Tuesday, May 25, 2010

حاسس اني عايز أقول

ان ده مش موود امتحانات لأ ده قلق حقيقي وزعل حقيقي ووجع بجد مش شـِعر وان فيه ناس اظاهر من كتر مانا مصدر ضحك وسعاده ليهم مش مقدرين ان انا ممكن أزعل او ممكن احتاج اتكلم جد
ولما اتكلم جد ماحدش يدخل يهزر او يتريق او مايقدرش موقفي او على الاقل ما يطبطبش عليا
وان ساعات باحتاج اتحضن ..أه اتحضن ... ماحدش يعمل نفسه مكسوف ايه مابتتحضنوش



حاسس اني عايز أقول اني مابعرفش أعيط وحاسس ان انا محروم من العياط مش باعرف اعيط بس هاعمل ايه عاوز اعيط - قبل كده حد قالي انك لما حد يحضنك هاتعيط
بس المشكله ان مارتينيا كانت جمبي هنا وكانت بتحضني وبارضه ماكنتش باعيط
واهي مارتينيا سافرت أمريكا
اللي كل اما احب حد تاخده مني هي والسويد الله يحرقها بجاز



حاسس اني عايز أقول ان انا بني ادم وان البني ادمين المفروض يبطلوا يستخفوا بمشاعر بعض



حاسس اني عايز اقول اني متضايق من نفسي اني بحب الهزار والضحك ومابحبش ارمي همومي على حد ودايما بقابل الناس وانا مبتسم حتى لو انا حاصلي ايه بارضه باضحك ولو فرحان ونفسي ازقطط واجري واقول نكت والاقي حد زعلان على طول في ساعتها أبقى زعلان ومحاوش استفز اللي قدامي بأي هزار نفسي بس لما أكون تعبان ومحتاج حبة هدوء جمبي
أو حد يزعل عشاني - مابلاقيش


حاسس أني عايز أقول اني عملت كتير أوي لناس بحبها وماشوفتش منهم من الحب أي جانب - أنا عمري ما بستنى مقابل او رد جميل لأني لما باخدم حد او باساعد حد او باضحك في وش حد باعمل ده لاني فعلا بابقا عايز اعمل ده
وبابقى متضايق فعلا لو هو متضايق
وبابقا سعيد اوي لما اشوف نجاحه
وبابقا مزقطط وانا باقول للدنيا كلها صاحبي عمل كذا وكذا وكذا
انا مش بستني رد فعل لكن لما احس اني باتعب عشان ناس ..مابتفكرش انها تتعب عشاني ولو للحظه بابقى زعلان على نفسي جدا
مش عشان كنت مستني رد جميل بس عشان بحس اني قيمتي عندهم مش نفس قيمتهم عندي


حاسس اني عايز أقول
اني عارف ان ربنا هايسيبني متضايق شويه عشان شايلي حاجه حلوه في الدنيا وعارف كمان انه مش هايسيبني في الاخره ازعل انا عارف ومتأكد ان كل اللي شوفته في الفتره اللي فاتت دي مش ببلاش عند ربنا وانه شايلي حاجه اكبر في الجنه


حاسس اني عايز اقول ان صحابي اللي ماتوا وحشوني جدا
مش عايز اعيش تاني اللحظه اللي اشوف حد فيها من صحابي بيموت قدامي وماقدرش اساعده
مش عايز اعيش اليوم اللي افقد فيه حد تاني من صحابي عايز أموت قبلهم
يمكن ساعتها هابقا مرتاح لأني مش هاعرف اذا كانوا هايزعلوا عليا ولا مش هايزعلوا


حاسس اني عايز أسكت

7 comments:

aMr saYed said...

انا حاسك يا مان اوي

صمت المشاعر said...

مش عارفه اقول ايه بس كلامك وجعني اوووووووي

بث تجريبي said...

ياااااااه
بجد احساسك عالي
انا مش عارفة اقول اعلق بايه
اكترمن انك خبطت على حتة جوايا واتفتحت لما قريت البوست بتاعك
بجد الله عليك.

Anonymous said...

حاسه انى عايزة اقول انك جواك وجع جامد اوى وصل جوايا
كل كلمه وصلتلى اوى تقريبا حسيت الاحساس اللى انت حاسه وانت بتكتب الكلام ده
الاحساس نعمه لازم تشكر ربنا عليها
كويس جدا انك تقدر توصل احساسك بالشكل ده
ROKA

خالد كامل said...

انا من كتر ما عيطت ... حاسس انى خلصت دموعى و مبقتش أعيط خلاص

و من كتر ما استنيت حد يحضننى و محصلش ... مبقتش بعرف أحضن حد لما بييجى يحضننى

منك لله يا عم زيكا .. فكرتنى بالذى مضى

Bent Men ElZman Da !! said...

صدق نفسك اوى فى الجمله اللى قولتها
انك مستحمل الفتره دى عشان عارف ان ربنا شايلك حاجه فى الدنيا قريب
خليك مقتنع بكده
عشان دى فعلا حقيقه وهتعرفها بعدين بجد
مش عيب انك تكون بتهزر وبتضحك ومصدر سعاده للناس دى حاجه عمرك ماتزعل منها
بس مش معنى كده انك تيجى دايما على نفسك
لان ده هيتعبك انت اكتر ما هيتعب اى حد غيرك
ربنا معاك وتعدى الفتره دى على خير ان شاء الله

أسماء حسين said...

زيكا يا زيكا يا زيكا

يا زيكا يا زيكا

زيكا


لازم أزهقك شوية بردوه
اومال نكومنت كدة ببلاش :P


أنا بقولك ايه
ايه
ايه

أنا بحب البوست دة أوووى
وهسرقه..لا هخطفه

وهضمه لمجموعة بوستات بحبها اللى فى المدونة

:)

بعد اذنك وانفك طبعا

صباحك نهارى بحت