انا عمري ما نسيت

السنه الجديده ...وبعد سنه من دلوقت هتبقي سنه قديمه والسنه اللي وراها بارضه هتبقي قديمه وكله مسيره في يوم هيقدم
وحاجات كتيره عملناها هتموت وهتتنسي .
لكن انا عمري ما نسيت

اسلام 1989 :2/10/ 2000

بيشوي 1989 :7/ 6/2006

هبه 1989: 29/2/2007

رنا 22/11/1989 : 29/11/2006

خلود 12/9/1985 : 15/5/2006

لسه فاكر كل يوم فقدت فيه واحد من اغلي الناس في حياتي , كل يوم ببقي نفسي اشوف حد منكم ولو لدقيقه .

نفسي بس اقولكم قد ايه انتوا واحشني

نفسي اسلم عليكم واحضنكم تاني ونضحك لبعض لما نشوف بعض زي زمان

اوعوا تكونوا نسيتوا ايام زمان...هزعل اوي.عشان انا عمري ما نسيت

اسلام : حادثة عربية واحنا خارجين من المدرسه وبنتسابق مين يعدي الشارع الاول

بيشوي : غرق في البحر

هبه: هبوط حاد في الدوره الدمويه :

رنا : ماتت بعد فشل عمليه لثقب في القلب

خلود : اضطرابات في القلب( هبوط حاد في مؤشر النبضات) نتيجة زيادة نسبة الكحول في الجسم

حتي لو اختلفت الطريقه اللي كل واحد فيكوا بعد عني بيها

هتفضل الحقيقه ان كلكم مشيتوا فوقت قريب

ومهما طالت المده بعدكم عمر ما هنسي حد منكم ابدا

انتوا بس وحشتوني

وحشتني يا اسلام ووحشتني ايام الطفوله

وحشتني يا بيشوي يا اخويا الصغير

وحشتيني يا هبه

وحشتيني يا خلود

وحشتيني يا رنا

انا سمعت الاغنيه دي ...ول انتوا سامعيني دلوقت .ياريت تسمعوها معايا

وداع -- كريم جمال

يا دنيا ليه قاسيه كده
فيكي دخلت ولا اتسالت
توهت وغرقت
ليه كل ده
سايبك خلاص منك زهقت
كل الصحاب ماشيين ورايا
فوقهم شايفهم كلهم
جايين معايا
بنده عليهم
صوتي عالي
يا خساره مش سامعين ندايا
هيوصلوني ويرجعوا
بنده عليهم اسمعوا
من جوه قلبي هتوحشوني
من غير بكا من غير كلام
من غير وداع من غير دموع من غير سلام
عشت السنين وياكوا بنسي
واهو دوري جه
ايام وكل الناس هتنسي
بس اوعوا تنسوا اللي خلقنا خير وشر
لحظه وهتلقوا العمر مر
والدور هييجي مفيش مفر
سر الحياه ..سر الوجود
جوانا اه مالهاش حدود
نكره في ناس بتعيش سنين
ونحب ناس زهرة شبابها بتنطفي
قدام عينينا
والمعني موت
مين اللي ينسي وينسي ايه
دانا لسه سامع ضحكتك في وداني رنه
شايفك في عيني وبسمتك .رايح وجايه
لو ننسي كل الكون
ملامحك...مش هننسي
لو عدي بعدك الف يوم
بعدك ومهما الدنيا تقسي
هتكون معانا
في فرحنا وفي حزننا هتعيش هوانا
واللي بينسي ..بينسي حد براه يكون
لكن مكانك في القلوب
بين الجفون جوه العيون
يعني اللي ينسي روحه
والروح عليه ازاي تهون
ازاي تهون
ازاي تهون
ازااي تهوون

.........................................

نرجع تاني للاحلام . عارفين انا نفسي في ايه كمان , انا نفسي ارجع زي زمان

ارجع بطل العاب قوي تاني

او

ارجع العب كرة قدم زي زمان .بس من غير ما الكابتن يعد يشتم فيا , ولا يطردني من الملعب لما يحس انه احرج بعد ما اجيب جون .

او

ارجع العب بوكس تاني , بس من غير ما الاعب مايكل , مايكل يا كابتن جسمه قدي تلت مرات اكيد المنافسه بيننا مش هتكون عادله

او

نفسي اتعلم السباحه , نفسي اعرف اعوم

زهقت من كل ما اجرب اتعلم اعوم اغرق ويطلعوني مغم عليا

نفسي ارجع تاني للثانويه العامه.عشان اذاكر يمكن مجموعي يبقي اعلي . وادخل الكليه اللي كنت عايزها

نفسي ادرس اخراج

نفسي السيناريو اللي كتبته يشوف النور... لأ نفسي اخرجه انا

نفسي انزل ديوان ليا في السوق.

مش عشان يتباع ولا حاجه

عشان الناس تقرا وتحس اللي بقوله

نفسي اخف

اخف خالص

من كل الامراض ومن كل الصفات الوحشه اللي بقت فيا

عارفين نفسي في ايه

نفسي ارجع ارقص زي زمان

نفسي مابطلش اروح حصة الرقص

نفسي لياقتي ترجع زي زمان واحسن

نفسي رجلي تمشي مع المزيكا تاني

وجسمي كله يتنطط زي زمان

نفسي في يوم ابقي مدرب رقص

..................

انا عمري ما اتمنيت اكون حد غيري , كل اللي اتمنيته اني ابقي انا , حاولت في كل حاجه وفكل ناحيه .لكن دايما بتبقي فيه حيطه كبيره اوي قدامي للاسف لا بطولها

ولا بقدر اكسرها ولا حتي قادر اشب واشوف ايه اللي مستخبيلي وراها