Tuesday, September 14, 2010

عنصري 3

اسكندريه
بدون مقدمات .. لا أفهم هذا السر المتطرف الذي يجعل من الاسكندرانيه أكثر شعوب العالم عنصريه ضد الزوّار القاهريين - المصريين كما يطلقون علينا - والزوار الفلاحين والصعايده إلخ
متعللين بأنهم يساهمون بشكل مباشر في عدم نظافة الاسكندريه وازدحامها وتلوث البيئه فيها ..وربما أنهم سبب أن هناك اسكندراني لم يأكل وجبته باستمتاع لأنه واصطبح بوجه مصري عفن
لم يجرب الشعب الاسكندراني أن تكون بلدتهم هي العاصمه وما أدراك ما العاصمه - حيث تتحول القاهره أثناء النهار وبعض أطراف الليل إلى سويقه كبيره بفضل المصريين من كل شبر على باقي الخريطه صعايده فلاحين اسكندرانيه دون أن نقول " يع " ...المصريين العفنين قد احتلوا القاهره
القاهره تلك المدينة البائسه التي أنارها سكانها ثم أظلمها جميع المرتحلين إليها سواء مصريين أو لاجئين أفارقه أو عرب
القاهره التي تبدو قطعة من الجنه في الرابعه صباحا والسادسه صباحا
القاهره التي لا يترفق أحد بأي أديب أو فنان يخرج منها ... بل تطاول عليه الأقلام والأفواه بما لذ وطاب من النقد , لا يعلمون أن القاهريين لا يرون في يومهم العادي سوى مزيدا من البشر من كل ثقافات مصر والعالم , لا يرون سوى ازدحاما ليسوا هم كامل السبب فيه
لذا أعزائي الاسكندرانيه ..الإسكندريه مدينة جميله والاسكندرانيه - ناس لطاف - فلا تعكروا صفونا بمزاجكم الغير رائق لرؤية المصطافين الذين يزورون المدينة الرائعة 3 اشهر في السنة , فلولاهم لكنتم تمارسون مهنة الشحاته على أبواب الاسكندرية

18 comments:

آخر أيام الخريف said...

هاهاهاهاهاهاهاها

بس انا شخصياً و أنا قاهرية زيك بالضبط بفضل اسكندرية فى الشتا و لنفس الأسباب : زحمة المصيفين ..غير انى مخلوقة شتوية بالفطرة

حلوة التدوينة ...بس شكلك اتعرضت لموقف مش لطيف :))))

Zika said...

:D:D:d

لا والله انا ماتعرضتش لأي موقف

أنا عن نفسي لما باروح اسكندريه بابقا في قمة سعادتي وبالاقي ترحيب فوق المعتاد من كل أصحابي هناك

بس البوست ده رد على كام بوست عنصري من واحد قليل الأدب بيشتم القاهريين وادباء القاهره

فالكلام ده انا بقوله لمجرد اثبات اننا مش بناخد الكلام ونعديه على ودننا خالص ..احنا عندنا ردود يعني

:)


والله لو القمر عليه زحمه انا مش هاروح لأن انا اساسا عايش في زحمه فأي مكان فيه زحمه اكيد مش هاروحه حتى لو هوليوود في الشتا

اسكندريه ... أحلى مكان في جمهورية مصر كلها بجد

آخر أيام الخريف said...

"اسكندريه ... أحلى مكان في جمهورية مصر كلها بجد"

اتفق معاك بشدة :)))

Mahmoud Hermes said...

تسلم ايدك يازيكا طلعت كل الجواية واشكرك جداااااا ليه الله ياعلم جايز عشان بستمتع كل مازور بيتك الصغير هنا اتمني لك السعادة والتوفيق الدائم

adel said...

خسئت ياض
بس عندك حق

يجوا يجربوا الزحمة و قرف كل محافظاتك يامصر و اولهم اسكنكرية كل يوم طول السنة ويجربوا و يعرفوا

انا بحب اسكنكرية الشتاء
وبضم صوتي لتئومي اشاسا

فاتيما said...

ازيك يا زيكا

انا جربت الأحساس
اللى بتقول عليه دا
على فكرة


لما قعدت انا و يوسف
ف اسكندرية 6 سنين


تحولت لمخلوقة
سكندرية غيورة

و زحمة الصيف
كانت بتخلينى نفسى
نص تسعة ييجى
و المدارس تبدأ
عشان الناس تمشى


دى حاجة
لا شعورية كدا
معرفش سببها ايه
غير الحب الشديد
و الرغبة ف التملك
و الغيرة على حب كبير ف قلبى
مش عاوز حد يشاركنى فيه


اسكندرية ف الشتا
جنة ربنا ع الأرض


اسكندرية؟


دى لوحدها
كوكب بحاله
و اجمل بلد ف الكون


و لو لم اكن مصرية
لوددت ان اكون سكندرية


و نفسى اعيش فيها
لحد ما اموت
و مش هبقى حاسة بغربة ابدا


على عكس اى مطرح تانى
هيا المكان الوحيد
اللى خلانى اتخلى عن روحى
و يسكننى
قبل ما اسكنه


انا سيباها بقالى
تلات سنين اهو تقريبا

لكن روحى هناك
و ذكرياتى مع يوسف
و المطر و البحر


و بحبها
و عرفت ليه
كتير مجاذيب بيها


عندهم حق
يغيروا عليها
يا زيكا


بحرها
و جوها
و اهلها
يستاهلوا


انا مش معاك ف الطلعة دى

اسكندرية
زى ما بيقولوا ف الأعلانات


بلد خارج المنافسة


صباحك خير و هنا

Ramy said...

جامدة يا زيكا

(:

ههههههههه

بس هما بيقولوا كده بس مبيعملوش كده

فاهم حاجه (:

Unknown said...

أنا بحب اسكندرية و مش بحب التعامل بقلة ذوق مع ضيوفها ، بشكل عام الزوار مش كلهم زى بعض ، فى الضيف الخفيف و فى الضيف إللى يجى يشوه حاجه جميله و اكيد نظرة الإسكندرانى لازم تفرق
يعنى مثلا فى الضيف إللى يجى عالكورنيش و يقطع طريق الكورنيش بالعرض بعربيته عشان مكسل يمشى حبه صغيرين لحد الفتحة إللى بعدها
أو يمشى فى شوارع اسكندرية بالمايوه واخد عوامته تحت ذراعه كأنه عالبيسين، أو يمشى يعاكس فى بنات الناس كأن ده حق من حقوقه الترفيهيه

اسكندرية مش زي أى محافظة تانيه مستنية المصطافين من الصيف للصيف عشان الناس تسترزق ، المدينه دى مدينه صناعية كبيرة فيها تنوع كبير بين الأنشطة التجارية و الحرف اليدوية و الصيد و موسم الصيف بيمثل جزء صغير جدا لا يعتمد عليه سوى قليل من أصحاب الكافيتيريات بالإضافة للطلبة إللى بيستغلوا الأجازة ويشتغلوا وشوية محلات عند الناس إللى فى شارع خالد بن الوليد (مش عارف ايه فى الشارع ده مش موجود فى أى حتة تانية عشان يبقى زحمة كدة ) ،حتى الشقق اللى بتتأجر مملوكه فى الغالب لناس من محافظات تانية بيتاجروا فيها ..لكن القاهرة بطبيعتها زحمة حتى لو محدش زارها لأسباب كتير ، الهجرة الداخلية مخلتش فى فرق واضح فى القاهرة بين سكانها و المهاجرين ليها ، كله بيقول أنا قاهرى
بس القاهرى اللى من القاهرة ابا عن جد حيفهم كويس قوى يعنى ايه تحس انك بقيت بتعانى من زحام وتلوث و مشاكل كتير بسبب ضيوف قرروا الإستقرار هناك ، يمكن القاهرة مفيهاش فرق واضح بين صيف و شتا لكن لو كان فيها كان زمان سكان القاهرة الأصليين بيقولوا امتى الشتا يجى

Unknown said...

أنا بحب اسكندرية و مش بحب التعامل بقلة ذوق مع ضيوفها ، بشكل عام الزوار مش كلهم زى بعض ، فى الضيف الخفيف و فى الضيف إللى يجى يشوه حاجه جميله و اكيد نظرة الإسكندرانى لازم تفرق
يعنى مثلا فى الضيف إللى يجى عالكورنيش و يقطع طريق الكورنيش بالعرض بعربيته عشان مكسل يمشى حبه صغيرين لحد الفتحة إللى بعدها
أو يمشى فى شوارع اسكندرية بالمايوه واخد عوامته تحت ذراعه كأنه عالبيسين، أو يمشى يعاكس فى بنات الناس كأن ده حق من حقوقه الترفيهيه

اسكندرية مش زي أى محافظة تانيه مستنية المصطافين من الصيف للصيف عشان الناس تسترزق ، المدينه دى مدينه صناعية كبيرة فيها تنوع كبير بين الأنشطة التجارية و الحرف اليدوية و الصيد و موسم الصيف بيمثل جزء صغير جدا لا يعتمد عليه سوى قليل من أصحاب الكافيتيريات بالإضافة للطلبة إللى بيستغلوا الأجازة ويشتغلوا وشوية محلات عند الناس إللى فى شارع خالد بن الوليد (مش عارف ايه فى الشارع ده مش موجود فى أى حتة تانية عشان يبقى زحمة كدة ) ،حتى الشقق اللى بتتأجر مملوكه فى الغالب لناس من محافظات تانية بيتاجروا فيها ..لكن القاهرة بطبيعتها زحمة حتى لو محدش زارها لأسباب كتير ، الهجرة الداخلية مخلتش فى فرق واضح فى القاهرة بين سكانها و المهاجرين ليها ، كله بيقول أنا قاهرى
بس القاهرى اللى من القاهرة ابا عن جد حيفهم كويس قوى يعنى ايه تحس انك بقيت بتعانى من زحام وتلوث و مشاكل كتير بسبب ضيوف قرروا الإستقرار هناك ، يمكن القاهرة مفيهاش فرق واضح بين صيف و شتا لكن لو كان فيها كان زمان سكان القاهرة الأصليين بيقولوا امتى الشتا يجى

Magi Mostafa said...

انا برده ساعات بسمع الكلام ده
فى القاهره كمان مش اسكندريه بس بحكم انى بتنقل كتير بين البلدين دول
ومع ان جدتى اسكندرانيه اصلا وبعد كده اتنقلت هنا عمرى مسمعت حد ولا هى سمعت حد بيقولها انتى جايه هنا ليه او دى مش بلدك
بعكس انى لما بروح اسكندريه ممكن اسمع كلام من ده على سبيل الهزار او الرخامه
بس عادى يعنى مش بيضايقنى ده
المفروض الناس تفهم اننا كلنا مصريين وان مصر كلها حاجه واحده على بعضها وكلها بلدنا

dr.lecter said...

اسكندريه ثم اسكندريه ثم اسكندريه ثم اسكندريه

اسكندريه افضل من القاهره

القاهره زمان كانت حلوه لكن دلوقتي بقفت خره البرك

القاهره بحسها مليانه تعب وخطايا ومرض وعجز

اه بتبقفي حلوه الفجر والساعه 6 الصبح
لكن من االساعه 7 بتبقي زفت وقرف علشان المواطنين المعفنين بلينزلوا من اول الوزير لغايه الغفير

Zika said...

محمود هيرميس
والله زيارتك بتسعدني جدا
تحياتي ليك ونورني على طول أرجوك

عادل
ييجوا يشوفوا الخريطه كلها مجتمعه في ميدان التحرير

فاتيما
أنا مقدّر ده جدا .. لسبب بسيط جدا ان القاهره اكتر من اسكندريه مليون مره في المرتحلين اليها ومش مجرد 3 شهور صيف وخلاص لأ احنا طول السنه
وانا من اكتر الناس اللي بيحبوا اسكندريه والاسكندرانيه على وجه الأرض
بس ..وجب الرد مش اكتر
وربنا انتي منوّره :)

Zika said...

رامي

الكلام بيجرح ساعات أكتر م الفعل
وزي ما قلت فوق البوست ده رد على الناس اللي بتقول القاهريين واسلوبهم وحياتهم و ادبائهم

فاهمني انت ]:)
?

Zika said...

رامي

الكلام بيجرح ساعات أكتر م الفعل
وزي ما قلت فوق البوست ده رد على الناس اللي بتقول القاهريين واسلوبهم وحياتهم و ادبائهم

فاهمني انت ]:)
?

Zika said...

مشمش

أنا هنا مش باتكلم عن الزوّار وتصرفاتهم لأن الزوار من كل حته في مصر هم مصريين والاسكندرانيه مصريين وفيه حتت في اسكندريه فيها زباله وناس اسكندرانيه بيرموا في الأرض وبييجوا هنا عربيات ملاكي اسكندريه جايين عَكس

لأن دي طباع الشعب المصري كله


واللي يلوث اي مكان في الدنيا بني ادم معفن ..وخصوصا لما يلوث اسكندريه أحلى مكان في الدنيا

أنا باتكلم عن نظرة الكتير ليووووه الزحمه دي والناس الأغراب دول

الاسكندرانيه للأسف مايعرفوا يعني ايه اغراب ييعيشوا في بلدهم ويبهدلوها

انتوا ماشفتوش حاجه من ده خالص يا مشمش

القاهره نسبة النزوح ليها من كل محافظات مصر .. ولاجئين أفارقه ولاجئين عرب ..هايخليك تبوس كل الزوار وتقولهم يا حبااااايبي

والناس البيئه اللي بتعاكس وماشي في الشارع بالعوامه والجو ده ... ايش عرفك ان هو مش اسكندراني .. وليه يكون قاهري ..ليه مايكونش واحد من اسيوط مثلا ..
وبعدين هي تفتكر المعاكسه دي يعني أمر خريطة مصريه دون اسكندريه

هو انا يعني مابنزلش اسكندريه ومابشوفش اسكندرانيه بيعاكسوا اسكندرانيه

بلاش يا معلم خلط أوراق .. زي ما بقولك دي مصر .. ودي تفكير مصريين مش قاهريين وامحافظات واسكندريه لأا

بص في التعليق اللي تحت

Zika said...

أما بالنسبه لنقطة السياحه

تفتكر بذمتك ان السياحه مجرد كافيتيريات ع البحر ..او كراسي وشمسيات

انا مادرستش سياحه
بس مش محتاجه مفهوميه
ان
المواصلات بتزيد وحركة البيع والشرا بتزيد
زي مانت قلت ايه العبقري في شارع خالد بن الوليد غير ان الناس بتشتري منه لمجرد انهم في اسكندريه
وبالتالي حركة العمله بتزيد والمحافظه بتاخد فلوس اكتر ولو هاعد اشرحلك يعني ايه سياحه هانتعب

بلدنا .. مصر ..كلها على بعضها ..المصدر التاني ليها بعد البترول ..السياحه
يعني ده المورد التاني اللي انا وانت و80 مليون مصري عايشين بيه
تفتكر ده سببه ان الناس بتدخل تتفرج ع الاهرامات وبتعوم في شرم والغردقه وبينفعوا الفنادق .
؟؟؟؟؟!!!!



define سياحه

أخيرا : انا مش بهاجم اسكندريه او الاسكندرانيه لأن ببساطه خمسين في الميه من صحابي من هناك وانا علاقتي باسكندريه مش علاقة سياحه انا ليه شغل وعيشة في اسكندريه .. يعني الموضوع مش مجرد سخافه مش في وقتها مني
لأ الموضوع واضح انا أقصد ايه

المهم بعد الرغي اللي انا صدعتلك بيه دماغك ده
انت عامل ايه ؟
واسف طبعا اني اتاخرت في الرد كل ده يا معلم

Zika said...

ماجي
المفروض الناس تفهم اننا كلنا مصريين وان مصر كلها حاجه واحده على بعضها وكلها بلدنا

الله عليكي هو ده الكلام

بس هو انا ليه دايما لما باكلمك عن حاجه بتحسسيني اني جاي من المريخ وانها ماحصلتش
ماهو يا مج مج مش معني انها ماحصلتلكيش يبقا هي ماحصلتش


صح ؟

Zika said...

دكتره

اسكندريه زي القاهرها بالظبط من حيث كل حاجه
بس شيل البحر وحط النيل

انا بقا بحبهم زي بعض
واحساسي ان اسكندريه افضل مش عشان اسكندريه افضل
بس عشان اكتر الناس اللي بحبها في حياتي اسكندرانيه
فبحب معاهم هناك الحياه بتباق حلوه

دعك من أن الجو هناك راائع وهذا ليس بيد القاهريين او بأمر الاسكندرانيه ده بأمر ربك
وحد الله يا برنس :D

منور يا أوس