التدوينة ال 24 متهيألي - السعودية

على فكرة مش عايز ابقا متحامل
بس والله فيه كتب تاريخ من وجهات نظر انجليزيه شبه محايده
بتعترف
أن قيام دولة اسرائيل كان مرتبط بقيام دولة آل سعود في شبه الجزيرة العربية
والعكس صحيح
انا ماعنديش ادنى مشكلة مع السعوديين ك أشخاص
لكن عندي كام مشكلة
مع التضامن المستمر للسعودية مع الفساد
ومشكله مع الملكية اللي مسيرها إلى زوال
وكمان مشكلة مع الفكر الوهابي برعاية آل سعود

وكمان مشكلة مع اتحاد جده عشان ماحترموش جوزيه :D:D

تدوينة كمان - يبليك ربي

حد عارف مين اللي كاتب الكلام ده ؟؟؟؟

أنهو شاعر .. فانهي عصر

وما كانت المناسبة

وما هو لون السيراميك المستخدم في البناء ؟

شكرا لصاحب هذه المدونة اللي انا قفشت منها اللينك وانا باسيرش

http://tagreba.wordpress.com/2006/12/04/%D8%A3%D9%88%D8%B1%D9%83%D8%B3%D8%AA%D8%B1%D8%A7-%D8%AF%D8%A7%D8%BA%D8%B1-%D9%88%D8%B9%D9%85%D8%B1%D8%A7%D9%86-2/



وماتنسوش تنزلوا اللينك اللي في آخر المدونة وتسمعوها
حاجه كده فشيخه يعني








يا من هواهُ أعزّه وأذلنـــــــــي
كيف السبيل إلى وصالك دُلني

حالـفتـني وحلفـــــــــــــــتَ لي
وحلفتَ بأنكَ لن تخونَ فخُـنتني


وحلفتَ أنك لا تميلُ مع الهوى
أين اليمينُ وأين ما عاهدتنـــي


ولأقعُدنّ على الطريقِ وأشتـــــكي
إني أنا المظلوم منك وأنت ظلمتني


ولأدعُونّ عليكَ في غسقِ الدُجى
يُبـليكَ ربي مثلما أبليــــــــــــتني

التدوينة ال 20 وال 21 - سؤال بسيط

هو فين التدوينة ال 14 ؟




الامتحانات

لا دين لها

التدوينة ال 19 - كان لازم يعني

نصيحة مهمة جدا :
اللي تعرف ديته اقتله

ده مش تحريض ع القتل.. ده تحريض ع الحلول

لو عندك حل لمشكلة .. له أثار جانبية
مش مهم
يادوبك ... شكة دبوس

التدوينة ال 18 - جزء من قصيدة

كل البنات
قطعوا مسافة طويلة
لحد روحي
وفضّلوا عليا الطريق

عيون بتسقط م النظر
وايدين بتندب ع الحقيقة
زرعة دايبة في نص بير ..
ومايمتلكش الصبح غير
وجهة نظر

وعينيا وقعت في البحر
ماقدرش اجاذف بالغرَق
ولا المراكبي كان هايتشعبط على كتاف السما
ويجيب عياط المغرمين
بالمشي نص الليل لحد عندك

التدوينة ال 17 - معلش

معلش .. معلش

التدوينة ال 16 - الحرّيف

نجاح الموجي وهو بيعيّط بعد ما زق العربية هو وعادل امام

عادل امام وهو بيتكلم مع المومس ع السلم وفي وسط ماهي عمّاله ترغي يقولها
" أنا أمي ماتت "

عادل امام وهو بيطلع جنيهات لابوه اللي لسه بيشتكيله من تحت لتحت من انه ماعهوش فلوس

ابو عادل امام وهو بيقوله
" فارس , لما أموت ادفني في البلد "

عادل امام بعد ما نجاح الموجي نط عشان مايتمسكش
وهو بيبص على اسرة نجاح الموجي وهم مرعوبين
ويقوم قايل
" ملعون أبو الفقر "

التدوينة ال 15- جزء من قصيدة

كان نفسي بجد أحس الصمت في قلبي
و ف عز ما صمت الحارة بيلعن حظ الشارع
لحظة ما يخلى من ذنوب الأوليا
هانده لآدم وأسأله
يا هل ترى
طعم التفاّحه كان يستحق المعصية ؟

التدوينة ال 13 - عندي امتحان بكرة

ببساطة

A person that aged 30 years and wishes to purchase a pure endowment policy that will pay him l.e 1000 when he attains age 65

Find the Present Value (P.V)


وانا مال أمي ان شالله ما عنه عاش ولا شاف تأمين ولا مات ولا اتنيل على عينه

المهم يعني ان
x = 30 n 35 S = 10000

N.S.P or (P.V) = s.nEx
10000. 35E30


N.S.P = 10000 . D65
ـــــــــــــ


D30

وبتعوض من الجدول
10000 . ( REsult) = 1639.27


دي مش مسألة بتيجي في الامتحان
انما ايه بقا
يجي يطلع عين أهلك في الامتحان ويقولك

A man aged 65 is granted a pension of L.E 1500 A year for 5 years beginning at once ( لازم نعرف انها كده عاديه مش فورية ) and L.E 200 a year .. there after for the rest of his life .
If all payments on his survival ,
Find their Present Value

هنا لازم نخلي بالنا ان دول وثيقتين
مش وثيقه واحده
يبقا ايه

x = 65 R1 = 1500 N1 = 5
R2 = 200 N2 = 5

نلاحظ هنا يا جدعان ان الأولانية

التدوينة ال 12 .. نادي القتال

You're not your job. You're not how much money you have in the bank. You're not the car you drive. You're not the contents of your wallet. You're not your fucking khakis. You're the all-singing, all-dancing crap of the world

التدوينة ال11 - سورة يوسف - كل مشكله وحلها عند ربنا

كل ما تحس انك متضايق
وعندك هموم
اسمع أو إقرأ السورة دي
وشوف المصايب اللي كان فيها سيدنا يوسف
تقريبا دي السورة اللي بتحسسني اني سليم ومعافى ميه في الميه وأتخن مشكله عندي حلّها عند ربنا سهل أوي وهايحلها لوحده

حابب أجيبهالكوا بارضك بالصوت ده
http://www.youtube.com/watch?v=ZenPIv92XVM
صوت الشيخ محمد عمران
اللي عامل توشيح اسمه " فكم لله من لطف خفي " اللي بتقول
http://www.youtube.com/watch?v=ZenPIv92XVM
وكم لله من لطفٍ خفيٍّ يَدِقّ خَفَاهُ عَنْ فَهْمِ الذَّكِيِّ
وَكَمْ يُسْرٍ أَتَى مِنْ بَعْدِ عُسْرٍ فَفَرَّجَ كُرْبَة َ القَلْبِ الشَّجِيِّ
وكم أمرٍ تساءُ به صباحاً وَتَأْتِيْكَ المَسَرَّة ُ بالعَشِيِّ
إذا ضاقت بك الأحوال يوما فَثِقْ بالواحِدِ الفَرْدِ العَلِيِّ
تَشَفَّع بالنبيِ فكُلِ عبد يجار اذا تشفع بالنبي
وَلاَ تَجْزَعْ إذا ما نابَ خَطْبٌ فكم للهِ من لُطفٍ خفي
أظن الشِعر ده لسيدنا علي بن أبي طالب


ملحوظه أخيرة .. ربنا مش بينسى حد وبيحبك وبيحبنا كلنا
ولو كان بيحاسبنا بأخطائنا ماكانش حد فينا شم ريحة خير أو جنه

التدوينة العاشرة - على قد الليل ما يطوّل - سيد درويش

http://www.youtube.com/watch?v=RjtRvjfF4Wg



مش لاقي النسخه الاساسية بتاعة سيد درويش

كل اللي موجود بتاعة سيد مكاوي واسعاد يونس
أينعم هي نسخه منقّحة .. ومؤدبه شويه
بس حلوه بارضه

بحبها أوي
أول مره سمعتها في ميريت
في ندوة كده
وكان بيغنيها
الممثله والمغنية .. ريم حجاب وزوجها

الأغاني دي كان دمّها خفيف
:)

التدوينة التاسعة - ع المعاش - غنوه قديمه

كان بيسأل ع المعاش
عند بيّاع الجرايد
روحه تنقص حتة لكن
جوه عينه حزن زايد

تكمل الغنوة في ملامحه
صبره جارحه
ثم يسكت
ثم يسأل
ع المعاش ..

كل يوم بأشعر بخوفه
وأما قالوا في الخبر
زاد المرتّـب
روحت جري عشان أشوفه
من ساعتها
لسّه باسأل
ليه ماجاش؟ ..

التدوينة الثامنة - قصيدة مش بتاعتي

قصيدة للشاعر لمدحت منير



هاعمل .. باخرّ دم
واعملي بتعيّطي
كأن مطره
واحنا مبلولين
وشجرة
بتوطّي على الشباك وتبص
هاعمل
مش مهتم
واعملي بتحضنيني
كأن نسمة
مش بتتشطر غير على الخصلة الحرير
هاعمل باطير
والناس من آخر الدنيا
بيشوفوني سحابه
يخرب عقلك دي دموع بجد

التدوينة السابعة - يا الله

كان لازم يعني
؟!
مانت عارف اني مش قادر واني لازم ..... السنه دي
أرجوك .. يارب . بلاش المره دي
فعلا .. بلاش
انت عارف اني مابقولش لأ وباقولك الحمد لله وباغيظلك الشيطان وبافرهدهولك ورايا
بس معلش
والنبي
بلاش المره دي

التدوينة السادسة - خالد

فاكر يا خالد اليوم ده
أكيد فاكره
وزمانك دلوقت قاعد فوق وبتضحك عليه ومقطّع روحك ضحك

عندي طلب يا صاحبي لو سمحت

أنا عاوزك تجيلي في الحلم هاقعدك على قهوة حلوه ونعد نرغي شويه ع اللي بيحصل
عارف
يوم 28
لما الظابط ضربني على كتفي , ( بالمناسبة لسّه معلّمه على كتفي لحد دلوقت ) وقفت قدامه وقلتله
الله أكبر .. بصوت عالي وزعّقت
وماكنتش خايف
أوّل حاجه جت في بالي ساعتها
صورتك
وانت ماسك القطّه وبتلاعبها
طبعا وقتها كلت العصايه من هنا وهاتك يا جري ماكنتش هاقدر أعمل دكر ساعتها اكتر من كده
اليوم ده كان كله
كر وفر
كنا بنتنفخ يا معلم في شارع الجامعه كنا شبه محبوسين
مانت عارف
أنا عارف ومتأكد انك كنت موجود ساعتها
كنت حاسس بيك أساسا

أو أقولك

روح لمامتك يا خالد
روحلها وهي نايمه
هاتشوفك وتسمعك واضحكلها .. وقولها حقّي مش هايضيع

وبالمره وانت بتحضن ربنا
قوله يفضل واقف معانا يا خالد عشان احنا محتاجينله

احنا محتاجينله أوي
واستسمحوا يعفيني لو كنت بتقّل عليه يعني ساعات
هو عارف والله الدنيا صعبه يا خالد
تصبح على خير يا صاحبي

التدوينة الخامسة - علامة استفهام

أنا لا أتمنى أبدا أن اعود يوما إلى طفولتي
سأظل أتمنى أن أكبر وأكبر وأكبر .. حتى أنتهي أو ينتهي منّي العمر

هذا وباعتراف ذاكرتي بأني لم أكن يوما طفلا سعيدا

التدوينة الرابعه - جزء من قصيدة

مش هاتفرق
- لأ هاتفرق .. وانتي عارفه
القميص ده
دمّه كان شاهد عليّا
- بس صاحبك ده اسمه ايه ؟
- اسمه يحيى
- قوله يكتب ع اللي شافه
- بس خايف / والضلام حِمل لكتافه
قول للتاريخ يحلف بطعم المعجزات -
ان الحقيقه المرّه لذّه
واللي شاف الذئب يومها ..بير وحيد
واللي رايح مش على قد اللي فات
والبيوت اتثبتت
و السلاسل .. سلسلت
والأرض صوتها

هزّ قلب الصبح هزّه
- ربما ... أنا مش مصدّق
- بكره تعرف
- بكره .. جايز !
- للي عايز
- بكره تصبحي ع الحقيقه
- التاريخ بيصيح بصمت الممكنات وال مش ممكنة
- خليك مصدّق
- مش كنتي أول مؤمنه ؟!
- خليك مصدّق
- خليكي قد البحر يقلع من عيوني الأزمنه
- خلّيك مصدّق
- خلّيكي زي الليل بيكدب زيّنا
دم بكره لسه فاير ع النهرده
بس صمت القاضي قاتل

التدوينة التالته - جزء من قصيدة

وبشّر الصابرين الساكتين
العارفين معنى السكات
المُضحِكين .. والموهومين . . والمرصوصين
كالكوبايات
بعد ما تكسّر طموحك
ذكّر
انما انت مُذَكِّر
مش هاتفرق لو هاتقطع عنّهم
حبّة حاجات

التدوينة التالته - جزء من قصيدة

وبشّر الصابرين الساكتين
العارفين معنى السكات
المُضحِكين .. والموهومين . . والمرصوصين
كالكوبايات
بعد ما تكسّر طموحك
تحت أفكار البنات
ذكّر
انما انت مذكّر
مش هاتفرق لو هاتقطع عنهم
حبّة حاجات

جزء من قصيدة

أسمر
ولأنه كان أسمر
كات الطيور دايما
بتهجّ من روحه
ترسى على الرمله
وتلم عناقيده
كان كل يوم ينقص
شكل السما في عينيه
الضحك بينقّصه .. والمٌر بيزيده

أول تدوينة في يونيه 2011

أنا اسمي زيكا
أنا كنت جزء م النظام
كنت جزء م النظام لما قررت اقلل تدوين وأكتر سجاير
كنت جزء م النظام لما قررت أقصّر شعري وماجبش جيل
كنت جزء م النظام ..لأني كنت باكل العيال الصغيره بالنص وهم مش واخدين بالهم
مصر بتتغير
وأنا كمان
أنا هاشرب سجاير وهازود التدوين وهادون كل يوم في شهر ستّه
هاطوّل شعري .. وهاحط جيل
( مش محتاجه فقاقه يعني )
مش هاكل العيال الصغيره بالنص
أنا هاكلهم ساده كده وأرميهم في أي سلة مهملات