خطرفة جغرافيه... الجزء الاول

في يوم من ذات الايام .. كنا في عز الصيف .. والمطره مغرقه الدنيا ...صحيت من النوم علي الساعه 9 صباحا .. صحيت علي صوت المؤذن بيقول .. الصلاة خير من النوم .. الصلاة خير من النوم..قومت علشان اصلي العشا حاكم اصلك لازم تصلي العشا في معادها روحت المدرسه.. كان عندي يوميها امتحان موارد...اصل انا نسيت اقولكم اني في كلية تجاره , شربت بتاع سبعه نيسكافيه وعلبتين سجاير وازازتين بيره..اصلك لا مؤاخذه لازم تروح الامتحان عامل دماغ ..عشان ده امتحان موارد وبعدين بيدينا واحد دكتور اسمه اشرف عبده..ما يعلم بيه الا ربنا...هو قال بنفسه انه بيكيف لما الطلبه بتوعه بتسقط عنده يعني واضح انه مسطول فانا قلت اما اروحله مسطول واحلله اي حاجه هو يتسطل عشان يسقطني يغلط ينجحني انجح انا....وهو ده اللي حصل فعلا
المهم خلصت الامتحان وخرجت اعدت شوية في كافيه من كافيهات المهندسين وفجاة الراجل الغريب اللي كان قاعد في التربيزه اللي جمبي ساب مصباح صغير جدا .وقام ...بصراحه مخدتش بالي غير بعد ما الراجل مشي من الكافيه ببتاع تلت اربع ايام كده المهم طبعا خدت المصباح وطلعت اجري ورا الراجل.اكيد اكيد اكيد لقيته.. وقلتله حضرتك نسيت المصباح السحري بتاعك قاللي لا ده بتاع الست اللي كانت قاعده في نفس الترابيزه من 15 سنه قلتله ياااه..وفجاه وانا بقول يااااه الراجل اختفي قلت ياللا مش مهم
خدت المصباح ومشيت من غير ما ادفع الحساب . وروحت مكان فااااااااااضي كله ناس وتعابين وعربيات ودخان وموتسيكلات وتكاتك وميكروباصات وتاكسيات وعربيات سيات و128 .يادوبك علبال ما لقيت حته فاضيه اركن فيها الجزمه بتاعتي.قلت باس مفيش غير اني ادعك المصباح .اكيد هيطلعلي عفريت وساعتها هطلب منه يحققلي امنياتي كلها ...المهم اعدت ادعك في الفانوس..ادعك في الفانوس ادعك في الفانوس ...لحد ما الفانوس اتكسر مني ..قلت ياللا اهو عفريت وراح
بصراحه احبط جدا...لقيت نفسي واقف جمب مسجد فاتح .قلت حلو.ادخل اصليلي ركعتين وانا عالباب ,
لقيت اتنين عساكر بيقولولي رايح فين يا كابتشين
. قلتله بتسال ليه ..واشمعنا سالتني انا ما كله عمال يدخل ويخرج ولا قلتلهم رايحين فين.ما الطويل دخل والقصير دخل والتخين دخل والرفيع دخل ولا هي وقفت عليا انا يعني .وبعدين ده بيت من بيوت الله عادي يعني..انا عايز ادخل اصلي..
. قاللي خلاص طالما انت داخل تصلي تبقي انت واد اصلي .
دخلت اعدت علي كرسي الاعتراف وسالني الشيخ اللي جوه الكابينه وقاللي قوللي يابني ايه علتك..قلتله يا عم الحاج انا بقالي ساعتين بدور علي المصليه مش لاقي ..بصراحه اول مره ادخل مسجد كله كراسي وصلبان...مدرتش بنفسي بعد كده غير وهما بيشيلوني هيلا بيلا ورموني بره الكنيسه .
وانا ماشي في نفس اليوم الجميل الصافي الملئ بالغبار والاتربه ده , لقيت جامع قدام الجامع التاني اللي هو طلع كنيسه ده وقدام الجامع لقيت واحد لابس سلسله دهب فيها صليب بيحط ايده علي كتفي وقاللي
- يابني انت شكلك مؤمن .ما تدخل الجامع تصليلك ركعتين وتدعي ربنا حسني مبارك يموت.يمكن يموت
قلتله يا عام الشيخ انا مش هدخل الجامع لا يطلع بعد كده كنيسه وتضربوني وترموني بره الجامع ..
- بصلي الراجل باستغراب..قلتله وبعدين كده كده حسني مبارك مش هيموت اوجع دماغي انا ليه بقي وادخل اصلي واتضرب وبتاع.
- بصللي الشيخ باشمئزاز وضربني قلمين
طبعا فاكرين اني ضربته قلمين
لأ ......تسعه ....علي كام بونيه علي كام افا كومته... جت الاسعاف شالته
المهم بعد اليوم العصيب ده ... روحت بيتنا ..ماكنش فيه حد في البيت النهرده كلهم مسافرين .وانا طالع عالسلم لقيت جيراننا واقفين مزبهلين ... معرفش من ايه
قلتلهم بتبصولي كده ليه
قالولي: فيه واحد جه سال عليك
المهم طلعت شقتنا .وفتحت الباب...لقيت عفريت اعد في الصالون
طلعلي عفريت ..اه عفريت عادي يعني ..انت سايب كل الكلام اللي فات ده وجاي تستغرب دلوقت
قاللي شومبيك لومبيك جزمه موجوده فرجلليك
وفبداية كلامه قاللي
وهو متاثر جدا وتقريبا هيعيط
حاجتين بس مقدرش احققهملك..
الصحه والنيسكافيه
الصحه دي بعلم ربنا
والنيسكافيه عشان معنديش ماكنه نيسكافيه وبابي ومامي سافروا ومش هييجوا قبل 3 اشهر وانا معنديش فلوس اجيب ماكينة نيسكافيه فارجوك بلاش تطلب مني طلب صعب كفايه الحر اللي الواحد فيه ده
المهم قلت للعفريت انا بقالي يومين ما كلتش ..هات اكل...دخلت خدت دش وخرجت لقيت جرس الباب بيرن .وواحد لابس طاقيه دليفري وبيقوللي حضرتك طلبت من عندنا طلبات بالتليفون .. الحساب 326 هنضيف عليهم ضريبة عفاريت وبيبسي وخدمه يبقي حسابنا 1326 جنيه .قبل الميلاد
تنحت للدنيا كده .فجاه لقيتني مسكون بالملل!
روحت لعفريت قلتله انت اتجننت ازاي تطلب دليفري.هو انت مش عفريت ..
قاللي ايوه عفريت بس اكيد مش بطبخ يا فالح ولا انت فاكر كل العفاريت زي العفريت الاهبل ابن الاهبل اللي طلع لاسماعيل يس ,
قولت امري لله...وروحت دافع الحساب
شويتين وقلتله بص يا اونكل عفريت
قاللي اؤمر بس من غير ما تتمنظر
قلتله انا مبحبش السودانيين ..مش عايز اشوف وش واحد فيهم في مصر...
قاللي ليه بس يا عم حرام عليك تقطع عيشنا ..احنا عملنالك ايه
تنحت للدنيا كده..فجاة لقيتني مسكون بالملل!
قومت عملت كوبايتين شاي ليا انا والعفريت , واعدنا في البلكونه , بنبص عاللي رايح واللي جاي واليوم ده بالذات كان فيه حوالي 13 حادثه .انا مش عارف فيه ايه ..كل العربيات اتجننت , وطبعا مفيش ولا ظابط مرور , ولا اي حمار واقف ينظم المرور ,
قومت اصليلي ركعتين , لقيت العفريت جاب مصليه وجه وقف جمبي , وهيصلي معايا.قلت ربنا يهدي, وبعد ما خلصنا صلاه.قلت اخش انام شويه وبكره ابقي اتصرف مع العفريت ده ,
لقيت العفريت بيقوللي لو سمحت يا باشا ,,اديني حسابي بقي خلليني امشس عشان انا واقف من صباحية ربنا علي رجلي
احولت عينيا واتشلت ايديا ورجليا وبؤي اتعوج , وحواجبي وقعت وشعري اتصبغ لوحده لون ابيض سماوي كده لون النادي الاهلي حبيبي وشرياني , وقلتله يا عم انت هو انت مش المفروض عفريت وكده.. وتحققلي امنياتي .قاللي يا عم انا عفريت علي قدي غلبان وبعدين خلصني بقي انا عندي شغل الصبح ولازم انام بدري عشان اصحي بدري , عشان الحق الاتوبيس عشان ما اتاخرش علي الشغل والمدير يهزاني وبعدين انا امي عيانه يا بيه وابويا اسير حرب من سنة 48 ولسه مخرجش , وبعدين دانا وحيد امي وابويا يا بيه وبجري علي اخواتي السبعه , ده فيهم تلت بنات علي وش جواز
ربنا ما يوقعك في ضيقه يا بيه المهم اديته حسابه
وقاللي الوداع ...قلت اشطه
>> يتبع