Saturday, September 26, 2009

بتتغير

بتتغير
كل اما تلمح في العيون
ضي عايش ع الامل
كل اما بتلاقي الامل
علي خيط بيوصل فكرتين ..
تسال ساعتها ليه بكيت
وتشوف طريق
بيترسم
جايز ملامحه تتوصفلك
م البكا
جايز ملامحه تتحكيلك ضحكتين ..
وتلاقي كل الامثله
بتكون حلول للمشكله
وتصلي سجدة شكر
بخشوع الملايكه
وتآمن ان الحظ .. مكتوب ع الجبين ..
وبتآمن ..
بتلقي الناس بوش بشوش
وتتلاقي مع عيونك
وشوش الناس
ضمير مغشوش
وتبقي الدنيا فتحالك على الصفين ..
ومادّالك . عشان اللحن ليك كفين ..
وتتغير
كل اما بتلاقي الطريق
مفتوح أوي ..
تدخل بجرأه وبالجنون
بتقيس مقادير العطش
بازاي هاتقدر ترتوي ..
تفوت ع الشوق
تفوت ع الغنا ..
تفوت على دروب الصحاب
تفوت تدور ع الازمنه .
وفآخر الضحك المجيد
تلمح بطرف عينيك حاجات مش ممكنه .
بتلاقي يوم مافهوش صحاب
تلقى الوشوش متعكننه .
تلمح بطرف عينيك بشر
عايشين حياه متلخفنه .
وتفوق على دمع الصبايا المحرومين ..
من كل الوان الغنا.
وتفوق على طعم العطش
وتفاجئك الاحزان على
صوت الكمان
فتشوف كمان
تلبس ازاز العتمه نضارة طريق
ماتشوفش شئ
ويفاجأك القلب بمتين مليون
سؤال
- ايه اللي خلا الحزن فوق الاحتمال ؟
وتقابلك الضلمه
وتحكيلك ..
تبقا الكآبه وشم مرسوم فتفصيلك ..
متحني بيك كعب الالم
حتى ولو.. كل الصبايا هاتنحنيلك ..
حتي ولو .. طعم الخمور احلى
حتى ولو .. دخان سيجارتك بينسي
وبيعتم .. فيتكلم على .. طعم السكات بالسوء
تبدأ تفكر ان مهما الفرح
بيحاول ساعات
يخطف من الاحزان .. كوبليه وحيد ..
باقي الغناوي اتلحنت
احزان اوي
من لحظة الخلق المجيد .


ممدوح عبد الحميد
" زيكا "

8 comments:

*البت المشمشية *حلوة بس شقية * said...

تفكر ان مهما الفرح
بيحاول ساعات
يخطف من الاحزان .. كوبليه وحيد ..
باقي الغناوي اتلحنت

الله تجنن يا زيكا
حلوة اوى بجد

*البت المشمشية *حلوة بس شقية * said...

اول تعليق
لوووووووووول

dr.lecter said...

قشطه

adel said...

مش هاقولك حلوة ولا وحشة

هابعتلك علي الفتيس بؤ

MǿиY El-Shreef said...

انت عديت يازيكا :)

انا عنيا دمعت

mahasen saber said...

ازيك يا زيكا

اخبارك ايه شكلك اخبارك تمام

micheal said...

أنت بتعرف دلوقتي تخش جوه نخاشيش وأعماق النفس وتجيب الكلمة من الشمخ الجواني
هايل يا زيكس

نعكشة said...

عشان الدنيا دية مش عشان تفرح فيها


الدنيا دنيا
سافلة يعني مش قصدي سافلة قليلة الادب

حاجة واطية كدة مش واطية برضو قليلة الادب

حاجة مقرفة

حتى فى لحظات الجنون
ممكن فى لحظة فى وسط ضحكة مضحكتش باعلى منها تفتكر لحظة الم تبكي بعدها بالجامد قوي

يلا بلا هوسة

سلام عليك