Wednesday, April 28, 2010

رسالة الى ربنا

المرسل : أنا
المرسل اليه : ربنا
عنوان المرسل اليه : فوق أوي
عنوان المرسل : هنا من فوق سطح بيتنا أقرب مكان للسما
السلام عليكم ورحمة الله وبركاته
ربنا .. انا ممدوح يارب اللي في رابعه ابتدائي ..اللي قاعد جمب مريم ومحمود في رابعه خامس
ربنا ..هو انت زعلان مني ؟ ..... لو زعلان مني عشان ماعملتش الواجب ياريت ماتزعلش
أصل انا كنت باتفرج على اخر حلقه من كابتن ماجد ..والميس كانت مديانا واجب كتير أوي انا عارف اني غلطان وعارف انك زعلان ..ماما وبابا كمان زعلانين مني والميس كمان بس يارب مانت عارف انا مش بحب العاب القوى دي وعايز العب كوره ..وماما مش عايزاني العب كوره وبابا اصلا عايزني اعد اذاكر وبس وكابتن ماجد بيلعب كوره وماحدش بيقوله لأ ...وبعدين يارب دي كانت اخر حلقه ..تصور ... كابتن ماجد خلاص بقا يلعب في البرازيل والنهرده الماتش الاخراني هايخلص
ربنا ..هو انا ينفع اكلمك كده وافضل ابعتلك جوابات ..أصل الميس اخر مره زعقتلي وقالتلي عشان كده انت مابتردش ع الجوابات دي هو انت ليه مابتردش ع الجوابات
بابا قاللي الجوابات مافيهاش فايده وقرب من ربنا
طب اقرب اكتر من كده ايه ..ده انا طلعت فوق السطح ودلوقت ماما لو عرفت اني فوق السطح هاتزعق واحتمال تخليني ماشوفش الكارتون تاني
عارف يارب انا نفسي في ايه ..نفسي اطير طياره مع أحمد اللي ساكن في البيت اللي قدامنا ..كل يوم الصبح باجري ع البلكونه عشان اشوف طيارته وهي قريبه منك اكتر حتى من السطح بافكر احطلك الجواب في الطياره
تعرف .. بيبقا شكلها حلو أوي وهي فوق وقريبه منك ..وانا نفسي ابقا قريب منك كده
هو انا ليه يارب مش باعرف اطير على عكس الحمام اللي عند خالتو عبير .الحمام اللي هرب من القفص بتاعه وطار لما انا فتحتله باب القفص
خالتو زعلت مني أوي وانا بحب خالتو بس الحمام كان بيعيط وعايز يقرب منك بس طنط كانت حابساه في القفص مش مخلياه يروحلك
بعد ما الحمام طار ... فيه واحده رجعت ووقفت جمبي وقعدت تطلع صوت غريب كده ..بس انا فهمت هي عايزه تقولي ايه
أصل ماما قالتلي لما حد يساعدك قوله ميرسي
أكيد هي كمان كانت بتقولي ميرسي
ياربنا هو انت هاترد ع الجواب ده ..ولا لأ ..طب لو انت زعلان مني قولي اعمل ايه عشان اصالحك أصل انا مش باعرف احكي لحد غيرك بابا بيصدني وماما بتزعقلي ومصطفى كل اللي همه انه يلعب معايا بس ومريم كل ما اجي احضنها تعيط وتروح تقول للميس
يارب ... ممكن تحضني
بس انا عارف انك مش هاتحضني ..أصل يعني اشحال مش عايز ترد ع الجواب
طيب انا هاحكيلك ... النهرده وانا راجع من المدرسه ..فيه واحده شكلها حلوه اوي شبه ماما جدا أول ما شافتني باستني من دماغي وقعدت تعيط فقام جه واحد مسكها من ايديها وكان شكله بيعيط هو كمان وقام طبطب عليها
بس انا افتكرت ماما لما قالتلي أي حد يكلمك في الشارع سيبوا واجري حتى لو هاتسيبلوا الشنطه
وطبعا انت عارف كلام كل يوم الصبح ( ماحدش يقولك تعالى اوديك لماما او بابا وماتروحش مع حد في حته وماتاخدش حاجه من حد ) .. بس.. فانا اول ما الراجل جه
جريت
فضلت اجري واجري واجري
لحد ما تعبت ... بس عارف ياربنا انا كنت خايف اوي مع ان شكلهم ماكانش يخوف
بس هي ليه عيطت اول ما شافتني وحضنتني وليه هو كمان كان شكله هايعيط ..
بابا قاللي ... ان الرجاله مش بتعيط
وانا راجل
بس ساعة لما الميس ضربتني عشان ماعملتش الواجب ..كنت عايز أعيط
ولما كابتن ماجد خلص ..كنت عايز اعيط
ولما بابا بيزعق لماما بابقا عايز اعيط
بس انت عارف طبعا ان الولاد مش بيعيطوا
انا عارف انك مشغول ..وعايز تشوف الناس التانيه اللي بتصلي
أصل العصر ادن
انا اسف اني مش باصلي ..بس المشكلة إن الصلاه بتيجي في ميعاد الكارتون ..
ودلوقت انا مضطر انزل عشان الكارتون جه بعد اذنك بس بلاش تخللي ماما تاخد بالها اني جيتلك
عشان كده مش هاعرف اكتبلك تاني
وابقا رد ع الجوابات ..ولو زعلان مني ...انا اسف
أنا آسف بجد
سلام
ممدوح الرفيع يارب مش ممدوح ابو نضاره

10 comments:

فاتيما said...

كدا يا زيكا ؟؟

اعمل فيك ايه ؟؟


انا عمالة امسح ف دموعى
و مش عارفة اسكتها
من اول سطر

اقولك انا الست دى
كانت بتعيط على ايه؟

ع اللى انا بعيط عليه دلوقتى



اقولك حاجة غريبة ؟؟
امبارح كنت ف هذا الموقف
تقريبا

كنت ف محل فيه اطفال كتير
و جنبى واحدة ست واقفة بتشترى اكل و معاها إبنها ..
افتكرت يوسف
لما كنا بنقف كدا زيهم
و عينى دمعت


كنت عاوزة ابوسه ف شعره
زى ما كنت بعمل مع يوسف
او حتى اطبطب على كتفه

بس خفت لأمه تتضايق منى

اكتفيت بإنى احضنه من بعيد
بعنيا و بس

انتا فكرت الست دى و الأب بإبنهم
اللى م هيشوفوه تانى

و عيطت
زى منا دلوقتى بعيط
و اغلب فى دموعى عشان محدش يشوفنى
لأنى ف الشغل ..عاجبك كدا ؟؟

البوست اكتر من كلمة رائع

و لمسنى أكتر مما تتصور

ربنا يسعدك يا زيكا
و يسلم قلبك الحنين دا
و الرسايل كلها بتوصل يا بنى
دا محدش غيره سبحانه
اللى عارف و شاهد و مطلع

محمود عثمان said...

:))))

Baskouta said...

WOW

Wanda said...

:-)

ممدوح الرفيع
ربنا بيقراء و يسمع و بيحس و بيحضن بس مش زى البشر يعنى مش زى بابا و ماما و الاصحاب و الميس و الحمام

لسه حتفهم بعدين بس متخذ الموضوع بحساسية قوى لحد ماتفهم انه موجود و مش زعلان قوى هو بس صابر عليك لحد يوم المعياد

إيهاب رضوان said...

تحياتى لك وإعجابى بمدونتك الجميلة .. رائع تقمصك لأسلوب الطفل بكل براءته وأفكاره ، ذكرتنى على الفور بالفانوس السحرى التى يسعدنى أن تقرأها
http://dakhalelsheta.blogspot.com/2008/02/blog-post_9636.html
تحياتى

كيكى عوووووو said...

ايه دة
ايه دة بس!!!
ايه كمية البراءه والساذجه وفقدان الحنان الى جبتها فى ممدوح دة!!
عارف انا عايزة ايه
عايز احضن البوست اوى الى متجسد فى شكل ممدوح دة
**********
ياعم فكك بلا تعليق بلا بتنجان ناس قليله الذوق هتعملها ايه يعنى
مش دة المهم بالنسبالى دلوقتى
انا المهم بقى عندى مممدوح

мαησηα said...

بجد راااااااااااااااااائع

مش هينفع اقولك كلام ولااعلق لانه اكيد هيكون قليل اوى عليك

تسلم اياديك واحساسك يا زيكا

Zika said...

منورين يا جماعه والله
تعليقاتكوا كلها احلى م البوست

Mahmoud Hermes said...

صباح الفل يا زيكا اول رنا يوفقك في الامتحان عارفت ده من البوست الاولاني واضح اني مش هاشتغل النهارده المدونه جميله قوييييي مع ان البوست بتاع الدكتور معجبنيش عشان الشتيمه معلش بس انا لافضل الكتبات من هذا النوع لاكن واضح اني فيه كميه تحفه هنا من البوستات تحياتي لك ياعزيزي بجد سردك لموضوع جميل

سلسبيل صلاح said...

حلوة حلوة حلوة اوي