايه
يارب تكون بخير؟؟؟
شكلك كده في كلية تجارة معانا فادعو لي عشان المادة الجاية رزلة حبتين تلاتة
وممكن نتقابل في يوم ان شاء الله واوضح لك وجهة النظر كاملة عشان في كثير من الاوقات الكلمات لاتوضح وجهة نظر اصحابها
وايملي
elyaqopy_ezz@yahoo.com

وعامة لعله خير
بس انت مفهمتش كلامي بتاع الادارة زي حاجات تانية
بما انك بتدرس ادارة فعند معالجة اي ازمة فاول شئ
ان نحلل المشكلة ونستعرض الظروف المحيطة بها ثم نضع حل للمشكلة واليات او سياسات لحلها او خطوات عملية
اما طرح مشكلة او قصور بدون حل فهذا سيؤدي في النهاية الي زيادة الاحباط
فالاهم من كشف المشكلة هو وضع اليات لحلها
ودمت بصحة وعافية
وشد حيلك في الامتحانات وهانبقي نكلمك حد عشان الكهربا اللي بتقطع شكلك كده في فيصل اصل الكهربا برضه بقالها بتقطع عندنا

وعامة ايملي عندك ونبقي نتكلم براحتنا في اي يوم باذن الله
والسلام

Desert cat said...

انا فاكرة انى كتبت كومنت على البوست ده
عموما مش مهم زيادة الكومنت اتنين
بس يا زيكا
انا اتهريت انونيمس
واتهزأت انا والعيلة المصون كلها من الاخر ده حد بيكون حاجه من الاتنين واحد فاضى وعقله افضى من افضاء الخارجى
او برضه واحد فاضى وقاعد يرذل على خلق الله ماهو مش لاقى حاجه يعملها
يبقى الكلاب تعوى والقافله تسير

Zika said...

break
نورتي المدونه يا بريك
بس سيبك انتي لسه محدش رد فيهم عليا في البوست ده
يسمع من بؤك ربنا

Zika said...

الفاتح اليعقوبي
بص يا باشا انا ف يتجاره اه
بس انا بعيد سنه اولي
:D :D
يعني ماتحاولش تعاملني علي اني فاهم المنهج وبعدين الاداره دي انا ناجح فيها عالحركرك
عموما ربنا يعينك ويعيني يارب في الكليه اللي ما يعلم بيها الا ربنا دي .. وان شاء الله تعدي علي خير
انا ضيفت ايميلك بس عالهوتمايل لاني للاسف معنديش ياهو
عموما
اتشرف بمعرفتك يا يعقوبي
وعلي فكره النور بيقطع في مصر كلها مش في فيصل بس
:d
تحياتي
نورت

Zika said...

desert cat
والله يا قطة المشكله دي بارضه حصلت لناس كتير ان تعليقاتهم ما بتظهرش عندي بس انا والله ماليش ذنب في الموضوع ده
هموت واعرف ايه السبب ؟
عموما زيادة الخير خيرين:)
المهم
علي فكره انتي من اكتر الناس اللي شجعتني اكتب الموضوع ده لاني كل ما ادخل عندك
الاقي العالم دي عندك زي الناموس في الصيف بالظبط
يمكن انتي وعند ( كله ماشي ) اكتر ناس بلاق يعندها النوع ده من التعليقات وانا بدات يبقي ليا معجبين من النوع ده بارضه
:DDD
فعلا خير الكلام ما قل ودل
الكلاب تعوي والقافلة تسير

EGYPT EYES said...

يازيكا هو في اجمل من التعليقات اياها دي أهم بيغيروه من جو الكأبه ويدوا الواحد فرصه أنه يضحك
تحياتي وربنا يوافقك

Anonymous said...

جرا ايه يا خول
انت سيبت الاخوان والمعارضه وبتشتم فيا انا
وعامللي موضوع مخصوص عشان تشهر بيا وبعدين يا ابن الاحبه هو انت هتعملي فيها محترم ده انت قلت قبل كده انك من امبابه يا ابن الواطي
هو بلدك دي فيها حد محترم .. كفايه انك انت مصري يا ابن الوسخه
اقل حاجه مكمن اقولهالك انك مصري يا مصري

Unknown said...

لكل داء دواء الا الحماقة اعيت من يداويها

الشخص الي بيكون مجرد مريض بالحقد ده سيبك منو احسن لان مافيش فايده من التعامل معاه

و الانونمس الي بيشتم زاد اوي و مش بيدل علي اي حاجه غير جبن و قلة ادب

تحياتي يا زيكا

mado80 said...

زيكا
إزيك

إيه ياعم زيكا النرفزه دي كلها هدي نفسك شويه

أنا اللي مضايقني هو الأخ الفاضل حسام بك بتاع الميرغني مالوش شغلانه غيرك ولا إيه حاجه تجنن فعلا

بقلك إيه يا زيكا ما تدلوش أي إهتمام بيتهيالي إنك كده بتعمله قيمه هو مش قدها ، أساسا ده شخص مريض يا زيكا

صحيح إنت عامل إيه في الإمتحنات يا مان ربنا يوفقك يارب

Zika said...

egypt eyes
انا متفق معاك يا باشا
فعلا بيغيروا جو الملل والمناقشات الجد والحاجات دي
:)
نورت

Zika said...

حسام الميرغني
ههههههه
اهلا اهلا
يا راجل ده انا بدور عليك من الصبح
علي فكره الشتيمه دي مش لايقه عليا خالص.. الغريب انها لايقه عليك انت
عموما مش هادخل في مهاترات معاك
وعلي فكره انا اه م ن امبابه
امباباوي وافتخر
ولو لم اكن امباباوي . لوددت ان اكون امباباوي
والحمد لله انا مش بعمل محترم عشان انا محترم فعلا
وطبعا مش سيادتك اللي هتحدد معني الاحترام
مانورتش المدونه
ومش تحياتي

Zika said...

emy
فعلا والله
الجمله دي في مكانها يا ايمي
هم فعلا جبنا وعندهم قلة ادب وفراغ كوني فظيع .. بيفرغوه فينا احنا .. ليه ماعرفش
نورتي يا ايمي

Zika said...

mado
ازيك يا مادو
يارب تكون تمام
والله فعلا يا مادو مش عارف اعمل معاه ايه لا ادب نافع ولا قلة ادب نافعه
عموما شكلي هجرب طريقة
4-4-2
بتاعتكوا دي اللي هي بتعتمد علي التنفيض في نص الملعب
:D
نورت يا صاحبي

break said...

الظاهر انى كنت وش الخير

Zika said...

break
يا ستي ما تاخديش في بالك