Saturday, February 16, 2008

المخرج

اه محدش يستغرب اللينك غيرته
والاسم غيرته
والشكل العام غيرته بس انا بارضه الي بكتب
ايه يعني لما امسح مدونتين
العربي
واشعارنا
واعمل مدونة جديده
( البلياتشو )
بعدين اغير اسمها واسم اللينك بتاعها عادي يعني
انا عارف ان معظمكم هيتشل مني بس معلش استحملوني بقي
انا كتبت موضوع كامل وبعد ما كتبته الجهاز فصل ( من غير سبب) والبوست متحفظش وانا تقريبا رجليا اليمين وايدي الشمال حاليا مش حاسس بيهم ( تقريبا جالي شلل نصفي ) فا ياريت محدش يستغرب
............
بالمناسبه انا قررت اليومين الجايين دول اعمل حاجات بالنسبالي هتبقي اول مره اعملها , اهو كسرا للملل
يعني مثلا انا قررت
اروح الجرنال اللي كنت بشتغل فيه واشوف ايه اخباره
ثانيا هموت واطلع علي كوبري امبابه من فوق الصبح
ثالثا ناوي اعمل موضوع عن السينمات المهجوره والاماكن المغلقه في مصر ( اللي هي يعني تحت الكوبري )؟
ثالثا ولا رابعا مش هتفرق : ناوي جدا اروح اقابل 4 شواذ جنسيا ( ولدين وبنتين اعرفهم من مدة واكتشفت بعد كده انهم مثليين ) ( مش حبا في قلة الادب ) بالعكس انا بس عاوز اعرف اكتر عن الناس دي بتفكر ازاي وبتعيش ازاي
همشي في مظاهره ودي محتاجه مني وقت عشان افكر فيها وابدا فيها فعلا ( لاني مش مجرد اي بتنجان وخلاص )
سابعا ولا معرفش تامنا ( مبقتش اعد ) هروح حتة من الاماكن المهجوره ( اللي زي اللي موجوده في فيلم حين ميسره دي ) واعمل موضوع عن الحياه هناك وربنا يستر طبعا
وخلال الرحله القصيره دي
ربنا يسترها معانا ونقدر نعمل حاجه من اللي كتبتها فوق دي
يا مسهل علي بركة الله ....سيري يا نورماندي
تو تو تو تو امم تو تو اممم تو
نسيت اقول ان شاء الله

8 comments:

mado80 said...

زيكا
ازيك يا مان

انت من امبابه يا زيكا

قشطه يا مان أجدع ناس أنا ليا صحاب كتير من امبابه تحديدا من شارع الوحده

ألف مبروك يا عم علي الشكل الجديد واللينك الجديد

بس ليه كده الشكل القديم ما كانش وحش

يلا ياعم أعمل اللي في نفسك ولا يهمك وما تخافش محدش هايتشل ولا حاجه
وربنا يعينك يا عم علي الحجات اللي انت ناوي تعملها

بس والنبي يا زيكا ما تطولش مع الشواذ دول وياريت كده تحاول تفهمهم بالزوء كده انه اللي بيعملوه خيبه قويه أوي يا زيكا

ليا بس رجاء عندك عاوزك لما تيجي تكتب عن الشواذ ما تقولش مثليين ، مثليين دي كلمه رقيقه أوي أكتر من اللازم يا زيكا هما شواذ يا زيكا مش مثليين

تحيه يا باشا ليك وتحيه كبيره أوي لكل امبابه ويلا بقي علشان أنا كده طولت أوي علي المسرح ولازم أنزل بقي علشان الكل ياخد دوره
هههههههههههههههه
:)


تحياتي ليك يا زيكا وألف تقدير لشخصك الكريم

Zika said...

mado08
يا باشا انا بارضه تحديدا من شارع الوحده
والله هي مش مشكلة انه كان وحش او لا بس هو الحكايه كلها ( تغيير ) مش اكتر ولا اقل
وبالنسبه للشواذ انا مش اول مره اقابل شواذ انا بقول يعني ان دي اول مره هقابل المجموعه دي بالذات وهبقي اشرح كل حاجه بالتفصيل ساعتها ان شاء الله
يا باشا المسرح بتاعك اقف زي مانت عايز وهات جيتارك وكمنجتك والاغاني اللي بتحبها وقعد ارقص عالمسرح براحتك :D
ودايما منور المدونه يا مادو

Empress appy said...

حلو قوى الانقلاب العسكرى اللى فى المدونه دى احيك عليه يا زيكا بس اعمل بقى المواضيع دى لانها جامده جدا وهتبقى مهم واى مساعدات يا ريس احنا معاك اطلب بس واحنا نقابلك بس الله يكرمك بلاش مظاهرات علشان انا بخاف من اونكل الظابط ده بيشخط فيه

Zika said...

appy
ربنا يخليكي يا اابي وشكرا اوي علي رفع المعنويات ده
لا متخافيش من اونكل ظابط .. انا هبقي مظبط القسم قبل المظاهره
مش هرمي نفسي في التهلكه قبل ما اروح
;)
:D

break said...

مبروك النيو لوك

بتختار اسامى كمان جذابة و معبرة
وشكلك هتخضنا الفترة الجاية

مستنيين البوستات الجديدة

Layla said...

يا سيدي مستحملينك..واديني عمال اجري وراك من مدونة لمدونة...دوختنا وراك..هههه

بس مبروك الشكل الجديد والاسم الجديد

:DD

Zika said...

break
الله يبارك فيكي يا بريك
عقبالك )
ان شاء الله عن قريب البوستات الجديده تنزل

Zika said...

marvel
الله يبارك فيك يا مارفل
انا عارف يا ريس انك مستحملني من زمان من قبل المدونات كمان .. من ايام زوربيا
:D:D
بس ربنا ابتلاك بيا بقي هنعمل ايه
:DD