Tuesday, March 25, 2008

اشعار وخلاص

دي شوية حاجات كتبتها في الفتره الاخيره وجمعتهالكوا مره واحده وقومت رازعها في البوست ... ويارب تعجب حد ان شاء الله
....
حالة حزن
في حالة حزن ملياني
في حالة حزن في كياني
حاسبت نفسي
قلت اكيد انا اناني
لومت نفسي ولومت احزاني
لومت الحقيقه والحقيقه تعباني
لومت دماغي اللي مصدعاني
بالكلام والاغاني
بالاحلام والاماني
في حاجه فيا مموتاني
في حاجه فيا رافضاني
راضيه وعايشه وسايباني
ادوس علي جراحي من تاني
في حالة حزن ملياني
بتجيني ساعات لشهور
وتجيني ساعات لثواني
واقول خلاص هتروح
الاقيها تجيني من تاني
ازعل من نفسي ايام
نفسي ترجع مصالحاني
اقول خلاص اتصالحنا
الاقيها من تاني مزعلاني
في حاجه فيا مش مسامحاني
دي حالة حزن ملياني
رافضه الغنا , رافضه السكوت
رافضه الحياه , رافضه الموت
رافضه الشوارع , رافضه البيوت
رافضه النجاح رافضه السقوط
رافضه البحور , رافضه الشطوط
فارضه عليا كتير شروط
مركزه اوي علي ما بين الخطوط
(اتاكدت بالتاكيد اني اكيد مهما اكتب واعيد وازيد حتي لو كتبت كلمة كل دقيقه .. من غير ما اوصل للحقيقه)
هموت , هموت , هموت
دي حالة حزن واخداني
دي حالة حزن في كياني
ـــــــــــــــــــــــــــــــــــ
معذورين
الدنيا صفيت لما السما مطرت
والقمر راح لحاله والشمس نورت
ميت دليل عالايادي المجروحين
عذروا الليالي والليالي معذورين
عذروا الشوارع والحواري الضيقين
عذروا الشجر والورود الدبلانين
عذروا اللي شافوا واللي مش شايفين
عذروا يا حبيبتي الجنود اللي خايفين
عايزين يعذرونا بس مش عارفين
خايفين يجرحونا . وجرحونا سنين
حبوا يعدمونا بس مش قادرين
يخلصوا من ذنوبنا وهم في الذنوب عايشين
عذروا الحياه عذروا الموت
عذروا الغنا عذروا السكوت
عذروا الاها في كل صوت
ادي الله وادي حكمته, وادي خلقه ودي سماه
ادي واحد كان مفتح بس ظلم الناس عماه
بيدعي ربه في كل يوم , بس ما استجاب دعاه
صوته . بكل قوته . علاه
وصل لاخر الكون مداه
هو بيكبر كل يوم , والجنون بيزيد معاه
كلهم عذروا الموت , كلهم عذروا الحياه
كلهم عذروا السكوت و, وكل واحد طال غناه
عذروا الرمله علي الشطوط , عذروا الكلام في كل اه
ـــــــــــــــــــــــــ
عود ثقاب واحد
عود ثقاب واحد
يستطيع قتل كل عنائي
ساحرق جميع صوري
وساخفي جميع اوراقي
سامزق اليوم صدري
وسامحو غدا اشلائي
ما يجدي اليوم خوفي
ولا يجدي اليوم بكائي
ساهرب من نظراتهم
لا استطيع ان اعتذر لهم
لا استطيع الا ان ابتعد
وتموت ذكراي ورائي
ساهرب اليوم وابدا
فما نفعتني حياتي
ولا نفعني ذكائي
لا تعذبوني جميعكم
اما ارتحتم من قتلي
اما ارتضيتم بعد صرخاتي
لقد ندمت علي كذبي
ولقد ندمت علي افترائي
ويل لتلك النظرات
ويل لها
ولكل من زاد من ابتلائاتي
كرهت حبي وكرهت ابتساماتي
لقد كرهت نفسي وكرهت كل حياتي
قدري اغضبته بيدي
والان ارجوا رحمة السماوات
والحل عود ثقابا
يحرق كل نفاياتي
ان لم اعش شريفا وسط الاحياء
فلن اعيش عظيما بين الاموات
فلتسقط اليوم كتبي
, ولتتحطم راياتي
ولاكسر الان قلمي
ولامزق كتاباتي
فلن امسي اليوم حيا
ولن تطير جناحاتي
لقد طرت كثيرا في بحور الغضب
وما للبحر اجابة للندائات
ولابحث الان عن قبرا
يرضي معاناتي
يرضي سفيها كان عاش بينكم
وقتلته نفسه من كثرة الملامات
لن ابقي لكم شعري
فلم اعد ارضي تفاهاتي
ساحرقه معي
ومعه كل ماساتي
بكل الحزن والدموع
واللهو والضحكات
فلتنتهي اليوم احزاني
ولتنتهي حكاياتي
فلتنتهي اليوم قصصي
ولتنتهي خرافاتي
ـــــــــــــــــــــــــــ
لما ماتت
لما ماتت
كل حاجه في الدنيا ماتت
كل احلامي
كل ايامي اللي فاتت
كل الذكريات
كل حاجه في ثانيه راحت
كل طريق رسمته
كل حلم حلمت بيه وكتبته
كل الطرق في ليله تاهت
كل الطيور اللي عدت علينا
وعلي حبنا شهدت وشافت
كل الحاجات زعلانه
وحسه بالانهيار
كل البيوت حيرانه
وحاسه بالم وانفجار
حتي السنين وحشتها
يا حبيبتي لهفة الانتظار
كل حته فيها اتنين شافونا
كل حد في يوم فرحنا واللي جرحونا
كل اللي قالوا علينا هيعيشوا فسعاده
كلهم يا حبيبتي وافقوا يشربوا القهوه دي ساده
كل حاجه بعدك ماتت
كل حاجه مش عايزها
وكل شئ حزين وساكت
كل الدموع اللي جفت
كل الالام اللي خفت
رجعت من مطرح ما بدات
كلها في لحظه صحيت
من مكان ما في مره نامت
فاكره حبيبتي الجنينه
كل ازهارها صبحم مقهورين
صبحت الازهار حزينه
وصبحت الايام زي الورود الدبلانين
ومفيش شجره فيها راضيه
تضلل علي اتنين تانيين
كل حاجه بيكي حست
كل حاجه في ثانيه سكتت
كل حاجه نامت وبيكي حلمت
حتي احلامي حبيبتي.كل احلامي خلصت
ــــــــــــــــــــــ
للحزن اسير
مش عايز ابقي حلم اتسرق
مش عايز اكون حبر في ورق
مش عايز اموت في البحر غريق
ولا اكون زي واحد اتحرق
لا اخترت صمت ولا سكوت
لا اخترت حياه ولا اخترت موت
ياما جاتلي الكوره قصاد الجون
ومكانش عندي الجرأه اشوط
تعبت من كتر التفكير
لكني ليا رب كبير
اكيد في يوم راح يخلقلي
جناحين اقدر بيهم اطير

شوفت عرفت فنون وفنون
لكني هفضل ملك الكون
لاني عارف سر خطير
هو ببساطه اني مجنون

جنوني ورقه في ذكرياتي
جنوني كلمه في كتاباتي
جنوني حاسه في كل حاجه
جنوني مالي عليا حياتي

اه معترف
مش محترف
لكني بحلم حلم كبير
عن حد واحد اسمه الشرف

بقول لنفسي كفايه ترف
بلا احلام بلا قرف
فجاه الاقي قلمي بكي
وعن الورق قلمي انحرف

لكن كطير محبوس في السما
معرفش حاجه انما
الناس فاكره اكمني بطير
اني ورد مزهر نما

الناس فاكره اكمني بطير
فاكرني بعزف عالمزامير
لكن حقيقتي في الاساطير
اني اكيد للحزن اسير

10 comments:

Rania Lelah said...

رفقا بنفسك اخى العزيز

و لكنى اعاتبك بانك وضعت كل هذه الكلمات الخلابة فى بوست واحد
كان اجدر بك ان تنشا مدونه لهم
و تضع كل خاطرة بمفردها
فجميعهم رائعيين
فلقد ابدعت حقا

تحياتى و مودتى

EGYPT EYES said...

ليا عوده يازيكا عشان اقرا على مهلي
تحياتي ياصديقي

Zika said...

rania
انا كان عندي مدونة للشعر ومسحتها من فترة ,
الحمد لله انهم نالوا اعجابك
وده شرف كبير ليا
شكرا علي رايك
نورتي المدونة
وتمنياتي بتكرار الزياره دائما

Zika said...

egypt eyes
مستني رايك يا صديقي

Empress appy said...

انت طلعت شاعر كمان

بس حلو قوى جدا بجد عجبنى

Zika said...

appy
يا نهار ابيض .. شاعر مره واحده ..:D:D
عموما شكرا يا ستي
الحمد لله انه عجبك معني كده انه حلو مدام عجب اابي ذات نفسها

Eman Eltaher said...

كلمات الشعر رغم انها بسيطة بس حلوة
أكتر شعر عجبنى هو : عود ثقاب واحد و على قد ما ما هو مليان حزن و جابلى اكتئاب !! :(( بس كانت تعبيراته قوية و دى أكتر حاجة بهتم بيها ف الشعر
لانى بكتب شعر برضه و بالتالى فانا بتذوقه جدا و مهتمة بالمجال ده اوى اكتر من اى حد بيقراه لمجرد انه يقراه و خلاص
انت كبداية بدأت كويس و ان شاء الله بكرة الموهبة هتتثقل أكتر و تتنمى

انا بجد مبسوطة انه الموضوع فاز باعجابك و مدحك الجميل ده و بجد أنا آسفة انى كنت سبب فى العطلة اللى عطلتهالك بسببب قراية البوست

:))))

Zika said...

eman
اولا نورتي المدونه يا ايمان وشكرا علي اهتمامك
والحمد لله ان كلامي عجبك
وفعلا اكتر ناس يحسوا بالشعر اللي بيكتبوه
هو بس في ملحوظه ان دي مش بدايه :)
بس ان شاء الله يبقي فيه تطور مع الخبرات والتجارب والقرايه اكتر ان شاء الله
...
انتي كل موضوعاتك جميله ومدونتك انا بجد بحب ادخل عليها كتير من وقت للتاني
تحياتي

ANN said...

كلمات رائعة لا اكثر من رائعة بجد تحفة ..انت فنان

Zika said...

ann
شكرا ي آن ربنا يخليكي
نورتي
تحياتي