Wednesday, May 14, 2008

ثقافة الكلمات المتقاطعه

اين توجد اطول بطيخه في العالم ؟
من هو اول من شرب شيشه قص ؟
اين يقع جبل بطاطس ؟
من هو اول من حلق دقنه ؟
متي اقيمت اول مسابقه لقتل النمل في العصر الحديث ؟
لا طبعا معرفة اجابات الاسئله الساذجه السخيفه دي مش هي الثقافه
الانسان المثقف هو الانسان اللي عنده معلومات مجمعه عن شئ بيحبه او بيتقنه او متابعه وموجود في اتجاهاته وافكاره وباين علي كلامه انه متاثر بشئ معين وكلمة ثقافه ماينفعش تتقال في العموم
ماينفعش اقول الانسان ده مثقف .
لان الثقافه كلمة مش عايمه كده وخلاص ..
يعني كلمة مثقف دي تتقال علي واحد قرا في حاجات كتير ودرسها واتناقش فيها وخرج باللي يفيده في حياته وحياة غيره
كمان لازم الثقافه تتحدد
يعني مهم اوي نقول الانسان ده مثلا مثقف في الرياضه
يعني متاثر بالرياضه وقرا كتير في انواعها ويمكن مارس كتير منها وهكذا وبالتالي شخصيته رياضيه يمعني ان الرياضه اثرت علي تفكيره فبيحب الرياضه وبالتالي هو شخصيته تتوصف يانها رياضيه بمعني انه متقبل للاخر عنده روح المنافسه متعلق بالرياضه ومتابعها مرح لياقته عاليه وهكذا
ونقيس علي كده في باقي الحاجات ..
ولا انتوا شايفين ايه ؟

17 comments:

اهو ده عيبه said...

اولا دى اول مرة اعلق هنا فى المدونة وان شاء الله مش الاخيرة

انا متفقه معاك ان الثقافه لازم يكون ليها تعريف محدد ومتبقاش مجرد لفظ مطاط بيسمح لاى حد انه يدعيه لنفسه

ومفيش اكتر فى ايامنا دى من مدعى الثقافه
لكن مش لازم برضه نقصرها على مجال واحد او محدد لان فى ناس عندها القدرة انها تتابع اكتر من مجال فى نفس الوقت وتهتم بيه

تحياتى ليك

Empress appy said...

بس الثقافه اى حد عارف كلمتين او قراهم بدون وعى يقولك انا مثقف عادى يعنى
الكلمات المتقاطعه تندرج تحت المعلومات العامه ودى برضه ثقافه
عاتى يعنى

افهمت حاجه

Zika said...

اهو ده عيبه
اولا اهلا بيكي في المدونه ويارب تنوري علي طول
اكيد مش لازم نحددها عشان اكيد في ناس عندها القدره انها تثقف نفسها في كذا مجال
بس انا كنت بعلق علي اللي حفظله كلمتين في اي حاجه وبيقول علي نفسه مثقف

Zika said...

appy
ايون الكلمات المتقاطعه تحت بند معلومات عامه
لكن لما واحد يحل الكلمات المتقاطعه ويجاوب علي اسئلة من سيربح المليون مش شرط بكده يبقي اثبت انه مثقف وهكذا
اه فهمت

الستة بتوع صيدلة said...

يتشرف جروب السته بتوع صيدله
بدعوه حضرتكم على حفل افتتاح بلوجهم الكريم :)

Hook said...

بسم الله الرحمن الرحيم...الاجابة...تونس!

Zika said...

السته بتوع صيدله
حاضر
:D

Zika said...

hook
الحمد لله
الاجابه غلط
:D

كريم عاطف said...

في سؤال مهم قوي نسيت تقوله مين اللي قتل علي بك الكبير؟
بص ياسيدي كلامك سليم طبعا لو هي دي الثقافة بس، لكن طبعا دي جزء صغير جدا اللي هو المعلومات العامة
أما كلمة مثقف دي فهي دلوقتي بتتقال على أي حد بيطلع في التليفزيون ويقول كلمتين حلوين او وحشين
يارب أشوفك مثقف وتطلع في التليفزيون برضه بس تقولنا كلمتين حلوين
تحياتي

Zika said...

كريم عاطف
يارب دعواتك معانا :)

القط البرى said...

انا اول مرة اعلق هنا هى بصراحة
مدونة حلوة اوى

ارجو لك التوفيق
هى اول زيارة وان شاء الله مش هتكون اخر زيارة

صديقق محمود

سلاااااااام

Zika said...

القط البري
نورت المدونه يا محمود
ويارب تنورها علي طول
وتشرفني دايما زيارتك
سلام

mostafa rayan said...

بص في تعريف بسيط قوي للثقافة ان تعرف كل شيء عن شيئ وشيئ عن كل شيئ
زي مابتوع الأعلام بيقولو لماتيجي تشتري حاجة وتكون ملفوفة في ورقة جرنال اقرأ الورقة قبل ماترميها واعرف كل شيئ ممكن عن مجال تخصصك
لكن مايمنعش بردة ان احيان كتير قوي اسئلة الكلمات المتاقطعة بتكون خنيقة قوي
انا لست من هواة حل هذه الكلمات
تحياتي لك

Layla said...

المعرفة عموما كويسة..لكن مشكلة معظم ما يسمى بالمثقفين انهم مش بيعرفوا يستخدموا المعلومات دي و ويوظفوها في خدمة مجتمعهم

يعني مثلا انا ميهمنيش اعرف اسامي الناس اللي عملت الثورة الفرنسية ولا يهم اي حد في مصر انه يعرفهم

لكن مهم جدا نعرف اسباب الثورة عشان نمنع حدوثها في مصر مثلا او في بلد تاني.. ونعرف احداثها الكويس منها والسيء

وصعب برضه نحدد ايه المهم وايه اللي مش مهم.. لان اهمية المعلومة مش بتظهر غير لما بنحتاجلها.. مثلا دكتور مش هيهمه يعرف اين اطول بطيخة في العالم..لكن معلومة زي ممكن تهم حد من العاملين في الزراعة وهكذا

الموضوع نسبي جدا

Zika said...

mostafarayan
حلو اوي التعريف ده
بجد بحييك
عليه
نورتني
تحياتي

Zika said...

marvel
فعلا نسبي وده اللي انا قلته
...
ليك وحشه
:)
يارب تكون بخير
سلام

الدرعمي said...

صحيح قولك يا صاحبي

الثقافة وإن كانت لابد وأن تكون شاملة عامة

إلا أنها يجب أن تكون فيها شيء من التخصص والتنظيم

والحكمة تقول

اعرف شيئا عن كل شيئ

واعرف كل شيء عن شيء


مبحبش الكلمات المتقاطعة أوي

يعني ممكن أبص فيهاوممكن لأ


تحياتي


آدم