Sunday, April 20, 2008

الحق

جرب تسال نفسك يعني ايه الحق ؟
-
-
-
-
-
يا تري الحق بالنسبالك هو ايه
ايه الفرق بين الحق والعدل ؟
طب اومال ايه هو القانون ؟
يا تري ايه علاقة القانون بالحق وبالعدل ؟
لكن
كلنا عارفين ان القانون ده هو مجموعة النظريات والقواعد العامه اللي بتهدف لتنظيم سلوك الافراد
والعدل . هو اننا نطبق القانون بحذافيره يعني اللي يمشي عالصغير يمشي عالكبير واللي يمشي عالغني .. يمشي بارضه عالفقير
لكن يعني ايه الحق
؟
ممكن الحق يتعرف من كذا ناحيه
يعني الحقوق عندنا كتير
عشان كل انسان بيتولد بمجموعه من الحقوق " الطبيعيه " بمعني ان كل انسان بيتولد وله الحق في الحريه
( حرية العقيده , حرية الاتجاه , حرية المذهب )
حق في الحياه
وفيه حقوق مكتسبه
حق العمل , حق الملكيه
وهكذا
اللي انا عايز اقوله ..... يعني ايه حق ؟
وليه ليكون للحق تعريف لوحده ونظرية لوحدها ودراسه لوحدها ليه ميكونش ضمن القانون , او العدل
وليه كلية الحقوق اسمها كلية الحقوق
ماسمهاش كلية القانون
بارضه لسه موصلكوش اللي انا بقوله ؟
الحق ده اللي انا مش قادر اعرفه , هو اللي انا حسيته في اليوم ده
.
.
كنت رايح في يوم وسط البلد وكنت سايق عربية واحد صاحبي وكانت الساعه 7 بالليل ومش لاقي حتة اركن فيها العربيه ازاي معرفش , وكان صاحبي ده مستنيني علي قهوة البورصه . فقررت اركنها جمب البنك
ايوه
عند يافطة ممنوع الوقوف قطعيا
بالظبط بالظبط
عند السلك الحديد اللي حاطينه عشان محدش يركن
جه واحد ظابط كده ( هو مش ظابط هو ماتفهمش عسكري ولا امين شرطة ولا بيشتغل ايه ) بس اهو واقف كل ما حد ييجي يركن يف المكان المخصص للركن بيقوله
لأ ممنوع ... ممنننوع ممنووووع ممنووووع
يا بيه بنجولك ممنوع
وانا طبعا رايح اركن في مكان غريب
رغم ان اليوم ده كنت عامل فيه خير وكنت مبسوط جدا
لكن سبحان الله قررت في اليوم ده اني اخالف القانون مره في حياتي
وطبعا بموقفي السلبي ضد الناس اللي بتلبس اسود ومعاها مسدسات خرز وفالحين يتشطروا عالناس الغلابه وسايبين الكلاب عماله تنهش في البلد
ولما لقيت العسكري تنح اوي كده
قولت اما اعمل فيه خير واعلمه الادب
روحت بكل برود وشيلت اليافطه زقيتها .. طلعتها فوق الرصيف
وروحت رامي العربيه وقعدت ازمر عشان ياخد باله
لحد ما خد باله
وقه كده وتنحلي ؟ وبصلي بصة بتقول :: معرفش ليه تنحت للدنيا كده . فجاة لقيتني مسكون بالملل
وبص لنفسه وبصلي وبص عالشارع وبخطوات ثابته
" بدا الرجل في الاقتراب من النقطة الحمراء التي وضعها له خيط الشمس الرفيع علي افق مستمر في الانسحاب "
" حتي كلما اقترب من ضالته ( اللي هي انا ) بدات هي في الاقتراب منه مرة اخري "
وبكل سذاجه " فيه حاجه ؟
انت بتستهبل يا بيه ( لاحظ قيمة النعت مع المنعوت ) بتستهبل ويا بيه
وانا اعملك ايه ماهو مفيش ركنه
يا عم انت شارب حاجه ده انت شيلت اليافطه بالسلك وحطيتها فوق الرصيف وركنت ولا اكن فيه حاجه حصلت
قلتله بقولك ايه ماتقلبش دماغي .... ايه رايك " تشرب شاي " * وانت ساكت
اهو كده يا جميل انت كده حلو ونشيلك البنك كمان لو عايز
قومت ظارفه عشره جنيه في ايده وروحت ماشي
لسه همشي بقيت واحده بسيات ابيزا رايحه بتشيل السلك عشان تركن ... وقفت اتفرج
لقيت الراجل رايح وداخل لها نفس الدخله
راحت قالتله : اشمعنا يعني سيبته يركن ولا هي حرام لناس وحلال لناس
قالتله انها لو خدت مخالفه هتروح تبلغ عنه
" تبلغ عنه فين ماعرفش "
وقالتله : انا موافقه تديني مخالفه بس علي شرط تكتبله مخالفه هو كمان
انا كل ده واقف مبسوط باللي هيا بتعمله ونفسي اروح احييها بس لو حيتها هتقول عليا عبيط ونفسي كمان اضرب العسكري ميت جزمه
ونفسي اضرب نفسي ميتين جزمه اني اديته فلوس
رغم اني كان ممكن ماديهالوش اساسا واركن بالعافيه " بس اعمل ايه كنت مبسوط ونفسي كل الناس تبقي مباسيط زيي" وبعدين
قولت ما بدهاش بقي... روحت مادد رجلي خطوتين قلتله الست عندها حق اذا كنت هتوقع عليها مخالفه يبقي لازم تعملي مخالفه انا كمان
الراجل بصلي بضهول وقاللي تحت امرك يا باشا
" كده من غير اعتراض"
وكله توفيق من عند ربنا .. لا دجل ولا شعوذه ولا دخلنا السجون ولا شوفناها بس اسمنا محفور جواها
الست بصتلي بنابهار ممزوج باستغراب ممزوج باستهبال
والراجل كمان وكتبلي مخالفه وراح لازقها عالعربيه وراح ظارفها مخالفه في ايديها
وبعلو الصوت : روحت مزعق وقايل
هات بقي العشره جنيه خساره في امثالك
وبكل بساطه وقرف راح مطلع العشره جنيه ومديهاني
سيبكوا من ان الموضوع طلع بمصلحه ان الست قعدت معايا عالقهوه بتاع ساعه ونص
وانا انبسط بالموضوع وقولت
هوبا ايه هوبا اه وان شاء الله هنظبط
لكن الموضوع ان انا خدت بالي من حاجات كتير اوي
..
طبعا القصه في منتهي الهبل لكنها الحقيقه عرفتني حاجات كتير
اول حاجه
طول مانت معاك حق .. يبقي كل اللي ضدك هيخاف منك
او علي الاقل هيحترمك
طول مانت بتطالب بحقك وبتعلي صوتك عشانه هيوصلك وممكن يوصلك باتفه الطرق زي ما حصل للبنت
الحق مش هيوصلك لوحده
لازم انت تروح تاخده
بالنسبه لصاحبي المخالفه ماكانتش حق خالص
لكن بالنسبالي
الحق اللي عمري ما عرفت يعني ايه
فهمته
ايه هو مقدرش اقولكم لاني معرفش يعني ايه
لان الحق ما بيتعرفش .. الحق بيتحس
لكن علي سبيل الاحتياط
" الحق هو تنفيذ القانون بالعدل "
لان القانون
هو اللي بيعبر عن حقوق الناس

8 comments:

Empress appy said...

ههههههههههه فيه واد عند البورصه صغير اسمه على ابقى اسال عليه هيخليك تركن
او انا ببلطج وادخل بطوط معايا جوا من عند محل السندوتشات ده مش فاكرة اسمه والجمعيه بتات السمك
المهم بعد ما زعلت منك من العشره جنيه اتبسطت انك روحت عملت كده انت كده صح بس خلاص

Zika said...

appy
طيب شكرا علي معلومة " علي " دي انا هقلب عليه وسط البلد كلها
ماهو انا بارضه ضميري وجعني وبعدين خسارة فيه العشرة جنيه
انا ادفع رشوه
لييييييييييييه يعني

Coca said...

زيكااا
ولا يهمك اوضحلك انا وجهه نظري

متي لبست الثوب الابيض
وتحليت بعقد اخضــر
اراك بالــــــــوهم تظفر

كان اصدي بيهم الناس اللي فاكره نفسهم ملايكه وبيتعاملوا معاك من برج عالي ومش حاسين انهم بيغلطوا زي البني ادمين دول بقي اللي عايشيين في الوهم
_____________________________________________________________________
متي قبلت عذائي
وانا علي قيد الحياه

الانسان بيتاخد عزاه لما بيموت فبشبه الناس اللي بتعتبرنا ميتين ويتصرفوا علي اساس اننا مش موجودين اساسا في الحياه

______________________________________________________________________

متي تاهت خطاك
عن طريق البيت
وعدت في درب
غير الدرب

بسال امتي ضليت طريقك لبيتك لمكان الامن والامان وبقيت ماشي في طريق غير الطريق اللي المفروض تمشي فيه
___________________________________________________________________
متي كنت سجاني
ومتي كانت السجون
جدرانا وقضبانا
بستنكر ان محدش يفتكر نفسه سجان للتاني

والسجون مش بس جدران وحيطان السجون ممكن تكون باشكال تانيه كتير
_________________________________________________________________

متي غفوت
وكانت غفوتي طويــــــــــــــــــله

الغفوه لما الواحد بيغلبه النوم لفتره وجيزه
يعني هو مش بيبقي قاصد ينام هو فقط يغفو اثناء الغفوه دي ممكن تحصل حاجات كتير برده بسال سؤال استنكاري وبقول امتي انا غفوت غفوه طويله ولما فوقت منها شوفت حاجات معرفش حصلت امتي
-----------------------------
نورتني يا جميل اسفه ان المعني موصلكش تماما


د ردي عليك في مدونتي يارب يعجبك بس

وهاجي اعلق علي البوست بتاعك تاني

Zika said...

coca
تماااام كده يا كوكا .. انا كده وصلتني المعاني
بجد جميله جدا ومعبره اوي ..
واحلي حاجه فيها ان تشبيهاتها بعيده وممكن يبقي ليها كذا تفسير بس بتبقي قاصده معني واحد في النهايه
بجد جميله
ونورتيني في مدونتي
مستني ردك عالبوست
تحياتي

Anonymous said...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the Telefone VoIP, I hope you enjoy. The address is http://telefone-voip.blogspot.com. A hug.

break said...

انا فى الاول حسيت انى بقرأ درس قراءة من بتوع زمان اوى دول
وحقوق الانسان
وبعدين دخلنا على على سلامة
وبعدين الميوزك اشتغلت
و حاجات كتير جوا بعض
فعلا بوست كوكتيل
:)

بالنوسبة بئا للقصة

عايزة اعرف صاحبك عمل فيك ايه؟
وخاصة لو كنت قلتله القصة بالتفصيل كدة

Zika said...

telefone voip
ياللا يا عم الله يسهلك

Zika said...

break
شوفتي .. مش اي حد يعرف يعمل كوكتيل علي فكره
انا احسن واحد بتاع كوكتيل في محلات العصير كلها . اسالي عليا هتلاقيني معروف عند بتوع العصير والكافيهات
ممدوح كوكتيل
:D:P
بالنسبه لصاحبي قرر انه ميصاحيش ناس مجانين زيي
من اصحاب المبادئ والذي منه
عشان كده قرر اني انا اللي هدفع الغرامه دي
وده كان قرار جمهوري.
وانا طبعا استجبت لمطالب الشعب