Monday, August 10, 2009

مصوراتي


عواميد النور بتبرقلي
وبتحرقلي
احلام الصوره اما بصور
ع الشجر الطير
وبنورها الاصفر الغامق
بتعتم قلبي بملامحها
من غير تفسير
وساعات بانطح
واقاوح صورتي ال مش باينه
- غاوي التصوير -
واصور تاني وتصويرتي بتضيق وتضيق
والافق الواسع انا شايفه
وكانه لا شئ
واتخيل في الحلم براحي وكانه طريق
واستاذن طيبتي المعهوده
في براح الصوت
واتصور محبوس في الاوضه
علي امل الموت
عواميد النور الغرقانه
ف شوارع بتنور عتمه
علي ناس بتبانلك حزنانه
تاثير الكتمه
تاثير الحزن المتوزَّع
في بطاقة كائن
مسموح بغباؤه
متبرع جدا
باخواته وبباقي اعضائه
علي نفس السيره
بيقولك
لازم تضحك
لو راح تتصور تصويره
وتقول وتحكّي
والوقت المرمي علي كتافك
لو شافك
هيموت م الضحك اللي يبكي
عدسة عينك تفرق ايه
عن عدسة قلبك ؟
مش فالح في الوقت الحالي
غير انك تسكت
وتكلم نفسك
وبحاول القط في الصوره لكني بامل
عواميد النور المكسوره
بتضايق عدسة احساسي
من رد الفعل
صوّرتك تكدب بلسانك
فكَّرتك حي
وبتحلف بارضح بايْمَانك
"ده العيب في الضي "

ممدوح عبد الحميد
" زيكا "

7 comments:

micheal said...

ينفع أقول من تاني أنها عجباني
علي فكرة الكونت ده جه غلط في البوست اللي فات
:))
كان قصدي أكتبه هنا

adel said...

حلوة قوي و نهايتها لذيذة قوي علي فكرة و المصطلحات طعمها حلوة
:):)

z!zOoOo said...

ازيك يا زيكا

وايه اخبارك يارب تكون بخير

مبدئيا هي حلوه وفيها تعبير انا إستخدمته قبل كده عشان كده حسيتها مشابهه لحاجه انا كاتبها

بس حسيت انها عايزه تركيز اكتر من كده وإعاده صياغه

بس زي ما قولتلك هي حلوه

بس انت ندل يا عم الحج

يارب من نجاح لنجاح يا زيكا

تحياتي

*البت المشمشية *حلوة بس شقية * said...

ايوة ياعم
هو ده عجبتنى جدا النهاية

الدرعمي said...

بجد مش عارف أعلق .. بس أنا هوصف لك حالتي دلوقتي .. أنا مبسوط أوي و حاسس بنشوة أما تنتهي من قراءة كتاب جمييييل أو تنتهي من حجر شيشة رااائع أو تقوم تغتسل (فاهمني!) أنا بشكرك على الحالة دي يا أجمل فنان @ تحياتي @ آدم

kareem azmy said...

رائعة بجد
أحسنت

mimi said...

كل ده فاتني؟؟؟؟؟