Thursday, February 7, 2008

life goes on

الروتين
يوم 4 فبراير اللي فات فقدت صديقي العزيز حسام بعد معاناه مع السرطان , المهم ان حسام بعد ما عمل العمليه كانت نتيجة العمليه هتبان لما يخرج من العنايه المركزه بمعني انه لما يدخل العنايه المركزه يبان اذا كان هيقدر يكمل من غير الجزء اللي فقده ولا لأ .... ده اللي شرحهولي الدكتور
ولو اني مش مقتنع
عموما بعد الوفاه , مرضيوش في المستشفي يخرجوا الجثه الا لما ييجوا ولي امره اللي هو خاله نظرا لوفاة الوالد والوالده , رغم وجود عمته , لكن المستشفي رفضت اعتبار عمته هي وليه امره اذا
كان لازم نستني لما ييجي خاله
خاله هييجي منين ؟
من الاردن
واترك ليكم التعليق
ــــــــــــــــــــــــــــــــــــــــــــــــــــــــــــــــــــ
ــــــــــــــــــــــــــــــــــــــــــــــــــــــــــــــــــــ
الروتين
روحت الجامعه من كام يوم عشان اجيب اثبات قيد .. ان انا في الجامعه , معرفش ليه بقي ميعتبرش كارنيه الجامعه اثبات ان انا في الجامعه
المهم دخلت علي شباك شئون الطلبه
احم احم هاي
اهلا . عايز ايه
لو سمحتي كنت عايز اطلع اثبات قيد ان انا مقي..... ؟
قاطعتني الست الطيبه اللي قاعده
عايزه ليه؟
نعم
نعم الله عليك .. عايزه ليه؟
عشان عايز اعمل فيزا في الب.....؟
قاطعتني تاني
خلاص هات الكارنيه
ادتني ورقه وقالتلي روح ادفع عشره جنيه في الخزنه
روحت دفعت 10 جنيه في الخزنه وجبت وصل ادتهولها
ادتني ورقتين قالتلي اكتب اسمك وحط 4 ورقات تمغه
طيب ممكن قلم بعد ذانك؟
لا طبعا روح هات قلم انت بقي
خرجت اشتريت قلم ودخلت مكتب البريد وقلتله لو سمحت عايز 4 ورقات تمغه
قالي 4 ورقات تمغه ب 4 جنيه
اتفضل
يزيد فضلك
طب حضرتك دول 16 ورقة تمغه احط انهي فيهم
حط تلاته من الاحمر وواحده من الازرق
طب حضرتك وهعمل ايه بالباق....؟
بعد اذنك متعطلنيش
دخلت الجامعه تاني
وكتبت بياناتي و حطيت اربع ورقات تمغه واتبقي معايا 12 ورقة تمغه تاني
بص بقي يا اخ ممدوح
ادخل عند استاذ ابراهيم خليه يمضيلك علي الورقه
دخلت ..
لو سمحت فين استاذ ابراهيم
خامس مكتب عالشمال
شكرا
يا استاذ ابراهيم بعد اذنك عايز امض.....؟
هات
روح اختم الورقه من عند مدام عطيات
فين مكتب مدام عطيات
المكتب اللي قبل الاخير علي ايدك الشمال
لو سمحتي انا عايز .....؟
ختمت الورقه
وجبت اثبات القيد
واترك ليكم التعليق
ـــــــــــــــــــــــــــــــــــــــــ
ـــــــــــــــــــــــــــــــــــــــــ
الاستعباط
الكيان الصهويني ( اسرائيل ) ترفض طلب مصر في زيادة عدد جنود ( مصر ) علي حدودها مع غزه لانها خائفه من مرحلة ما بعد مبارك , وصرحت بانها سوف تزيد هي من قواتها علي الجانب الصهيوني مع الحدود المصريه
واترك ليكم التعليق
ـــــــــــــــــــــــــــــــــــــــ
ـــــــــــــــــــــــــــــــــــــــ
الاستعباط
وزير الخارجيه المصري ابو الغيط طلع في برنامج تليفزيوني مصري علي قناة مصريه وبيقول ان الفلسطينيين بيضربوا بالصواريخ قريو سيدرويت
وصرخ وزير الداخليه المصري
حرام
حرام
(حرام علي الفلسطينيين يعني)
واترك ليكم التعليق
ــــــــــــــــــــــــــــــــــــــــ
ــــــــــــــــــــــــــــــــــــــــ
الروتين
بعد موت حسام
محستش بالزعل اللي بحس بيه كل مره
بدات اقتنع يوم بعد يوم بان حسام كده استريح
احسن ما كان كل يومين في المستشفي او عند الدكتور
يعني هو فيه حد عنده سرطان بيخف
اتعودت
والكلمه اللي دايره في دماغي اليومين دول
هي هي اللي بتدور كل مره
life goes on

6 comments:

sa'7so'7te said...

ازيك يا زيكا
و طبعا البقاء لله بالنسبه لحسام و كويس انك وصلت لمرحلة الاقتناع انه كده استريح
اما عن الروتين فعلى الاقل هم لما بيقلولك بيقولوا معلومات صح و ان كانت مش كامله
لكن انا و بريك مرة كنا عايزين اثبات قيد و لفيفونا لفة طويله عريضة على حاجات رجعوا بعدها قالولنا مالوش لازمة الكلام ده

اما عن "حرام حرام" فانا الصراحة معاه لان حماس مش بتبص لقدام يعنى هى بتضرب اوكى لكن اصلا بعدها اسرائيل تبتدى تضرب.. و تبتدى تحتل مناطق جديدة و طبعا العالم الاوروبى يتعاطف معاها لان حماس رافضة التفاوض.. و حماس مثلا بتجرى على قضية المعابر و انها تبقى ليها دور فيها فالمفروض تهدى و تبتدى تتفاوض عشان ماتضيعش حق الفلسطينين
انا رغيت كتيير و انا اسفة بس هو اللى فيه داء
سلام

appy said...

روتين واستعباط واستهبال عارف لما بقابل واحده زى دى التركى بينفش عليا واديها على دماغها علشان تشوف شغلها صح كان لازم تعمل فيها كده ابقى استلف التركى بتاعى وانت رايح مصلحه حكوميه

Zika said...

sa'7so'7te
ازيك يا سخسوختي
المشكله ان وزير الخارجيه ماكانش بيقولها بالطريقه دي
يعني هو مش قصده ان ده تصرف خاطئ من حماس في الوقت ده انها لما تضرب اسرائيل ترجع اسرائيل تضرب اكتر في الفلسطينين
لا
قرية سيدرويت زي ما بيقولوا دي قريه (عزل)
يعني قرية ناس مدنيين عاديين فهو بيقول حرام
ان حماس تضرب المدنيين العزل اللي ملهمش ذنب بصواريخ
حرام
حرام
فهمتي هو قصده ايه
؟
سلام

Zika said...

appy
والله يا آبي انا عندي واحد تركي وكيس اوي بس للاسف مش بحب استخدمه لانه تركي من النوع القديم ده وبصراحه مبيبقاش لايق علي مظهري فللاسف بيدي مظهر حلو اكتر من انه يوصل اني اتخنقت وجبت اخري بس عموما
خلي التركي بتاعك موجود هنبقي نحتاجه قريب
:)

loza said...

البقاء لله يا زيكا
ربنا يتولاه برحمته


اما بقى بالنسبه للروتين فاثبات القيد اسهل بكتيييييييييييير من انك توثق ورق من الخارجيه
او من اى قنصليه
او حتى انك تطلع باسبور

وبالنسبطه للاستعباط
هم يبكى ويضحك

EGYPT EYES said...

البقاء لله أحزنني للغايه ماكتبته عن صديقك وأتمنى من الله ان ينظر إلبه بعين الرحمه
بوست شيق للغايه تحياتي ياصديقي