Tuesday, June 3, 2008

ايها المدخنون .. اطفي السيجاره ياض انت وهو

بما اني خلاص اتحسبت مع اللي مش مدخنين ... وكمان كل يوم بقوم من النوم بحمد ربنا ان انا بطلت قبل ما السجاير تغلي ...يعني هو لما السجاير اللي بشربها تبقي ب11 جنيه
وانا بشرب علبتين يوميا
بالذمه مش حرام
يعني اضربوا كده
11*2 = 22
22*30= 660
ده طبعا غير لو قاعد مع ناس والناس دلوقت بقم مفجوعين يبقي العلبه هتخلص في ربع ساعه في رشتين بالظبط
المهم
بما اني خلاص بقالي اكتر من 3 شهور مبطل سجاير
يبقي من حقي اقولكم
يا جماعه التدخين ضااار جدا بالصحه ويسبب الوفاه
وبالنسبه للناس اللي بيشربوا كليوباترا
كفايه يا ابني انت وهو وهي
الرئه المنيله بنيله اللي هم حاطينها
ده ناقص يطلعلك واحد من العلبه يقولك حرام عليك نفسك
انا جايبلكوا شوية طرق جديده وقديمه عشان نقلل نسبة التدخين في مصر
اولا : طرق ذاتيه ( يعني انت تعمل ايه عشان تبطل سجاير) ما تقولش مش هقدر
العبد لله عنده خبره في الموضوع ده
لو انت رياضي او كنت رياضي ( يعني بتلعب رياضه بلاش غباء) يبقي المفروض تقوم كل يوم من النوم تضرب نفسك ميت جزمه ودايما تروح اماكن بعيدع مشي عشان تحس بالفرق
شوف زمان كنت بتجري يف اليوم قد ايه ودلوقت بقيت عامل زي البطه البلدي لما بتتزغط
دايما فكر انك داخل بطولة الجمهورية السنه دي ولازم تكسب ولو ما كسبتش هيمدوك علي رجليك في ميدان التحرير
وطبعا مستحيل تاخد بطولة الجمهورية وانت بتنهج لما بتفكر كده
تاني حاجه لو انت بتشتغل وعندك بيت واولاد وبتشرب مالبورو ماتعملش ناصح وتقول اشرب كليوباتر .. ولا عايز صدرك يبقي صدرر فرخه مشوية زي الصدر المنيل بنيله اللي حاطينه علي العلبه ده
ها قول اعترف .. نفسك في يوم من الايام يودوك المستشفي بس الدكتورمش هيقولك مبروك يا باشمهندش
( زي الاعلان اللي بييجي علي قناة الناس بس مش عشان الانجاب )
فاضلك يومين وتقابل ربنا
حرام عليك تدفع 600 جنيه من فلوسك علي تقصير عمرك
ولو بتشرب كليوباترا تعالو نحسبها
العلبه تقريبا ب 3 جنيه
فرضا انك بتشرب علبتين في اليوم
3*2 = 6
6*30= 180
ما تستقلش بالرقم ده
يوم القيامه ربنا هيحاسبك ويقولك جبت الفلوس منين
طبعا هتقول .. اشتغلت بيهم
لما يسالك بقي يا فالح .. صرفتهم في ايه ؟؟؟؟؟؟؟؟؟؟
هتقول ايه .. هتقوله يارب شربت بيهم سجاير عشان اموت نفسي
وبعدين حرام تخش النار عشان 180 جنيه
حاجه كمان حاول تقنع نفسك بانك بطلت حتي ولو بتشرب اربعتاشر علبة في اليوم
حد يقولي ازاي ؟
اقولكم ازاي
في حاجه في علم النفس بتقول انك لما تعد تقول لواحد سرق مره او اتنين يا حرامي يا حرامي
جوه نفسه هيقتنع بانه حرامي وهيفضل حرامي حتي لو هو كان ممكن يتعدل
فانت لو اقنعت نفسك انك بطلت ولما حد يقولك خد سيجاره .. قوله معلش اصل انا بطلت
اولا مش هيعزم عليك تاني
ثانيا انت هتقتنع وهتعيش في دور المنتصر اللي بطل سجاير
ثانيا : ( انشطه عامه ) يعني احنا المفروض نعمل ايه عشان نخلي الناس تبطل سجاير
اولا في المحلات التجارية
دايما بنلاقي ورق متعلقه
يقولك
" الاحساس نعمة"
" التدخين حرام شرعا "
" ممنوع التدخين "
وانا رايي ان الحاجات دي ما بتجبيبشي نتيجة لازم نجرب حاجات اكثر حزما وصرامه
زي مثلا
" اطفي السيجاره يا روح امك "
" كل واحد مش بيدخن يشوف واحد ماسك سيجاره يضربه علي قفاه "
" لو ماطفتش السيجاره يارب بيتوا يقع "
" اللي بيدخن يطلع بره "
وفي المدارس مثلا بدل ما بيكتبوا
" يابني حرام عليك صحتك "
نغير الكلام ده
" لو شفتك ماسك سيجاره هطفيها فجيبك"
" هقول لابوك "
" الطالب اللي بيدخن يجيب سيجاره يا اما هعمله استدعاء ولي امر"
او مثلا
" ممنوع التدخين يا حمار"
" انت حر في صدرك وانا حر في صدري"
" العربيه صدرها تعبان "
دي نصيحه طبعا لسواقين التاكسي
والقايمة مفتوحه لاي اقتراحات جديده
كان معكم من امام مستشفي الصدر
انا

23 comments:

أميمة كامل said...

ربنا يثبتك

حاول دائما تحث أى حد حولك

ممن يدخنون انه يبطل ويتوقف

دا مهم لك انت شخصيا

وياريت بعض النصائح

تتعمل فى نظام

مجموعات تتفق وتنفذ ويكون

فى تشجيع مستمر لصاحب احسن انجاز

Eman Eltaher said...

ههههههههههههه
والله انت بجد ضحكتنى جدا من الإقتراحات الجميلة دى خصوصا ف الجمل اللى المفروض تتكتب بدل الجمل الى متعودين نقراها على علب السجاير

نقراها من بعيد لبعيد يعنى
:)

بس بجد الموضوع ده لو كل شاب مدخن قراه و شاف انه موضوع انه يبطل التدخين ده مش شئ مستحيل بدليل انك بطلت أهو
صدقنى هيبقى ثوابك و حسناتك دول مش هيتعدوا

و ربنا يجازيك خير
أولا على النصيحة اللى بتقدمها للشباب المدخنين

ثانيا على خفة دمك

break said...

مبروك يا زيكا انك بطلت انا معرفتش انك بطلت نوهائى خلاص

:)

حلو البوست
بس مكنتش اعرف ان كليوباترا رخيصة اوى كدة

يا بلاش
انا مش بحرض حد
انا بس اول مرة اعرف

Zika said...

اميمه كامل
شكرا يا اميمه علي تعليقك
وشرفتيني بالزياره
واتمني دوام الزياره ان شاء الله
تحياتي

Zika said...

eman eltaher
اولا الحمد لله ان البوست عجبك
وفعلا نفسي كل واحد بيشرب سجاير يعرف ان يقدر يبطل سجاير وان السجاير البعد عنها مش معجزه يعني
دي ثانيا
ثالثا بقي
لأ مفيش ثالثا
:)
نورتي
تحياتي يا ايمان

Zika said...

break
الله يبارك فيكي يا بريك
عقبال اي حد تعرفيه بيشرب سجاير
وبالنسبة لكليوباترا
هي رخيضه بس مفعولها يودي في داهيه
الحمد لله حتي لما كنت بشرب ماكنتش بشرب كليوباترا
دي كفاية ريحتها
ههههههههههههه
سلام

appy said...

ربنا يهديك يا ربو كل الشوباب يعقلوا يا زيكس يا اخى الصغير انت

Desert cat said...

يعنى انا لو ركبت تاكسى ولايت جملة زى اللى فى اخر البوست دى هسيبه وانزل

Zika said...

appy
يارب يا آبي
يهدي كل الناس يارب يا اختاه يااارب

Zika said...

desert cat
لا بس هتتحرجي تشربي سجاير عشان هتصعب عليكي العربيه وبكده لو كل عربيه حطط اليافطه وكل الناس صعبت عليهم العربيه
محدش هيدخن في العربيات
وبعد كده
الناس هتحرج تدخن في السوبر ماركت
وبعدين محدش هيشرب في المدرسه
وهكذا
لحد ما يبدا ياخد علي انه مش بيشرب سجاير
وبعدين يا قطه اهي كلها محاولات
وربنا يقدم اللي فيه الخير

dodda said...

قرار رئيس الجامهوربه بتأميم شركة قناة السويس..شركه مسهمه مصريه
-------
الله يرحمه عبد الناصر
--------
يعنى احنا مش لاقيين قمح ناكله وبنستورده
مش عارف ياخد قرار بمنع استيراد السجاير؟؟
--------
ربنا ياخد اللى فى بالى

Zika said...

dodda
مايقدرش يمنع استيراد السجاير
دي بتجيبله دخل رهيب
والله احنا بلد غني جدا .. بس المشكله النهب والهبر والسرقه والحاجات دي هما اللي مخليينا مش لاقيين نزرع القمح ومش لاقيين كمان نستورده
نورتي المدونه في اول زياره
واتمني ان الزياره تتكرر دايما
تحياتي

ADAM said...

السلام عليك يا زيكو

والله جدع إنك بطلت

لي واحد صاحبي مدون نفسي يبطل

ربنا يهديه

أيوة كده اديهم فوق دماغهم

واللي مش عاجبه

ينزل

*************
adam_4lovers@yahoo.com
ياريت تكلمني هنا

***************

تحياتي


آدم

mado80 said...

إيه خلاص يا زيكا

بطلت سجاير يلا ألف مبروك عقبال الجميع

أنا لسه بحاول أهو
خفضت معدل شربي للسجاير لأدني معدلات ربنا يستر بقي ما يحصليش إنتكاسه

بس هو فعلا تبطيل السجاير مش مستحيل

تحياتي ليك يا زيكا

الــمــتــمــرده said...

والى بشرب L M نسيت تقول
تحياتى

Zika said...

adam
اديله شوية النصايح دي يمكن تيجي بفايدة
نورت يا ادم
تحياتي

Zika said...

mado80
اه يا ماجد انا ربنا وفقني وبطلت
عقبالك انت كمان ان شاء الله
بس شد حيلك
وهي فعلا مش معجزه
وان شاء الله لو بطلت سجاير مكافأة ليك
علبتين سجاير قصدي
مش هيكفيني فيك اسبوعين بوستات
بس اتكل علي الله وانوي بجد
سلام يا ماجد

Zika said...

المتمرده
بصي اللي بيشربوا ال ام وانا كنت منهم بارضه لمما كنت ببقي فقران
ياخدوا الوسط
ما بين المارلبورو و الكليوباترا
يعني يقروا الموضوع من النص
:d
نورتي المدونه يا متمرده
تحياتي

sa'7so'7te said...

هاهاهاهاهاهاها
بجد لذيذ جدا البوست
و والله انا شايفه ان اقتراحاتك هتبقى ناجحة جدا
:)

Zika said...

sa'7so'7te
كويس ان البوست عجبك
وياريت بقي تجربي الاقتراحات دي علي اي حد بيشرب سجاير تعرفيه
:)

د/أبويحيى وادم said...

السلام عليكم ورحمه الله وبركاته
آخى الكريم
لما أراك لم تشارك معنا فى حملتك إلى الآن ؟
أخي العزيز : هي حملتك هي لغتك ولغتي أذا لم نحافظ عليها نحن ونعمل على نشرها فمن يفعل ذلك ؟؟
أنا لا ادعوا إلى المثالية فى استخدام اللغة والأمر مفصل بالموضوع بالمدونة
وهى ليست دعوا لفرض قيود على كيفية التعبير عن الرأي فلك مطلق الحرية في هذا
أخي الحبيب أن مشاركتك في هذه الحملة سوف يكون احد أسباب نجاحها ونشر لغتك
ندعوا الى الاعتزاز بلغتنا ..أعلم انك تعتز بها ولكنى أدعوك الآن إلى نشر الأمر بين كل من تعرف وكل زوار مدونتك التي تدون بها وكل المنتديات التي تشارك بها
إلا أذا كنت غير مقتنع بالفكرة والحملة فلك مطلق الحرية في هذا واعتذر أذا كنت أطالت عليك
والسلام عليكم

ketchup said...



ايه ايه ايه

يانيبتي
انت تشرب سجاير

اطلع بره بيتي


و كمان بحداشر جنيه
يعني مش سجاير من بتاعت الغلابه كوكو الضعيف حبيب الملايين

هو انت بتشرب ايه ولمؤخذه
كوفته



على فكره ان امش مدخن و بكره التدخين جدا


Zika said...

ketchup
لا يا عم
مش كفته
بس السجاير اول ما غليت كانوا البقالين بينصبوا فيها وكل واحد يرفع زي ماهو عايز
بس دلوقت الحوار اتظبط شويه يعني ام حداشر جنيه دي بتتباع ب 9 .30 واغلي حته بتتباع فيها تقريبا 10
الحمد لله مش متابع ومش عايز اتابع
انا كده كويس الحمد لله
وعقبال كل اللي بيدخنوا يارب