Tuesday, April 8, 2008

هو ده النجاح

Photobucket
الناس اللي افتكرت ان يوم 6 ابريل فشل غلطانه .. لسببين
السبب الاول ان فعلا حصل اضراب والشعب شارك بنسبة 10 او 20 % او اقل ودي نسبة مش بطاله
السبب التاني ان الغرض من الاضراب اتحقق
طب كان ايه هو الغرض من الاضراب ؟
خفض الاسعار ؟
لأ
اقالة الحكومه ؟
يا خبر ابيض ... لأ طبعا
توليه احمد السقا رئاسة الجمهوريه ؟
انت عبيط ياض انت
اجبار حازم امام علي الاعتزال ؟
مش هيحصل
طلب من نادية الجندي والهام شهاين انهم يبطلوا تمثيل ؟
الطشت قاللي الطشت قاللي يا حلوه ياللي قومي استحمي
اومال ايه الغرض ؟
الغرض هو ان الناس تحس علي دمها .. وتخاف علي بلدها ويبداوا يتجعوا علي حاجه صح
مش هيجيب نتيجة ان الاخوان هم بس اللي يعملوا مظاهرات
مهما كان الاخوان وايجابياتهم لازم بارضه نعترف ونكون صرحاء مع نفسنا " الاخوان بيدوروا عالحكم في المقام الاول " وده بارضه مش من مصلحة الناس"
والاحزاب المصريه كلهم بلا استئناء عاملين زي الستات في فترة الياس , او زي الراجل اللي مبيعرفش " لا مؤاخذه يعني " بمعني ان عنده كل مقومات حياته لكن هو ضعيف وناقصه حاجه عان يبقي طبيعي
مافيش باديهم اي حيلة ..ومحاصرين من كل ناحيه
والامل مش فيهم
ومش في حركة كفاية " اللي بتلعب السياسه غلط خالص " لانهم بيدوروا عالمثقفين والممثلين ولرياضيين وهكذا
الحل هييجي علي ايد الراجل البسيط اللي ماشي في الشارع
مش هيجيب نتيجة ان المفكرين والصحفيين والمحاميين يعملوا مظاهرات , لانهم من ساعة ما بدات الخليقه وهم بيعملوا مظاهرات لان دول هم اللي في وش المدفع
امتي ييجي العدل ؟
لما الناس الفقيره هي اللي تعترؤض وتقول لأ
لما الناس ما تخافش
ومتبصش لرزق يومها وتفكيرها يبقي اوسع واكبر
وتبطل تخاف من الناس اللي زيها
وتبدا تخاف من ربنا
وتبدا تتخلص من عقدة الدين اللي عندها
وتبدا متعتمدش علي حد يتكلم عنها
ويتكلموا هم
الاضراب نجح
وهنكمل المشوار
رحلة بداية النهاية
والدليل ان اضراب 6 ابريل نجح
الدعوه اللي جاتلي النهرده عالفيس بوك بتاعي
اضراب يوم عيد ميلا الريس
4 مايو
وكل سنه ومصر ضاربه

6 comments:

بنوته مصرية said...

ايه بقي كل شويا اضراب اضراب

الناس اتهرت اضراب وضرب في نفس الوقت
ههههههههههه

كل اضراب وانت طيب

تحياتي
رودي

Zika said...

بنوته مصرية
هو ده اللي المفروض كان يحصل من زمان يا رودي
ههههههههه
معلش بقي نستحمل شويه لحد ما يبقي مفيش ضرب
:)
وانتي طيبه
تحياتي

Anonymous said...

السلام عليكم
إن شاء الله يجى يوم 3 مايو ويكون غمة وانزاحت وميلحقش يعيد
اللهم أمين

Zika said...

عمر المصري
وعليكم السلام ورحمة الله وبركاته
هو انا مش فاهم اوي للاسف .انا اسف مش بتريق والله
بس عموما
نورت المدونه ويارب متكونش اخر زياره
تحياتي

Hook said...

يا ريت يا جماعة كل مودن و مدونة يعمل بوست يوم 4 مايو يهني فيه الريس بطريقته الخاصة...الخاصة جدا!

Zika said...

hook
مالعين اليمين قبل الشمال يا هووك