Thursday, September 30, 2010

إلى المطر .. و آخرون

بالترتيب
إسلام - بيشوي - رنا - هبه - خلود - حسام - دينا
الموت مش حاجه تخوّف .. انتوا أكتر ناس ماكانتش بتخاف م الموت
بيقولوا إن لما حد بتحبه أوي يموت مابتصدقش غير لما تقف على دفنته
من فيلم أحلى الأوقات
غريبه مع إني مصدق أوي إنكوا أموات ..يعني انتوا فوق
ماعرفش بقا مين فيكوا مبسوط مين بيتعذب مين بيلعب مين بيحب مين بيعيش
ولا تكونوش كلكوا أصلا ميتين فعلا .. مجرد جثث هامده مستنيه يوم القيامه
طب وحساب القبر ؟
يبقا أكيد انتوا بتسمعوا وبتحسوا وبتفرحوا وبتزعلوا
إسلام : كفاية إني أشوف العربية تخبطك قدام عيني .. بس عارف أنا ساعتها كنت لسه في خمسه ابتدائي ..خوفت وجريت بعيد والأتوبيس جري .. والدنيا اتلمت وانا وقفت اتفرج من بعيد
تاني يوم ..قالولي إسلام مات
والدنيا كانت بتمطّر ... مافهمتش يعني ايه الدنيا تمطر غير بعد سنين أوي
بيشوي : ماكانش لازم يعني تموت انت كمان في المطره وأرجع تاني يوم الدرس يقولوا بيشوي تعيش انت .. ضحكتك .. وخوفك ورعشتك كل ما تيجي تتكلم مع هند كانت أكتر حاجه بتبسطني وتضحكني في الدنيا
رنا : هو انتي عارفه يعني ايه شهر حداشر - نوفمبر - تحديدا 29 نوفمبر
تحديدا بعد 22 نوفمبر 2006 يوم عيد ميلادك .. فاكراه .. هو انتي اصلا بتسمعي صحيح ولا ايه .. يعني أصلي حاسس اني عبيط أوي وانا باكلم نفسي
هبه : ربنا كان عايز كده .. يمكن التوقيت كان غريب انك تبكي على أعز صحباتك أربع شهور .. وف آخر الأربع شهور تكوني عندها ... وقتها آمنت إن كل الأرواح متصله ببعض وإننا حتى لو بعدنا عن بعض سنين كتير أوي .. بنلاقي جوانا حاجه من كل واحد عيشنا معاه لحظه حلوه
خلود : عمري ما نصحتك تبطلي مخدرات يا خلود .. عمري ما قلتلك إن الكيميا أخطر من الخمره والحشيش عمري ما قلتلك إن عينيكي الحلوه بدات ماتباقش حلوه ..مالاحظتش كل ده يا خلود ... مالاحظتوش .. وقفت اتفرج عليكي كل يوم وانتي بتاخدي الحقنه وبترتاحي بعدها ... وأما جه وقت المصحّه كنت أنا بعيد ... ووقتها بس قررتي تعاقبيني على إني كنت بعيد ... وتخليني لسه بعيد لحد دلوقت
حسام : إييييييه يا عم ... مش قلنا السرطان بيموّت كان لازم تعمل دكر وتخش العمليه ..إستئصال ايه ونيلة إيه وفلوس أختك ايه اللي كنت خايف تصرفها ع الدوا .. ما كنت استنيت شويه يا حسام ... ما كنت استنيت تشوف أختك مريم شكلها بقا عامل إزاي ... صحيح .. من كام يوم شوفت نادين ...أختك .. كبرت وبصراحه بقت حلوه اوي ..بس طول مانا واقف معاه كنت باصص في وشها .. كان فيه حاجه ناقصه .. عينينها كانت زرقا وشعرها كان دهبي وكانت جميله زي ما كنت بتحبها دايما .. بس كان فيه حاجه في عينيها ناقصه يا حسام .. ماعرفش هي ايه
دينا : أنا وإنتي كنا المفروض نبقا مع بعض وقتها .. والغريب إن أنا خرجت م الحادثه ماعنديش حتى صداع .. حكمة ربنا .. لما قالولي أنك خلاص روحتي عند ربنا .. مازعلتش زي كل مره بيموت فيها حد وابتسمت وقلت ربنا أكيد هايرحمه لأنه خده عشان احنا بنعامله وحش وهو يستحق معاملة فايف ستار ..والمعامله دي مش موجوده غير عنده هو بس
وقتها .. قعدت اعيّط ومحمود جابر وعبد الله قعدوا يعيطوا ونيبال قعدت تعيّط يوميها بس عرفت يعني إيه موت
يوميها بس عرفت إني ماخافش م الموت
ولما باسمع إسمه مابارتجفش واقول يااه شوفولنا سيرة تانيه
كل الناس نفسها تخش الجنه ... وكل الناس بتخاف م الموت
طب ازاي ؟
عامة .. بما إنكوا أصلا مش سامعيني وبما إن كلكوا مش موجودين هنا... يمكن أقابلكوا قريب ووقتها نبقا نكمّل كلامنا ..أصل في حاجات كتير أوي فاتتكوا كان نفسي تعرفوها - ده طبعا في حالة إنكوا مش عارفينها - وحتى لو كنتوا عارفينها فيه تفاصيل أنا ماقلتهاش لحد ...سبتها
عشان وقت ما نتقابل أحكيهالكوا مره واحده .

7 comments:

Soooo said...

حلو قوي ياقط

adel said...

بعد الطوفان الجو شبورة
ننده لبعض بهمسة مذعورة
بشويش نمد الايدين
ياللي انت جنبي انت فين ؟

youssef said...

حاسس اني آسف .. آسف أوي

.. لكل هذا الألم

و لا تعليق

آخر أيام الخريف said...

"بعد الطوفان الجو شبورة
ننده لبعض بهمسة مذعورة
بشويش نمد الايدين
ياللي انت جنبي انت فين ؟"

عادل قال اللى كنت عايزة أقوله بالضبط .

بوست رقيق و حساس ة موجع . ربنا يصبرك

فاتيما said...

عاجزة عن كتابة
اى تعليق يا زيكا

بجد

Mohammad Mamdouh said...

دخل الربيع يضحك لقاني حزين
نده الربيع على إسمي لم قلت مين
حط الربيع أزهاره جنبي وراح
وإيش تعمل الأزهار للميتين


بوست مؤثر جدا

تايهة بين الناس said...

مدونة جميلة بجد عجبتنى وشدت أنتباهى
تحياتى ليك